Sigaba 59
Sembulo lesaniketwa ngaJoseph smith umPhrofethi, eZion, eSifundzeni saseJackson, eMissouri, mhlaka 7 ngeNgci ngemnyaka we-1831. Ngaphambi kwalesi sembulo, live langcweliswa, njengobe iNkhosi yayiyalile, nendzawo yelithempeli lelitako yabusiswa. Ngelilanga lekwatfolakala ngalo lesi sembulo, Polly Knight, umfati waJoseph Knight lomDzala, wafa, lilunga lekucala leliBandla kufa eZion. Emalunga ekucala achaza lesi sembulo “njengalesiyala labaNgcwele kutsi lisabatha ligcinwa kanjani nekutsi kuthandazwa kanjani futsi kuzilwa kanjani.”
1–4, LabaNgcwele labetsembekile eZion batawubusiswa; 5–8, Kufanele bayitsandze baphindze bayisebentele iNkhosi futsi bagcine imiyaleto Yayo; 9–19, Ngekugcina lilanga leNkhosi lingcwele, labaNgcwele babusiswa ngekwasemhlabeni nangekwakamoya; 20–24, Labalungile batsenjiswa kuthula kulomhlaba nekuphila lokuphakadze emhlabeni lotako.
1 Bukani, babusisiwe, kusho iNkhosi, labo labeta kulendzawo ngeliso lelicondze enkhatimulweni yami, ngekwemiyaleto yami.
2 Ngoba labo labaphilako bayawukudla lifa lemhlaba, nalabo labafako bayawuphumula emisebentini yabo, nemisebenti yabo iyawubalandzela; futsi bayawutfola umchele etindlini taBabe, lengibalungiselele tona.
3 Yebo, babusisiwe labo tinyawo tabo letime eveni laseZion, labatfobele livangeli lami; ngoba bayawutfola njengemvuzo wabo tintfo letinhle temhlaba, futsi uyawuletsa ngemandla awo.
4 Futsi bayawukwetfweswa umchele ngetibusiso tasezulwini, yebo, nangemiyaleto leminyenti, nangetembulo esikhatsini sabo—labo labetsembekile nalabakhutsele phambi kwami.
5 Ngaloko-ke, ngibaniketa umyaleto, ngisho naku: Uboyitsandza iNkhosi Nkulunkulu wakho ngayo yonkhe inhlitiyo yakho, nangawo onkhe emandla akho, nangayo yonkhe ingcodvo yakho, nangawo wonkhe umfutfo wakho; futsi egameni laJesu Khristu umsebentele.
6 Ubotsandza makhelwane wakho njengobe utitsandza wena. Ungebi; ungaphingi, ungabulali, ungenti lutfo lolufana nako.
7 Uboyibonga iNkhosi Nkulunkulu wakho kuto tonkhe tintfo.
8 Ubonikela umnikelo eNkhosini Nkulunkulu wakho ngekulunga, ngisho lowo wenhlitiyo lephukile nemoya lodzabukile.
9 Kute utigcine ngalokugcwele ungenasici eveni, hamba endlini yemthandazo unikele ngeminikelo yakho lengcwele elangeni lami lelingcwele;
10 Ngoba ngicinisile leli lilanga lelibekelwe wena kuphumula emisebentini yakho, nekugcwalisa tetsembiso takho kuLosetikwakho Konkhe;
11 Noko tetsembiso takho uyawutenta ngekulunga ngawo onkhe emalanga nangaso sonkhe sikhatsi;
12 Kodvwa khumbula kutsi kuleli, lilanga leNkhosi, uyawunikela iminikelo yakho kuLosetikwakho Konkhe, uvume tono takho kubomnakenu, naphambi kweNkhosi.
13 Futsi ngaleli lilanga awuyukwenta lutfo lolunye, kuphela yenta kudla kwakho kulungiswe ngenhlitiyonye kute kuzila kwakho kube ngulokuphelele, noma, ngalamanye emagama, kute intfokoto yakho igcwale.
14 Ngicinisile, loku kuzila nekuthandaza, noma ngalamanye emagama, kujabula nekuthandaza.
15 Futsi nangabe nenta leti tintfo ngekubonga, ngetinhlitiyo nebuso lobutfokotile, hhayi ngekuhleka lokukhulu, ngoba loku kusono, kodvwa ngenhlitiyo leyeneme nebuso lobutfokotile—
16 Ngicinisile ngitsi, nangabe nenta loku, kugcwala kwemhlaba ngekwenu, tilwane tesiganga kanye netinyoni tasemoyeni, naloko lokucanca etihlahleni nalokuhamba emhlabatsini;
17 Yebo, nelikhambi, netintfo letinhle letivela emhlabatsini, noma kwekudla noma kwetembatfo, noma kwetindlu, noma kwetincolobane, noma kwemasimi etitselo, noma kwetingadze, noma kwetivini;
18 Yebo, tonkhe tintfo letivela emhlabatsini, ngesikhatsi sato, tentelwe inzuzo nekusetjentiswa bantfu, kwenelisa liso nekujabulisa inhlitiyo;
19 Yebo, kwekudla nekwekwembatsa, kwekunambitsa nekuhogela, kucinisa umtimba nekuvusetela umoya.
20 Futsi kuyamjabulisa Nkulunkulu kutsi unikete konkhe loku kumuntfu; ngoba nguloko lokwentelwe kona, kutsi kusetjentiswe ngekubona kwakhe, hhayi ngalokwecile, noma ngekuphanga.
21 Futsi kute lutfo umuntfu lamona ngako Nkulunkulu, noma kute umuntfu lulaka lwakhe loluvutsako, ngaphandle kwalabo labangasivumi sandla sakhe kuko konkhe, futsi nalabangayitfobeli imiyaleto yakhe.
22 Bukani, loku kungekwemtsetfo kanye nebaphrofethi; ngaloko-ke, ningasangihluphi mayelana naloludzaba.
23 Kodvwa fundzani kutsi loyo lowenta imisebenti yekulunga uyawutfola umvuzo wakhe, nekuthula kulomhlaba, nekuphila lokuphakadze emhlabeni lotako.
24 Mine, iNkhosi, sengikukhulumile, naMoya uyafakaza. Amen.