Sigaba 67
Sembulo lesaniketwa ngaJoseph Smith umPhrofethi, eHiram, e-Ohio, ekucaleni ngenyanga yeLweti ngemnyaka we-1831. Sikhatsi bekunguleso semhlangano lokhetsekile, nekukhishwa kwetembulo lebesetitfolakele eNkhosini ngemPhrofethi kwacatjangwa kwase kutsatfwa tinyatselo (buka sihloko sesigaba 1). William W. Phelps bekasandza kusungula indzawo yeliBandla yekukhicita tincwadzi e-Independence, eMissouri. Kulomhlangano kwancunywa kutsi tembulo lebesetitfolakele tifakwe kuBook of Commandments (INcwadzi yeMiyaleto) nekutsi kugaywe emakhophi latinkhulungwane letilishumi (lokwatsi ngenca yebumatima lobabungakalindzeleki sibalo sehliswa saba ngemakhophi latinkhulungwane letintsatfu) Linyenti lebazalwane besilisa banika bufakazi lobunesizotsa kutsi tembulo lebesetigcogcelwe kukhishwa ngaleso sikhatsi tatiliciniso, njengobe bekufakazwe nguMoya loNgcwele labebaphiwe yena. Umlandvo waJoseph Smith ulandzisa ngekutsi emvakwekutfolakala kwesembulo lesatiwa ngekutsi sigaba1, kwaba khona tinkhulumo letitsite mayelana nelulwimi lolwalusetjentisiwe etembulweni. Kwabese kutfolakala lesi sembulo.
1–3, INkhosi iyayiva imithandazo futsi iyabagadza babonisi Bayo; 4–9, Inika insayeya umuntfu lohlakaniphe kakhulu kutsi aphindzaphindze lokuncane kakhulu kwetembulo takhe; 10–14, Babonisi labetsembekile batawuphiliswa ngaMoya baphindze babone buso baNkulunkulu.
1Â Bukani futsi nilalele, O nine babonisi belibandla lami, lababutsene ndzawonye, lengiyivile imithandzazo yabo, nalengitatiko tinhlitiyo tabo, netifiso tabo letifikile phambi kwami.
2Â Bukani futsi nibone, emehlo ami asetikwenu, emazulu nemhlaba kusetandleni tami, nengcebo yaphakadze ngeyami kuninika.
3Â Netame kukholwa kutsi nitawusitfola sibusiso lesanikelwa kini; kodvwa bukani, ngicinisile ngitsi kini bekunekwesaba etinhlitiyweni tenu, futsi ngicinisile lesi sizatfu lesente ningasasitfoli.
4Â Manje mine, iNkhosi, ngininika bufakazi beliciniso balemiyaleto lephambi kwenu.
5Â Emehlo enu bekasetikwenceku yami Joseph Smith, lomNcane, futsi lulwimi lwakhe nilwejwayele, nebutsakatsaka bakhe nabati; etinhlitiyweni tenu nifune lwati lwekubeka kancono kunelulwimi lwakhe; naloku niyakwati.
6Â Manje, funani kuyo iBook of Commandments (iNcwadzi yeMiyaleto), lokuncane kakhulu ekhatsi kuyo, nikhetse loyo lohlakaniphile kakhulu emkhatsini wenu;
7Â Noma, uma kukhona noma ngubani emkhatsini wenu longenta lokufana nawo, ngaloko aninacala lekutsi aniyati kutsi iliciniso;
8Â Kodvwa uma ningeke nikhone kwenta lofana nawo, ninelicala uma ningafakazi kutsi iliciniso.
9Â Ngoba niyati kutsi kute kungalungi kuto, futsi loko lokulungile kwehlela phansi kuvela ngetulu, kuphuma kuBabe wekukhanya.
10 Ngetulu kwaloko, ngicinisile ngitsi kini kulilungelo lenu, nesetsembiso ngiyaninika nine lenibekwe kulona msebenti, kutsi nangabe nitihlubula umona nekwesaba, nititfobe phambi kwami, ngoba anikatitfobi ngalokwanele, indvwangu iyawudzatjulwa futsi niyawungibona niphindze nati kutsi nginguye—hhayi ngengcondvo yenyama noma yemvelo, kodvwa ngeyakamoya.
11Â Ngoba kute umuntfu loke wabona Nkulunkulu noma ngasiphi sikhatsi enyameni, ngaphandle nangabe loyo muntfu aphiliswe nguMoya waNkulunkulu.
12Â Futsi kute umuntfu wemvelo longamelana nebukhona baNkulunkulu, noma ngekwengcondvo yenyama.
13Â Anikwati kumelana nebukhona baNkulunkulu manje, noma nekusitwa tingilosi, ngaloko-ke, chubekani nekubeketela nite nipheleliswe.
14Â Ningavumeli tingcondvo tenu tibuyele emuva; futsi uma senifanelekile, ngesami sikhatsi lesifanele, niyawubona niphindze nikwati loko lokwaniketwa ngetandla tenceku yami Joseph Smith, lomNcane. Amen.