1 O Nkulunkulu, ukuphi na? Futsi lukuphi luphahla lolufihle indzawo lekubhacisile na?

2 Kuyawute kube nini sandla sakho usibamba, neliso lakho, yebo liso lakho lelimsulwa, libuka lisemazulwini aphakadze bubi lobentiwa kubantfu bakho nasetincekwini takho, nendlebe yakho itsintfwa kukhala kwabo na?

3 Yebo, O Nkhosi, kuyawute kube nini babhekana nalobuhlungu nalokucindzetelwa lokungekho emtsetfweni, ngaphambi kwekutsi inhlitiyo yakho ibatsambele, netibilini takho titsintseke ngekubavela na?

4 O Nkhosi Nkulunkulu Somandla, menti welizulu, umhlaba, tilwandle, nato tonkhe tintfo letikuko, futsi lolawula nalobeka develi ngaphansi kwakhe, nembuso weSheyoli lomnyama nalontima—lula sandla sakho; liso lakho alibukisise, luphahla lwakho aluphakanyiswe; indzawo yakho yekubhaca ayingasambonywa; beka indlebe yakho; inhlitiyo yakho ayitsanjiswe, netibilini takho atitsintseke ngekusivela.

5 Intfukutselo yakho ayivutse ngekumelana netitsa tetfu; futsi, entfukutselweni yenhlitiyo yakho, ngenkemba yakho siphindziselele ngebuhlungu lesiviswe bona.

6 Khumbula kuhlupheka kwalabangcwele bakho, O Nkulunkulu wetfu; netinceku takho titawujabula egameni lakho ingunaphakadze.

7 Ndvodzana yami, kuthula akube semphefumulweni wakho; bumatima bakho netinhlupheko takho tiyawuba tesikhashana;

8 Futsi emvakwaloko, uma ukubeketelela kahle, Nkulunkulu uyawukuphakamisela etulu; uyawuncoba etikwato tonkhe titsa takho.

9 Bahlobo bakho beme edvute nawe, futsi bayawuphindze bakubingelele ngetinhlitiyo letifutfumele nangetandla letinebungani.

10 Wena usengakafani naJobe; bangani bakho abalwi nawe, noma bakubeke licala lesiphambeko, njengobe benta kuJobe.

11 Futsi nalabo labakubeka licala lesiphambeko, litsemba labo liyawushabalaliswa, futsi naloko labakulindzele kuyawuncibilika njengesitfwatfwa sincibilika phambi kwemisebe leshisako yelilanga leliphumako;

12 Futsi nekutsi Nkulunkulu umemetele waphindze washicilela kushintja tikhatsi netikhatsi temnyaka, nekuphumphutsekisa tingcondvo tabo, kute bangayicondzi imisebenti yakhe lemangalisako; kute abavivinye aphindze ababambe kubo bucili babo;

13 Futsi ngesizatfu sekutsi tinhlitiyo tabo tikhohlakele, netintfo labafise kutetfwesa labanye, futsi batsandza kutsi labanye bahlupheke, titawuta kubo kakhulu;

14 Kute badvumale futsi, nematsemba abo ashabalaliswe;

15 Futsi kungakabi yiminyaka lemingaki kusukela manje, bona netitukulwane tabo bayawususwa ngaphansi kwelizulu, kusho Nkulunkulu, kangangoba kute namunye wabo losalako aphila.

16 Bacalekisiwe bonkhe labo labayawugucukela labagcotjiwe bami, kusho iNkhosi, bamemete batsi bonile babe bangakoni phambi kwami, kusho iNkhosi, kodvwa bente loko lokufanele emehlweni ami, nalengibayalete ngako.

17 Kodvwa labo labamemetela kutsi baphambukile bakwenta ngoba batinceku tesono, futsi babantfwana bekungalaleli lucobo lwabo.

18 Futsi labo labafunga emanga ngekumelana netinceku tami, kute batiletse ebugcilini nasekufeni—

19 Maye kubo; ngoba bakhubekise labancane bami bayawuhlukaniswa netimiso tendlu yami.

20 Emabhasikidi abo angeke agcwale, tindlu tabo netincolobane tabo tiyawubhidlika, nabo lucobo lwabo bayawudzelelwa ngulabo lababalutsa.

21 Angeke babe nelilungelo lebuphristi, noma titukulwane tabo emvakwabo titukulwane ngetitukulwane.

22 Bekuyawuba ncono kubo kutsi litje lekusila liboshelwe etintsanyeni tabo, bacwiliswe ekujuleni kwelwandle.

23 Maye kubo bonkhe labo labahlupha bantfu bami, babaphocelele kutsi babaleke, labababulalako, futsi bafakaze ngekumelana nabo, kusho iNkhosi yemaBandla; situkulwane semabululu angeke sikubalekele kulahlwa esihogweni.

24 Buka, emehlo ami ayayibona aphindze ayayati yonkhe imisebenti yabo, futsi ngigcine sehlulelo lesisheshako ngesikhatsi saso, sabo bonkhe;

25 Ngoba kunesikhatsi lesibekiwe sawo wonkhe umuntfu, kuyawuba ngekwemisebenti yakhe.

26 Nkulunkulu uyawukunika lwati ngaMoya wakhe loNgcwele, yebo, ngesipho lesingachazeki saMoya loNgcwele, lesingakase sembulwe kusukela umhlaba wabakhona kute kube manje;

27 Bokhokho betfu lebebalulindzele ngekulangatelela kutsi lwembulwe etikhatsini tekugcina, tingcodvo tabo letakhonjwa kulo tingilosi, njengobe lwalugcinelwe kuphelela kwenkhatimulo yabo;

28 Sikhatsi lesitako lapho kute lokuyawuvinjwa, noma kukhona Nkulunkulu munye noma bonkulunkulu labanyenti, bayawukwembulwa.

29 Tonkhe tihlalo tebukhosi nebukhosi, babusi nemandla, kuyawukwembulwa kuphindze kunikwe bonkhe labalibeketelele ngebuchawe livangeli laJesu Khristu.

30 Futsi, kuyawukwembulwa uma kukhona imincele lebekwe emazulwini noma etilwandle, noma emhlabeni lowomile, noma elangeni, enyangeni, noma etinkhanyetini—

31 Tonkhe tikhatsi tekutungeleta kwato, onkhe emalanga labekiwe, tinyanga, neminyaka, futsi onkhe emalanga emalanga ato, tinyanga, neminyaka, nato tonkhe tinkhatimulo tato, imitsetfo yato, netikhatsi tato letihleliwe, tiyawukwembulwa ngemalanga eluhlelo lekwengamela lekuphelela kwetikhatsi—

32 Ngekwaloko lokwabekwa emkhatsini weMkhandlu waNkulunkulu waPhakadze wabo bonkhe labanye bonkulunkulu lomhlaba usengakadalwa, lokufanele kugcinelwe siphetfo nekuphela kwawo, lapho wonkhe umuntfu ayawungena ebukhoneni bakhe nakuko kuphumula kwakhe lokungapheli.

33 Emanti lagobhotako angahlala angcolile kute kube kunini na? Ngumaphi emandla layawuvimba emazulu na? Kanjalo nemuntfu longalula umkhona wakhe lobutsakatsaka kumisa umfula iMissouri endleleni yawo lemisiwe, noma kuwushintja endleleni yawo ubuyele emuva, njengekuvimba Somandla ekutfululeni lwati lolusuka ezulwini kulabaNgcwele beTinsuku Tekugcina.

34 Buka, banyenti lababitiwe, kodvwa bambalwa labakhetsiwe. Futsi kungani bangakakhetfwa na?

35 Ngoba tinhlitiyo tabo tinake kakhulu tintfo talomhlaba, futsi balangatelela ludvumo lwebantfu, kangangoba abasifundzi lesi sifundvo sinye—

36 Sekutsi emalungelo ebuphristi ahlangene ngendlela lengeke yehlukaniswe nemandla asezulwini, nekutsi emandla asezulwini angeke alawulwe noma aphatfwe ngaphandle uma kungekwemigomo yekulunga.

37 Kutsi anganiketwa kitsi, kuliciniso; kodvwa uma setama kufihla tono tetfu, noma kwenelisa kutikhukhumeta kwetfu, kulangatelela kwetfu lokulite, noma kusebentisa kulawula noma kubusa noma kuphocelela kubantfwana bebantfu, nganoma nguliphi lizinga lekungalungi, buka emazulu ayahocisa; Moya weNkhosi uyadzabuka; futsi uma sewuhocisile, Amen kulobuphristi noma kuleligunya laleyo ndvodza.

38 Buka, ngaphambi kwekutsi ati, ushiywa yedvwa, kutsi akhahlele etinchijini, kuhlupha labangcwele, nekulwa naNkulunkulu.

39 Sifundze kabuhlungu kutsi kuyimvelo nesimo cishe sawo wonkhe umuntfu, ngekushesha nje lapho batfola ligunya lelincane, njengobe bacabanga, masinyane batawucala babuse ngalokungakalungi.

40 Kungako babanyenti lababitiwe, kodvwa bambalwa labakhetsiwe,

41 Kute emandla noma umtselela longakwati noma lokufanele ugcinwe ngebuphristi, ngaphandle, kwekuncenga, kumela bulukhuni, bubele nangebumnene, nangelutsandvo lolungatentisi;

42 Ngemusa, nangelwati loluphelele, lokuyawukhulisa kakhulu umoya ngaphandle kwekutentisa, nangephandle kwenkhohliso—

43 Kwekhuta kakhulu ngesikhatsi lesifanele, uma uchutjwa nguMoya loNgcwele; emvakwaloko ukhombise kukhula kwelutsandvo kuloyo lomkhutile, funa akutsatse njengesitsa sakhe;

44 Kute ati kutsi kwetsembeka kwakho kucinile kunetinketane tekufa.

45 Tibilini takho atigcwale lutsandvo kubo bonkhe bantfu, nakubendlu yekukholwa, futsi bucotfo abuhlobise imicabango yakho ngalokungapheli; uma kunjalo kutetsemba kwakho kuyawucina phambi kwaNkulunkulu; nemfundziso yebuphristi iyawukwehla emphefumulweni wakho njengematolo esuka ezulwini.

46 Moya loNgcwele uyawuba ngumngani wakho njalo, kanjalo nendvuku yakho ibe yindvuku lengashintji yekulunga neliciniso; nekubusa kwakho kuyawuba kubusa kwaphakadze, futsi ngaphandle kwekuphocelelwa kuyawugobhota kuwe phakadze naphakadze.