Sigaba 134
Simemetelo ngenkholelo ngalokuphatselene nemibuso nemitsetfo ngalokwejwayelekile, lesemukelwa ngelivoti lekuvumelana emhlanganweni lomkhulu weliBandla lobewubanjelwe eKirtland, e-Ohio, mhlaka 17 iNgci, 1835. LabaNgcwele labaningi babutsana ndzawonye kutawutsatsa sincumo ngalokwakuphakanyisiwe lokucuketfwe lushicilelo lwekucala lweMfundziso neTivumelwano. Ngaleso sikhatsi, lesi simemetelo saniketwa lesi sendvulelo: “Kute inkholelo yetfu ngalokuphatselene nemibuso yasemhlabeni nemitsetfo ngalokwejwayelekile ingatsatfwa kabi noma icondvwe kabi, sibone kukuhle kutsi, esiphetfweni salencwadzi, satise ngemibono yetfu ngalokuphatselene naloko.”
1–4, Imibuso kufanele ilondvolote inkhululeko yanembeza neyekukhonta; 5–8, Bonkhe bantfu kufanele bayisekele imibuso yabo baphindze bahloniphe futsi batfobele umtsetfo; 9–10, Tinhlangano tenkholo akukafaneli tisebentise emandla kuchuba umtsetfo; 11–12, Bantfu abanacala ngekutivikela bona kanye nemphahla yabo.
1 Sikholelwa kutsi imibuso yamiswa nguNkulunkulu kute kuzuze umuntfu; nekutsi ubeke kutsi bantfu batiphendvulele ngetento tabo mayelana nayo, ekushayeni imitsetfo nasekuyiphatseni, kute kuzuze futsi kuphephe bonkhe bantfu.
2 Sikholelwa kutsi kute umbuso longaba khona ngekuthula, ngaphandle kwekutsi kumiswe luhlobo lwemitsetfo letawugcinwa futsi ingephulwa naletawucinisekisa kumuntfu ngamunye kutsi asebentise nembeza wakhe ngekukhululeka, lilungelo nemandla ekuphatsa imphahla, nekuvikeleka kwemphilo.
3 Sikholelwa kutsi yonkhe imibuso idzinga baphatsi tikhundla nabomantji labasemtsetfweni kwenta imitsetfo yaleyo mibuso igcinwe; nekutsi labo labatawuphatsa umtsetfo ngekungakhetsi nangekulunga kufanele bafunwe baphindze basekelwe ngelivi lebantfu uma lowo mbuso ukhetfwe bantfu, noma ngentsandvo yenkhosi yelive.
4 Sikholelwa kutsi inkholo imiswe nguNkulunkulu; nekutsi bantfu kufanele baphendvule kuye, futsi kuye kuphela, ngekusebentisa inkholo, ngaphandle uma imibono yabo ngekwenkholo ibangela kutsi batsatse emalungelo nekukhululeka kwalabanye; kodvwa asikholelwa kutsi umtsetfo webantfu unelilungelo lekuphazamisa ekumisweni kwemitsetfo yekukhonta ngenhloso yekulawula bonembeza bebantfu, noma kuphocelela tindlela tekukhonta kwebantfu noma kumuntfu ngamunye; sikholelwa kutsi mantji losemtsetfweni kufanele abuvimbele bugebengu, kodvwa angawulawuli nembeza; ajezise kona, kodvwa angayicindzeteli inkhululeko yemuntfu.
5 Sikholelwa kutsi bonkhe bantfu babophelelekile kusekela nekukhutsata leyo mibuso labahlala ngaphansi kwayo, uma imitsetfo yaleyo mibuso ibavikela ngalokuphatselene namalungelo abo emvelo nalawo langeke bemukwe wona; nekutsi kususa lutfutfuva nekuvukela umbuso akukafaneli kwentiwe takhamuti telive letivikeleke kanjalo, futsi kufanele kujeziswe ngalokufanele; nekutsi yonkhe imibuso inelilungelo lekumisa luhlobo lwemitsetfo ngekubona kwayo letawucinisekisa lokufunwa bantfu bonkhe; noma kunjalo, igcine inkhululeko yanembeza ingaguculwa.
6 Sikholelwa kutsi wonkhe umuntfu kufanele ahlonishwe esikhundleni sakhe, babusi nabomantji ngalokunjalo, ngoba babekelwe kuvikela labangenacala nekujezisa labonile; nekutsi bonkhe bantfu kufanele bayihloniphe futsi bayitfobele imitsetfo, ngoba ngaphandle kwayo kuyawuba khona siphitsiphitsi nekwesaba esikhundleni sekuthula nekuvana; imitsetfo yebantfu ibekwe ngenhloso yekulawula lokutsandvwa ngitsi njengebantfu netive, emkhatsini wemuntfu nemuntfu, nemitsetfo yaNkulunkulu leniketwe ezulwini, lebeka imitsetfo ngalokuphatselene netintfo tamoya, tekukholwa nekukhonta, kokubili lokufanele kuphendvulwe ngumuntfu kuMenti wakhe.
7 Sikholelwa kutsi babusi, tive, nemibuso kunelilungelo, futsi kufanele kumise imitsetfo kuvikela tonkhe takhamuti telive ekwenteni ngekukhululeka tinkholelo tabo letingekwenkholo; kodvwa asikholelwa kutsi banelilungelo lekwemuka takhamuti telive lelilungelo, noma kutivimbela ngalokuphatselene nemibono yabo, uma tiyinaka tiphindze tiyihlonipha leyo mitsetfo futsi leyo mibono ngekwenkholo ingasekeli kususa lutfutfuva noma luzungu.
8 Sikholelwa kutsi sento sebugebengu kufanele sijeziswe ngebunjalo baso; nekutsi kubulala, kuvukela umbuso, kugebenga, kweba, nekuphazamisa kuthula kwebantfu, nganoma nguyiphi indlela, kufanele leto tento tijeziswe ngekwebugebengu bato nangekutsambekela kwato kubangela bubi emkhatsini webantfu, ngekwemitsetfo yalowo mbuso lapho kwentiwe khona leso sento sekona; futsi sikholelwa kutsi kute kube khona kuthula nekuvana kubo bonkhe bantfu kufanele kubekhona labakwentako baphindze basebentise emandla abo kuletsa toni letephula imitsetfo lemihle kutsi tijeziswe.
9 Asikholelwa kutsi kulungile kuhlanganisa umtselela wenkholo nembuso losemtsetfweni, lokubangela kutsi lenye inhlangano yenkholo ikhuliswe lenye ivinjelwe ngalokuphatselene nemalungelo ayo ngekwenkholo, lapho emalunga ayo, njengetakhamuti, emukwa emalungelo.
10 Sikholelwa kutsi tonkhe tinhlangano tenkholo tinelilungelo lekutsatsela emalunga ato tinyatselo ngekutiphatsa kwawo lokungakalungi, ngekwemitsetfo nenchubo yaleto tinhlangano; uma leto tinyatselo kungetebulunga nekutiphatsa kahle; kodvwa asikholelwa kutsi noma nguyiphi inhlangano yenkholo ineligunya lekutsetsa emacala ebantfu ngalokuphatselene nemalungelo abo emphahla noma emphilo, kutsatsa kubo imphahla yalamhlabeni, noma kubabeka engotini yemphilo noma yemtimba, noma kubajezisa ngekubavisa buhlungu emtimbeni. Bangabacosha kuphela enhlanganweni yabo, baphindze batsatse kubo bulunga babo.
11 Sikholelwa kutsi bantfu kufanele bendlulise emacala abo emtsetfweni weluntfu kute ulungise onkhe emaphutsa netikhalo, lapho umuntfu ahlukunyetwe khona noma kuphulwe lilungelo lemphahla noma lesimilo, uma kukhona imitsetfo lenjalo levikela lawo malungelo; kodvwa sikholelwa kutsi bonkhe bantfu bete licala ekutivikeleni bona, bangani babo, nemphahla, nembuso, ekuhlaselweni lokungekho emtsetfweni kwemalungelo abo bonkhe bantfu ngetikhatsi tebungoti, lapho umuntfu angeke akwati kufaka sikhalo ngekushesha, futsi nekusitakala kungeke kutfolakale.
12 Sikholelwa kutsi kulungile kushumayela livangeli etiveni temhlaba, nekwecwayisa labalungile kutsi batisindzise enkhohlakalweni yemhlaba; kodvwa asikholelwa kutsi kulungile kuphatamisa tigcili, noma kushumayela livangeli kuto, noma kutibhabhatisa ngalokuphambene nentsandvo nekufisa kwebaphatsi bato, noma kugcambukela noma kubafaka umoya kancane lokutawubenta banganetiseki ngetimo tabo kulemphilo, ngaleyondlela sibeke ebungotini timphilo tebantfu; loko kugcambukela sikholelwa kutsi akukho emtsetfweni futsi akukalungi, kuphindze kuyingoti kuko kuthula kwanoma ngumuphi umbuso lovumela bantfu baphatfwe ngebugcili.