Sigaba 133
Sembulo lesaniketwa ngaJoseph Smith umPhrofethi, eHiram, e-Ohio, mhlaka 3 Lweti, 1831. Kwendvulela lesi sembulo, umlandvo waJoseph Smith utsi, “Ngalesi sikhatsi betitiningi tintfo Babonisi labebafisa kutati mayelana nekushumayela liVangeli kubantfu basemhlabeni, nangalokuphatselene nekubutsana; kute bahambe ekukhanyeni kweliciniso, baphindze bafundziswe kusuka etulu, mhlaka 3 Lweti, 1831, ngabuta eNkhosini ngase ngitfola lesi sembulo lesilandzelako lesibalulekile.” Lesi sigaba sacala kwengetwa encwadzini yeMfundziso neTivumelwano njengesitsasiselo kwatsi kamuva saba ngulesinye setigaba.
1–6, LabaNgcwele bayaletwa kutsi balungiselele Kubuya kwesiBili; 7–16, Bantfu bayaletwa kutsi babaleke eBhabhulona, bete eSiyoni, balungiselele lilanga lelikhulu leNkhosi; 17–35, Utawukuma etikweNtsaba yaseSiyoni, emavekati atawugucuka abe live linye, netive letilahlekile taka-Israyeli titawubuya; 36–40, Livangeli labuyiselwa ngaJoseph Smith kute lishunyayelwe emhlabeni wonkhe; 41–51, INkhosi iyawukwehla ngemphindziselo etikwalababi; 52–56, Kuyawuba ngumnyaka walabahlengiwe Bayo; 57–74, Livangeli litawutfunyelwa kusindzisa labaNgcwele nekubhujiswa kwalababi.
1 Lalelani, O nine bantfu belibandla lami, kusho iNkhosi Nkulunkulu wenu, nive livi leNkhosi ngalokuphatselene nani—
2 INkhosi leyawukuta masinyane ethempelini layo; iNkhosi leyawukwehlela etikwemhlaba nesicalekiso kutawukwehlulela; yebo, etikwato tonkhe tive letimkhohlwako Nkulunkulu, nasetikwabo bonkhe lababi emkhatsini wenu.
3 Ngoba uyawukwembula umkhono wakhe longcwele embikwato tonkhe tive, nayo yonkhe imikhawulo yemhlaba iyawuyibona insindziso yaNkulunkulu wabo.
4 Ngaloko-ke, lungiselelani, lungiselelani, O bantfu bami; tingcweliseni; butsanani dzawonye, O nine bantfu belibandla lami, eveni laseSiyoni, nani nonkhe leningakayaletwa kutsi nihlale.
5 Phumani eBhabhulona, Hlantekani nine leniphetse titja teNkhosi.
6 Bitani imihlangano yenu lengcwele, nikhulume njalo lomunye kulomunye. Wonkhe umuntfu akabite libito leNkhosi.
7 Yebo, ngicinisile ngiyaphindza ngitsi kini, sikhatsi sesifikile lapho livi leNkhosi litsi kini: Phumani eBhabhulona; butsanani niphume emkhatsini wetive, kusukela emagumbini lamane emhlaba, kusukela emkhawulweni lomunye welizulu kute kube kulomunye.
8 Tfumelani babonisi belibandla lami etiveni letikhashane; etichingini telwandle; batfumeleni kulamanye emave; ncusani tive tonkhe, kubeTive kucala, emvakwaloko nakumaJuda.
9 Bukani, nibone, lesi kuyawuba simemetelo sabo, nelivi leNkhosi kubo bonkhe bantfu: Hambani niye eveni laseSiyoni, kute imincele yebantfu bami yandziswe, netikhonkhwane tayo ticiniswe, kute iSiyoni ichubekele etifundzeni ndzawo tonkhe.
10 Yebo, simemetelo asiye emkhatsini wabo bonkhe bantfu: Vukani nisukume niyawuhlangabeta uMyeni; bukani nibone, uMyeni uyeta; hambani niyawumhlangabeta. Tilungiseleleni lilanga lelikhulu leNkhosi.
11 Ngako-ke, lindzani, ngoba anilati lilanga noma lihora.
12 Ngako-ke, labo labasemkhatsini webeTive ababalekele eSiyoni.
13 Labo labasive sakaJuda babalekele eJerusalema, etintsabeni tendlu yeNkhosi.
14 Phumani emkhatsini wetive, ngisho naseBhabhulona, emkhatsini webubi, lokuyiBhabhulona yamoya.
15 Kodvwa ngicinisile, naku lokushiwo yiNkhosi, kubaleka kwenu akungabi ngulokusheshako, kodvwa tonkhe tintfo atilungiswe phambi kwenu; futsi loyo lohambako, akangabuki emuva funa imbubhiso letumanako imehlele.
16 Lalelani nive, O nine bantfu basemhlabeni. Lalelani, ndzawonye nine babonisi belibandla lami, nive livi leNkhosi; ngoba ubita bonkhe bantfu, futsi uyaleta bonkhe bantfu dzawo tonkhe kutsi baphendvuke.
17 Ngoba bukani, iNkhosi Nkulunkulu itfumele ingilosi kutsi imemetele emkhatsini welizulu itsi: Lungisani indlela yeNkhosi, nente tindlela tayo ticondze, ngoba sikhatsi sekuta kwayo sesisedvute—
18 Lapho liWundlu liyawukuma etikweNtsaba yaseSiyoni, lime kanye nebantfu labatinkhulungwane letilikhulu nemashumi lamane nakune, banelibito leYise libhalwe emabuntini abo.
19 Ngaloko-ke, lungiselelani kuta kweMyeni; phumani, phumani niyawumhlangabeta.
20 Ngoba bukani, uyawukuma etikwentsaba yemiNcumo, nasetikwelwandle lolukhulu, ngisho ekujuleni lokukhulu, nasetikwetichingi telwandle, nasetikwelive laseSiyoni.
21 Futsi uyawubhodla eSiyoni, aphindze akhulume aseJerusalema, futsi livi lakhe liyawuvakala kubo bonkhe bantfu;
22 Futsi kuyawuba livi lelifanana nemabhudlo emanti, nalivi lelifanana nekudvuma lokukhulu, lokuyawudzilita tintsaba, netigodzi angeke titfolakale.
23 Uyawuyaleta kujula lokukhulu, futsi kuyawuhlehla kuye emaveni lasenyakatfo, bese tichingi tiba live linye.
24 Futsi live laseJerusalema nelive laseSiyoni ayawubuyiselwa etindzaweni tawo, nemhlaba uyawuba njengoba bewunjalo emalangeni ngaphambi kwekube uhlukaniswe.
25 Futsi iNkhosi, ngisho uMsindzisi, iyawukuma emkhatsini webantfu bayo, futsi iyawubusa etikwabo bonkhe bantfu.
26 Bese labo labasemaveni lasenyakatfo bayawukhunjulwa yiNkhosi; nebaphrofethi babo bayawuliva livi layo, futsi angeke basatibamba; bayawushaya emadvwala, nelichwa liyawugobhota phambi kwabo.
27 Futsi kuyawukwakhiwa umgwaco lomkhulu ekhatsi nelwandle lolukhulu.
28 Titsa tabo tiyawuba ngaphansi kwabo,
29 Futsi elugwadvuleni lolomile kuyawuphuma sitiba semanti lageletako; nesihlabatsi lesishisako angeke sisaba live lelomile.
30 Futsi bayawuletsa emagugu abo labaluleke kakhulu kubantfwana ba-Efrayimu, tinceku tami.
31 Nemincele yetintsaba taphakadze iyawutfutfumela phambi kwabo.
32 Lapho bayawuguca phansi betfweswe umchele wenkhatimulo, ngisho eSiyoni, ngetandla tetinceku teNkhosi, ngisho bantfwana ba-Efrayimu.
33 Bayawugcwaliswa ngemaculo enjabulo yaphakadze.
34 Bukani, lesi sibusiso saNkulunkulu waphakadze kuto tive taka-Israyeli, nesibusiso lesikhulu kuye Efrayimu nebalingani bakhe.
35 Nalabo futsi besive sakaJuda, emvakwebuhlungu babo, bayawungcweliswa kutsi babe ngulabangcwele phambi kweNkhosi, kute bahlale ebukhoneni bayo imini nebusuku, phakadze naphakadze.
36 Manje, ngicinisile itsi iNkhosi, kute letintfo tatiwe emkhatsini wenu, O bantfu basemhlabeni, ngitfumele ingilosi yami lendiza emkhatsini welizulu, inelivangeli laphakadze, levele kulabanye futsi yalinika bantfu, leyawuvela kulabaningi labahlala emhlabeni.
37 Futsi lelivangeli liyawushunyayelwa kuto tonkhe tive, imindeni, tilimi, nakubantfu.
38 Tinceku taNkulunkulu tiyawuhamba, ngelivi lelikhulu titsi: Yesabani Nkulunkulu nimnike ludvumo, ngoba sikhatsi sekwehlulela kwakhe sesifikile;
39 Futsi mkhonteni loyo lowenta lizulu nemhlaba, nelwandle, nemitfombo yemanti—
40 Tibita libito leNkhosi imini nebusuku titsi: O shangatsi ungadzabula emazulu, wehlele phansi, tintsaba titfutfumele embikwakho.
41 Futsi tiyawuphendvulwa; ngoba inkhatimulo yeNkhosi iyawufanana nemlilo loncibilisako lovutsako, futsi njengemlilo lowenta emanti abile.
42 Awu Nkhosi, yehla utawukwenta kutsi titsa takho tilati libito lakho, futsi netive tonkhe tiyawutfutfumela embikwakho—
43 Nawenta tintfo letesabekako, tintfo labangakatilindzeli;
44 Yebo, nawehla, netintsaba setitfutfumela embikwakho, uyawuhlangana naye lotfokotako nalowenta kulunga, lokukhumbulako etindleleni takho.
45 Ngoba kusukela ekucaleni kwemhlaba kute lowase weva, noma nendlebe leyase yeva, kute liso lelase labona, O Nkulunkulu, ngaphandle kwakho, kutsi tinkhulu kangakanani tintfo lowutilungiselele loyo lokulindzile.
46 Futsi kuyawutsiwa: Ngubani lona lowehla aphuma kuNkulunkulu ezulwini netingubo letibovu; yebo, losuka etindzaweni letingatiwa, logcoke ingubo yakhe yebukhosi, lohamba ngebukhulu bemandla akhe na?
47 Futsi uyawutsi: Nginguye lowakhuluma ngekulunga, nalonemandla ekusindzisa.
48 Futsi iNkhosi iyawuba bovu ngetingubo tayo, tingubo tayo tiyawuba njengetemuntfu lobekahluta emagelebisi.
49 Futsi iyawuba yinkhulu kakhulu inkhatimulo yebukhona bakhe kangangoba lilanga liyawufihla buso balo ngemahloni, nenyanga iyawugodla kukhanya kwayo, netinkhanyeti tiyawuphonswa tisuke etindzaweni tato.
50 Livi lakhe liyawuvakala litsi: Ngisinyatselile sikhamo seliwayini ngingedvwa, futsi ngiletse kwehlulela kubo bonkhe bantfu; futsi kute namunye lobekanami;
51 Ngibagcobagcobile ngentfukutselo yami, ngabapitjita ngelulaka lwami, ingati yabo ngayifafata etembatfweni tami, ngatingcolisa tonkhe timphahla tami; ngoba leli bekulilanga lekuphindzisela lebelisenhlitiyweni yami.
52 Manje umnyaka walabahlengiwe bami sewufikile; futsi bayawukhuluma ngebukhulu bemusa weNkhosi yabo, nangako konkhe loko lebaphe kona ngekulunga kwakhe, nangekwemusa wakhe, phakadze naphakadze.
53 Etinhluphekweni tabo naye wahlupheka. Futsi ingilosi yebukhona bakhe yabasindzisa; ngelutsandvo lwakhe nangemusa wakhe wabahlenga, wabatsatsa, wabetfwala kuwo onkhe amalanga akadzeni;
54 Yebo, na-Enoki futsi, nalabo labebanaye; baphrofethi labebasembikwakhe; naNowa, nalabo bebasembikwakhe; naMosi, nalabo bebasembikwakhe;
55 Futsi kusuka kuMosi kuya ku-Eliya, nekusuka ku-Eliya kuya kuJohane, labebanaKhristu ekuvukeni kwakhe, nebaphostoli labangcwele, bana-Abrahama, Isaka, naJakobe, bayawuba khona ebukhoneni beliWundlu.
56 Futsi emathuna alabangcwele ayawuvuleka, baphume beme ngasesandleni sangesekudla seliWundlu, ngesikhatsi iyawuma etikweNtsaba yaseSiyoni, nasetikwemuti longcwele, iJerusalema leNsha; futsi bayawuhlabela liculo leliWundlu, imini nebusuku phakadze naphakadze.
57 Futsi ngenca yalesi sizatfu, kute bantfu babe ngulabahlanganyela kuto timfihlakalo lebetisatawukwembulwa, iNkhosi yatfumela kuphelela kwelivangeli layo, sivumelwano sayo saphakadze, ikhuluma ngalokucacile nangalokuvakala kalula—
58 Kulungiselela lababutsakatsaka tintfo letitako emhlabeni, nemsebenti weNkhosi ngelilanga lapho lababutsakatsaka bayawujabhisa labahlakaniphile, nalabancane kakhulu bayawuba sive lesinemandla, futsi lababili bayawucosha labatinkhulungwane letilishumi tetitsa tabo.
59 Ngetintfo letibutsakatsaka temhlaba iNkhosi iyawuhlukanisa tive ngemandla aMoya wayo.
60 Ngalesi sizatfu lemiyaleto yaniketwa; yayaleta kutsi igodlwe emhlabeni ngelilanga leyaniketwa ngalo, kodvwa manje kufanele iye kubo bonkhe bantfu—
61 Futsi loku ngekwemcondvo nangekwentsandvo yeNkhosi, lebusa etikwabo bonkhe bantfu.
62 Futsi loyo lophendvukako nalotingcwelisako phambi kweNkhosi uyawunikwa kuphila lokuphakadze.
63 Kulabo labangalilaleli livi leNkhosi kuyawugcwaliseka loko lokwabhalwa ngumphrofethi Mosi, kutsi kufanele basuswe emkhatsini webantfu.
64 Naloko lokwabhalwa ngumphrofethi Malakhi: Ngoba, bukani, lilanga liyeta leliyawushisa njengemlilo lowesabekako, bonkhe labatigcabhako, yebo, nabo bonkhe labenta lokubi, bayawuba tinhlanga, lelo langa lelitako liyawubalumeka ngemlilo, kusho iNkhosi yemabandla, kute imphandze noma ligala leliyawusala kubo.
65 Ngaloko-ke, lena kuyawuba yimphendvulo yeNkhosi kubo:
66 Ngalelo langa lapho ngita kubami, kute umuntfu emkhatsini wenu lowangemukela, futsi nacoshwa.
67 Ngesikhatsi ngimemeta kwababete losabelako; kodvwa ingalo yami beyingakafinyetwa sanhlobo kutsi bengingeke nginihlenge, noma emandla ami kutsi nginisindzise.
68 Bukani, ngekukhuta kwami ngiyalomisa lwandle. Ngente imifula ibe ligwadvule; netinhlati tayo tinuke, tife ngenca yekoma.
69 Ngembatsisa emazulu ngebumnyama, ngente emasaka abe simbonyo sawo.
70 Futsi loku niyawukutfola esandleni sami—niyawulala phansi etinhlungwini letimatima.
71 Bukani, nibone, kute labayawunisindzisa; ngoba anililalelanga livi lami ngesikhatsi nginibita ngisemazulwini; anitikholwanga tinceku tami, futsi ngesikhatsi titfunyelwe kini anitemukelanga.
72 Ngaloko-ke, tabucinisa bufakazi tawubopha nemtfwalo, nine nalahlwa ebumnyameni.
73 Laba bayawuhamba baye ebumnyameni lobungephandle, lapho kunekukhala, nekugedletela kwematinyo.
74 Bukani iNkhosi Nkulunkulu wenu ikushito loku. Amen.