Sigaba 76
Umbono lowaniketwa Joseph Smith umPhrofethi naSidney Rigdon, eHiram, e-Ohio, mhlaka 16 iNdlovana, 1832. Kwendvulela kubhalwa kwalombono, umlandvo waJoseph Smith utsi: “Ekubuyeni kwami emhlanganweni lowawuse-Amherst, ngachubeka nekuhumusha imiBhalo leNgcwele. Etembulweni letehlukahlukene lebesetitfolakele, bekusobala kutsi tincenye letibalulekile letiphatselene nensindziso yebantfu besetikhishiwe eBhayibhelini, noma besetilahlekile ngaphambi kwekutsi lihlanganiswe. Kwabonakala kusobala kulawo maciniso labekasele, kutsi uma Nkulunkulu bekanika wonkhe umuntfu umvuzo ngekwemisebenti layente asaphila emhlabeni leligama lelitsi ‘Lizulu,’ njengoba lihloselwe likhaya laphakadze lalabaNgcwele, kufanele kutsi lihlanganise imibuso leminingi kunalowodvwa. Ngako-ke, … ngesikhatsi sihumusha Livangeli ngekwakaJohane, uMbonisi Rigdon nami sabona lombono lolandzelako.” Ngesikhatsi kuniketwa lombono, umPhrofethi bekahumusha incwadzi yaJohane 5:29.
1–4, INkhosi inguNkulunkulu; 5–10, Timfihlakalo tembuso titawukwembulwa kubo bonkhe labetsembekile; 11–17, Bonkhe batawuvuka ekuvukeni kwalabalungile noma kwalabangakalungi; 18–24, Bantfu labahlala emihlabeni leminingi bangemadvodzana nemadvodzakati latelwe kuNkulunkulu ngeNhlawulo yaJesu Khristu; 25–29, Ingilosi yaNkulunkulu yawa yase iba ngudeveli; 30–49, Emadvodzana ekulahlwa atfola kulahlwa kwaphakadze; bonkhe labanye bazuza lizinga lelitsite lensindziso; 50–70, Inkhatimulo nemvuzo walabaphakanyisiwe embusweni wesilestiyali kuyachazwa; 71–80, Labo labatawutfola lifa lembuso wethirestriyali bayachazwa, 81–113, Simo salabo labasetinkhatimulweni yethilestiyali, yethirestriyali, neyesilestiyali siyachazwa; 114–119, Labetsembekile bangatibona baphindze baticondze timfihlakalo tembuso waNkulunkulu ngemandla aMoya loNgcwele.
1 Lalelani, Awu nine mazulu, niphindze niphe indlebe, Awu, mhlaba, nijabule nine lenihlala kuwo, ngoba iNkhosi inguNkulunkulu, futsi ngaphandle kwayo kute uMsindzisi.
2 Kuhlakanipha kwakhe kukhulu, tindlela takhe tiyamangalisa, futsi kute longabati bubanti betento takhe.
3 Tinhloso takhe atehluleki, futsi kute namunye longavimbela sandla sakhe.
4 Kusukela phakadze naphakadze uyafana, neminyaka yakhe angeke iphele.
5 Ngoba naku lokushiwo yiNkhosi—mine, iNkhosi, nginemusa nesihawu kulabo labangesabako, futsi kuyangijabulisa kuhlonipha labo labangisebentela ngekulunga nangeliciniso kute kube sekugcineni.
6 Uyawuba mkhulu umvuzo wabo futsi iyawuba yaphakadze inkhatimulo yabo.
7 Futsi kubo ngiyawukwembula tonkhe timfihlakalo, yebo, tonkhe timfihlakalo letifihliwe tembuso wami kusukela etikhatsini tasendvulo, nasetikhatsini letitako, ngitawukwembula kubo lokuhle ngentsandvo yami ngalokuphatselene nato tonkhe tintfo leticondzene nembuso wami.
8 Yebo, ngisho netimangaliso taphakadze bayawutati, netintfo letisetawufika ngitawubakhombisa, ngisho netintfo tetitukulwane letiningi.
9 Futsi kuhlakanipha kwabo kuyawuba kukhulu, nekucondza kwabo kuyawufinyelela ezulwini; futsi phambi kwabo kuhlakanipha kwalabahlakaniphile kuyawushabalala, nekucondza kwetati kuyawuba lite.
10 Ngoba ngaMoya wami ngitawubakhanyisela, futsi ngemandla ami ngitawukwembula timfihlo tentsandvo yami—yebo, ngisho naleto tintfo liso lelisengakatiboni, nendlebe lesengakativa, noma letisengakangeni enhlitiyweni yemuntfu.
11 Tsine, Joseph Smith lomNcane, naSidney Rigdon, sikuMoya ngelilanga lelishumi nesitfupha ngeNdlovana, ngemnyaka weNkhosi yetfu wetinkhulungwane nemakhulu lasiphohlongo nemashumi lamatsatfu nakubili—
12 Ngemandla aMoya emehlo etfu avuleka kanye nekucondza kwetfu kwakhanyiseleka, kute sitibone siphindze siticondze tintfo taNkulunkulu—
13 Ngisho naleto tintfo letatikhona kwasekucaleni umhlaba ungakadalwa, letatisungulwe nguBabe, ngeNdvodzana yakhe Letelwe Yodvwa, leyayisesifubeni seYise, kusukela ekucaleni;
14 Lesifakaza ngaye; futsi bufakazi lesibuniketako kuphelela kwelivangeli laJesu Khristu, loyiNdvodzana, lesambona nalesakhuluma naye embonweni wasezulwini.
15 Ngoba ngesikhatsi sisenta umsebenti wekuhumusha, iNkhosi leyayisikhetsele wona, safika evesini lemashumi lamabili nemfica lesehluko sisihlanu saJohane, lelaniketwa kitsi kanje—
16 Lelikhuluma ngekuvuka kwalabafile, ngalokuphatselene nalabo labayawuliva livi leNdvodzana yeMuntfu:
17 Bayawuvuka; labo labente lokuhle, ekuvukeni kwalabalungile; bese labo labente lokubi, ekuvukeni kwalabangakalungi.
18 Manje loku kwenta kutsi simangale, ngoba saniketwa kona ngaMoya.
19 Futsi ngesikhatsi sisazindla ngaleti tintfo, iNkhosi yatsintsa emehlo ekucondza kwetfu avuleka, nenkhatimulo yeNkhosi yakhanyisa ndzawo tonkhe.
20 Futsi sabona inkhatimulo yeNdvodzana, ngesekudla saBabe, satfola kuphelela kwayo;
21 Sabona tingilosi letingcwele, nalabo labangcwelisiwe phambi kwesihlalo sakhe, badvumisa Nkulunkulu, neliWundlu, bamdvumisa phakadze naphakadze.
22 Manje, emvakwebufakazi lobuningi losebuniketiwe ngaye, nabu bufakazi, ekugcineni kwako konkhe, lesibunikako ngaye: Kutsi uyaphila!
23 Ngoba sambona, ngisho nasesandleni sangesekudla saNkulunkulu; futsi saliva livi lifakaza kutsi uyiNdvodzana Letelwe Yodvwa yaBabe—
24 Kutsi ngaye, ngendlela yakhe, nangemasu akhe, imihlaba ikhona futsi yadalwa, nebantfu bayo bangemadvodzana nemadvodzakati latelwe kuNkulunkulu.
25 Naloku sakubona, futsi siyafakaza, kutsi ingilosi yaNkulunkulu lebeyisebuholini ebukhoneni baNkulunkulu, leyahlamuka iNdvodzana Letelwe Yodvwa lebeyitsandvwa nguBabe nalebeyisesifubeni sababe, yakhishwa ebukhoneni baNkulunkulu neNdvodzana.
26 Futsi yabitwa ngeKulahlwa, ngoba emazulu ayikhalela—bekanguLusifa, indvodzana yekusa.
27 Futsi sambona, buka, uwile! uwile, ngisho indvodzana yekusa!
28 Futsi ngesikhatsi sisekuMoya, iNkhosi yasiyaleta kutsi asibhale lombono; ngoba sambona Sathane, leyo nyoka lendzala, ngisho develi, lowahlamuka Nkulunkulu, wafuna nekutsatsa umbuso waNkulunkulu wetfu naKhristu wakhe—
29 Ngaloko-ke, ulwa nalabangcwele baNkulunkulu, futsi uyabatungeleta ndzawo tonkhe.
30 Futsi sabona umbono wekuhlupheka kwalabo lalwa nabo wabancoba, ngoba livi leNkhosi leta kitsi kanjalo:
31 Naku lokushiwo yiNkhosi ngalokuphatselene nabo bonkhe labati emandla ami, nalasebake bawatfola, nalabativumele ngemandla adeveli kutsi bancotjwe, nekutsi baliphike liciniso baphindze bangawahloniphi emandla ami—
32 Ngibo laba labangemadvodzana ekulahlwa, ngabo lengitsite bekuyawuba ncono kubo kube abatalwanga;
33 Ngoba batitja telulaka, labagwetjelwe kutsi beve buhlungu belulaka lwaNkulunkulu, nadeveli netingilosi takhe phakadze;
34 Ngalokuphatselene nalabo lesengikhulume ngabo kute kutsetselelwa kulomhlaba noma emhlabeni lotako—
35 Ngoba bamphikile Moya loNgcwele emvakwekumtfola, futsi bayiphikile iNdvodzana yaBabe Letelwe Yodvwa, batibetselela baphindze bayitsela ngelihlazo ebaleni.
36 Laba ngibo labayawuya echibini lemlilo nesibabule, nadeveli netingilosi takhe—
37 Futsi lokungibo bodvwa kufa kwesibili lokuyawuba nemandla kubo;
38 Yebo, ngicinisile, nalokungibo bodvwa labangeyukuhlengwa ngesikhatsi lesifanele, emvakwetinhlupheko telulaka lwayo.
39 Ngoba bonkhe labanye bayawuvuswa ngekuvuka kwalabafile, ngekuncoba nangenkhatimulo yeliWundlu, lelabulawa, lebelisesifubeni saBabe ngaphambi kwekudalwa kwemihlaba.
40 Futsi leli livangeli, tindzaba letimnandzi, livi lelaliphuma emazulwini lafakaza ngato kitsi—
41 Kutsi weta emhlabeni, ngisho Jesu, kutawubetselelwa umhlaba, nekutawutfwala tono temhlaba, nekutawuhlanta umhlaba, nekuwuhlambulula kuko konkhe kungalungi;
42 Kute kutsi ngaye basindziswe bonkhe Babe lababeke emandleni akhe nalabadale ngaye;
43 Lodvumisa Babe, nalosindzisa yonkhe imisebenti yetandla takhe, ngaphandle kwalawo madvodzana ekulahlwa laphika iNdvodzana emvakwekube Babe sekayembulile.
44 Ngaloko-ke, ubasindzisa bonkhe ngaphandle kwabo—bayawuhamba baye ekujezisweni lokuphakadze, lokukujeziswa lokungapheli, lokukujeziswa kwaphakadze, kuyawubusa nadeveli netingilosi takhe phakadze, lapho imphetfu yabo ingafi, nemlilo ungacinywa, lokubuhlungu babo—
45 Futsi siphetfo salapho, nendzawo yalapho, noma buhlungu babo, kute umuntfu lobatiko;
46 Noma akutange kwembulwe, noma akukembulwa, noma akuyukwembulwa kumuntfu, ngaphandle kwalabo labentiwe baba bahlanganyeli balapho;
47 Noko, mine, iNkhosi, ngikukhombisile ngembono kulabaningi, kodvwa ngiphindze ngawuvala ngekushesha.
48 Ngaloko-ke, siphetfo, bubanti, kuphakama, kujula, nelusizi lwalapho, abalucondzi, noma kute namunye umuntfu ngaphandle kwalabo lababekelwe loku kulahlwa.
49 Futsi seva livi, litsi: Bhalani lombono, ngoba bukani, lesi siphetfo sembono wekuhlupheka kwalabangamesabi Nkulunkulu.
50 Ngetulu kwaloko siyafakaza—ngoba sabona saphindze seva, futsi lobu bufakazi belivangeli laKhristu ngalokuphatselene nalabo labayawuvuka ekuvukeni kwalabalungile—
51 Ngibo labo labemukela bufakazi baJesu, futsi bakholwa egameni lakhe baphindze babhajatiswa ngendlela yekungcwatjwa kwakhe, bangcwatjwa emantini egameni lakhe, futsi loku ngekwemyaleto lawuniketile—
52 Kutsi ngekugcina imiyaleto bangagezwa futsi bahlantwe kuto tonkhe tono tabo, batfole Moya loNgcwele ngekubekwa tandla nguloyo lobekiwe waphindze wanikwa lamandla;
53 Futsi labancoba ngekukholwa, babekwa luphawu ngaMoya loNgcwele wesetsembiso, Babe lamtfumele kubo bonkhe labo labalungile nalabetsembekile.
54 Ngibo labo labalibandla leLitubulo.
55 Ngibo labo etandleni tabo Babe lasekabanikete tonkhe tintfo—
56 Ngibo labo lababaphristi nemakhosi, lasebatfole kuphelela kwakhe konkhe, nenkhatimulo yakhe;
57 Futsi babaphristi baLosetikwako Konkhe, ngekweluhlelo lwaMelkhisedeki, lolwalungekweluhlelo lwa-Enoki, lolwalungekweluhlelo lweNdvodzana Letelwe Yodvwa.
58 Ngaloko-ke, njengoba kubhaliwe, babonkulunkulu, ngisho emadvodzana aNkulunkulu—
59 Ngaloko-ke, tonkhe tintfo tabo, noma kuphila noma kufa, noma ngulokukhona, noma ngulokusetawuba khona, konkhe kwabo futsi baKhristu, naKhristu waNkulunkulu.
60 Futsi bayawuncoba tonkhe tintfo.
61 Ngaloko-ke, akubebete umuntfu lotigabatisa ngemuntfu, kodvwa akatigabatise ngaNkulunkulu, loyawutfobisa tonkhe titsa atibeke ngaphansi kwetinyawo takhe.
62 Laba bayawuhlala ebukhoneni baNkulunkulu naKhristu wakhe phakadze naphakadze.
63 Laba ngibo layawuta nabo, uma eta ngemafu elizulu kutobusa emhlabeni etikwebantfu bakhe.
64 Laba ngibo labayawuba nencenye ekuvukeni kwekucala.
65 Laba ngibo labayawuvuka ekuvukeni kwalabalungile.
66 Laba ngibo labete eNtsabeni iSiyoni, nasedolobheni laNkulunkulu lophilako, indzawo yasezulwini, lengcwele kunato tonkhe.
67 Laba ngibo labete esicukwini setingilosi letingabaleki, embutsanweni wabo bonkhe bantfu nelibandla la-Enoki, neleLitubulo.
68 Laba ngibo emabito abo labhalwe ezulwini, lapho Nkulunkulu naKhristu babehluleli babo bonkhe.
69 Laba ngibo lababantfu labalungile labaphelelisiwe ngaJesu Khristu umlamuli wesivumelwano lesisha, lofeze lenhlawulo lephelele ngekucitsa ingati yakhe lucobo.
70 Laba ngibo imitimba yabo ingeyesilestiyali, inkhatimulo yabo iyelilanga, ngisho inkhatimulo yaNkulunkulu, losetikwako konkhe, inkhatimulo yakhe lokubhalwe ngayo kutsi ifana neyelilanga esibhakabhakeni.
71 Ngetulu kwaloko, sabona umhlaba wethirestriyali, futsi bukani nibone, laba ngibo lababethirestriyali, inkhatimulo yabo leyehlukile kunaleyo yelibandla leLitubulo lelitfole kuphelela konkhe kwaBabe, njengenkhatimulo yenyanga leyehlukile kuneyelilanga esibhakabhakeni.
72 Bukani, laba ngibo labafa bete umtsetfo;
73 Futsi nalabo labayimimoya yebantfu leyayigcinwe ejele, labavakashelwa yiNdvodzana, yashumayela livangeli kubo, kute behlulelwe njengebantfu labasenyameni;
74 Labangabemukelanga bufakazi baJesu enyameni, kodvwa muva babemukela.
75 Laba ngibo lababantfu labahloniphekile bemhlaba, labebaphumphutsekiswe bucili bebantfu.
76 Laba ngibo labemukela inkhatimulo yakhe, kodvwa hhayi kuphelela kwayo.
77 Laba ngibo labemukela bukhona beNdvodzana, kodvwa hhayi kuphelela kwaBabe.
78 Ngaloko-ke, bayimitimba yethirestriyali, hhayi imitimba yesilestiyali. Futsi behlukile ngenkhatimulo njengenyanga leyehlukile elangeni.
79 Laba ngibo labete bufakazi baJesu lobucinile; ngaloko-ke, abawutfoli umchele embusweni waNkulunkulu wetfu.
80 Manje lesi siphetfo sembono lesawubona wethirestriyali, iNkhosi leyasiyaleta kutsi siwubhale ngesikhatsi sisekuMoya.
81 Ngetulu kwaloko, sabona inkhatimulo yethilestiyali, inkhatimulo yalowo mbuso longephansi, njengenkhatimulo yetinkhanyeti leyehlukile enkhatimulweni yenyanga esibhakabhakeni.
82 Laba ngibo labangalemukelanga livangeli laKhristu, noma bufakazi baJesu.
83 Laba ngibo labangamphiki Moya loNgcwele.
84 Laba ngibo labaphonswa phansi esihogweni.
85 Laba ngibo labangeke bahlengwe kudeveli kute kube kuvuka kwekugcina, ite iNkhosi, ngisho Khristu liWundlu, iyawube seyiwucedzile umsebenti wayo.
86 Laba ngibo labangakutfoli kuphelela kwakhe konkhe emhlabeni waphakadze, kodvwa labatfola kwaMoya loNgcwele ngekusetjentelwa ngulabasethirestriyali;
87 Futsi bethirestriyali bakutfola ngekusetjentelwa basesilestiyali.
88 Ngetulu kwaloko bethilestiyali bakutfola ngekusetjentelwa tingilosi letikhetfwe kutsi tibasebentele, noma letikhetfwe kutsi tibe yimimoya lebasebentelako; ngoba bayawuba tindlalifa tensindziso.
89 Ngako sabona, embonweni wasezulwini, inkhatimulo yethilestiyali leyendlula konkhe kucondza;
90 Futsi kute umuntfu loyatiko ngaphandle kwaloyo Nkulunkulu layembule kuye.
91 Ngako sayibona inkhatimulo yethirestriyali leyendlula ngekwetintfo tonkhe inkhatimulo yethilestiyali, ngisho nangekubusa, nangeligunya, nangemandla, nangebukhosi.
92 Ngako sayibona inkhatimulo yesilestiyali, leyendlula ngekwetintfo tonkhe—lapho Nkulunkulu, ngisho Babe, abusa esihlalweni sakhe sebukhosi phakadze naphakadze;
93 Ngaphambi kwesihlalo sakhe sebukhosi tonkhe tintfo tiyakhotsama ngenhlonipho letfobekile, timnika inkhatimulo phakadze naphakadze.
94 Labo labahlala ebukhoneni bakhe balibandla leLitubulo; futsi babona njengoba babonwa, futsi bati njengoba batiwa, sebemukele kuphelela kwakhe konkhe nemusa wakhe;
95 Futsi ubenta balingane ngeligunya, nangemandla, nangebukhosi.
96 Futsi inkhatimulo yesilestiyali iyodvwa, njengoba nenkhatimulo yelilanga iyodvwa.
97 Nenkhatimulo yethirestriyali iyodvwa, njengoba nenkhatimulo yenyanga iyodvwa.
98 Nenkhatimulo yethilestiyali iyodvwa, njengoba nenkhatimulo yetinkhanyeti iyodvwa; ngoba njengoba inkhanyeti yehluka kulenye inkhanyeti, kanjalo-ke lomunye uyehluka kulomunye ngenkhatimulo emhlabeni wethilestiyali.
99 Ngoba laba ngibo lababakaPawula, nebaka-Apolosi, nebakaKhefase.
100 Laba ngibo labatsi babemuntfu lotsite labanye batsi babalomunye—labanye babaKhristu nalabanye babaJohane, nalabanye babaMosi, nalabanye baba-Eliyasi, nalabanye baba-Esayasi, nalabanye baba-Isaya, nalabaye baba-Enoki;
101 Kodvwa abalemukelanga livangeli, noma bufakazi baJesu, noma baphrofethi, noma sivumelwano saphakadze.
102 Kwekugcina, laba ngibo bonkhe labangeke bagcogcwe nalabangcwele, kute bahlwitselwe ebandleni leLitubulo, bemukelwe emafini.
103 Laba ngibo lababacambi manga, batsakatsi, tiphingi, tingwadla, nabo bonkhe labatsandza nalabacala emanga.
104 Laba ngibo labeva buhlungu belulaka lwaNkulunkulu emhlabeni.
105 Laba ngibo labatfola sijeziso semlilo longacimeki.
106 Laba ngibo labaphonswa esihogweni nalabeva buhlungu belulaka lwaNkulunkulu, Somandla, kute kube kuphelela kwetikhatsi, lapho Khristu uyobe sekatitfobise tonkhe titsa ngaphansi kwetinyawo takhe, futsi uyobe sekawuphelelisile umsebenti wakhe.
107 Lapho ayawuniketa umbuso, awubeke phambi kwaBabe, ungenasici, atsi: Ngincobile futsi sikhamo seliwayini ngisinyatsele ngingedvwa, ngisho sikhamo seliwayini leliyintfukutselo yelulaka lwaNkulunkulu, Somandla.
108 Lapho uyawubese utfweswa umchele wenkhatimulo yakhe, kute ahlale esihlalweni sebukhosi semandla akhe kute abuse phakadze naphakadze.
109 Kodvwa bukani, nibone, sabona inkhatimulo nebantfu labahlala emhlabeni wethilestiyali, kutsi bebangabaleki njengetinkhanyeti esibhakabhakeni selizulu, noma njengesihlabatsi saselugwini lwelwandle.
110 Futsi seva livi leNkhosi litsi: Labo bonkhe bayawuguca, netilimi tonkhe tiyawuvuma kuye loyo lohleti esihlalweni sebukhosi phakadze naphakadze;
111 Ngoba bayawukwehlulelwa ngekwemisebenti yabo, futsi wonkhe umuntfu uyawukwemukela ngekwemisebenti yakhe, bukhosi bakhe lucobo, etindlini letilungisiwe;
112 Futsi bayawuba tinceku taLosetikwako Konkhe; kodvwa lapho kuhlala khona Nkulunkulu naKhristu angeke bakwati kuta khona, etitukulwaneni tonkhe taphakadze naphakadze.
113 Lesi siphetfo sembono lesawubona, lesasiyaletiwe kutsi siwubhale ngesikhatsi sisekuMoya.
114 Kodvwa mikhulu futsi iyamangalisa imisebenti yeNkhosi, netimfihlakalo tembuso lasikhombisa tona, letendlula konkhe kucondza ngekubusa, nangemandla, nangebukhosi;
115 Leyasiyaleta kutsi singayibhali ngesikhatsi sisekuMoya, futsi lokungakavunyelwa kutsi umuntfu ayikhulume;
116 Noma kute namunye umuntfu longakwati kuyembula, ngoba ingabonwa futsi icondvwe kuphela ngemandla aMoya loNgcwele, Nkulunkulu lawunika labo labamtsandzako, nalabatihlantako phambi kwakhe;
117 Kulabo labanika lilungelo lekutibonela nekutatela ngekwabo;
118 Kute ngemandla nangesibonakaliso saMoya, ngesikhatsi basenyameni, bakwati kubeketelela kuba phambi kwakhe eveni lenkhatimulo.
119 Futsi ligunya, ludvumo, nebukhosi akube kuNkulunkulu neliWundlu phakadze naphakadze. Amen.