Sigaba 83
Sembulo lesaniketwa ngaJoseph Smith umPhrofethi, e-Independence, eMissouri, mhlaka 30 Mabasa, 1832. Lesi sembulo satfolakala ngesikhatsi umPhrofethi ahleli emkhandlwini nabomnakabo.
1–4, Besifazane nebantfwana banelilungelo lekondliwa ngemadvodza abo naboyise babo; 5–6, Bafelokati netintsandzane banelilungelo lekondliwa liBandla.
1 Ngicinisile, naku lokushiwo yiNkhosi, ngetulu kwemitsetfo yelibandla ngalokuphatselene nebesifazane nebantfwana, labo labangebelibandla, labalahlekelwe ngemadvodza abo naboyise babo;
2 Besifazane banelilungelo lekondliwa ngemadvodza abo, ate emadvodza abo atsatfwe emhlabeni; futsi uma bangakatfolwa bangulabaphambukako bayawuba nebulunga ebandleni.
3 Futsi uma bangaketsembeki angeke babe nebulunga ebandleni; noko bangaphila ngemafa abo ngekwemitsetfo yelive.
4 Bonkhe bantfwana banelilungelo lekondliwa batali babo bate bafike ebudzaleni.
5 Emvakwaloko, banelilungelo lekondliwa libandla, noma ngalamanye emagama endlini yengcebo, uma batali babo bete labangabanika kona lokungemafa.
6 Futsi indlu yengcebo iyawugcinwa ngeminikelo yelibandla; nebafelokati netintsandzane bayawukondliwa khona, kanjalo nalabamphofu. Amen.