Sigaba 111
Sembulo lesaniketwa ngaJoseph Smith umPhrofethi, eSalema, eMassachusetts, mhlaka 6 iNgci, 1836. Ngalesi sikhatsi baholi beliBandla bebasetikweletini kakhulu ngenca yemisebenti yabo enkonzweni yabo. Ngekuva kutsi bebatawutfola samba lesikhulu semali eSalem, umPhrofethi, Sidney Rigdon, Hyrum Smith, naOliver Cowdery bahamba baya lapho besuka eKirtland, e-Ohio, kuyawuphenya ngaloku bekushiwo, nekuyawushumayela livangeli. Labazalwane benta tintfo letehlukene temsebenti weliBandla baphindze bashumayela. Ngesikhatsi kubonakala kutsi bekute imali lebeyitawukuta, babuyela eKirtland. Tintfo letitsite letehlukene naletigcamile kulesi simo tiyavela emavini alesi sembulo.
1–5, INkhosi inakekela tidzingo tasemhlabeni tetinceku Tayo; 6–11, Utawuyiphatsa ngebubele iSiyoni iphindze ihlele tonkhe tintfo kute kuzuze tinceku Tayo.
1 Mine, iNkhosi Nkulunkulu wenu, angikaphatseki kabi ngekuta kwenu kuloluhambo, nanoma nente buwula.
2 Nginemcebo wenu lomningi kulelidolobha, kute kuzuze iSiyoni, nebantfu labaningi labakulelidolobha, lengitawubagcogca ngesikhatsi lesifanele kute kuzuze iSiyoni, ngelusito lwenu.
3 Ngako-ke, kufanele kutsi nakhe budlelwane nebantfu labakulelidolobha, njengoba niyawuholwa, nanjengoba kuyawukwembulwa kini.
4 Futsi kuyawukwenteka ngesikhatsi lesifanele kutsi ngitawunikela lelidolobha etandleni tenu, kute nibe nemandla etikwalo, kangangoba angeke bati ngetinhloso tenu; futsi ingcebo yalo yeligolide nesiliva iyawuba ngeyenu.
5 Ningakhatsateki ngetikweleti tenu, ngoba ngitawuninika emandla ekutibhadala.
6 Ningakhatsateki ngeSiyoni, ngoba ngitawuyiphatsa ngebubele.
7 Hlalani kulendzawo, nasetifundzeni letisedvute;
8 Futsi indzawo lapho kuyinhloso yami kutsi nihlale khona, kakhulu, itawukwatiswa kini ngekuthula nemandla aMoya wami, loyawukuta kini.
9 Lendzawo ningayitfola ngekuyicasha. Futsi butani ngekukhutsala mayelana nalabebahlala kulendzawo basemandvulo nebasunguli balelidolobha;
10 Ngoba kunemcebo wenu lomningi kulelidolobha.
11 Ngako-ke, hlakaniphani njengetinyoka kodvwa ningabi nasono; futsi ngitawutihlela tonkhe tintfo kute nizuze, ngekushesha leningakwati kutemukela ngako. Amen.