Sigaba 115
Sembulo lesaniketwa ngaJoseph Smith umPhrofethi, eFar West, eMissouri, mhlaka 26 Mabasa, 1838, lesatisa ngentsandvo yaNkulunkulu mayelana nekwakhiwa kwaleyo ndzawo kanye nendlu yeNkhosi. Lesi sembulo sicondziswe etikhulwini letengamele nakumalunga eliBandla.
1–4, INkhosi icamba libandla Layo ngekutsi liBandla laJesu Khristu lalabaNgcwele beTinsuku teKugcina; 5–6, ISiyoni netikhonkhwane tayo batindzawo tekuvikela netekuphephela talabaNgcwele; 7–16, LabaNgcwele bayaletwa kutsi bakhe indlu yeNkhosi eFar West; 17–19, Joseph Smith uphetse tikhiya tembuso waNkulunkulu emhlabeni.
1 Ngicinisile naku lokushiwo yiNkhosi kuwe, nceku yami Joseph Smith lomNcane, nakuwe nceku yami Sidney Rigdon, kanjalo nakuwe nceku yami Hyrum Smith, nakubeluleki bakho lababekiwe nalabatawubekwa emvakwaloku;
2 Nakuwe, nceku yami Edward Partridge, nakubeluleki bakhe;
3 Futsi nakuto tinceku tami letetsembekile letitemkhandlu lomkhulu welibandla lami eSiyoni, ngoba uyawubitwa kanjalo, nakubo bonkhe babonisi nebantfu beliBandla laJesu Khristu lalabaNgcwele beTinsuku teKugcina, labasakateke ngaphandle emhlabeni wonkhe;
4 Ngoba liyawubitwa kanjalo libandla lami ngemalanga ekugcina, ngisho liBandla laJesu Khristu lalabaNgcwele beTinsuku teKugcina.
5 Ngicinisile ngitsi kini nonkhe: Sukumani nikhanye, kute kukhanya kwenu kube sibonelo kubetive;
6 Futsi kute kubutsana ndzawonye eveni laseSiyoni, nakuto tikhonkhwane tayo, kube kwekutivikela, nekutiphephisa esivunguvungwini, naselulakeni uma selutfululwa ngaphandle kwekudidiyelwa emhlabeni wonkhe.
7 Lidolobha, iFar West, alibengumhlaba longcwele nalongcweliselwe mine; futsi liyawubitwa ngekutsi ngulelingcwele kakhulu, ngoba umhlabatsi lenime kuwo ungcwele.
8 Ngako-ke, nginiyaleta kutsi ningakhele indlu, kute kubutsane ndzawonye kuyo labangcwele bami, kute bangikhonte.
9 Futsi akube khona sicalo salomsebenti, nesisekelo, nemsebenti wekulungiselela, kulelihlobo lelilandzelako;
10 Lesicalo asentiwe ngelilanga lesine kuKholwane lolandzelako; futsi kusuka ngaleso sikhatsi kuya phambili bantfu bami abasebente ngekukhutsala kwakha indlu egameni lami;
11 Futsi ngemnyaka munye kusuka kulelilanga abacale futsi babeke sisekelo sendlu yami.
12 Ngalesi sizatfu abasebente ngekukhutsala kusuka ngaleso sikhatsi kuya phambili ite icedvwe, kusuka etjeni lesisekelo layo kuya etulu, kute kubete lutfo lwayo lolungakacedvwa.
13 Ngicinisile ngitsi kini, inceku yami Joseph, nenceku yami Sidney, nenceku yami Hyrum, abangasaphindzi bangene etikweletini ngekwakha indlu egameni lami;
14 Kodvwa indlu ayakhiwe egameni lami nekwesifanekiso lengitawunikhombisa sona.
15 Futsi uma bantfu bami bangayakhi ngekwesifanekiso lengiyawusikhombisa bumengameli babo, angeke ngiyemukele etandleni tabo.
16 Kodvwa uma bantfu bami bayakha ngekwesifanekiso lengiyawusikhombisa bumengameli babo, ngisho inceku yami Joseph nebeluleki bakhe, uma kunjalo ngitawuyemukela etandleni tebantfu bami.
17 Ngetulu kwaloko, ngicinisile ngitsi kini, kuyintsandvo yami kutsi lidolobha laseFar West kufanele lakhiwe ngekushesha ngekugcogcana kwalabangcwele bami;
18 Nekutsi letinye tindzawo kufanele timiselwe kuba tikhonkhwane etifundzeni letisedvute, njengoba kuyawuboniswa inceku yami Joseph Smith, tikhatsi ngetikhatsi.
19 Ngoba bukani, ngitawuba naye, futsi ngitawumngcwelisa phambi kwebantfu; ngoba ngimnike tikhiya talombuso nebufundisi. Kunjalo nje. Amen.