Sigaba 78
Sembulo lesaniketwa ngaJoseph Smith, umPhrofethi, eKirtland, e-Ohio, mhlaka 1 iNdlovulenkhulu, 1832. Ngalelo langa, umPhrofethi kanye nalabanye baholi bebahlangene kutawucocisana ngalokuphatselene neliBandla. Lesi sembulo ekucaleni sasiyala umPhrofethi, naSidney Rigdon, kanye naNewel K. Whitney kutsi bahambe baye eMissouri kuyawukwenta imetamo yekuhlela ibhizinisi yeliBandla yekutsengisa imphahla kanye nekushicilela ngekutsi bakhe “inkampane” lebeyiyawubuketa lemetamo, nekwenta timali tekumisa iSiyoni kute kuzuze labamphofu. Lenkampane lebeyatiwa ngekutsi yiNkampane yeLubumbano, yasungulwa ngaMabasa 1832 yase ihlakatwa nga 1834 (buka sigaba 82). Ngesikhatsi lesitsite emvakwekuhlakatwa kwayo, ngaphansi kwekuyaletwa nguJoseph Smith, emagama latsi “tindzaba tendlu yengcebo yalabamphofu” atsatsa indzawo yalawa latsi “kumiswa kwebhizinisi yekutsengisa imphahla kanye netindzawo tekushicilela” kulesembulo, futsi neligama lelitsi “luhlelo” latsatsa indzawo yalelitsi “inkampane.”
1–4, LabaNgcwele kufanele bahlele baphindze basungule indlu yengcebo; 5–12, Kusebentisa ngekuhlakanipha imphahla yabo kutawuholela ensindzisweni; 13–14, LiBandla kufanele litimele linganciki emandleni asemhlabeni; 15–16, Mikhayeli (Adamu) usebenta ngaphansi kwekuyaletwa nguloNgcwele (Khristu); 17–22, Babusisiwe labetsembekile, ngoba batawutfola lifa lato tonkhe tintfo.
1 INkhosi yakhuluma kuJoseph Smith lomNcane, yatsi: Ngilaleleni, kusho iNkhosi Nkulunkulu wenu, nine lenibekwe ebuphristini lobukhulu belibandla lami, lenibutsene ndzawonye;
2 Nilalele imiyaleto yakhe loyo lonibeke kusuka etulu, loyawukhuluma etindlebeni tenu emavi ekuhlakanipha, kute insindziso ite kini ngalokuphatselene naleyontfo leniyiletse phambi kwami, kusho iNkhosi Nkulunkulu.
3 Ngoba ngicinisile ngitsi kini, sikhatsi sesifikile, futsi sesisondzele; bukani, nibone, kumele kutsi bantfu bami bahleleke, ekucondziseni nasekusunguleni tindzaba tendlu yengcebo yebantfu labamphofu kulendzawo naseveni laseSiyoni—
4 Kute kube nekuhleleka lokungapheli nekwaphakadze neluhlelo ebandleni lami, kusita simiso, lenitinikele kuso, kute kusindziswe bantfu, futsi kukhatimuliswe Babe wenu losezulwini;
5 Kute nilingane ngetibopho tetintfo tasezulwini, yebo, kanye netetintfo tesemhlabeni, kute nitfole tintfo tasezulwini.
6 Ngoba uma ningalingani etintfweni tasemhlabeni angeke nilingane ekutfoleni tintfo tasezulwini;
7 Ngoba uma nifisa kutsi ngininike indzawo emhlabeni wesilestiyali, kufanele nitilungiselele ngekwenta letintfo lenginiyalete ngato naletidzingekako kini.
8 Manje, ngicinisile naku lokushiwo yiNkhosi, kufanele kutsi tonkhe tintfo tentelwe inkhatimulo yami, ngini lenihlangene ndzawonye ngalolu luhlelo;
9 Noma, ngalamanye emagama, inceku yami Newel K. Whitney nenceku yami Joseph Smith, lomNcane, nenceku yami Sidney Rigdon abahlale emkhandlwini nalabangcwele labaseSiyoni;
10 Kungenjalo Sathane ufuna kugucula tinhlitiyo tabo tisuke ecinisweni, kute bavaleke emehlo bangaticondzi tintfo letilungiselwe bona.
11 Ngaloko-ke, ngininika umyaleto, wekutsi tilungiseleleni niphindze nitihlele ngesibopho noma ngesivumelwano saphakadze lesingeke sephulwe.
12 Futsi loyo losephulako uyawulahlekelwa sikhundla nesimo sakhe ebandleni, futsi uyawunikelwa ekuhlushweni nguSathane kute kube lilanga lekuhlengwa.
13 Bukani, loku kulungiselela lenginilungiselela ngako, nesisekelo, nesibonelo lengininika sona, ngaso leningafeza imiyaleto leniniketwe yona;
14 Kute ngelusito lwami, nanoma kungenca yetinhlupheko letiyawukwehlela kini, libandla litimele ngetulu kwato tonkhe letinye tidalwa letingephansi kwemhlaba wesilestiyali;
15 Kute nenyukele emcheleni lolungiselwe nine, futsi nentiwe babusi etikwemibuso leminingi, kusho iNkhosi Nkulunkulu, loNgcwele waseSiyoni, lomise tisekelo tase-Adamu-ondi-Ahman;
16 Lokhetse Mikhayeli kutsi abe yinkhosana yenu, wacinisekisa tinyawo takhe, wambeka etulu, waphindze wamnika tikhiya tensindziso ngaphansi kwekululekwa nekuyaletwa nguloNgcwele, lote sicalo semalanga noma siphetfo semphilo.
17 Ngicinisile, ngicinisile, ngitsi kini, nibantfwana labancane, futsi nisengakacondzi kwamanje kutsi tinkhulu kangakanani tibusiso Babe lanato etandleni takhe nalanilungiselele tona;
18 Futsi angeke nikhone kubeketelela tonkhe tintfo manje; noko, manini sibindzi, ngoba ngitawunihola phambili. Umbuso wenu netibusiso tawo tenu, nengcebo yaphakadze yenu.
19 Futsi loyo lowemukela tintfo tonkhe ngekubonga uyawukwentiwa abe nenkhatimulo; futsi netintfo talomhlaba tiyawukwengetwa kuye, ngisho nangalokuphindvwe kaningi, yebo, nangetulu.
20 Ngaloko-ke, yentani letintfo lenginiyalete ngato, kusho uMhlengi, ngisho iNdvodzana Ahman, lolungisa tonkhe tintfo ngaphambi kwekube anitsatse;
21 Ngoba nilibandla leLitubulo, futsi litawunitsatsa ngelifu, liphindze labele wonkhe umuntfu incenye yakhe.
22 Futsi loyo lowetsembekile nalongumphatsi lohlakaniphile uyawutfola lifa lato tonkhe tintfo. Amen.