Sigaba 129
Timfundziso letaniketwa nguJoseph Smith umPhrofethi, eNauvoo, e-Illinois, mhlaka 9 iNdlovana 1843, lebetatisa ngetikhiya letintsatfu letinkhulu lekungahlukaniswa ngato bunjalo lobufanele betingilosi nemimoya lesebentako.
1–3, Kukhona imitimba levusiwe kanye nemitimba yamoya ezulwini; 4–9, Tikhiya tiyaniketwa lekungabonwa ngato titfunywa letisuka ngale kwendvwangu.
1 Timbili tinhlobo tebantfu ezulwini, lokungulaba: Tingilosi, lokubantfu lasebavuswe ekufeni, labanemtimba wenyama nematsambo—
2 Sibonelo, Jesu watsi: Ngitsintseni nitewubona, ngoba umoya ute inyama nematsambo, njengoba ningibona mine nginako.
3 Kwesibili: yimimoya yebantfu labalungile labaphelelisiwe, labo labangakavuswa ekufeni, kodvwa labatfola inkhatimulo lefanako.
4 Uma sitfunywa sifika sitsi sinemlayeto lophuma kuNkulunkulu, sinike sandla sakho usicele kutsi nichawulane.
5 Uma siyingilosi siyawukwenta njalo, futsi utawusiva sandla saso.
6 Uma singumoya wemuntfu lolungile lophelelisiwe sitawukuta sisenkhatimulweni yaso; ngoba leyo nguyona kuphela indlela lesingavela ngayo—
7 Sicele kutsi nichawulane, kodvwa angeke sinyakate, ngoba kuphambene neluhlelo lwasezulwini kutsi umuntfu lolungile akhohlise; kodvwa noko utawendlulisa umlayeto wakhe.
8 Uma kungudeveli avela njengengilosi yekukhanya, uma umcela kutsi nichawulane uyawukuniketa sandla sakhe kodvwa angeke uve lutfo; ngako-ke ungambona.
9 Leti tikhiya letintsantfu letinkhulu longakwati kubona ngato kutsi noma ngukuphi kusetjentelwa kuvela kuNkulunkulu.