Sigaba 74
Sembulo lesaniketwa Joseph Smith umPhrofethi, eSifundzeni saseWayne, eNew York, ngemnyaka wa 1830. Ngisho nangaphambi kwekuhlelwa kweliBandla, imibuto beyicubukile mayelana nendlela lengiyo yekubhabhatisa, lokwabangela kutsi umPhrofethi afune timphendvulo ngaloludzaba. Umlandvo waJoseph Smith utsi lesi sembulo siyinchazelo yalencwadzi 1Â kubaseKhorinte 7:14, umbhalo lowawuvame kusetjentiswa kunika sizatfu sekubhajatiswa kwebantfwana.
1–5, Pawula weluleka liBandla langesikhatsi sakhe kutsi lingawugcini umtsetfo waMosi; 6–7, Bantfwana labancane bangcwele futsi bangcweliswa ngeNhlawulo.
1 Ngoba indvodza lengakholwa ingcwelisiwe ngemfati wayo, nemfati longakholwa ungcwelisiwe ngendvodza yakhe; kube bekungenjalo ngabe bantfwabenu bangcolile, kodvwa njengamanje bangcwele.
2 Manje, etikhatsini tebaphostoli umtsetfo wekusoka bewentiwa emkhatsini wawo onkhe emaJuda labekangalikholwa livangeli laJesu Khristu.
3 Futsi kwenteka kutsi kwacubuka kuphikisana lokukhulu emkhatsini webantfu mayelana nemtsetfo wekusoka, ngoba umyeni longakholwa bekafisa kutsi bantfwana bakhe basokwe futsi babe ngaphansi kwemtsetfo waMosi, lowo mtsetfo lobesewugcwalisekile.
4 Futsi kwenteka kutsi bantfwana, bakhuliswe ngaphansi kwemtsetfo waMosi, banaka emasiko aboyise bangalikholwa livangeli laKhristu, ngaloko abatange babe ngulabangcwele.
5 Ngaloko-ke, ngalesi sizatfu umphostoli wabhalela libandla, aliniketa umyaleto, hhayi weNkhosi, kodvwa lobekungewakhe, kutsi lokholwako angashadi nalongakholwa; ngaphandle uma umtsetfo waMosi uyekelwa emkhatsini wabo,
6 Kute bantfwababo bahlale bangakasoki; nekutsi lisiko liyekelwe, lelalitsi bantfwana labancane abasiko ngcwele; ngoba belentiwa emkhatsini wemaJuda;
7 Kodvwa bantfwana labancane bangcwele, bangcweliswe ngenhlawulo yaJesu Khristu; futsi nguloku lokushiwo yimibhalo lengcwele.