Sigaba 31
Sembulo lesaniketwa ngaJoseph Smith umPhrofethi lesasiya kuThomas B. Marsh, ngeNyoni ngemnyaka we-1830. Lesikhatsi bekunguleso lesalandzela masinyane nje emvakwemhlangano weliBandla (buka sihloko sesigaba 30) Thomas B. Marsh bekabhajatisiwe ekucaleni kwenyanga futsi abekwe njengembonisi eBandleni ngaphambi kwekutsi kuniketwe lesembulo.
1–6, Thomas B. Marsh ubitelwa kutsi utawushumayela livangeli futsi uyacinisekiswa ngenhlalakahle yemndeni wakhe; 7–13, Uyelulekwa kutsi abeketele, athandaze njalo, aphindze alandzele uMdvudvuti.
1Â Thomas, ndvodzana yami, ubusisiwe ngenca yelukholo lwakho emsebentini wami.
2Â Buka, ube netinhlupheko letinyenti ngenca yemndeni wakho; noko, ngitawukubusisa wena nemndeni wakho, yebo, nebantfwana bakho; futsi lilanga liyeta lapho batawukholwa futsi balati liciniso baphindze babemunye nawe ebandleni lami.
3Â Tfokota uphindze ujabule, ngoba lihora lemsebenti wakho wekufundzisa livangeli selifikile; nelulwimi lwakho luyawuchacheka, futsi uyawumemetela tindzaba letimnandzi tentfokoto lenkhulu kulesi situkulwane.
4Â Uyawumemetela tintfo letembulwe encekwini yami Joseph Smith, lomNcane. Utawucala kushumayela kusukela nyalo kuya phambili, yebo, kuvuna ensimini leseyimhlophe leseyilungele kushiswa.
5Â Ngaloko-ke, jikijela lisikela lakho ngawo wonkhe umphefumulo wakho, tono takho titsetselelwe, futsi utawetfwala titfungo emhlane wakho, ngoba tisebenti kufanele titfole umvuzo wato. Ngaloko-ke, umndeni wakho utawuphila.
6Â Buka, ngicinisile ngitsi kuwe, suka kubo kwesikhashana nje, ushumayele livi lami, ngitawubalungiselela indzawo yekuhlala.
7Â Yebo, ngitawuvula tinhlitiyo tebantfu, futsi batawukwemukela. Ngitawusungula libandla ngawe;
8Â Futsi uyawubacinisa ubalungiselele sikhatsi lapho batawugcogcwa khona.
9Â Beketela etinhluphekweni, ungabetfuki labo labakwetfukako. Busa indlu yakho ngebumnene futsi ucine.
10Â Buka, ngitsi kuwe uyawuba ngumelaphi ebandleni, kodvwa hhayi emhlabeni, ngoba angeke bakwemukele.
11Â Hamba uye noma ngukuphi lapho ngitawukutfumela khona, utawukwembulelwa nguMdvudvuti kutsi utawukwentani nekutsi utawuya kuphi.
12Â Thandaza njalo, funa ungene ekulingweni ulahlekelwe ngumvuzo wakho.
13Â Tsembeka kute kube sekugcineni, buka, nginawe. Lawa mavi akaphumi kumuntfu noma kubantfu, kodvwa ngewami, ngisho Jesu Khristu, uMhlengi, ngentsandvo yaBabe. Amen.