Timemetelo lesiseMtsetfweni 1
LiBhayibheli neNcwadzi yaMormon tifundzisa kutsi kushada nemfati munye simiso saNkulunkulu semshado ngaphandle uma Yena asho lokwehlukile (buka 2 Samuweli 12:7–8 na Jakobe 2:27, 30). Kulandzela sembulo lesaya kuJoseph Smith, lomkhuba wesitsembu wacalwa emkhatsini wemalunga eliBandla ekucaleni kweminyaka yabo 1840 ( buka sigaba 132). Kusukela eminyakeni yabo 1860 kuya kuyabo 1880, umbuso waseMelika waphasisa imitsetfo yekwenta lomkhuba wenkholo ube ngekho emtsetfweni. Lemitsetfo yagcina isekelwe yiNkantolo lePhakeme yaseMelika. Emvakwekutfola sembulo, Mengameli Wilford Woodruff wakhipha lesi Simemetelo lesilandzelako, lesemukelwa liBandla njengalesigunyatiwe lesisemtsetfweni nalesibophako mhlaka 6, iMphala, 1890. Loku kwaholela ekutseni umkhuba wemshado wesitsembu uphele eBandleni.
Kuloyo Longatsintseka:
Ngenca yekutsi imibiko yetindzaba itfunyelwe ngetinhloso tetembusave, isuka eSalt Lake City, lekhishwe kabanti, lebika kutsi uMkhandlu wase-Utah, embikweni wawo losandza kwentiwa loya kuMabhalane weTangekhatsi, lotsi imishado yesitsembu isentiwa nekutsi imishado lenjalo lengemashumi lamane noma ngetulu emalunga elibandla angene kuyo e-Utah kusukela ngenyanga yeNhlaba leyendlulile noma ngemnyaka lowendlulile, nekutsi etinkhulumeni teliningi baholi beliBandla bawufundzisile, bawukhutsata baphindze bagcugcutela inchubekela phambili yalomkhuba wesitsembu—
Ngako-ke mine, njengaMengameli weliBandla laJesu Khristu lalabaNgcwele beTinsuku Tekugcina, ngalesi simemetelo, ngekutitfoba lokukhulu, ngimemetela kutsi leti tinsolo tingemanga. Asifundzisi sitsembu noma umshado wekutsatsa bafati labaningi, futsi asivumeli muntfu kutsi ente lowo mkhuba, futsi ngiyaphika kutsi kukhona imishado yesitsembu lengemashumi lamane noma lesinye sibalo leyentiwe ngaleso sikhatsi emaThempelini etfu noma kunoma nguyiphi lenye indzawo kuleSifundza.
Sehlakalo sinye sibikiwe, lapho labo labebabika batsi umshado wentelwa eNdlini yekupha tipho takamoya, eSalt Lake City, ngeNtfwasahlobo ya1889, kodvwa angikakhoni kutfola kutsi ngubani lowenta lomshado; noma ngabe yini leyentiwa kulesehlakalo yentiwa ngaphandle kwelwati lwami. Kulandzela lesi sehlakalo lokutsiwa senteka leNdlu yekupha tipho takamoya, ngekuyaletwa ngimi, yabhidlitwa ngaphandle kwekucitsa sikhatsi.
Ngenca yekutsi Tishayamtsetfo setiyibekile imitsetfo levimbela imishado yesitsembu, lokuyimitsetfo inkantolo yekugcina yetikhalo letse ihambisana nemtsetfosisekelo, ngalesi simemetelo ngimemetela inhloso yami yekutfobela leyo mitsetfo, nekusebentisa emandla ami kumalunga eliBandla lengiwengamele kutsi nawo ente lokufanako.
Kute lutfo etimfundzisweni tami eBandleni noma kulabo lengisebentisana nabo, kuleso sikhatsi lesishiwo, lokukhombisa kutsi sichubekisa noma sikhutsata sitsembu; futsi uma kukhona Umbonisi weliBandla losebentise lulwini loluvakala lufundzisa imfundziso lenjalo, wekhutwe ngekushesha. Manje ngimemetela phambi kwebantfu bonkhe seluleko sami kulabaNgcwele beTinsuku Tekugcina sekutsi abayekele kwenta noma ngumuphi umshado longakavunyelwa ngumtsetfo walelive
Wilford Woodruff
Mengameli weliBandla laJesu Khristu
lalabaNgcwele beTinsuku Tekugcina.
Mengameli Lorenzo Snow wabeka loku lokulandzelako:
“Ngiphakamisa kutsi, ngoba semukela Wilford Woodruff njengaMengameli weliBandla laJesu Khristu lalabaNgcwele beTinsuku Tekugcina, futsi nalokungiyo yodvwa indvodza emhlabeni kulesi sikhatsi sanyalo lenetikhiya tetimiso tekubopha, simtsatsa njengalogunyatwe ngalokugcwele ngenca yesikhundla sakhe kukhipha lesi Simemetelo lesifundziwe kute sisive, lesakhishwa mhlaka 24 iNyoni, 1890, nekutsi njengeliBandla kuloMhlangano loMkhulu lohlangene, siyasemukela simemetelo ngalokuphatselene nemishado yesitsembu njengalesigunyatiwe lesisemtsetfweni nalesibophako.”
Salt Lake City, e-Utah, mhlaka 6 iMphala 1890.
Ticaphuno letitsatfwe eTinkhulumeni letiNtsatfu
taMengameli Wilford Woodruff
ngalokuphatselene nalesi Simemetelo
INkhosi angeke ingivumele noma ivumele noma nguyiphi lenye indvodza leme njengaMengameli waleliBandla kutsi inidukise. Akukho eluhlelweni. Akukho emcondvweni waNkulunkulu. Uma bengingakwetama loko, iNkhosi beyingangisusa endzaweni yami, futsi beyingenta kanjalo kunoma nguyiphi lenye indvodza letama kudukisa bantfwana bebantfu etembulweni taNkulunkulu kanjalo nasemsebentini wabo. (EMhlanganweni loMkhulu weNcenye wemnyaka wemaShumi lasitfupha nakunye weliBandla, ngemsombuluko, mhlaka 6 iMphala 1890, eSalt Lake City, e-Utah. Kwabikwa kuDeseret Evening News, yamhlaka 11 iMphala 1890, likhasi 2.)
Akusho lutfo kutsi ngubani lophilako noma ngubani lofako, noma ngubani lobitwe kuhola leliBandla, kufanele balihole ngekuphefumulelwa nguNkulunkulu Somandla. Uma bangenti ngaleyo ndlela, angeke bakhone kukwenta sanhlobo. …
Ngibe netembulo muva nje, letibaluleke kakhulu kimi, futsi ngitawunitjela kutsi iNkhosi itsiteni kimi. Ake nicabange ngaloko lokubitwa ngekutsi simemetelo. …
INkhosi ingitjele kutsi ngibute labaNgcwele beTinsuku Tekugcina umbuto, futsi ingitjele kutsi uma bangalalela loko lengikushito kubo futsi baphendvule nembuto lobutwe kubo, ngaMoya nangemandla aNkulunkulu, bebatawuphendvula bonkhe ngalokufanako, futsi bebatawukholelwa bonkhe ngendlela lefanako ngalokuphatselene naloludzaba.
Umbuto ngulo: Nguyiphi indlela lenekuhlakanipha kakhulu lokumele labaNgcwele beTinsuku Tekugcina bayilandzele—kuchubeka nekwetama kwenta umshado wesitsembu, nemitsetfo yesive lephikisana nawo nekuphikiswa tigidzi letingemashumi lasitfupha tebantfu, nemphumela wekutsatfwa nekulahleka kwawo onkhe emaThempeli, nekumiswa kwato tonkhe timiso letikuwo, talabaphilako nalabafile, nekuboshwa kweBumengameli bekuCala nalabaliShumi nakuBili, netinhloko temindeni eBandleni, kanye nekutsatfwa kwemphahla yebantfu (konkhe loku lokungenta labangcwele bawuyekele lomkhuba); noma, emvakwekwenta nekuhlupheka lesinako ngekubambelela kwetfu kulomgomo wekuyekela lomkhuba sitfobele umtsetfo, ngekwentanjalo sishiye baPhrofethi, baPhostoli nabobabe emakhaya, kute bafundzise bantfu baphindze bente imisebenti yeliBandla, siphindze sishiye emaThempeli abe setandleni talabaNgcwele, kute bakwati kwenta timiso teliVangeli, talabaphilako lababafile na?
INkhosi yangikhombisa kahle ngembono nangesembulo kutsi bekutawentekani kube asiwuyekelanga lomkhuba. Kube asiwuyekelanga, beningeke niwadzinge … emadvodza kulelithempeli laseLogan; ngoba tonkhe timiso betitawuyekelwa kulo lonkhe live laseSiyoni. Kudideka bekutawubusa kuwo wonkhe Israyeli, futsi emadvodza lamaningi bekatawuba tiboshwa. Lolusizi belutakwehlela liBandla lonkhe, futsi besitawuphoceleleka kuyekela lomkhuba. Manje, umbuto utsi, ngabe kufanele umiswe ngalendlela, noma ngendlela iNkhosi lesembulele yona, futsi sishiye baPhrofethi nebaPhostoli nabobabe betfu kutsi babe ngulabakhululekile, sishiye nemathempeli etandleni tebantfu, kute labafile bahlengwe. Sibalo lesikhulu sesikhululiwe endlini yelijele eveni lemimoya ngulaba bantfu, futsi ingabe lomsebenti uyawuchubeka noma ume na? Ngulona umbuto lengiwubeka kulabangcwele beTinsuku Tekugcina. Kufanele nitincumele nine. Ngifuna nitiphendvulele nine lombuto. Angeke ngiwuphendvule; kodvwa ngitsi kini ngiso kanye lesimo tsine njengebantfu lebesitawuba kuso kube asiyitsatsanga lendlela lesiyitsatsile.
… Ngabona kahle kutsi bekutakwentekani kube akwentiwanga lutfo. Sengibe nawo lomoya kimi sikhatsi lesidze. Kodvwa ngifuna kusho loku: Bengiyawuyekela emathempeli onkhe aphume etandleni tetfu; bengiyakuya ejele mine lucobo, ngiphindze ngivumele onkhe emadvodza aye lapho, kube Nkulunkulu wasezulwini akangiyaletanga kutsi ngente loko lengakwenta; futsi kwatsi lapho sikhatsi sesifika sekutsi ngente loko lengayaletwa kona, kwaba sobala konkhe kimi. Ngaya phambi kweNkhosi, ngabhala loko iNkhosi leyangitjela kutsi ngikubhale. …
Nginishiya naloku, kute nizindle ngako futsi nikucabange. INkhosi isemsebentini kanye natsi. (UMhlangano weSikhonkhwane saseCache, eLogan, e-Utah, ngelisontfo, mhlaka 1 Lweti 1891. Kwabikwa kuDeseret Weekly, mhlaka 14 Lweti 1891.)
Manje sengitawunitjela lokwembulwa kimi nalokwentiwa yiNdvodzana yaNkulunkulu kulentfo. … Tonkhe leti tintfo betitawukwenteka, njengoba Nkulunkulu Somandla aphila, kube leso Simemetelo asiniketwanga. Ngako-ke iNdvodzana yaNkulunkulu yativa itsambekela ekutseni leyontfo yetfulwe ebandleni nasemhlabeni kute ifeze tinhloso letisemcondvweni wayo. INkhosi beseyincumile ngekumiswa kweSiyoni. Beseyincumile ngekucedvwa kwelithempeli. Beseyincumile kutsi insindziso yalabaphilako nalabafile kufanele inikwe kuletigodzi tetintsaba. Futsi Nkulunkulu Somandla besekancumile kutsi Develi akukafaneli akuvimbele loko. Uma ningakucondza loko, loko kusikhiya sesizatfu sekunikwa kwalesi Simemetelo. (Kutsatfwe enkhulumeni yekunikelwa kwesitfupha kweliThempeli laseSalt Lake, ngaMabasa 1893. Umbhalo lobhalwe ngemshini wemisebenti yeKunikelwa, eNdlini yemiLandvo, kuMnyango wetemiLandvo yeliBandla, eSalt Lake City, e-Utah.)