Sigaba 90
Sembulo lesiya kuJoseph Smith umPhrofethi, lesaniketwa eKirtland, e-Ohio, mhlaka 8 iNdlovulenkhulu 1833. Lesi sembulo sisinyatselo lesichubekako ekumisweni kweBumengameli bekuCala (buka sihloko sesigaba 81); ngenca yaloko, beluleki labashitiwo, babekwa mhlaka 18 iNdlovulenkhulu, 1833.
1–5, Tikhiya tembuso tiphatsiswa Joseph Smith futsi nangaye eBandleni; 6–7, Sidney Rigdon naFrederick G. Williams kufanele basebente kuBumengameli bekuCala; 8–11, Livangeli kufanele lishunyayelwe etiveni taka-Israyeli, kubeTive, nakumaJuda, wonkhe umuntfu alive ngelulwimi lwakhe; 12–18, Joseph Smith nebeluleki bakhe kufanele balungise libandla lihleleke ; 19–37, Bantfu labehlukahlukene belulekwa yiNkhosi kutsi bahambe ngebucotfo baphindze basebente embusweni Wayo.
1 Naku lokushiwo yiNkhosi, ngicinisile, ngicinisile ngitsi kuwe ndvodzana yami, tono takho titsetselelwe, ngekwesicelo sakho, ngoba imithandazo yakho nemithandazo yabomnakenu ifikile etindlebeni tami.
2 Ngako-ke, ubusisiwe kusukela nyalo wena lophetse tikhiya tembuso letiniketwe wena; umbuso lowo lomiswa kwekugcina.
3 Ngicinisile ngitsi kuwe, tikhiya talombuso atiyutsatfwa kuwe, usesemhlabeni, nasemhlabeni lotako.
4 Noko, ngawe tembulo tiyawuniketwa lomunye, yebo, ngisho ebandleni.
5 Futsi bonkhe labo labatfola tembulo taNkulunkulu, abacaphele kutsi batiphatsa kanjani funa titsatfwe njengentfo lengakabaluleki, futsi baletfwe ngaphansi kwekulahlwa, bakhutjwe bawe uma sekwehla tiphepho, nemimoya ihhusha, netimvula tehla, tishaya etikwendlu yabo.
6 Ngetulu kwaloko, ngicinisile ngitsi kubomnakenu, Sidney Rigdon naFrederick G. Williams, nabo tono tabo titsetselelwe, futsi sebatsatfwa njengalabalingana nawe ekuphatseni tikhiya talombuso wekugcina;
7 Nangekuphatsa kwakho tikhiya tesikolwa sebaphrofethi, lengiyalete kutsi sihlelwe;
8 Kute ngaloko bapheleliswe emsebentini wabo wekusindziswa kweSiyoni, nekwetive taka-Israyeli, nekwebeTive, bonkhe labo labayawukholwa;
9 Kute ngekuphatsa kwakho balemukele livi, nangekuphatsa kwabo livi lihambe liye emikhawulweni yemhlaba, kubeTive kucala, emvakwaloko, bukani, nibone, bayawuphendvukela kumaJuda.
10 Futsi emvakwaloko kufika lilanga lapho umkhono weNkhosi uyawukwembulwa ngemandla ekukholwiseni tive, tive letingemahedeni, indlu yaJosefa, ngelivangeli lensindziso yabo.
11 Ngoba kuyawukwenteka ngalelo langa, kutsi wonkhe umuntfu uyawuva kuphelela kwelivangeli ngelulwimi lwakhe, ngalabo lababekwe kulamandla, ngekuholwa nguMdvudvuti, lotfunyelwe kubo kute kwembulwe Jesu Khristu.
12 Manje, ngicinisile ngitsi kini, ngininika umyaleto wekutsi nichubeke emsebentini nakubumengameli.
13 Futsi uma senikucedzile kuhumusha tincwadzi tebaphrofethi, kusukela ngaleso sikhatsi niyawukwengamela tindzaba telibandla netesikolwa;
14 Futsi tikhatsi ngetikhatsi, njengoba kuyawubonakaliswa nguMdvudvuti, niyawutfola tembulo kusombulula timfihlakalo tembuso;
15 Niphindze nilungise emabandla ahleleke, nifundze futsi nitfole lwati, nitejwayete netincwadzi letikhanyiselanako, netilimi, nendlela yekukhuluma, kanye nebantfu.
16 Futsi loku kuyawuba ngumsebenti wenu nekutfunywa kwenu imphilo yenu yonkhe, kwengamela umkhandlu, nekulungisa tonkhe tindzaba talelibandla nembuso tihleleke.
17 Ningabi nemahloni, noma nihlazeke; kodvwa khutekani kukho konkhe kutikhukhumeta nekutatisa kwenu, ngoba kuletsa lugibe kini.
18 Lungisani tindlu tenu tihleleke, susani kuvilapha nekungahlanteki kube khashane nani.
19 Manje, ngicinisile ngitsi kuwe, akube khona indzawo leniketiwe, ngekushesha nakunekwenteka, yemndeni wemeluleki namabhalane wakho, ngisho Frederick G. Williams.
20 Futsi inceku yami leseyikhulile, Joseph Smith, loMdzala, akachubeke nekuhlala nemndeni wakhe endzaweni lapho ahlala khona manje; futsi ayingatsengiswa ute umlomo weNkhosi usho.
21 Futsi umeluleki wami, Sidney Rigdon, akachubeke ahlale lapho ahlala khona nyalo ute umlomo weNkhosi usho.
22 Futsi umbhishobhi akafune ngekukhutsala kute atfole sitfunywa, futsi akube ngumuntfu locebile—umuntfu waNkulunkulu, nalonelukholo lolucinile—
23 Kute ngaloko akwati kubhadala tonkhe tikweleti; kute indlu yengcebo yeNkhosi ingangeni ehlazweni phambi kwemehlo ebantfu.
24 Funani ngekukhutsala, nithandaze njalo, niphindze nikholwe, futsi tonkhe tintfo tiyawunisebentela tibe nguletinhle, uma nihamba ngebucotfo nikhumbula sivumelwano lenivumelene ngaso lomunye kulomunye.
25 Imindeni yenu ayibe mincane, ikakhulukati wenceku yami Joseph Smith leseyikhulile, ngalokuphatselene nalabo labangasibo bemindeni yenu;
26 Kute leto tintfo leniniketwe tona, kwenta umsebenti wami wenteke, tingatsatfwa kini tinikwe labo labangakafaneli—
27 Futsi ngaloko nivimbeleke ekufezeni leto tintfo lenginiyalete ngato.
28 Ngetulu kwaloko, ngicinisile ngitsi kini, kuyintsandvo yami kutsi incekukati yami Vienna Jaques itfole imali yekutfwala tindleko tayo, iye eveni laseSiyoni;
29 Futsi imali lesalako inganikelwa kimi, bese unikwa umvuzo ngesikhatsi sami lesifanele.
30 Ngicinisile ngitsi kini, kulungile emehlweni ami kutsi ahambe aye eveni laseSiyoni, atfole lifa esandleni sembhishobhi;
31 Kute ahlale ngekuthula nangabe etsembekile, angavilaphi emalangeni akhe ekuphila kusukela ngaleso sikhatsi.
32 Futsi bukani, ngicinisile ngitsi kini, niyawubhala lomyaleto, niwusho kubomnakenu eSiyoni, nibabingelele ngelutsandvo, kutsi nginibitile futsi kutsi nengamele iSiyoni ngesikhatsi sami lesifanele.
33 Ngako-ke, abayekele kungikhatsata ngaloludzaba.
34 Bukani, ngitsi kini bomnakenu eSiyoni sebacala kuphendvuka, netingilosi tiyajabula ngabo.
35 Noko, angijabuli ngetintfo letiningi; futsi angijabuli ngenceku yami William E. McLellin, nangenceku yami Sidney Gilbert; nembhishobhi naye, nalabanye kunetintfo letiningi lokufanele baphendvuke kuto.
36 Kodvwa ngicinisile ngitsi kini, mine, iNkhosi, ngitawukulwa neSiyoni, ngincuse labo labanemandla bakhe, ngimjezise ate ancobe futsi abe ngulohlantekile phambi kwami.
37 Ngoba angeke asuswe endzaweni yakhe. Mine, iNkhosi, singikukhulumile loku. Amen.