1 Sembulo saJesu Khristu encekwini yakhe Joseph Smith, lomncane, nakubabonisi labasitfupha, ngesikhatsi bahlangene ngetinhlitiyo futsi baphakamisela emaphimbo abo etulu.

2 Yebo, livi leNkhosi ngalokuphatselene nelibandla layo, lelisungulwe ngetikhatsi tekugcina kute kubuyiselwe bantfu bayo, njengobe seyikhulumile ngemilomo yebaphrofethi bayo, futsi kute kugcogcwe labangcwele bayo beme etikweNtsaba iSiyoni, lekuyawuba lidolobha leliyiJerusalema leNsha.

3 Lidolobha lelo leliyawukwakhiwa, kusuka endzaweni yelithempeli, lekhetfwe ngumunwe weNkhosi, eminceleni lesenshonalanga yeSifundza saseMissouri, lelanikelwa ngesandla saJoseph Smith, lomNcane, nalabanye iNkhosi leyayitfokote kakhulu ngabo.

4 Ngicinisile leli livi leNkhosi, kutsi lidolobha iJerusalema leNsha liyawukwakhiwa ngekubutsana kwalabangcwele, kusuka kulendzawo, ngisho nendzawo yelithempeli, lithempeli lelo leliyawukwakhiwa kulesi situkulwane.

5 Ngoba ngicinisile lesi situkulwane asiyukwendlula sonkhe ite indlu yakhelwe iNkhosi, nelifu liyawuhlala etikwayo, lifu lelo leliyawuba yinkhatimulo yeNkhosi, leyiyawugcwalisa leyondlu.

6 Futsi emadvodzana aMosi, ngekwebuPhristi lobuNgcwele labutfola ngaphansi kwesandla sababetala wakhe, Jethro;

7 Jethro wabutfola ngaphansi kwesandla saKhalebi;

8 Khalebi wabutfola ngaphansi kwesandla sa-Elihu;

9 Elihu ngaphansi kwesandla saJeremiya;

10 Jeremiya ngaphansi kwesandla saGadi;

11 Gadi ngaphansi kwesandla sa Esayasi;

12 Esayasi wabutfola ngaphansi kwesandla saNkulunkulu.

13 Futsi Esayasi bekaphila etinsukwini ta-Abrahama, waphindze wabusiswa nguye—

14 Abrahama loyo lowatfola buphristi kuMelkhisedeki, lowabutfola ngentalelwane yabokhokho bakhe, kute kube kuNowa;

15 Kusuka kuNowa kute kube ku-Enoki, ngentalelwane yabokhokho;

16 Kusuka ku-Enoki kuya ku-Abela, lowabulawa ngeluzungu lwemnakabo, lowabutfola lobuphristi ngemiyaleto yaNkulunkulu, ngesandla seyise Adamu, lobekangumuntfu wekucala—

17 Buphristi lobo lobuchubekako ebandleni laNkulunkulu kuto tonkhe titukulwane, futsi bute sicalo semalanga noma siphetfo seminyaka.

18 Futsi iNkhosi yacinisekisa buphristi naku-Aroni nentalelwane yakhe, kuto tonkhe titukulwane tabo, buphristi lobo lobuchubekako futsi lobuhleti ingunaphakadze nebuphristi lobufanako lobungekweluhlelo lolungcwele kakhulu lwaNkulunkulu.

19 Futsi lobu buphristi lobukhulu bucondzisa livangeli futsi buphetse nesikhiya setimfihlakalo tembuso, ngisho sikhiya sekwati ngaNkulunkulu.

20 Ngako-ke, etimisweni tabo, emandla ekwesaba Nkulunkulu ayembulwa.

21 Futsi ngaphandle kwetimiso tabo, neligunya lebuphristi, emandla ekwesaba Nkulunkulu akembulwa kubantfu enyameni;

22 Ngoba ngaphandle kwaloku kute umuntfu longabona buso baNkulunkulu, ngisho Babe, aphile.

23 Manje loku Mosi wakufundzisa ngalokusobala kubantfwana baka-Israyeli ehlane, futsi wafuna ngekukhutsala kungcwelisa bantfu bakhe kute babone buso baNkulunkulu;

24 Kodvwa batenta lukhuni tinhlitiyo tabo bangakhoni kubeketelela kuba sebukhoneni bakhe; ngako-ke, iNkhosi elulakeni lwayo, ngoba intfukutselo yayo yavutsa ngekumelana nabo, yafunga kutsi abayikungena ekuphumuleni kwayo basesehlane, kuphumula loko lokukuphelela konkhe kwenkhatimulo yayo.

25 Ngako-ke, yamtsatsa Mosi yamkhipha emkhatsini wabo, ngalokunjalo nebuPhristi lobuNgcwele;

26 Futsi buphristi lobuncane bachubeka, buphristi lobo lobuphetse sikhiya sekusetjentelwa tingilosi neselivangeli lekulungiselela;

27 Livangeli lelo lokulivangeli lekuphendvuka nembhabhatiso, nelekutsetselelwa kwetono, nemtsetfo wemiyaleto yenyama, iNkhosi elulakeni lwayo leyawenta kutsi uchubeke unakekelwe yindlu ya-Aroni emkhatsini webantfwana baka-Israyeli kwate kwefika Johane, lowavuswa nguNkulunkulu, agcwaliswe ngaMoya loNgcwele esiswini senina.

28 Ngoba wabhajatiswa ngesikhatsi asesemncane, futsi wabekwa yingilosi yaNkulunkulu ngesikhatsi anemalanga lasiphohlongo budzala kulamandla, kute abhubhise umbuso wemaJuda, aphindze alungise indlela yeNkhosi icondze phambi kwebuso bebantfu bakhe, nekubalungiselela kuta kweNkhosi, etandleni tayo lokuniketwe onkhe emandla.

29 Ngetulu kwaloko, tikhundla tembonisi nembhishobhi tingulokwengetiwe lokudzingekako ebuphristini lobukhulu.

30 Ngetulu kwaloko, tikhundla temfundzisi nemdikhoni tingulokwengetiwe lokudzingekako ebuphristini lobuncane, buphristi lobo lobacinisekiswa ku-Aroni nemadvodzana akhe.

31 Ngako-ke, njengobe ngishito ngalokuphatselene nemadvodzana aMosi—ngoba emadvodzana aMosi kanye nemadvodzana a-Aroni ayawunikela umnikelo nemhlatjelo lomukelekako endlini yeNkhosi, indlu leyo leyawukwakhelwa iNkhosi kulesi situkulwane, etikwalelibala lelingcwelisiwe njengobe ngishito—

32 Futsi emadvodzana aMosi nemadvodzana a-Aroni ayawugcwaliswa ngenkhatimulo yeNkhosi, etikweNtsaba iSiyoni endlini yeNkhosi, nine leningemadvodzana abo; kanjalo nalabanyenti lengibabitile futsi ngabatfuma kuyawukwakha libandla lami.

33 Ngoba noma ngubani lowetsembekile kute atfole lobu buphristi lobubili lengikhulume ngabo, nasekukhuliseni lubito lwabo, bangcweliswa ngaMoya ngalokwenele kutsi kwentiwe kabusha imitimba yabo.

34 Baba ngemadvodzana aMosi nemadvodzana a-Aroni nentalelwane ya-Abrahama, nelibandla nembuso, nalabakhetsiwe baNkulunkulu.

35 Ngetulu kwaloko bonkhe labo labemukela lobu buphristi bemukela mine, kusho iNkhosi;

36 Ngoba loyo lowemukela tinceku tami wemukela mine;

37 Futsi loyo lowemukela mine wemukela Babe;

38 Futsi loyo lowemukela Babe wemukela umbuso waBabe; ngako-ke konkhe loko Babe lanako kuyawuniketwa yena.

39 Futsi loku kuhambisana nesifungo nesivumelwano lesihlangene nebuphristi.

40 Ngako-ke, bonkhe labo labemukela lobu buphristi, bemukela lesi sifungo nesivumelwano saBabe, langeke asephule, futsi lesingeke sisuswe.

41 Kodvwa loyo lowephula lesi sivumelwano emvakwekusemukela, futsi asilahle ngalokuphelele, angeke atsetselelwe tono kulomhlaba noma emhlabeni lotako.

42 Futsi maye kubo bonkhe labo labangeti kulobu buphristi lesenibemukele, lengibucinisekisako kini nine lenikhona lamuhla, ngelivi lami lucobo leliphuma emazulwini; senginike ngisho nemabutfo asezulwini netingilosi tami umyaleto ngalokuphatselene nani.

43 Manje sengininika umyaleto wekutsi niticaphele, kutsi ninake ngekukhutsala emavi ekuphila lokuphakadze.

44 Ngoba niyawuphila ngawo onkhe emavi laphuma emlonyeni waNkulunkulu.

45 Ngoba livi leNkhosi liliciniso, futsi noma ngabe yini leliciniso ikukhanya, futsi noma ngabe yini lekukhanya inguMoya, ngisho Moya waJesu Khristu.

46 Futsi Moya uniketa kukhanya kuwo wonkhe umuntfu lota emhlabeni; futsi Moya ukhanyisela wonkhe umuntfu emhlabeni, lolilalelako livi laMoya.

47 Wonkhe umuntfu lolilalelako livi laMoya uta kuNkulunkulu, ngisho Babe.

48 Babe umfundzisa sivumelwano lasivusetele futsi wasicinisekisa kini, lesicinisekiswa kini ngenca yenu, futsi kungabi ngenca yenu kuphela, kodvwa ngenca yemhlaba wonkhe.

49 Umhlaba wonkhe ungephansi kwesono, futsi ububula ngaphansi kwebumnyama nangaphansi kwebugcili besono.

50 Futsi ngaloku ningati kutsi bangaphansi kwebugcili besono, ngoba abeti kimi.

51 Ngoba loyo longeti kimi ungephansi kwebugcili besono.

52 Futsi loyo longalemukeli livi lami akalati livi lami, futsi akasiye wami.

53 Futsi ngaloku ningabati labalungile kulababi, nekutsi wonkhe umhlaba ububula ngaphansi kwesono nebumnyama nanyalo.

54 Netingcondvo tenu esikhatsini lesendlulile tifiphalisiwe ngenca yekungakholwa, futsi ngoba niye natitsatsa kalula tintfo lenitemukele—

55 Loku lokulite nekungakholwa kuletse libandla lonkhe ngaphansi kwekulahlwa ngelicala.

56 Futsi loku kugcekwa kuhleli etikwebantfwana baseSiyoni, ngisho bonkhe.

57 Futsi bayawuba ngaphansi kwaloku kugcekwa bate baphendvuke baphindze bakhumbule sivumelwano lesisha, ngisho neNcwadzi yaMormon nemiyaleto yaphambilini lengibanikete yona, hhayi kukhuluma kuphela, kodvwa kwenta njengobe ngibhalile—

58 Kute bavete titselo letifanele tembuso waBabe; kungenjalo kukhona sijeziso nekwehlulela lokutawutfululelwa kubantfwana baseSiyoni.

59 Ngoba ngabe bantfwana bembuso batawungcolisa live lami lelingcwele na? Ngicinisile, ngitsi kini, Cha.

60 Ngicinisile, ngicinisile, ngitsi kini nine leniwevako emavi ami manje, laliphimbo lami, nibusisiwe nangabe nitemukela leti tintfo;

61 Ngoba ngitawunitsetselela tono tenu ngalomyaleto—kutsi nihlale nicine etingcondvweni tenu ngesizotsa nangemoya wekuthandaza, kufakaza kuwo wonkhe umhlaba ngaleto tintfo letikhulunywa kini.

62 Ngako-ke, hambani niye kuwo wonkhe umhlaba; futsi kunoma nguyiphi indzawo leningeke niye kuyo niyawutfumela, kute bufakazi buhambe busuke kini buye kuwo wonkhe umhlaba kuto tonkhe tidalwa.

63 Futsi njengobe ngasho kubaphostoli bami, kanjalo-ke ngitsi kini, ngoba nibaphostoli bami, ngisho baphristi labakhulu baNkulunkulu; ningibo labo Babe langiphe bona; nibahlobo bami;

64 Ngako-ke, njengobe ngasho kubaphostoli bami nakini ngitsi, wonkhe umuntfu lokholelwa emavini enu, abhajatiswe ngemanti kute kutsetselelwe tono, uyawutfola Moya loNgcwele.

65 Futsi leti tibonakaliso tiyawubalandzela labo labakholwako—

66 Egameni lami bayawukwenta imisebenti leminyenti lemangalisako;

67 Egameni lami bayawukhipha bodeveli;

68 Egameni lami bayawuphilisa labagulako;

69 Egameni lami bayawuvula emehlo alabangaboni, bavule netindlebe talabangeva;

70 Futsi nelulwimi lwalongakhulumi luyawukhuluma;

71 Futsi uma kukhona umuntfu loyawubanika shevu angeke ubalimate;

72 Futsi nashevu wenyoka angeke ube nemandla ekubalimata.

73 Kodvwa umyaleto ngibanika wona, kutsi bangatikhukhumeti ngaleti tintfo, futsi bangatikhulumi embikwebantfu; ngoba leti tintfo tiniketwe nine kute nizuze niphindze nisindziswe.

74 Ngicinisile, ngicinisile, ngitsi kini, labo labangakholelwa emavini enu, baphindze bangabhajatiswa egameni lami, kute kutsetselelwe tono tabo, kute batfole Moya loNgcwele, bayawulahlwa, futsi angeke bete embusweni waBabe lapho Babe nami sikhona khona.

75 Futsi lesi sembulo kini, nalomyaleto, kusebenta kusuka ngalesi sikhatsi emhlabeni wonkhe, nelivangeli liya kubo bonkhe labangakalitfoli.

76 Kodvwa ngicinisile ngitsi kubo bonkhe labo lokuniketwe kubo umbuso—kusuka kini kufanele lishunyayelwe kubo, kute baphendvuke emisebentini yabo lemibi yaphambilini; ngoba kufanele bekhutwe ngetinhlitiyo tabo letimbi tekungakholwa, nabomnakenu eSiyoni ngekunihlamuka ngesikhatsi nginitfumile.

77 Ngetulu kwaloko ngitsi kini, bahlobo bami, ngoba kusukela manje ngitawunibita ngebahlobo, kufanele kutsi ngininike lomyaleto, wekutsi nibe njengebahlobo bami emalangeni lapho nganginabo, ngihamba kuyawushumayela livangeli ngemandla ami;

78 Ngoba angibavumelanga kutsi babe nesipatji noma sikhwama, noma emabhantji lamabili.

79 Bukani, nginitfumele kuvivinya umhlaba, futsi nesisebenti kufanele sitfole liholo laso.

80 Futsi noma ngubani loyawuhamba ashumayele lelivangeli lembuso, angehluleki kuchubeka atsembeke etintfweni tonkhe, angeke akhatsale engcondvweni, noma afiphale, emtimbeni, noma esitfweni, noma elungeni; nelunwele lwenhloko yakhe angeke luwele phansi lungabonwa. Futsi angeke balambe noma bome.

81 Ngako-ke, ningakhatsateki ngelikusasa, kutsi niyawudlani, noma niyawunatsani, noma niyakwembatsani.

82 Ngoba, bukani timbali temhlaba, kutsi tikhula njani, atikhandleki, atitfungi; futsi imibuso yemhlaba, kubo bonkhe bukhatikhati bayo, ayimbatsiswa njengayinye yato.

83 Ngoba Babe wenu, losezulwini, uyati kutsi niyakudzinga konkhe loku.

84 Ngako-ke, likusasa alitikhatsalele lona.

85 Noma ningahlupheki ngekutsi niyawutsini; kodvwa londvolotani etingcondvweni tenu njalo emavi ekuphila, futsi niyawukwati ngaleso sikhatsi leyo ncenye leyawuhlukaniselwa wonkhe umuntfu.

86 Ngako-ke, akubebete umuntfu emkhatsini wenu, ngoba lomyaleto ungewabo bonkhe labetsembekile lababitwe nguNkulunkulu ebandleni kulomsebenti, kusuka ngalesi sikhatsi lotsatsa sipatji noma sikhwama, kulabahambako kuyawumemetela lelivangeli lembuso.

87 Bukani, nginitfuma kutsi niyawukwekhuta bantfu kuto tonkhe tento tabo tekungalungi, nekubafundzisa ngekwehlulela lokutako.

88 Futsi loyo lonemukelako, lapho ngitawuba khona nami, ngoba ngitawuhamba phambi kwebuso benu. Ngitawuba ngasesandleni sangesekudla nesangesencele, naMoya wami utawuba setinhlitiyweni tenu, netingilosi tami tinitungelete, kute tinetfwale.

89 Noma ngubani lonemukelako wemukela mine; futsi loyo lonemukelako utawunipha kudla, anembatsise, aniphe nemali.

90 Futsi loyo lonipha kudla, noma lonembatsisako, noma lonipha imali, akayoze alahlekelwe ngumvuzo wakhe.

91 Kantsi lona longatenti leti tintfo akasuye umfundzi wami; ngaloku niyawubati bafundzi bami.

92 Loyo longanemukeli, khweshani kuye, nihlante tinyawo tenu ngisho nangemanti, emanti lahlobile, noma kushisa noma kubandza, futsi nifakaze ngako kuBabe wenu losezulwini, ningaphindzi nibuyele kuloyo muntfu.

93 Futsi kunoma nguliphi lidolobhanyana noma lidolobha leningena kulo, yentani kanjalo.

94 Noko, funani ngekukhutsala ningatibambi; futsi maye kulelo khaya, noma lidolobhanyana noma lidolobha lelinilahlako, noma emavi enu, noma bufakazi benu ngalokuphatselene nami.

95 Ngiyaphindza ngitsi, maye kulelo khaya, noma kulelo dolobhanyana, noma kulelo dolobha lelinilahlako, noma emavi enu, noma bufakazi benu ngami;

96 Ngoba mine, Somandla, ngibeke tandla tami etikwetive tonkhe, kubajezisa ngenca yebubi babo.

97 Futsi tinkhatsato tiyawutfunyelwa, futsi angeke titsatfwe emhlabeni ngite ngiwucedze umsebenti wami, lotawufinyetwa ngekulunga—

98 Bate bonkhe bangati, labasele, kusukela kulomncane kute kufike kulomkhulu, futsi bayawugcwaliswa ngekwati iNkhosi, bayawutibonela ngewabo emehlo, bayawuphakamisa liphimbo labo, futsi ngaleliphimbo kanyekanye bahlabelele leliculo lelisha batsi:

99 INkhosi iphindze yayibuyisa iSiyoni;INkhosi ibahlengile bantfu bayo, Israyeli,Ngekukhetfwa ngemusa,Lokwafezwa ngelukholoNangesivumelwano sabokhokho babo.

100 INKhosi ibahlengile bantfu bayo;NaSathane uboshiwe futsi nesikhatsi asisekho.INkhosi ihlanganise tonkhe tintfo ndzawonye.INkhosi yehlisele phansi iSiyoni isuka etulu.INkhosi yenyusele etulu iSiyoni isuka phansi.

101 Umhlaba ube nemhelo watala emandla awo;Futsi liciniso licinisekisiwe etibilinini tawo;Nemazulu awumamatsekele;Futsi wembatsiswe ngenkhatimulo yaNkulunkulu wawo;Ngoba ume emkhatsini webantfu bakhe.

102 Inkhatimulo, ludvumo, emandla, nekuncoba,Akube kuNkulunkulu wetfu; ngoba ugcwele bubele,Kulunga, umusa neliciniso, nekuthula,Phakadze naphakadze, Amen.

103 Ngetulu kwaloko, ngicinisile, ngicinisile, ngitsi kini, kufanele kutsi wonkhe umuntfu lohambako kuyawumemetela livangeli lami laphakadze, nangabe banemindeni, futsi batfola imali ngesipho, abayitfumele kubo noma bayisebentise kute bazuze, njengobe iNkhosi iyawubabonisa, ngoba ngalendlela kubonakala kukuhle kimi.

104 Futsi bonkhe labo labangenayo imindeni, labatfola imali, abayitfumele kumbhishobhi eSiyoni, noma kumbhishobhi e-Ohio, kute ingcweliselwe kuveta tembulo nekukhicitwa kwato, nekusungulwa kweSiyoni.

105 Futsi uma kukhona loyawupha lomunye libhantji, noma isudu, tsatsa lendzala uyiphe labamphofu, uhambe ngendlela yakho utfokote.

106 Uma kukhona umuntfu emkhatsini wenu lonemandla kuMoya, akatsatse loyo lobutsakatsaka ahambe naye, kute akheke ngebumnene bonkhe, kute naye abe nemandla.

107 Ngako-ke, tsatsani labo lababekwe ngebuphristi lobuncane, nibatfumele ngaphambi kwekuta kwenu kute bayawuhlela tikhatsi tekubonana, nekulungisa indlela, nekugcina tikhatsi tekubonana letihleliwe nine leningakhoni kutigcina.

108 Bukani, ngiyo lendlela baphostoli bami, basemandvulo, labangakhela ngayo libandla.

109 Ngako-ke, wonkhe umuntfu akeme esikhundleni sakhe, asebente elubitweni lwakhe; futsi inhloko ayingasho etinyaweni kutsi ayitidzingi tinyawo; ngoba ngaphandle kwetinyawo umtimba ungakwati kanjani kuma na?

110 Kanjalo nemtimba unesidzingo salo lonkhe lilunga, kute onkhe akhane ndzawonye, kute luhlelo lugcinwe luphelele.

111 Futsi bukani, baphristi labakhulu kufanele bahambe, kanjalo nebabonisi, kanjalo nebaphristi labancane; kodvwa badikhoni nebafundzisi kufanele bakhetselwe kubuka libandla, kutsi babe tisebenti letingahambi telibandla.

112 Futsi umbhishobhi, Newel K. Whitney, naye kufanele ahambe ndzawo tonkhe emkhatsini wawo onkhe emabandla, afuna labamphofu kutawubasita ngekwetidzingo tabo ngekutfobisa labacebile nalabatatisako.

113 Kufanele aphindze acashe sitfunywa kubuketa nekwenta umsebenti wakhe wasemhlabeni njengekumlayetela.

114 Noko, umbhishobhi akahambe aye edolobheni laseNew York, nasedolobheni lase-Albany, nasedolobheni laseBoston, acwayise bantfu balawo madolobha ngemsindvo welivangeli, ngelivi lelikhulu, ngekubhujiswa nangekucedvwa nya lokubalindzele uma batilahla leti tintfo.

115 Ngoba uma batilahla leti tintfo sikhatsi sekwehlulelwa kwabo sesisondzele, nendlu yabo iyawusala ingenamuntfu.

116 Akatsembele kimi futsi angeke atfotjiswe; futsi lunwele lwenhloko yakhe angeke luwele phansi lungabonwa.

117 Futsi ngicinisile ngitsi kini, nine nonkhe lenitinceku tami, hambani njengekuvuma kwetimo tenu, elubitweni lwenu lolwehlukahlukene, niye emadolobheni nasemadolobhananeni, nekhute umhlaba ngekulunga kuto tonkhe tento tabo letingakalungi naletingenabo bunkulunkulu, nibeke ngalokucacile nangekucondza kubhujiswa kwesinengiso etikhatsini tekugcina.

118 Ngoba, iNkhosi Somandla itsi ngani, ngitawuyibhubhisa imibuso yabo; angeke ngitamatamise umhlaba kuphela, kodvwa nemazulu lagcwele tinkhanyeti ayawutamatama.

119 Ngoba mine, iNkhosi, ngibeke sandla sami kubonakalisa emandla asezulwini; angeke nikubone nyalo, kodvwa kusetawuba sikhashana niyawukubona, futsi nati kutsi nginguye, nekutsi ngitawukuta ngitawubusa nebantfu bami.

120 Ngingu-Alfa na-Omega, sicalo nesiphetfo. Amen.