Sigaba 81
Sembulo lesaniketwa ngaJoseph Smith umPhrofethi, eHiram, e-Ohio, mhlaka 15 ngeNdlovulenkhulu, ngemnyaka we-1832. Frederick G. Williams ubitwa kutsi abe ngumphristi lomkhulu nemeluleki kubuMengameli bebuPhristi lobuKhulu. Imibhalo yemlandvo ikhombisa kutsi ngesikhatsi lesi sembulo sitfolakala ngeNdlovulenkhulu ngemnyaka we-1832, sabita Jesse Gause esikhundleni sekuba ngumeluleki waJoseph Smith kubuMengameli. Kodvwa, kwatsi uma ehluleka kuchubeka ngendlela lehambisana naloku kubekwa, lolubito lwabese lwendluliselwa kuFrederick G. Williams. Lesembulo (sangeNdlovulenkhulu ngemnyaka we-1832) kufanele sitsatfwe njengesinyatselo sekuhlelwa ngalokusemtsetfweni kwebuMengameli bekuCala, ngenca yekutsi sibita sikhundla semeluleki kulelo cembu futsi sicacisa ngesitfunti salesi sikhundla. Umzalwane Gause wasebenta kwesikhashane kodvwa wacoshwa eBandleni ngeNgongoni ngemnyaka we-1832. Umnaketfu Williams wabekwa kulesi sikhundla mhlaka 18 ngeNdlovulenkhulu ngemnyaka we-1833.
1–2, Tikhiya tembuso tihlala njalo tiphetfwe buMengameli bekuCala; 3–7, Uma Frederick G. Williams etsembekile emsebentini wakhe, utawutfola kuphila lokuphakadze.
1Â Ngicinisile, ngicinisile, ngitsi kuwe nceku yami Frederick G. Williams: Vani livi laloyo lokhulumako, livi leNkhosi Nkulunkulu wakho, futsi ulalele lubito lobitelwe kulo, ngisho nekuba ngumphristi lomkhulu ebandleni lami, nemeluleki encekwini yami Joseph Smith, lomNcane.
2Â Kuye lengimnike tikhiya tembuso, letihlala njalo titebuMengameli bebuPhristi lobuKhulu;
3Â Ngako-ke, ngicinisile ngiyamati futsi ngitawumbusisa, kanjalo nawe, nangabe wetsembekile ekubeni ngumeluleki, esikhundleni lengikubeke kuso, ekuthandazeni njalo, ngekuvakala nangenhlitiyo, phambi kwebantfu nangasense, nasemsebentini wakho ekumemeteleni livangeli eveni lalabaphilako, nasemkhatsini wabomnakenu.
4Â Ngekwenta leti tintfo utawukwenta lokuhle kakhulu kubantfu bakini, futsi utawuchubekisa nenkhatimulo yakhe loyiNkhosi yakho.
5Â Ngaloko-ke, yetsembeka; mani esikhundleni lengikubeke kuso; sita lababutsakatsaka, phakamisa tandla takho letibutsakatsaka, ucinise nemadvolo lacekako.
6Â Futsi uma wetsembekile kute kube sekugcineni uyawetfweswa umchele wekungabhubhi, nekuphila lokuphakadze etindlini lengitilungisile ekhaya laBabe.
7Â Buka, ubone, lawa ngemavi a-Alfa na-Omega, ngisho Jesu Khristu. Amen.