1 Ebandleni, kukhona buphristi lobubili, lobubitwa ngekutsi, baka-Melkhisedeki nebaka-Aroni, lokufaka ekhatsi nebuPhristi baka-Levi.

2 Sizatfu sekutsi bekucala bubitwe ngebuPhristi baka-Melkhisedeki kungoba Melkhisedeki bekangumphristi lomkhulu kakhulu.

3 Ngaphambi kwekuphila kwakhe bebubitwa ngebuPhristi lobuNgcwele, ngekweLuhlelo lweNdvodzana yaNkulunkulu.

4 Kodvwa ngenca yenhlonipho noma kuhlonipha libito laLophakeme, kuvimbela kuphindzaphindza kanyenti libito lakhe, lona, libandla, etikhatsini tasemandvulo, babubita lobo buphristi ngaMelkhisedeki, noma buPhristi baka-Melkhisedeki.

5 Bonkhe labanye labasemagunyeni noma etikhundleni ebandleni bangulokwengetiwe kulobu buphristi.

6 Kodvwa kunetigaba letimbili noma tigaba letinkhulu—sinye buPhristi baka-Melkhisedeki, lesinye buPhristi baka-Aroni noma buPhristi bakaLevi.

7 Sikhundla sembonisi singaphansi kwebuphristi baka-Melkhisedeki

8 BuPhristi baka-Melkhisedeki buphetse lilungelo lebumengameli, futsi bunemandla neligunya ngetulu kwato tonkhe tikhundla ebandleni kuto tonkhe tikhatsi temhlaba, kwengamela etintfweni takamoya.

9 BuMengameli bebuPhristi lobuKhulu, ngekweluhlelo lwaMelkhisedeki, bunelilungelo lekwenta imisebenti yato tonkhe tikhundla ebandleni.

10 Baphristi labakhulu ngekweluhlelo lwebuPhristi baka-Melkhisedeki banelilungelo lekwenta imisebenti etikhundleni tabo, ngaphansi kwekuholwa bumengameli, ekuphatseni tintfo tamoya, kanjalo nakuso sikhundla sembonisi, semphristi (ngekweluhlelo lwaLevi), semfundzisi, semdikhoni, kanye neselilunga.

11 Umbonisi unelilungelo lekwenta imisebenti esikhundleni semphristi lomkhulu uma angekho.

12 UmPhristi lomkhulu nembonisi kufanele bengamele etintfweni takamoya, ngekuvumelana netivumelwano nemiyaleto yelibandla; futsi banelilungelo lekwenta imisebenti kuto tonkhe letikhundla telibandla uma bangekho labasemagunyeni lamakhulu.

13 BuPhristi besibili bubitwa ngebuPhristi baka-Aroni, ngoba baniketwa Aroni nentalelwane yakhe, kuto tonkhe titukulwane tabo.

14 Sizatfu bubitwa ngebuphristi lobuncane kungoba bungulokwengetiwe kulobukhulu, noma baka-Melkhisedeki, futsi bunemandla ekwenta timiso tangephandle.

15 Bubhishobhi bubumengameli balobu buphristi, futsi buphetse tikhiya noma ligunya labo.

16 Kute indvodza lenelilungelo lelisemtsetfweni kulesi sikhundla, kutsi iphatse tikhiya talobu buphristi, ngaphandle uma iyesitukulwane sangempela sa-Aroni.

17 Kodvwa njengobe umphristi lomkhulu webuPhristi baka-Melkhisedeki uneligunya lekwenta imisebenti yato tonkhe tikhundla letincane, angaphatsa esikhundleni sembhishobhi uma kute longewesitukulwane sangempela sa-Aroni longatfolakala, kuphela nje uma abitiwe waphindze wehlukaniswa futsi wabekwa kulamandla ngetandla tebuMengameli nebuPhristi baka-Melkhisedeki.

18 Emandla neligunya lalolobukhulu, noma buPhristi baka-Melkhisedeki, kuphatsa tikhiya tato tonkhe tibusiso takamoya telibandla—

19 Kuba nelilungelo lekutfola timfihlakalo tembuso wasezulwini, kutsi bavulelwe emazulu, kuchumana nembutsano lomkhulu nelibandla leLitubulo, nekujabulela kuhlanganyela nekuba khona kwaNkulunkulu Babe, naJesu longumlamuli wesivumelwano lesisha.

20 Emandla neligunya lalolobuncane, noma buPhristi baka-Aroni, kuphatsa tikhiya tekusetjentelwa tingilosi, nekwenta timiso tangephandle, lokubhaliwe kwelivangeli, umbhabhatiso wekuphendvuka kute kutsetselelwe tono, ngekuvumelana netivumelwano nemiyaleto.

21 Ngekwesidzingo kukhona bomengameli, noma tikhulu letengamele letivela, noma letikhetsiwe letiphuma emkhatsini walabo lababekwe etikhundleni letehlukahlukene kulobu buphristi bobubili.

22 Kulobu buPhristi baka-Melkhisedeki, baPhristi labaKhulu labatsatfu labengamele, labakhetfwe libandla leKhoramu, labakhetfwa baphindze babekwa kuleso sikhundla, futsi labasekelwe ngekwetsenjwa, ngelukholo, nangemthandazo welibandla, benta ikhoramu yebuMengameli beliBandla.

23 Emalunga emkhandlu lalishumi nakubili alabahambako abitwa kutsi abe baPhostoli labaliShumi nakuBili, noma bofakazi labakhetsekile belibito laKhristu emhlabeni wonkhe—ngako-ke bayehluka kuletinye tikhulu ebandleni emisebentini yelubito lwabo.

24 Futsi bakha ikhoramu, lelingana ngeligunya nangemandla nabomengameli labatsatfu lekukhulunywe ngabo ngaphambilini.

25 LabangemaShumi lasiKhombisa nabo babitwa kutsi bashumayele livangeli, nekutsi babe bofakazi labakhetsekile kubeTive nasemhlabeni wonkhe—ngako-ke bayehluka kuletinye tikhulu ebandleni emisebentini yelubito lwabo.

26 Futsi bakha ikhoramu, lelinganako ngeligunya nalelo labofakazi labaliShumi nakuBili labakhetsekile noma baPhostoli labasandza kushiwo.

27 Futsi tonkhe tincumo letitsatfwa ngunoma nguyiphi yalawa makhoramu kufanele tibe ngelivi linye; lokusho kutsi, emalunga kuleyo khoramu ngayinye kufanele avumelane netincumo, kute bente tincumo tabo tibe nemandla lafanako noma tibe neliciniso lomunye kulomunye—

28 Linyenti lingakha ikhoramu uma timo tenta kube matima kutsi kube ngalenye indlela—

29 Ngaphandle uma kunjalo, tincumo tabo atitifaneli tibusiso letifana netincumo tekhoramu yabomengameli labatsatfu letatitifanele mandvulo, labebabekwe ngekweluhlelo lwaMelkhisedeki, futsi labebangemadvodza lalungile nalangcwele.

30 Tincumo talawa makhoramu, noma yinye yawo, kufanele tentiwe ngako konkhe kulunga, bungcwele, nekutfobeka kwenhlitiyo, bumnene, kumela bulukhuni, nekukholwa, nebucotfo, nelwati, nekutitsiba, nekubeketela, nekwesaba Nkulunkulu, nekutsandza bomnakenu kanye nelutsandvo.

31 Ngoba setsembiso kutsi, uma leti tintfo tikubo angeke babe bete titselo ekuyatini iNkhosi.

32 Futsi uma kwenteka kuba khona sincumo salamakhoramu lesitsatfwa ngekungalungi, singaletfwa phambi kwemhlangano lomkhulu wemakhoramu lehlukene, lafaka ekhatsi labasemagunyeni belibandla etintfweni letingetakamoya; kungenjalo angeke kubekhona kwendlulisa licala esincumeni labasitsatsile.

33 LabaliShumi nakuBili banguMkhandlu lomKhulu walabeNgamele balaBahambako, kwenta imisebenti egameni leNkhosi, ngaphansi kwekuholwa buMengameli beliBandla, ngekuvumelana nalokumiswe ezulwini; kwakha libandla, nekulawula tonkhe tindzaba telibandla etiveni tonkhe, kucala kubeTive bese kwesibili kuba kumaJuda.

34 LabangemaShumi lasiKhombisa kufanele bente tintfo egameni leNkhosi, ngaphansi kwekuholwa ngulabaliShumi nakubili noma umkhandlu lomkhulu walabahambako, ekwakheni libandla nasekulawuleni tonkhe tindzaba telibandla etiveni tonkhe, kucala kubeTive bese kuba kumaJuda—

35 LabaliShumi nakuBili bayatfunywa kutsi baphatse tikhiya, bavule umnyango ngekumemetela livangeli laJesu Khristu, kucala kubeTive bese kuba kumaJuda.

36 Imikhandlu lemikhulu lemile, kuto tikhonkhwane teSiyoni, yakha ikhoramu lelinganako ngeligunya etindzabeni telibandla, kuto tonkhe tincumo tayo, nekhoramu yebumengameli, noma nemkhandlu lomkhulu walabahambako.

37 Umkhandlu lomkhulu eSiyoni wakha ikhoramu lelinganako ngeligunya etindzabeni telibandla, kuto tonkhe tincumo tawo, nemikhandlu yalabaliShumi nakuBili kuto tikhonkhwane teSiyoni.

38 Kungumsebenti wemkhandlu lomkhulu walabahambako kucela labangemaShumi lasikhombisa, uma badzinga lusito, kwenta umsebenti wekushumayela nekuniketa livangeli, esikhundleni sanoma ngubaphi labanye.

39 Kungumsebenti walabaliShumi nakuBili, kuwo onkhe emagala lamakhulu elibandla, kubeka tisebenti telivangeli, njengobe bayawukhonjwa kuto ngesembulo—

40 Loluhlelo lwalobuphristi lwamiselwa kutsi lwendluliswe kusuka kubabe kuya kundvodzana, futsi ngalokufanele lungulwesitukulwane sangempela sentalelwane lekhetsiwe, lokwentiwa kuyo letetsembiso.

41 Loluhlelo lwamiswa etikhatsini ta-Adamu, futsi lwehla njalo ngesitukulwane ngalendlela lelandzelako:

42 Kusuka ku-Adamu kuya kuSethi, lowabekwa ngu-Adamu aneminyaka lengemashumi lasitfupha nemfica, futsi wabusiswa nguye eminyakeni lemitsatfu ngaphambi kwekufa kwakhe (Adamu), waphindze watfola setsembiso saNkulunkulu ngeyise, sekutsi titukulwane takhe kufanele tibe nguletikhetsiwe teNkhosi, nekutsi kufanele bagcinwe kute kube sekugcineni kwemhlaba;

43 Ngoba yena (Sethi) bekayindvodza lelungile, futsi simo sakhe besifana ncamashi neseyise, kangangobe bekabukeka afana neyise etintfweni tonkhe, futsi bekahlukaniseka kuye ngeminyaka yakhe kuphela.

44 Enoshi wabekwa aneminyaka lelikhulu nemashumi lamatsatfu nakune netinyanga letine, ngesandla sa-Adamu.

45 Nkulunkulu wabita Khenani ehlane aneminyaka lengemashumi lamane; futsi wahlangana na-Adamu asahamba aya endzaweni yaseShedolamaki. Bekaneminyaka lengemashumi lasiphohlongo nesikhombisa budzala ngesikhatsi atfola kubekwa kwakhe.

46 Mahalaleli bekaneminyaka lengemakhulu lamane nemashumi layimfica nesitfupha nemalanga lasikhombisa budzala ngesikhatsi abekwa ngesandla sa-Adamu, lowaphindze wambusisa.

47 Jaredi bekaneminyaka lengemakhulu lamabili budzala ngesikhatsi abekwa ngaphansi kwesandla sa-Adamu, lowaphindze wambusisa.

48 Enoki bekaneminyaka lengemashumi lamabili nesihlanu budzala ngesikhatsi abekwa ngephansi kwesandla sa-Adamu; futsi besekaneminyaka lengemashumi lasitfupha nesihlanu futsi Adamu wambusisa.

49 Wabona iNkhosi, wahamba nayo, aphambi kwebuso bayo njalo; wahamba naNkulunkulu iminyaka lengemakhulu lamatsatfu nemashumi lasitfupha nesihlanu, lokwamenta waba neminyaka lengemakhulu lamane nemashumi lamatsatfu budzala ngesikhatsi atsatfwa.

50 Methusela bekaneminyaka lelikhulu budzala ngesikhatsi abekwa ngaphansi kwesandla sa-Adamu.

51 Lameki bekaneminyaka lengemashumi lamatsatfu nakubili budzala ngesikhatsi abekwa ngaphansi kwesandla sa-Sethi.

52 Nowa bekaneminyaka lelishumi budzala ngesikhatsi abekwa ngaphansi kwesandla saMethusela.

53 Iminyaka lemitsatfu ngaphambi kwekufa kwa-Adamu, wabita Sethi, Enoshi, Khenani, Mahalaleli, Jaredi, Enoki, naMethusela, bonkhe labebabaphristi labakhulu, nalabebasele besitukulwane sakhe labebalungile, esigodzini sase-Adamu Ondi Ahmani, futsi lapho wabanika sibusiso sakhe sekugcina.

54 Futsi iNkhosi yavela kubo, basukuma baphindze bambusisa Adamu, futsi bambita ngaMikhayeli, umholi, ingilosi lenkhulu.

55 Futsi iNkhosi yamdvudvuta Adamu, yase itsi kuye: Ngikubeke kutsi ube ngumholi; tive letinyenti tiyawukwehla tivela kuwe, futsi ungumholi etikwabo ingunaphakadze.

56 Futsi Adamu wema emkhatsini welibandla; nanoma besekagobene ngenca yebudzala, agcwele Moya loNgcwele, wakusho konkhe lokwakutawehlela titukulwane takhe kute kube situkulwane sekugcina.

57 Tonkhe leti tintfo betibhaliwe encwadzini ya-Enoki, futsi kufanele kufakazwe ngato ngesikhatsi lesifanele.

58 Kungumsebenti walabaliShumi nakuBili, futsi, kubeka baphindze bahlele tonkhe tikhulu telibandla, ngekuvumelana nesembulo lesitsi:

59 Ebandleni laKhristu eveni laseZion, ngetulu kwalemitsetfo yelibandla mayelana nemsebenti welibandla—

60 Ngicinisile, ngitsi kini, kusho iNkhosi yemaBandla, kudzingeka kube nebabonisi labengamele kutawengamela labo labasesikhundleni sembonisi;

61 Ngalokunjalo nebaphristi kutawengamela labo labasesikhundleni semphristi;

62 Ngalokunjalo nebafundzisi kutawengamela labo labasesikhundleni semfundzisi, ngendlela lefanako, kanjalo nebadikhoni—

63 Ngaloko-ke, kusuka kumdikhoni kuya kumfundzisi, nekusuka kumfundzisi kuya kumphristi, nekusuka kumphristi kuya kumbonisi, ngamunye njengekukhetfwa kwabo, ngekwetivumelwano nemiyaleto yelibandla.

64 Emvakwaloko kuta buPhristi lobuKhulu, lobukhulu kunabo bonkhe.

65 Ngaloko-ke, kudzingeka kutsi munye webuPhristi lobuKhulu akhetfwe kwengamela lobu buphristi, futsi uyawubitwa ngaMengameli webuPhristi lobuKhulu beliBandla;

66 Noma, ngalamanye emagama, umPhristi lomKhulu loweNgamele kubuPhristi lobuKhulu beliBandla.

67 Kuloku kuvela kunikwa kwetimiso netibusiso ebandleni, ngekubekwa tandla.

68 Ngaloko-ke, sikhundla sembhishobhi asilingani naleso; ngoba sikhundla sembhishobhi sekuphatsa tonkhe tintfo tasemhlabeni;

69 Noko umbhishobhi kufanele akhetfwe kubuPhristi lobuKhulu, ngaphandle uma anguwesitukulwane sangempela sa-Aroni;

70 Ngoba ngaphandle uma anguwesitukulwane sangempela sa-Aroni angeke atiphatse tikhiya talobo buphristi.

71 Noko, umphristi lomkhulu, lokusho kutsi, ngekweluhlelo lwaMelkhisedeki, angahlukaniselwa kuphatsa tintfo tasemhlabeni, anelwati ngato ngaMoya weliciniso;

72 Nekutsi abe ngumehluleli ka-Israyeli, kwenta umsebenti welibandla, kwehlulela labaphula umtsetfo ngebufakazi njengobe buyawubekwa phambi kwakhe ngekwemitsetfo, ngelusito lwebeluleki, labakhetsile noma latawubakhetsa emkhatsini webabonisi belibandla.

73 Lona ngumsebenti wembhishobhi longasiye wesitukulwane sangempela sa-Aroni, kodvwa lobekwe kubuPhristi lobuKhulu ngekweluhlelo lwaMelkhisedeki.

74 Uyawuba ngumehluleli, ngisho umehluleli wabo bonkhe labahlala eSiyoni, noma esikhonkhwaneni seSiyoni, noma kuliphi ligala lelibandla lapho ayawehlukaniselwa khona kulona msebenti, ite imincele yeSiyoni yelulwe futsi kube nesidzingo sekutsi kubekhona labanye babhishobhi noma behluleli eSiyoni noma kulenye indzawo.

75 Futsi nangabe kukhona labanye babhishobhi labakhetsiwe bayawusebenta esikhundleni lesifanako.

76 Kodvwa longewesitukulwane sangempela sa-Aroni unelilungelo ngalokusemtsetfweni kubumengameli balobuphristi, kuto tikhiya talomsebenti, kutsi asebente esikhundleni sembhishobhi ngekutimela, ngaphandle kwebeluleki, ngaphandle kwesimo lapho Mengameli webuPhristi lobuKhulu, ngekweluhlelo lwaMelkhisedeki, avivinywa, kutsi ahlale njengemehluleli ka-Israyeli.

77 Futsi sincumo sanoma ngumuphi walemikhandlu, lesivumelana nemyaleto lotsi;

78 Futsi, ngicinisile, ngitsi kini, umsebenti lobaluleke kakhulu welibandla, nemacala lalukhuni kakhulu elibandla, nangabe kute kweneliseka kulesincumo sembhishobhi noma sebehluleli, kuyawedluliselwa kuyiswe emkhandlwini welibandla, phambi kwebuMengameli bebuPhristi lobuKhulu.

79 Futsi buMengameli bemkhandlu webuPhristi lobuKhulu buyawuba nemandla ekubita labanye baphristi labakhulu, ngisho labalishumi nakubili, kutawelekelela njengebeluleki; ngako-ke buMengameli bebuPhristi lobuKhulu nebeluleki babo bayawuba nemandla ekuncuma ngekuvumelana nebufakazi ngekwemitsetfo yelibandla.

80 Futsi emvakwalesi sincumo angeke kuphindze kuletfwe phambi kweNkhosi, ngoba lona ngumkhandlu lophakeme kakhulu welibandla laNkulunkulu, futsi sincumo sekugcina mayelana netimphikiswano etindzabeni takamoya.

81 Kute umuntfu longuwelibandla longekho ngaphansi kwalomkhandlu welibandla.

82 Futsi nangabe Mengameli webuPhristi lobuKhulu ephula umtsetfo, uyawuletfwa phambi kwemkhandlu walo lonkhe libandla, loyawusitwa beluleki labalishumi nakubili bebuPhristi lobuKhulu;

83 Futsi sincumo sabo ngaye siyawuba kuphela kwemphikiswano lephatselene naye.

84 Ngako-ke kute longeke abe ngaphansi kwekulunga nasemitsetfweni yaNkulunkulu, kute tonkhe tintfo tentiwe ngeluhlelo nangesizotsa phambi kwakhe, ngekweliciniso nangekulunga.

85 Ngetulu kwaloko, ngicinisile ngitsi kini, umsebenti wemengameli esikhundleni semdikhoni kwengamela badikhoni labalishumi nakubili, kuhlala emkhandlwini nabo, nekubafundzisa umsebenti wabo, bakhane, njengobe kunikiwe ngekwetivumelwano.

86 Futsi umsebenti wemengameli esikhundleni sebafundzisi kwengamela bafundzisi labangemashumi lamabili nakune, nekuhlala nabo emkhandlwini, kubafundzisa imisebenti yesikhundla sabo, njengobe kuniketiwe etivumelwaneni.

87 Futsi umsebenti wemengameli kubuPhristi baka-Aroni kwengamela baphristi labangemashumi lamane nesiphohlongo, aphindze ahlale nabo emkhandlwini, kubafundzisa imisebenti yesikhundla sabo, njengobe kuniketiwe etivumelwaneni.

88 Lomengameli kufanele abe ngumbhishobhi; ngoba lona ngulomunye wemisebenti yalobuphristi.

89 Ngetulu kwaloko, umsebenti wemengameli esikhundleni sebabonisi kwengamela babonisi labangemashumi layimfica nesitfupha, ahlale nabo emkhandlwini, nekubafundzisa ngekwetivumelwano.

90 Lobumengameli behlukile kunalobo balabangemashumi lasikhombisa, futsi buhloselwe labo labangahambi emhlabeni wonkhe.

91 Ngetulu kwaloko, umsebenti weMengameli wesikhundla sebuPhristi lobukhulu kwengamela libandla lonkhe, futsi abe njengaMosi—

92 Bukani, naku kuhlakanipha; yebo, kuba ngumboniswa, umembuli, umhumushi, kanye nemphrofethi, nekuba nato tonkhe tiphiwo taNkulunkulu latipha umholi welibandla.

93 Futsi kungekwembono lokhombisa luhlelo lwalabangemaShumi lasiKhombisa, kutsi kufanele babe nabomengameli labasikhombisa kubengamela, labakhetfwe emkhatsini walabangemashumi lasikhombisa.

94 Futsi mengameli wesikhombisa walabomengameli kufanele engamele labasitfupha;

95 Futsi labomengameli labasikhombisa kufanele bakhetse labanye labangemashumi lasikhombisa ngaphandle kwalaba bekucala labangemashumi lasikhombisa labangemalunga abo, futsi kufanele babengamele;

96 Futsi nalabanye labangemashumi lasikhombisa, kute kube kasikhombisa kuphindvwe ngemashumi lasikhombisa, uma umsebenti esivinini udzinga loko.

97 Futsi laba labangemashumi lasikhombisa kufanele babe tisebenti letihambako, kubeTive kucala kanjalo nakumaJuda futsi.

98 Kantsi letinye tikhulu telibandla, letingekho kulabaliShumi nakuBili, noma kulabangemaShumi lasiKhombisa, atikho ngaphansi kwesibopho sekuhamba emkhatsini wetive tonkhe, kodvwa kufanele tihambe ngekuvunyelwa timo tabo, noma tisetikhundleni letinkhulu naletimcoka telibandla.

99 Ngaloko-ke, manje onkhe emadvodza akafundze umsebenti wawo, futsi asebente esikhundleni labekwe kuso, ngako konkhe kukhutsala.

100 Loyo lovilaphako angeke atsatfwe njengalofanele kuma, futsi loyo longawufundzi umsebenti wakhe futsi atikhombisa njengalongakavunywa angeke atsatfwe njengalofanele kuma. Kunjalo-nje. Amen.