Sigaba 106
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 25 Lweti. 1834. Lesi sembulo sicondziswe kuWarren A. Cowdery, umnakabo-Oliver Cowdery lomdzala.
1–3, Warren A. Cowdery ubitwa kutsi abe sikhulu lesengamele endzaweni lapho ahlala khona; 4–5, Kubuya kwesiBili angeke kubatume bantfwana bekukhanya njengelisela; 6–8, Tibusiso letinkhulu tilandzela kusebenta ngekwetsembeka eBandleni.
1 Kuyinhloso yami kutsi inceku yami Warren A. Cowdery ikhetfwe iphindze ibekwe kutsi ibe ngumphristi lomkhulu lowengamele ebandleni lami, eveni laseFreedom nasetifundzeni letisedvute;
2 Futsi kufanele ishumayele livangeli lami lelingunaphakadze, iphakamise livi layo iphindze yecwayise bantfu, hhayi endzaweni yayo kuphela, kodvwa etifundzeni letisedvutane;
3 Futsi inikele sikhatsi sayo sonkhe kulolubito loluphakeme nalolungcwele, lengilunika yona, ifune ngekukhutsala umbuso wasezulwini nekulunga kwawo, futsi tonkhe tintfo letidzingekile titawungetelwa kuloko; ngoba sisebenti kufanele sitfole liholo laso.
4 Ngetulu kwaloko, ngicinisile ngitsi kini, kubuya kweNkhosi kuyasondzela masinyane, futsi kutuma umhlaba njengelisela ebusuku—
5 Ngako-ke, bophani tinkhalo tenu, kute nibe bantfwana bekukhanya, futsi lelo langa angeke lunitume njengelisela.
6 Ngetulu kwaloko, ngicinisile ngitsi kini, kwabakhona injabulo ezulwini ngesikhatsi inceku yami Warren ikhotsamela indvuku yami yebukhosi, itehlukanisa ebucilini bebantfu;
7 Ngako-ke, ibusisiswe inceku yami Warren, ngoba ngitawuba nemusa kuyo; futsi, nanoma ingenalutfo enhlitiyweni yayo, ngitawuyiphakamisa nangabe itawutitfoba phambi kwami.
8 Futsi ngitawuyinika umusa nesiciniseko lengema ngaso; futsi uma ichubeka iba ngufakazi lowetsembekile nekukhanya ebandleni ngiyilungiselele umchele etindlini taBabe, Kunjalo nje. Amen.