Sigaba 119
Sembulo lesaniketwa ngaJoseph Smith umPhrofethi, eFar West, eMissouri, mhlaka 8 Kholwane 1838, kuphendvula kuncusa lokwakutsi: “Awu Nkhosi! Khombisa tinceku takho kutsi kungakanani lowukudzingako kwemphahla yebantfu bakho njengekwelishumi.” Umtsetfo wekwelishumi, njengoba watiwa namuhla, bewungakanikwa eBandleni ngaphambi kwalesi sembulo. Ligama lelitsi kwelishumi, emthandazweni losandza kushiwo nasetembulweni taphambilini (64:23; 85:3; 97:11) belingasho incenye yinye eshumini, kodvwa lalisho yonkhe iminikelo yesihle, noma lokunikelwako, esikhwameni seliBandla. INkhosi yayike ngaphambilini yanika liBandla umtsetfo wekunikela newekuphatfwa kwemphahla, emalunga (ikakhulukati babonisi lababaholi) labekangena kuwo ngesivumelwano lokwakufanele sibe ngesaphakadze. Ngenca yekuhluleka kwalabaningi kugcina lesi sivumelwano, iNkhosi yawususa kwesikhashana yase inika esikhundleni sawo umtsetfo wekwelishumi eBandleni lonkhe. UmPhrofethi wabuta iNkhosi kutsi ingakanani imphahla yabo lebeyiyidzinga kute kufezwe tinjongo letingcwele. Imphendvulo kwaba ngulesi sembulo.
1–5, LabaNgcwele kufanele babhadale imphahla yabo lesele bese banikela, njengekwelishumi, kunye eshumini kwentalo yabo ngemnyaka; 6–7, Inchubo lenjalo itawulingcwelisa live laseSiyoni.
1 Ngicinisile, naku lokushiwo yiNkhosi, ngifuna yonkhe imphahla yabo lesele kutsi ibekwe etandleni tembhishobhi welibandla lami eSiyoni,
2 Kute kwakhiwe indlu yami, futsi kubekwe sisekelo seSiyoni nesebuphristi, futsi kute kubhadalwe tikweleti teBumengameli beliBandla lami.
3 Futsi loku kuyawuba sicalo sekwelishumi kwebantfu bami.
4 Futsi emvakwaloko, labo labakhokhiswe kwelishumi ngalendlela bayawukhokha kunye eshumini kwayo yonkhe intalo yabo ngemnyaka, futsi loku kuyawuba ngumtsetfo lomile kubo ingunaphakadze, lowentelwe buphristi bami lobungcwele, kusho iNkhosi.
5 Ngicinisile ngitsi kini, kuyawukwenteka kutsi bonkhe labo lababutsanele eveni laseSiyoni, bayawukhokhiswa kwelishumi lokusele kwemphahla yabo, futsi bayawugcina lomtsetfo, nakungenjalo angeke batfolakale bafanele kuhlala emkhatsini wenu.
6 Futsi ngitsi kini, uma bantfu bami bangawugcini lomtsetfo, kute bawugcine ungcwele, futsi ngalomtsetfo balingcwelise live laseSiyoni kimi, kute imitsetfo yami lemisiwe nekwehlulela kwami kugcinwe lapho, kute libe ngcwele kakhulu, bukani, ngicinisile ngitsi kini, angeke libe live laseSiyoni kini.
7 Futsi loku kuyawuba sibonelo kuto tonkhe tikhonkhwane taseSiyoni. Kunjalo nje. Amen.