Sigaba 94
Sembulo lesaniketwa ngaJoseph Smith umPhrofethi. eKirtland, e-Ohio, mhlaka 2 iNgci, 1833. Hyrum Smith, Reynolds Cahoon, naJared Carter bakhetfwa njengelikomidi lelakha takhiwo teliBandla.
1–9, INkhosi iniketa umyaleto mayelana nekwakhiwa kwendlu yemsebenti weBumengameli; 10–12, Indlu yekukhicita tincwadzi kufanele yakhiwe; 13–17, Emafa latsite ayabiwa.
1 [Futsi] Ngetulu kwaloko, ngitsi kini, bahlobo bami, ngininika umyaleto, wekutsi kufanele nicale umsebenti wekuhlela nekulungisa sicalo nesisekelo selidolobha lesikhonkhwane seSiyoni, lapha eveni laseKirtland, nicale endlini yami.
2 Futsi bukani, kufanele kwentiwe ngesifanekiso lengininikete sona.
3 Futsi incenye yekucala leseningizimu ayingcweliselwe mine kute kwakhiwe indlu yebumengameli, yemsebenti webumengameli, ekutfoleni tembulo; neyekwentela umsebenti webufundisi bebumengameli, kuto tonkhe tintfo letiphatselene nelibandla nembuso.
4 Ngicinisile ngitsi kini, iyawukwakhiwa ibe silinganiso semashumi lasihlanu nesihlanu nangesilinganiso semashumi lasitfupha nesihlanu bubanti nebudze bayo, lingekhatsi lesibuya sayo.
5 Kuyawuba nesibuya lesingephansi nalesingetulu, ngekwesifanekiso leniyawuniketwa sona emvakwaloku.
6 Futsi iyawungcweliselwa iNkhosi kusukela esisekelweni sayo, ngekweluhlelo lwebuphristi, nangekwesifanekiso leniyawuniketwa sona emvakwaloko.
7 Yonkhe iyawungcweliselwa iNkhosi kwenta umsebenti webumengameli.
8 Futsi aniyukuvumela kutsi lokungcolile kungene kuyo; futsi inkhatimulo yami iyawuba lapho, nami ngiyawuba lapho.
9 Kodvwa uma kuyawungena kuyo lutfo lolungahlanteki, inkhatimulo yami angeke ibe lapho, futsi nami angeke ngingene kuyo.
10 Ngetulu kwaloko, ngicinisile ngitsi kini, incenye yesibili leseningizimu iyawungcweliselwa mine kute kwakhiwe indlu yami, kwenta umsebenti wekukhicita kuhunyushwa kwemibhalo yami lengcwele, nato tonkhe tintfo lengiyawuniyaleta ngato.
11 Futsi iyawuba ngemashumi lasihlanu nesihlanu nemashumi lasitfupha nesihlanu bubanti nebudze bayo, esibuyeni lesingekhatsi; futsi kuyawuba khona lesingephansi nalesingetulu sibuya.
12 Futsi lendlu yonkhe iyawungcweliselwa iNkhosi kusukela esisekelweni sayo, kwenta umsebenti wekukhicita, kuto tonkhe tintfo lengiyawuniyaleta ngato, ibe ngcwele, ingangcoliswa, ngekwesifanekiso etintfweni tonkhe njengoba niyawuniketwa.
13 Encenyeni yesitsatfu inceku yami Hyrum Smith iyawutfola lifa layo.
14 Futsi encenyeni yekucala neyesibili enyakatfo tinceku tami Reynolds Cahoon naJared Carter tiyawutfola emafa ato—
15 Kute tente umsebenti lengitikhetsele wona, kutsi tibe likomiti lelakha tindlu tami, ngekwemyaleto, mine, iNkhosi Nkulunkulu, lengininikete wona.
16 Leti tindlu totimbili akukafaneli takhiwe ngite ngininikete umyaleto ngato.
17 Manje angininiketi lutfo lolunye kulesi sikhatsi. Amen.