1 Alibongwe libito lakho, O Nkhosi Nkulunkulu wema-Israyeli, logcina sivumelwano nalokhombisa bubele etincekwini takho letihamba ngebucotfo phambi kwakho, ngetinhlitiyo tato tonkhe—

2 Wena loyalete tinceku takho kutsi takhe indlu egameni lakho kulendzawo [eKirtland].

3 Manje uyabona, O Nkhosi, kutsi tinceku takho setente njengekwemyaleto wakho.

4 Manje siyakucela, Babe loNgcwele, egameni laJesu Khristu, iNdvodzana yakho letsandzekako, ngeligama layo kuphela insindziso lenganiketwa kubantfwana bebantfu, siyakucela, O Nkhosi, kutsi wemukele lendlu, umsebenti wetandla tetfu, tinceku takho, losiyalete kutsi siyakhe.

5 Ngoba uyati kutsi siwente lomsebenti ngaphansi kwetinhlupheko letinkhulu, futsi esimeni setfu sekweswela sinikele ngetintfo tetfu kwakha indlu egameni lakho, kute iNdvodzana yeMuntfu ibe nendzawo yekutibonakalisa kubantfu bayo

6 Futsi njengobe ushito esembulweni, lesiniketwe kitsi, usibita ngebahlobo bakho, utsi—Bitani umhlangano wenu longcwele, njengobe nginiyaletile;

7 Futsi njengobe bonkhe bete lukholo, funani ngekukhutsala niphindze nifundzisane emavi ekuhlakanipha; yebo, funani etincwadzini letakhako emavi ekuhlakanipha, funani kutfola lwati ngisho nangekufundza nangekukholwa futsi;

8 Tihleleni; nilungise konkhe lenikudzingako, nakhe indlu, ngisho indlu yekuthandaza, indlu yekuzila, indlu yekukholwa, indlu yekufundza, indlu yebukhosi, indlu yekuhleleka, indlu yaNkulunkulu;

9 Kute kungena kwenu kube segameni leNkhosi, kute kuphuma kwenu kube segameni leNkhosi; kute konkhe kubingelelana kwenu kube segameni leNkhosi, ngetandla letiphakanyiselwe kuLosetikwako Konkhe—

10 Manje, Babe loNgcwele, siyakucela kutsi usisite, tsine bantfu bakho, ngemusa wakho, ekubiteni umhlangano wetfu longcwele, kute loko kwentelwe kukuhlonipha futsi kute kwemukelwe nguwe;

11 Ngendlela yekutsi sitfolakale sifanelekile, emehlweni akho, kute sitfole kugcwaliseka kwetetsembiso lowutentile kitsi, tsine bantfu bakho, kuletembulo letiniketwe kitsi;

12 Kute inkhatimulo yakho yehlele kubantfu bakho, nakulendlu yakho, lesiyehlukanisela kuwe manje, kute ingcweliswe futsi inikelwe kutsi ibe ngcwele, nekutsi bukhona bakho lobungcwele buhlale bukhona njalo kulendlu;

13 Nekutsi bonkhe bantfu labayawungena emnyango walendlu yeNkhosi baweve emandla akho, futsi bative baphocelelekile kuvuma kutsi uyingcwelisile, nekutsi yindlu yakho, indzawo yebungcwele bakho.

14 Futsi siyacela usinike, Babe loNgcwele, kutsi bonkhe labayawukhonta kulendlu bafundziswe emavi ekuhlakanipha etincwadzini letakhako, nekutsi bafune lwati ngisho ngekufundza, nangekukholwa, njengobe ushito;

15 Kute bakhule kuwe, baphindze baphiwe kuphelela konkhe kwaMoya loNgcwele, futsi bahlelwe ngekwemitsetfo yakho, balungele nekutfola konkhe lokudzingekako;

16 Kute lendlu ibe yindlu yekuthandaza, indlu yekuzila, indlu yekukholwa, indlu yebukhosi neyaNkulunkulu, ngisho indlu yakho;

17 Kute konkhe kungena kwebantfu bakho, kulendlu, kube segameni leNkhosi;

18 Kute konkhe kuphuma kwabo kulendlu kube segameni leNkhosi;

19 Futsi kute konkhe kubingelelana kwabo kube segameni leNkhosi, ngetandla letingcwele, letiphakanyiselwe kuLosetikwako Konkhe;

20 Nekutsi kubete lokungakahlanteki lokuyawuvunyelwa kutsi kungene endlini yakho kutawuyingcolisa;

21 Futsi uma bantfu bakho baphambuka, noma ngumuphi kubo, bangaphendvuka ngekushesha baphindze babuyele kuwe, batfole umusa emehlweni akho, futsi babuyiselwe etibusisweni lowutibekile kutsi titfululelwe etikwalabo labayawukuhlonipha endlini yakho.

22 Futsi siyakucela, Babe loNgcwele, kutsi tinceku takho tiphume kulendlu tihlome ngemandla akho, nekutsi libito lakho libe setikwato, nenkhatimulo yakho ititungelete ndzawo tonkhe, netingilosi takho tibagadze;

23 Futsi kusuka kulendzawo tihambise tindzaba letinkhulu naletimangalisako, ngeliciniso, kute kube semikhawulweni yemhlaba, kute bati kutsi lona ngumsebenti wakho, nekutsi uselulile sandla sakho, kugcwalisa loko lowukukhulumile ngemilomo yebaphrofethi, ngalokuphatselene nemalanga ekugcina.

24 Siyakucela, Babe loNgcwele, kutsi ucinisekise labantfu labayawukhonta, nalabayawuliphatsa ngekuhlonipha libito nekuma kulendlu yakho, kuto tonkhe titukulwane kanye naphakadze;

25 Kute kubebete sikhali lesilolelwe bona lesiyawuphumelela; kute loyo lobembela umgodzi kungene yena kuwo;

26 Kute kubebete inhlanganisela yebubi leyawuba nemandla ekubavukela futsi incobe bantfu bakho lokuyawubekwa kubo libito lakho kulendlu;

27 Futsi uma kukhona bantfu labayawuvukela labantfu, lulaka lwakho luvutse ngekumelana nabo;

28 Futsi uma bayawubashaya labantfu utawubashaya nabo; siyacela kutsi ubalwele bantfu bakho njengobe wenta ngetikhatsi temphi, kute bakhululwe etandleni tato tonkhe titsa tabo.

29 Siyakucela, Babe loNgcwele, kutsi ubathulise, uphindze ubamangalise, futsi ubafake ehlazweni nekudideka, bonkhe labo labandzisa imibiko yemanga khashane, emhlabeni, ngekumelana nenceku noma tinceku takho, uma bangeke baphendvuke, uma livangeli laphakadze selimenyetelwa etindlebeni tabo;

30 Nekutsi yonkhe imisebenti yabo yentiwe ibe lite, futsi ishanyelwe sangcotfo, nangetehlulelo lowuyawutitfumela kubo ngelulaka lwakho, kute kuphele kucala emanga nekuhlambalata bantfu bakho.

31 Ngoba uyati, O Nkhosi, kutsi tinceku takho betimsulwa phambi kwakho ekufakazeni ngelibito lakho, ngaloko letiye tehlelwa nguleti tintfo.

32 Ngako-ke siyacela phambi kwakho kukhululwa konkhe nalokuphelele ngaphansi kwalelijoko;

33 Lephule, O Nkhosi; lephule etintsanyeni tetinceku takho, ngemandla akho, kute sikwati kuvuka emkhatsini walesi situkulwane futsi sente umsebenti wakho.

34 O Jehova, bani nebubele kulabantfu, futsi njengobe bonkhe bantfu bona, tsetselela tiphambeko tebantfu bakho, tesulwe ingunaphakadze.

35 Kugcotjwa kwetisebenti takho akube yintfo lengayukuphela kubo ngemandla lasuka etulu.

36 Akugcwaliseke kubo, njengakulabo bangelilanga lePhentekhoste; siphiwo setilimi asitfululelwe kubantfu bakho, ngisho netilimi letehlukana ekhatsi kungatsi yinkhehlenhkehle yemlilo, nekuhunyushwa kwato.

37 Futsi lendlu yakho ayigcwaliswe, njengekuhhusha kwemoya lomkhulu, ngenkhatimulo yakho.

38 Beka etincekwini takho bufakazi besivumelwano, kute kutsi uma tiphuma tiphindze timemetela livi lakho tiwugcine umtsetfo, futsi tilungise tinhlitiyo talabangcwele bakho kuto tonkhe leto tehlulelo lotawutitfumela, elulakeni lwakho, kubantfu basemhlabeni, ngenca yetiphambeko tabo, kute bantfu bakho bangalahlekelwa litsemba ngelilanga lekuhlupheka.

39 Futsi noma nguliphi lidolobha tinceku takho letiyawungena kulo, nebantfu balelo dolobha bemukele bufakazi babo, kuthula kwakho nensindziso yakho akube kulelo dolobha; kute bagcogce labalungile baphume kulelo dolobha, kute bete eSiyoni, noma etikhonkhwaneni tayo, tindzawo letikhetfwe nguwe, ngemaculo enjabulo yaphakadze;

40 Futsi ngaphambi kwekutsi loku kufezeke, tehlulelo takho atingaweli kulelidolobha.

41 Futsi noma nguliphi lidolobha tinceku takho letiyawungena kulo, futsi bantfu balelo dolobha bangabemukeli bufakazi betinceku takho, netinceku takho tibacwayise kutsi batisindzise kulesi situkulwane lesiphambene, akube kulelo dolobha ngekwaloko lowukukhulumile ngemilomo yebaphrofethi bakho.

42 Kodvwa tikhulule, O Jehova, siyakuncenga, tinceku takho etandleni tabo, futsi ubahlambulule engatini yabo.

43 O Nkhosi, asikujabuleli kubhujiswa kwebantfu betfu; imiphefumulo yabo iligugu phambi kwakho;

44 Kodvwa livi lakho kufanele ligcwaliseke. Sita tinceku takho kutsi titsi, ngekulekelelwa ngumusa wakho: Intsandvo yakho ayentiwe, O Nkhosi, hhayi yetfu.

45 Siyati kutsi ukhulumile ngemilomo yebaphrofethi bakho tintfo letesabekako ngalokuphatselene nalababi, etikhatsini tekugcina—kutsi utawutfulula tehlulelo takho, ngaphandle kwesilinganiso;

46 Ngako-ke, O Nkhosi, khulula bantfu bakho elusizini lwalababi; tinike emandla tinceku takho kutsi tigcine umtsetfo, futsi tibophe bufakazi, kute tilungele kumelana nelilanga lekushiswa.

47 Siyakucela, Babe loNgcwele, kutsi ukhumbule labo labacoshwe bantfu labahlala esifundzeni saseJackson, eMissouri, emaveni langemafa abo, futsi lephule, O Nkhosi, lelijoko lekuhlushwa lelibekwe etikwabo.

48 Uyati, O Nkhosi, kutsi bebacindzetelwe kakhulu baphindze bahlushwa bantfu lababi; futsi tinhlitiyo tetfu tigcwele lusizi ngenca yemitfwalo yabo lematima.

49 O Nkhosi, kuyawute kube nini uvumela labantfu batfwale loku kuhlupheka, nekukhala kwebantfu babo labamsulwa kwenyukela etindlebeni takho, nengati yabo ita njengebufakazi phambi kwakho, futsi ungabubonakalisi bufakazi bakho ngenca yabo na?

50 Bani nebubele, O Nkhosi, kulesicuku salababi, lesicoshe bantfu bakho, kute bayekele kuphanga, kute baphendvuke etonweni tabo uma kuphendvuka kukhona.

51 Kodvwa uma bangeke baphendvuke, yembula umkhono wakho, O Nkhosi, ubuyise loko lowukumisile kwaba yiSiyoni kute kuzuze bantfu bakho.

52 Futsi uma kungeke kube ngalenye indlela, kute umgomo webantfu bakho ungagcwaliseki phambi kwakho shangatsi lulaka lwakho lungavutsa, nentfukutselo yakho yehlele etikwabo, kute babhujiswe, timphandze nemagala, ngaphansi kwelizulu;

53 Kodvwa nangabe batawuphendvuka, wena unemusa nesihawu, futsi uyawulususa lulaka lwakho uma ubuka buso baloGcotjiwe wakho.

54 Bani nebubele, O Nkhosi, kuto tonkhe tive temhlaba; bani nebubele kubabusi belive letfu; Shangatsi leyo migomo, leyavikelwa ngendlela lehloniphekile nalebuchawe, lokunguMtsetfosisekelo welive letfu, bokhokho betfu, ingamiswa ingunaphakadze.

55 Khumbula emakhosi, tikhulu, labaphakeme, nalabakhulu bemhlaba, nabo bonkhe bantfu, nemabandla, bonkhe labamphofu, labeswele, nalabahluphekile bemhlaba;

56 Kute tinhlitiyo tabo titsanjiswe uma tinceku takho setiphuma endlini yakho, O Jehova, kutawufakaza ngelibito lakho; kute lubandlululo lwabo lukhweshele liciniso, futsi bantfu bakho batfole kwemukeleka emehlweni abo bonkhe;

57 Kute wonkhe umhlaba wati kutsi tsine, tinceku takho, silivile livi lakho, nekutsi usitfumile;

58 Kute emkhatsini wabo bonkhe laba, tinceku takho, emadvodazana a-Jakobe, agcogce labalungile kute bakhe lidolobha lelingcwele egameni lakho, njengobe ubayaletile.

59 Siyakucela kutsi umisele iSiyoni letinye tikhonkhwane ngaphandle kwalesi losewusimisile, kute kubutsana kwebantfu bakho kuchubeke ngemandla lamakhulu nangebukhosi, kute umsebenti wakho ufinyetwe ngekulunga.

60 Manje lawa mavi, O Nkhosi, siwakhulumile phambi kwakho, mayelana netembulo nemiyaleto losinikete yona, tsine lesihlangene nebeTive.

61 Kodvwa uyati kutsi unelutsandvo lolukhulu kubantfwana baJakobe, labasakatwe etintsabeni sikhatsi lesidze, elangeni leligucubele nalelimnyama.

62 Ngako-ke siyakucela kutsi ube nebubele kubantfwana baJakobe, kute iJerusalema, kusuka ngalesi sikhatsi, icale kubuyiselwa.

63 Nelijoko lebugcili licale kwephulwa endlini yaDavide;

64 Futsi nebantfwana bakaJuda bacale kubuyela emihlabeni loyinike Abrahama, uyise.

65 Futsi wente kutsi insali yaJakobe, lebeyicalekisiwe yaphindze yashaywa ngenca yetiphambeko tayo, iphendvuke esimeni sayo sekungaphucuki nekuba nelunya ite ekupheleleni konkhe kwelivangeli lelingunaphakadze;

66 Kute babeke phansi tikhali tabo tekucitsa ingati, bayekele nekuvukela kwabo.

67 Futsi shangatsi yonkhe insali lesakatiwe yaka-Israyeli, lecoshiwe yate yefika emikhawulweni yemhlaba, ingafinyelela ekwatini liciniso, ikholwe kuMesiya, futsi ibuyiselwe iphume ekucindzetelweni, ijabule phambi kwakho.

68 O Nkhosi, khumbula inceku yakho, Joseph Smith, lomNcane, nato tonkhe tinhlupheko nekutingelwa kwakhe—kutsi wenta sivumelwano kanjani naJehova, futsi wafunga kuwe, O Nkulunkulu Somandla waJakobe—nemiyaleto lomnikete yona, nekutsi wetamile ngebucotfo kwenta intsandvo yakho.

69 Bani nemusa, O Nkhosi, kumkakhe nebantfwana bakhe, kute baphakanyiselwe ebukhoneni bakho, futsi bagcinwe ngesandla sakho lesikhulisako.

70 Bani nebubele kuto tonkhe tihlobo tabo, kute lubandlululo lwabo lucedvwe futsi lukhukhulwe njengesihlambi semanti; kute baphendvuke futsi bahlengwe na-Israyeli, bati kutsi wena unguNkulunkulu.

71 Khumbula, O Nkhosi, bomengameli, ngisho bonkhe bomengameli belibandla lakho, kute sandla sakho sangesekudla sibaphakamise, kanye nayo yonkhe imindeni yabo, netihlobo tabo, kute emabito abo achubeke futsi akhunjulwe phakadze etitukulwaneni ngetitukulwane.

72 Khumbula lonkhe libandla lakho, O Nkhosi, nayo yonkhe imindeni yalo, nato tonkhe tihlobo talo, nabo bonkhe labagulako nalabahlushiwe balo, nabo bonkhe labamphofu nalabamnene bemhlaba; kute umbuso, lowumisile ngaphandle kwetandla, ube yintsaba lenkhulu futsi ugcwalise umhlaba wonkhe;

73 Kute libandla lakho liphume ehlane lebumnyama, likhatimule libe lihle njengenyanga, likhanye njengelilanga, futsi lesabeke njengelibutfo leliphetse tiboniso temphi;

74 Futsi lihlotjiswe njengamakoti ngalelo langa lapho uyawukwembula emazulu, wente tintsaba tigobhote ebukhoneni bakho, netigodzi tiphakanyiswe, netindzawo letimagebhugebhu tilingane; kute inkhatimulo yakho igcwale umhlaba wonkhe;

75 Kute kutsi uma licilongo likhalela labafile, siyawuhlwitfwa etulu emafini kuyawukuhlangabeta, kute sibe neNkhosi njalo;

76 Kute tingubo tetfu tihlantwe, kute sembatsiswe tingubo tekulunga, siphatse emasundvu etandleni tetfu, nemichele yenkhatimulo etinhloko tetfu, futsi sivune kujabula kwaphakadze ngako konkhe kuhlupheka kwetfu.

77 O Nkhosi Nkulunkulu Somandla, sive kuleti ticelo tetfu, futsi usiphendvule usezulwini, endlini yakho lengcwele, lapho uhleti khona esihlalweni sebukhosi, unenkhatimulo, kuhlonishwa, emandla, bukhulu, kubusa, liciniso, kulunga, kwehlulela, bubele, nekuphelela konkhe lokungenamkhawulo, kusuka phakadze kuya phakadze.

78 O sive, O sive, O sive, O Nkhosi! Futsi utiphendvule ticelo tetfu, uphindze wemukele kunikelwa kwalendlu kuwe, umsebenti wetandla tetfu, lesiyakhele libito lakho;

79 Futsi naleli libandla, kutsi libeke libito lakho kulo. Usilekelele ngemandla aMoya wakho, kutsi sihlanganise emaphimbo etfu nalawo maserafi lakhatimulako, nalacwebetelako latungelete sihlalo sakho sebukhosi, ngekuhalalisa kwekudvumisa, sihlabela Hosana kuNkulunkulu nakulo liWundlu!

80 Futsi laba, labagcotjiwe, bembatsiswe ngensindziso, nalabangcwele bakho bamemete kakhulu ngekujabula. Amen, futsi Amen.