Sigaba 53
Sembulo lesaniketwa ngaJoseph Smith umPhrofethi ku-Algernon Sidney Gilbert, eKirtland, e-Ohio, mhlaka 8 ngeNhlaba, 1831. Ngenca yesicelo saSidney Gilbert, umPhrofethi wabuta iNkhosi ngemsebenti weMnaketfu Gilbert nekubekwa kwakhe ebandleni.
1–3, Lubito nekukhetfwa kwaSidney Gilbert eBandleni kubekwa kutsi abe ngumbonisi; 4–7, Utawuphindze asebente njengesitfunywa sembhishobhi.
1Â Buka, ngitsi kuwe, nceku yami Sidney Gilbert, ngiyivile imithandazo yakho, futsi ungicelile kutsi watiswe, yiNkhosi Nkulunkulu wakho, mayelana nelubito nekukhetfwa kwakho ebandleni, mine, iNkhosi, lengilisungulile kuleti tikhatsi tekugcina.
2Â Buka, mine, iNkhosi, leyabetselwa ngenca yetono temhlaba, ngikuniketa umyaleto wekutsi uyawushiya umhlaba.
3Â Yemukela lubito lengikugcobele kulo, nalolo lwekuba ngumbonisi, kushumayela kukholwa nekuphendvuka nekutsetselelwa kwetono, ngekwelivi lami, nekwemukela Moya loNgcwele ngekubekwa tandla.
4Â Uphindze ube sitfunywa kulelibandla endzaweni leyawukhetfwa ngumbhishobhi, ngekwemiyaleto leyawuniketwa emvakwaloku.
5Â Ngetulu kwaloko, ngicinisile ngitsi kuwe, uyawutsatsa luhambo lwakho netinceku tami Joseph Smith, lomNcane, naSidney Rigdon.
6Â Buka, leti timiso tekucala lotawutitfola; letinye titawukwatiswa ngesikhatsi lesitako, njengekusebenta kwakho esivinini sami.
7Â Ngetulu kwaloko, ngifuna ufundze kutsi nguloyo kuphela losindziswako loyawubeketela kute kube sekugcineni. Kunjalo nje. Amen.