Sigaba 88
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 27 namhlaka 28 iNgongoni, 1832, namhlaka 3 Bhimbidvwane, 1833. UmPhrofethi wasibita njenge “‘ licembe lemncumo’ … lelikhiwe eSihlahleni sasePharadisi, umlayeto weNkhosi wekuthula kitsi.” Lesembulo saniketwa emvakwekuthandaza kwebaphristi labakhulu emhlanganweni “ngamunye futsi ngalokuvakalako eNkhosini kutsi yembule intsandvo yayo kitsi mayelana nekwakhiwa kweSiyoni.
1–5, LabaNgcwele labetsembekile batfola loyo Mdvudvuti, lokusetsembiso sekuphila lokuphakadze; 6–13, Tonkhe tintfo tiphetfwe futsi tilawulwa Kukhanya kwaKhristu; 14–16, Kuvuka kuta ngeKuhlengwa; 17–31, Kutfobela umtsetfo wesilestiyali, wethirestriyali, noma wethilestiyali kulungiselela bantfu leyo mibuso netinkhatimulo; 32–35, Labo labakhetsa kuhlala esonweni bahlala bangcolile njalo; 36–41, Yonkhe imibuso yenganyelwe ngumtsetfo; 42–45, Nkulunkulu unikete umtsetfo kuto tonkhe tintfo; 46–50, Umuntfu utawucondza ngisho naNkulunkulu; 51–61, Umfanekiso wendvodza letfuma tisebenti tayo kuyawusebenta ensimini futsi itivakashele lomunye emvakwalomunye; 62–73, Sondzelani eNkhosini, futsi nitawubona buso Bayo; 74–80, Tihlanteni niphindze nifundzisane timfundziso tembuso; 81–85, Wonkhe umuntfu lowecwayisiwe kufanele acwayise makhelwane wakhe; 86–94, Tibonakaliso, kuphatamiseka kwemvelo, netingilosi tilungisa indlela yekubuya kweNkhosi; 95–102, Emacilongo etingilosi avusa labafile ngeluhlelo lwabo lekulandzelana; 103–116, Emacilongo etingilosi amemetela kubuyiselwa kwelivangeli, kuwa kweBhabhulona, nemphi yaNkulunkulu lomkhulu; 117–126, Funani kufundza, yakhani indlu yaNkulunkulu (lithempeli), niphindze nitembatsise ngesibopho selutsandvo; 127–141, Luhlelo lweSikolwa sebaPhrofethi lubekwa sobala, kanye nesimiso sekugezwa kwetinyawo.
1 Ngicinisile, naku lokushiwo yiNkhosi kini nine lenibutsene ndzawonye kwemukela intsandvo yakhe ngalokuphatselene nani:
2 Bukani, loku kuyajabulisa eNkhosini yenu, futsi netingilosi tiyanitfokotela; imithandazo yenu yetento temusa ikhuphukele etindlebeni teNkhosi Sebawothi, futsi ibhalwe encwadzini yemabito alabangcwelisiwe, ngisho labo bemhlaba wesilestiyali.
3 Ngaloko-ke, manje ngitfumela lomunye uMdvudvuti, ngisho nakini bahlobo bami, kute ahlale etinhlitiyweni tenu, ngisho Moya loNgcwele wesetsembiso; loyo Mdvudvuti lofanako nalengawutsembisa kubafundzi bami, njengoba kubhaliwe ebufakazini ngalokukaJohane.
4 LoMdvudvuti usetsembiso lengininika sona sekuphila lokuphakadze, ngisho nenkhatimulo yembuso wesilestiyali;
5 Leyo nkhatimulo lokungeyelibandla leLitubulo, ngisho laNkulunkulu, longcwele kakhulu kunabo bonkhe, ngaJesu Khristu iNdvodzana yakhe—
6 Loyo lowenyukela etulu, njengoba waphindze wehlela phansi kwetintfo tonkhe, kangangoba wacondza tonkhe tintfo, kute abe kuko konkhe nakuto tonkhe tintfo, kukhanya kweliciniso;
7 Liciniso lelikhanyako. Loku kukhanya kwaKhristu. Njengoba futsi aselangeni, futsi akukhanya kwelilanga, nemandla alo lelentiwa ngawo.
8 Njengoba futsi asenyangeni, futsi akukhanya kwenyanga, nemandla ayo leyentiwa ngawo;
9 Njengoba futsi akukhanya kwetinkhanyeti, nemandla ato letentiwa ngawo;
10 Kanjalo nemhlaba, nemandla awo, ngisho nemhlaba lenime kuwo.
11 Nekukhanya lokukhanyako, lokuninika kukhanya, kungaye lokhanyisela emehlo enu, lokukhanya lokufanako naloko lokukhulisa kucondza kwenu;
12 Kukhanya lokuphuma ebukhoneni baNkulunkulu kute kugcwalise bukhulu bendzawo—
13 Kukhanya lokukuto tonkhe tintfo, lokunika imphilo kuto tonkhe tintfo, lokungumtsetfo lokuphatfwa ngawo tonkhe tintfo, ngisho nemandla aNkulunkulu lohleti esihlalweni sakhe sebukhosi, losesifubeni saphakadze, losemkhatsini wetintfo tonkhe.
14 Manje, ngicinisile ngitsi kini, ngekuhlengwa lokwentelwe nine kufezwa kuvuka kwalabafile.
15 Futsi umoya nemtimba kwakha umuntfu.
16 Nekuvuka kwalabafile kukuhlengwa kwemuntfu.
17 Nekuhlengwa kwemuntfu kungaye lophilisa tonkhe tintfo, esifubeni sakhe lokushiwo kutsi labamphofu nalabamnene bemhlaba bayawudla lifa lawo.
18 Ngako-ke, kutawufanele uhlambululwe kuko konkhe kungalungi, kute ulungiselelwe inkhatimulo yesilestiyali;
19 Ngoba emvakwekufeza inhloso yekudalwa kwawo, uyawetfweswa umchele ngenkhatimulo, ngisho nasebukhoneni baNkulunkulu Babe;
20 Kute imitimba lekunguyasembusweni wesilestiyali ibe ngeyawo phakadze naphakadze; ngoba, ngalenhloso wentiwa waphindze wadalwa, futsi ngalenhloso bayangcweliswa.
21 Futsi labo labangakangcweliswa ngemtsetfo lengininike wona, ngisho nemtsetfo waKhristu, kufanele badle lifa lalomunye umbuso, ngisho lowo lokunguwethirestriyali, noma lowo lokungumbuso wethilestiyali.
22 Ngoba loyo longakwati kutfobela umtsetfo wembuso wesilestiyali angeke akwati kubeketelela inkhatimulo yesilestiyali.
23 Futsi loyo longakwati kutfobela umtsetfo wembuso wethirestriyali angeke akwati kubeketelela inkhatimulo yethirestriyali.
24 Futsi naloyo longakwati kutfobela umtsetfo wembuso wethilestiyali angeke akwati kubeketelela inkhatimulo yethilestiyali; ngako-ke akawufaneli umbuso wenkhatimulo. Ngako-ke kufanele abeketelele umbuso longasiwo umbuso wenkhatimulo.
25 Ngetulu kwaloko, ngicinisile ngitsi kini, umhlaba uyawutfobela umtsetfo wembuso wesilestiyali, ngoba ufeza inhloso yekudalwa kwawo, futsi awuphuli mtsetfo—
26 Ngaloko-ke, uyawungcweliswa; yebo, nanoma uyawukufa, ayawuphindze uphiliswe, futsi uyawukwati kubeketelela emandla lophiliswe ngawo, nalabalungile bayawuwutfola njengelifa.
27 Ngoba nanoma bafa, bayawuphindze bavuke, njengemtimba wamoya.
28 Labo labangumoya wesilestiyali bayawutfola lowo mtimba lofanako lowawungewemvelo; ngisho nani niyawuyitfola imitimba yenu, futsi nenkhatimulo yenu kuyawuba nguleyo nkhatimulo imitimba yenu lephiliswe ngayo.
29 Nine leniphiliswe ngencenye yenkhatimulo yesilestiyali niyawubese senitfola lefanako, ngisho nekuphelela kwayo.
30 Futsi labo labaphiliswe ngencenye yenkhatimulo yethirestriyali bayawubese sebatfola lefanako, ngisho nekuphelela kwayo.
31 Futsi nalabo labaphiliswe ngencenye yenkhatimulo yethilestiyali bayawubese sebatfola lefanako, ngisho nekuphelela kwayo.
32 Nalabo labasalako bayawuphiliswa nabo; noko, bayawuphindze babuyele endzaweni yabo, kuyawutfokotela loko labatimisele kukutfola, ngoba bebangakatimiseli kutfokotela loko labebangakutfola.
33 Ngoba kumsita ngani umuntfu uma aphiwa sipho, yena angasemukeli leso sipho? Bukani, akajabuli ngaloko lanikwe kona, noma akajabuli ngaloyo lamnike lesipho.
34 Ngetulu kwaloko, ngicinisile ngitsi kini, loko lokubuswa ngumtsetfo nako kugcinwe ngumtsetfo futsi kupheleliswe kwaphindze kwangcweliswa ngawo.
35 Loko lokwephula umtsetfo, nalokungawulaleli umtsetfo, kodvwa lokufuna kuba ngumtsetfo ngekwako, lokukhetsa kuhlala esonweni, futsi kuhlale esonweni ngalokuphelele, angeke kungcweliswe ngemtsetfo, noma ngemusa, kulunga, noma kwehlulela. Ngako-ke, kufanele ahlale angcolile njalo.
36 Yonkhe imibuso inemitsetfo lemisiwe;
37 Futsi miningi imibuso; ngoba kute indzawo lapho kungekho mbuso khona; futsi kute umbuso lapho kungekho ndzawo khona, kungaba ngumbuso lomkhulu noma lomncane.
38 Futsi kunoma ngumuphi umbuso umtsetfo uniketiwe; futsi kuwo wonkhe umtsetfo kuphindze kube khona imincele nemibandzela letsite.
39 Bonkhe bantfu labangayitfobeli leyo mibandzela abatfolwa bangenacala.
40 Ngoba kwati kunamatsela kulokunye kwati; kuhlakanipha kwemukela kuhlakanipha; liciniso lemukela liciniso; bucotfo butsandza bucotfo; kukhanya kunamatsela kulokukhanyako; umusa unesihawu kulomunye umusa futsi ufuna lokungewako; kulunga kuhamba indlela yako nako kufuna labangebako; kwehlulela kuhamba phambi kwebuso baloyo losesihlalweni sebukhosi lophetse nalowenta tonkhe tintfo.
41 Ucondza tonkhe tintfo, futsi tonkhe tintfo tiphambi kwakhe, tonkhe tintfo timtungeletile; futsi ungetulu kwetintfo tonkhe, nasekhatsi kwetintfo tonkhe, nakuto tonkhe tintfo, futsi utungelete tonkhe tintfo; netintfo tonkhe tingaye, futsi tisuka kuye, ngisho Nkulunkulu, phakadze naphakadze.
42 Ngetulu kwaloko, ngicinisile ngitsi kini, unikete umtsetfo kuto tonkhe tintfo, ngawo letinyakata ngetikhatsi tato nangetikhatsi temnyaka letifanele tato;
43 Netindlela tato timisiwe, ngisho netindlela temazulu nemhlaba, lokuhlanganisa umhlaba nawo onkhe emaplanethi.
44 Futsi tiniketa kukhanya lenye kulenye ngetikhatsi tato nangetikhatsi letifanele tato temnyaka, ngemizuzu yato, ngemahora ato, ngemalanga ato, nangemaviki ato, ngetinyanga tato, ngeminyaka yato—konkhe loku kungumnyaka munye kuNkulunkulu, kodvwa hhayi kumuntfu.
45 Umhlaba ugicika ngetimphiko tawo, nelilanga linika kukhanya kwalo emini, nenyanga inika kukhanya kwayo ebusuku, netinkhanyeti nato tinika kwato kukhanya, tisagicika ngetimphiko tato enkhatimulweni yato, emkhatsini wemandla aNkulunkulu.
46 Ngingayifananisa nani lemibuso, kute nicondze na?
47 Bukani, konkhe loko kuyimibuso, futsi noma ngumuphi umuntfu loye wabona noma ngukuphi noma lokuncanyana kuloku umbonile Nkulunkulu ahamba ngebukhosi nangemandla akhe.
48 Ngitsi kini, umbonile; noko, loyo loweta kubakhe akemukelwanga.
49 Kukhanya kukhanya ebumnyameni, nebumnyama bangakucondzi; noko, lilanga liyawufika lapho niyawucondza ngisho naNkulunkulu, seniphilisiwe kuye nanguye.
50 Emvakwaloko niyawukwati kutsi ningibonile, kutsi nginguye, nekutsi ngikukhanya kweliciniso lokukini, nekutsi nikimi; kungenjalo naningeke niphumelele.
51 Bukani, ngitawufananisa lemibuso nendvodza lenensimu, letfumela tisebenti tayo ensimini kutsi tiyawulima.
52 Yase itsi kusekucala: Hamba usebente ensimini, ngelihora lekucala ngitawukuta kuwe, futsi utawukubona kujabula kwebuso bami.
53 Yase itsi kusesibili: Hamba nawe ensimini, ngelihora lesibili ngitawukuvakashela ngenjabulo yebuso bami.
54 Kanjalo kusesitsatfu, itsi: Ngitawukuvakashela;
55 Kanjalo kusesine, njalonjalo kuya kuselishumi nakubili.
56 Futsi inkhosi yensimu yahamba yaya kusekucala ngelihora lekucala, yahlala naso lihora lonkhe, futsi sajabula ngenca yekukhanya ebusweni benkhosi yaso.
57 Emvakwaloko yesuka kusekucala kute ivakashele sesibili, nesesitsatfu, nesesine, njalonjalo kuya kuselishumi nakubili.
58 Futsi ngaleyo ndlela tonkhe tatfola kukhanya kwebuso benkhosi yato, indvodza ngayinye ngelihora layo, nangesikhatsi sayo, nangesikhatsi sayo lesifanele.
59 Icala ngesekucala, njalonjalo kuya kusekugcina, futsi kusukela kusekugcina kuya kuleso sekucala, nakusukela kusekucala kuya kusekugcina;
60 Yonkhe indvodza ngekweluhlelo lwayo, lite liphele lihora layo, njengekuyaletwa kwayo yinkhosi yayo, kute inkhosi yayo ikhatimuliswe kuyo, nayo kanjalo enkhosini yayo, kute bonkhe bakhatimuliswe.
61 Ngako-ke, ngalomfanekiso ngitawufananisa lemibuso, nalabahlala kuyo—wonkhe umbuso ngelihora lawo, nangesikhatsi sawo, futsi ngesikhatsi sawo lesifanale, ngisho nangekwesimemetelo Nkulunkulu lasentile.
62 Ngetulu kwaloko, ngicinisile ngitsi kini, bahlobo bami, ngishiya lamavi kini kutsi nizindle ngawo etinhlitiyweni tenu, nalomyaleto lengininika wona, kutsi ningibite ngisesedvute—
63 Sondzelani kimi nami ngitawusondzela kini; ngifuneni ngekukhutsala nitawungitfola; celani, nitawuphiwa, nconcotsani, nitawuvulelwa.
64 Noma ngayini leniyicelako kuBabe egameni lami nitawuniketwa, loko lokunifanele;
65 Futsi uma nicela noma ngayini lengakanifaneli, kuyawukuphendvukela ekulahlweni kwenu.
66 Bukani, loko lenikuvako kunjengelivi lalokhala ehlane—ehlane, ngoba anikwati kumbona—livi lami, ngoba livi lami linguMoya; Moya wami uliciniso; liciniso liyabeketela futsi lite siphetfo; futsi uma likini liyawuphumelela.
67 Futsi uma emehlo enu atinikele enkhatimulweni yami, imitimba yenu yonkhe iyawugcwaliswa kukhanya, futsi kuyawubabete bumnyama kini; nalowo mtimba logcwaliswe kukhanya ucondza tonkhe tintfo.
68 Ngako-ke, tingcweliseni kute tingcondvo tenu titinikele kuNkulunkulu, futsi nemalanga atawufika lapho niyawumbona khona; ngoba uyawunembulela buso bakhe, futsi kuyawuba ngesikhatsi sakhe, nangendlela yakhe, nangekwentsandvo yakhe.
69 Khumbulani setsembiso lesikhulu nesekugcina lengisente kini; lahlani imicabango yenu lelite neluhleko loluningi khashane nani.
70 Hlalani, hlalani kulendzawo, nibite umhlangano lonesizotsa, ngisho newalabo labatisebenti tekucala kulombuso wekugcina.
71 Futsi labo lasebabacwayisile basahamba ababite iNkhosi, bazindle ngalesecwayiso etinhlitiyweni tabo lesebasitfolile, kwesikhashana.
72 Bukani, nibone, ngitawuyinakekela imihlambi yenu, futsi ngitawuvusa babonisi ngibatfumele kubo.
73 Bukani, ngitawusheshisa umsebenti wami ngesikhatsi sawo.
74 Futsi nginika nine, lenitisebenti tekucala kulombuso wekugcina, umyaleto wekutsi butsanani ndzawonye, nitihlele, nitilungiselele, nitingcwelise; yebo, hlambululani tinhlitiyo tenu, nigeze netandla tenu kanye netinyawo tenu phambi kwami, kute nginente nihlanteke;
75 Kute ngifakaze kuBabe, naNkulunkulu wenu, naNkulunkulu wami, kutsi nihlantekile engatini yalesi situkulwane lesibi; kute ngigcwalise lesi setsembiso lesikhulu nesekugcina lengisente kini, uma ngitsandza.
76 Futsi, ngininika umyaleto wekutsi nichubeke nekuthandaza nekuzila kusukela kulesi sikhatsi kuya phambili.
77 Futsi ngininika umyaleto wekutsi nifundzisane imfundziso yembuso.
78 Fundzisani ngekukhutsala futsi umusa wami utawuba nani, kute nifundziseke ngalokuphelele ecinisweni, emtsetfweni, nasemfundzisweni, nasemtsetfweni welivangeli, nasetintfweni tonkhe letiphatselene nembuso waNkulunkulu, letifanele nine kutsi niticondze;
79 Ngalokuphatselene netintfo letisezulwini naletisemhlabeni, naletingephansi kwemhlaba; tintfo lesetike taba khona, tintfo letikhona, netintfo lekufanele tenteke masinyane; tintfo letisekhaya, tintfo letikulamanye emave; timphi nekudideka kwetive, nekwehlulela lokuningi lokuseveni; nelwati lwemave kanye nelwemibuso—
80 Kute nitilungiselele kuto tonkhe tintfo lapho ngiphindze nginitfumela kuyawukhulisa lubito lenginibitele kulo, nemsebenti lenginikhetsele wona.
81 Bukani, nginitfumela kuyawufakaza niphindze necwayise bantfu, futsi kufanele kutsi wonkhe muntfu lowecwayisiwe acwayise makhelwane wakhe.
82 Ngako-ke, abanataba, futsi tono tabo tisetikwetinhloko tabo.
83 Loyo longifunisisako uyawungitfola, futsi angeke iNkhosi imlahle.
84 Ngako-ke, hlalani, nisebente ngekukhutsala, kute nipheleliswe emsebentini wenu kute nihambe niye emkhatsini webeTive kwekugcina, kubo bonkhe labo labayawubekwa ngumlomo weNkhosi, kubopha umtsetfo nekugcina bufakazi, nekulungiselela labangcwele sikhatsi sekwehlulela lesitawufika;
85 Kute imiphefumulo yabo isindze elulakeni lwaNkulunkulu, sinengisoncitsakalo lesilindzele lababi, kulomhlaba nasemhlabeni lotako. Ngicinisile, ngitsi kini, labo labangasibo babonisi bekucala abachubeke esivinini ute umlomo weNkhosi ubabite, ngoba sikhatsi sabo sisengakefiki kwanyalo; tingubo tabo atikahlantwa engatini yalesi situkulwane.
86 Hlalani kuyo inkhululeko lenikhululwe ngayo; ningaboshelwa esonweni, kodvwa tandla tenu atihlanteke, ite iNkhosi ibuye.
87 Ngoba kungakendluli emalanga lamaningi kusukela nyalo umhlaba utawutamatama uphindze udzayitele njengesidzakwa; nelilanga liyawufihla buso balo, lale kunika kukhanya; nenyanga iyawuba njengengati; netinkhanyeti tiyawutfukutsela kakhulu, futsi tiyawutilahla phansi njengelikhiwa leliwa esihlahleni semkhiwa.
88 Futsi emvakwebufakazi benu kuta lulaka nentfukutselo kubantfu.
89 Ngoba emvakwebufakazi benu kuta bufakazi bekutamatama kwemhlaba, lokutawubanga kububula emkhatsini wawo, futsi nebantfu bayawuwela phansi bangakhoni kuma.
90 Ngetulu kwaloko kuta bufakazi belivi lekudvuma, nelivi lemibani, nelivi letiphepho, nelivi lemagagasi elwandle aphakama ngetulu kwemikhawulo yawo.
91 Futsi tonkhe tintfo tiyawuba siphitsiphitsi; futsi nakanjani, bantfu bayawucaleka babe nesiyeti; ngoba kwesaba kuyawube kukubantfu bonkhe.
92 Futsi tingilosi tiyawundiza emkhatsini welizulu, tisho ngelivi lelikhulu, tikhalise licilongo laNkulunkulu, titsi: Lungisani, lungisani, Awu nine bantfu basemhlabeni; ngoba kwehlulela kweNkhosi yetfu sekufikile. Bukani, nibone, uMyeni uyeta; phumani niyawumhlangabeta.
93 Masinyane kuyawubonakala sibonakaliso lesikhulu ezulwini, futsi bonkhe bantfu bayawusibona kanyekanye.
94 Futsi lenye ingilosi iyawushaya licilongo layo, itsi: Lelo bandla lelikhulu, unina wetinengiso, lowente tonkhe tive tanatsa liwayini lelulaka lebugwadla bakhe—lohlupha labangcwele baNkulunkulu, locitsa ingati yabo—lohleti etikwemanti lamaningi, nasetikwetichingi telwandle—bukani, ulukhula lwemhlaba; uboshwe tincumbi; tinketane takhe tentiwe tacina, kute umuntfu longatichacha; ngako-ke, sewukulungele kushiswa. Futsi itawushaya licilongo layo sikhatsi lesidze kuvakale, futsi tonkhe tive liyawuliva.
95 Kuyawuba khona kuthula dvu ezulwini sikhatsi lesingaba sigamu selihora; masinyane emvakwaloko likhethini lelizulu liyawuvulwa, njengelicansi emvakwekugocotwa, futsi buso beNkhosi buyawukwembulwa;
96 Futsi labaNgcwele labasemhlabeni, labaphilako, bayawuphiliswa baphindze bahlwitfwe kuyawumhlangabeta.
97 Nalabo labalele emathuneni abo, bayawuphuma, ngoba emathuna abo ayawuvulwa; nabo bayawuhlwitfwa kute bayawumhlangabeta emkhatsini wensika yelizulu—
98 BabaKhristu, titselo tekucala, labo labayawukwehla naye kucala, nalabo labasemhlabeni nasemathuneni abo, labangebekucala kuhlwitfwa kuyawumhlangabeta; futsi konkhe loku ngelivi lekukhala kwelicilongo lengilosi yaNkulunkulu.
99 Emvakwaloko lenye ingilosi iyawukhalisa licilongo, lokulicilongo lesibili; futsi kuyawubese kuta kuhlengwa kwalabo lababaKhristu ekubuyeni kwakhe; labatfole incenye yabo kulelo lijele lelilungiselelwe bona, kute bemukele livangeli, futsi behlulelwe njengebantfu benyama.
100 Ngetulu kwaloko, lelinye licilongo liyawukhala, lokulicilongo lesitsatfu; emvakwaloko kuta imimoya yebantfu labatawukwehlulelwa, futsi batfolakale bangaphansi kwekulahlwa;
101 Futsi laba bangulabanye kulabafile; futsi abasayukuphila kute kuphele iminyaka leyinkhulungwane, angeke futsi, kute kube sekupheleni kwemhlaba.
102 Futsi lelinye licilongo liyawukhala, lokulicilongo lesine, litsi: Kukhona emkhatsini walabo lokufanele basale kute kube ngulelo langa lelikhulu nelekugcina, ngisho lelisiphetfo, labayawuhlala baloku bangcolile.
103 Lelinye licilongo liyawukhala, lokulicilongo lesihlanu, lokuyingilosi yesihlanu leyenta livangeli lelingunaphakadze—indiza emkhatsini welizulu, kuto tonkhe tive, imindeni, tilimi, nakubantfu;
104 Futsi loku kuyawuba kukhala kwelicilongo lakhe, litsi kubo bonkhe bantfu, ezulwini nasemhlabeni, nakulabo labangephansi kwemhlaba—ngoba tonkhe tindlebe tiyawuliva, nawo onkhe emadvolo ayawukhotsama, netilimi tonkhe tiyawuvuma, uma beva kukhala kwelicilongo, litsi: Mesabeni Nkulunkulu, nimnike inkhatimulo lohleti esihlalweni sebukhosi, phakadze naphakadze; ngoba sikhatsi sekwehlulela kwakhe sisifikile.
105 Ngetulu kwaloko, lenye ingilosi iyawukhalisa layo licilongo, lokuyingilosi yesitfupha, itsi: Sewuwile lowente tonkhe tive tanatsa liwayini lelulaka lebugwadla bakhe; Sewuwile, sewuwile!
106 Ngetulu kwaloko, lenye ingilosi iyawukhalisa licilongo layo, lokuyingilosi yesikhombisa, itsi: Kufeziwe; kufeziwe! LiWundlu laNkulunkulu lincobile futsi lanyatsela sikhamo seliwayini lilodvwa, ngisho sikhamo seliwayini lentfukutselo yelulaka lwaNkulunkulu Somandla.
107 Emvakwaloko tingilosi tiyawutfweswa umchele wenkhatimulo yemandla akhe, nalabangcwele bayawugcwaliswa ngenkhatimulo yakhe, batfole lifa labo futsi bentiwe balingane naye.
108 Emvakwaloko lengilosi yekucala iyawuphindze ikhalise licilongo layo etindlebeni tabo bonkhe labaphilako, yembule tento letiyimfihlo tebantfu, nemisebenti lemangalisako yaNkulunkulu ngeminyaka leyinkhulungwane yekucala.
109 Emvakwaloko ingilosi yesibili iyawukhalisa layo licilongo, yembule tento letiyimfihlo tebantfu, nemicabango netifiso tetinhlitiyo tabo, kanye nemisebenti lemangalisako yaNkulunkulu eminyakeni leyinkhulungwane yesibili—
110 Njalonjalo, ite ingilosi yesikhombisa ikhalise licilongo layo; futsi iyawukuma emhlabatsini nasetikwelwandle, ifunge egameni laloyo lohleti esihlalweni sebukhosi, kutsi akuseyukuba khona sikhatsi; futsi Sathane uyawuboshwa, leyo nyoka lendzala, lebitwa ngadeveli, futsi angeke akhululwe sikhatsi lesiyiminyaka leyinkhulungwane.
111 Emvakwaloko uyawukhululwa sikhashana lesincane, kute agcogcele ndzawonye emabutfo akhe.
112 Futsi Mikhayeli, ingilosi yesikhombisa, ngisho ingilosi lenkhulu, uyawugcogca ndzawonye emabutfo akhe, ngisho emabutfo asezulwini.
113 Nadeveli uyawugcogca ndzawonye emabutfo akhe, ngisho emabutfo esihogo, futsi uyawukuta kutawukulwa naMikhayeli nemabutfo akhe.
114 Emvakwaloko kuta imphi yaNkulunkulu lomkhulu; futsi develi nemabutfo akhe bayawuphonswa endzaweni yabo, kute bangaphindzi babe nemandla etikwalabangcwele.
115 Ngoba Mikhayeli utawubalwela timphi tabo, aphindze amncobe loyo lofuna sihlalo sebukhosi saloyo lohleti esihlalweni sebukhosi, ngisho liWundlu.
116 Lena yinkhatimulo yaNkulunkulu, neyalabangcwelisiwe; futsi abaseyuphindze bakubone kufa.
117 Ngako-ke, ngicinisile ngitsi kini, bahlobo bami, bitani umhlangano wenu lonesizotsa, njengoba nginiyaletile.
118 Futsi njengoba bonkhe bete lukholo, funani ngekukhutsala niphindze nifundzisane emavi ekuhlakanipha; yebo, funani etincwadzini letikhanyiselana emavi ekuhlakanipha; funani kutfola lwati, ngisho ngekufundza nangelukholo.
119 Tihleleni, lungisani konkhe lokudzingekako; nakhe indlu, ngisho indlu yekuthandaza, indlu yekuzila, indlu yekukholwa, indlu yekutfola lwati, indlu yenkhatimulo, indlu yekuhleleka, indlu yaNkulunkulu;
120 Kute kungena kwenu kube segameni leNkhosi; kute kuphuma kwenu kube segameni leNkhosi; kute konkhe kubingelelana kwenu kube segameni leNkhosi, ngetandla letiphakanyiselwe kuLosetikwako Konkhe.
121 Ngako-ke, yekelani tonkhe tinkhulumo tenu letilite, kuhleka, tonkhe tinkhanuko tenu, konkhe kutikhukhumeta kwenu nekutsandza kudlala, nekwenta tonkhe tento tenu letimbi.
122 Khetsani emkhatsini wenu umfundzisi, futsi abangakhulumi bonkhe ngasikhatsi sinye; kodvwa akukhulume munye ngasikhatsi sinye bese bonkhe balalela lakushoko, kute kutsi uma bonkhe sebakhulumile nakhane nonkhe, futsi kute wonkhe muntfu abe nelilungelo lelilinganako.
123 Cinisekisani kutsi niyatsandzana, yekelani kufisa tintfo talabanye bantfu; fundzani kuphana njengoba livangeli lisho.
124 Yekelani kuvilapha; yekelani kungcola; yekelani kutfola emaphutsa lomunye kulomunye; yekelani kulala sikhatsi lesidze kunalokudzingekile; sheshani nilale, kute ningakhatsali; sheshani nivuke, kute imitimba yenu netingcondvo tenu titawuvuseleleka.
125 Ngetulu kwako konkhe, tembatsiseni ngesibopho selutsandvo, njengengubo, lolusibopho sekuphelela nekuthula.
126 Thandazani njalo, kute ningadzinwa, ngite ngifike. Bukani, nibone, ngitawubuya masinyane, nginilandze nite kimi. Amen.
127 Ngetulu kwaloko, lolu kuyawuba luhlelo lwendlu lelungiselwe bumengameli besikolwa sebaphrofethi, lesisungulwe kubafundzisa etintfweni tonkhe letibafanele, ngisho nabo bonkhe labasetikhundleni belibandla, noma ngalamanye emagama, labo lababitelwe ebufundisini ebandleni, kusuka kubaphristi labakhulu, kuya phansi kubadikhoni—
128 Futsi lolu kuyawuba luhlelo lwendlu yebumengameli besikolwa: Loyo lokhetfwe kuba ngemengameli, noma umfundzisi, uyawutfolwa eme endzaweni yakhe, endlini leyiyawulungiselelwa yena.
129 Ngako-ke, uyawuba wekucala endlini yaNkulunkulu, endzaweni lapho libandla lelisendlini lingaweva kahle emavi akhe ngalokucacile, ngaphandle kwekukhulumela etulu.
130 Futsi uma efika endlini yaNkulunkulu, ngoba kufanele abe wekucala kuleyondlu—bukani, loku kuhle, kute abe sibonelo—
131 Akatinikele ngemthandazo aguce ngemadvolo phambi kwaNkulunkulu, ngeluphawu noma kukhumbula sivumelwano saphakadze.
132 Futsi uma kukhona loyawungena emvakwakhe, umfundzisi akasukume, futsi, ngetandla letiphakanyiselwe ezulwini, yebo, leticondzile, abingelele umnakabo noma umzalwane ngalamavi:
133 Ingabe ungumnaketfu noma umzalwane na? Ngiyakubingelela egameni leNkhosi Jesu Khristu, ngeluphawu noma ngekukhumbula sivumelwano saphakadze, lokusivumelwano lengikwemukela ngaso kwenta budlelwane, ngekutimisela lokumile, lokunganyakatiseki, futsi lokungagucuki, kuba ngumhlobo nemnakenu ngemusa waNkulunkulu ngetibopho telutsandvo, kuhamba kuyo yonke imiyaleto yaNkulunkulu ngalokungasoleki, ngekubonga, phakadze naphakadze. Amen.
134 Futsi loyo lotfolwa angakafanelwa ngulesi sibingelelo angeke abe nendzawo emkhatsini wenu; ngoba aniyukuvumela kutsi indlu yami ingcoliswe nguye.
135 Loyo longenako nalowetsembekile phambi kwami, futsi angumnakenu, noma babazalwane, bayawubingelela mengameli noma umfundzisi ngetandla letiphakanyiselwe ezulwini, ngemthandazo nesivumelwano lesifanako, noma ngekutsi Amen, ngeluphawu lofanako.
136 Bukani, ngicinisile, ngitsi kini, loku kusibonele kini sekubingelelana endlini yaNkulunkulu esikolweni sebaphrofethi.
137 Futsi nibitelwe kwenta loku ngemthandazo nangekubonga, njengoba Moya uyawuninika leniyawukusho kuko konkhe lenikwentako endlini yeNkhosi, esikolweni sebaphrofethi, kute ibe yindzawo lengcwele, likhaya laMoya loNgcwele kute nakhiwe.
138 Futsi aniyukwemukela muntfu emkhatsini wenu kulesikolwa ngaphandle uma ahlantekile engatini yalesi situkulwane;
139 Futsi uyawukwemukelwa ngesimiso sekugezwa kwetinyawo, ngoba samiselwa loku simiso sekugezwa kwetinyawo.
140 Ngetulu kwaloko, simiso sekugezwa kwetinyawo kufanele sentiwe ngumengameli, noma umbonisi lowengamele libandla.
141 Kufanele sicalwe ngemthandazo; futsi emvakwekudla sinkhwa neliwayini, kufanele abophe njengesibonelo lesiniketwe esehlukweni selishumi nakutsatfu sebufakazi baJohane ngalokuphatselene nami. Amen.