Sigaba 105
Sembulo lesaniketwa ngaJoseph Smith umPhrofethi, eMfuleni iFishing, eMissouri, mhlaka 22 iNhlaba, 1834, Ngaphansi kwebuholi bemPhrofethi, labaNgcwele labebasuka e-Ohio nakuletinye tindzawo bahamba baya eMissouri eluhambeni lolwagcina selwatiwa ngekutsi yiNkambu yeSiyoni.Inhloso yabo bekukuphekeletela labaNgcwele labebacoshiwe labebahlala eMissouri kutsi babuyele etindzaweni tabo eSifundzeni iJackson. Bantfu baseMissouri lebebake bahlupha labaNgcwele ngaphambilini besaba kuphindziselwa eNkambu yeSiyoni, babese sebahlasela labaNgcwele labebahlala eSifundzeni iClay, eMissouri, kute bavimbele loko kuphindzisela. Emvakwekutsi umbusi waseMissouri sekasihocisile setsembiso sakhe sekulekelela labaNgcwele, Joseph Smith watfola lesi sembulo.
1–5, ISiyoni itawukwakhiwa ngekulandzela umtsetfo wesilestiyali; 6–13, Kuhlengwa kweSiyoni kuyahlehliswa kwesikhashana; 14–19, INkhosi itawukulwa timphi teSiyoni; 20–26, LabaNgcwele kufanele bahlakaniphe futsi bangatigabatisi ngemisebenti lemikhulu nabahlangana; 27–30, Imihlaba leseJackson nasetifundzeni letidvutane nayo kufanele itsengwe; 31–34, Babonisi kufanele baphiwe tipho tamoya endlini yeNkhosi leseKirtland; 35–37, LabaNgcwele balabitiwe nalabakhetsiwe batawungcweliswa; 38–41, LabaNgcwele kufanele baphakamise sibonakaliso sekuthula emhlabeni.
1 Ngicinisile ngitsi kini nine lenitihlanganise ndzawonye kute nitfole lwati ngentsandvo yami mayelana nekubuyiswa kwebantfu bami labahlushiwe esimeni sabo—
2 Bukani, ngitsi kini, kube bekungasiko ngenca yekwephula umtsetfo kwebantfu bami, ngikhuluma ngalokuphatselene nelibandla hhayi umuntfu ngamunye, ngabe sebabuyisiwe esimeni sabo namanje.
3 Kodvwa bukani, abakafundzi kulalela tintfo lengangitibhekile etandleni tabo, kodvwa bagcwele lonkhe luhlobo lwebubi, futsi ababelani ngetintfo tabo, njengalokufanele labangcwele, kulabamphofu nalabahlushiwe emkhatsini wabo;
4 Futsi abakabumbani ngekwelubumbano lolufunwa ngumtsetfo wembuso wesilestiyali;
5 Futsi iSiyoni angeke yakhiwe ngaphandle kwemigomo yemtsetfo wembuso wesilestiyali; kungenjalo angeke ngiyemukele kimi.
6 Nebantfu bami kufanele bajeziswe bate bafundze kulalela, uma kudzingekile, ngetintfo labendlula kuto.
7 Angikhulumi ngalabo labakhetfwe kutsi bahole bantfu bami, labababonisi bekucala ebandleni lami, ngoba akusibo bonkhe labangephansi kwaloku kulahlwa;
8 Kodvwa ngikhuluma ngemabandla ami lakhashane—baningi labatawutsi: Uphi Nkulunkulu wabo na? Bukani, utawubakhulula ngesikhatsi sekuhlupheka, kungenjalo angeke sikhuphukele eSiyoni, futsi sitawutigodla timali tetfu.
9 Ngako-ke, ngenca yekwephula umtsetfo kwebantfu bami, ngibona kufanele kutsi babonisi bami balindze sikhashana kute kubuyiswe iSiyoni—
10 Kute nabo lucobo batilungiselele, nekutsi bantfu bami bafundziswe ngalokugcwele, baphindze batijwayete, futsi bati ngalokugcwele mayelana nemsebenti wabo, netintfo lengitidzinga etandleni tabo.
11 Futsi loku angeke kwenteke bate babonisi bami baphiwe emandla lavela etulu.
12 Ngoba bukani, ngilungise tipho tamoya letinkhulu netibusiso kute kutfululelwe etikwabo, nangabe betsembekile futsi bachubeka nekutitfoba phambi kwami.
13 Ngako-ke ngibona kufanele kutsi babonisi bami balindze sikhashana, kute kubuyiswe iSiyoni.
14 Ngoba bukani, angikufuni etandleni tabo kutsi balwe timphi teSiyoni; ngoba, njengoba ngishito emyaletweni waphambilini, kanjalo ngitawukugcwalisa loko—ngitawutilwa timphi tenu.
15 Bukani, umbhubhisi ngimtfumele kutsi abhubhise aphindze acitse titsa tami; futsi iminyaka leminingi kusukela nyalo bayobe sebangekho kungcolisa lifa lami, nekuhlambalata libito lami emihlabeni lengiyingcwelisile kute kubutsane ndzawonye labangcwele bami.
16 Bukani, ngiyalete inceku yami Joseph Smith, lomNcane, kutsi atsi ebutfweni lendlu yami, ngisho emachawe ami, emajaha ami, nalabaneminyaka lesemkhatsini, ababutsane ndzawonye kubuyisela bantfu bami, futsi badzilite imibhoshongo yetitsa tami, basakate nabogadzi babo;
17 Kodvwa libutfo lendlu yami alikawalaleli emavi ami.
18 Kodvwa nangabe kukhona labawalalele emavi ami, ngibalungisele sibusiso nesipho samoya, uma bachubeka nekwetsembeka.
19 Ngiyivile imithandazo yabo, ngitawemukela nemnikelo wabo; futsi ngikubona kufanele kutsi baletfwe kute kube lapha kute kuvivinywe lukholo lwabo.
20 Manje, ngicinisile ngitsi kini, ngininika umyaleto, wekutsi bonkhe labeta lapha, labangahlala esifundzeni lesidvute, abahlale;
21 Labo labangeke bahlale, labanemindeni emphumalanga, abahlale kwesikhashana, kangangoba inceku yami Joseph Smith iyawubacondzisa;
22 Ngoba ngitawumluleka ngaloludzaba, futsi konkhe layawubacondzisa ngako kuyawugcwaliseka.
23 Futsi bantfu bami bonkhe labahlala etifundzeni letisedvute abetsembeke kakhulu, bathandaze, batitfobe phambi kwami, futsi bangatembuli tintfo lengitembule kubo, kute kube kuhlakanipha kimi kutsi tembulwe.
24 Ningakhulumi ngekwehlulelwa, noma nitigabatise ngekukholwa noma ngemisebenti lemikhulu, kodvwa butsanani ndzawonye ngekucophelela, ngebuningi benu esifundzeni sinye, ngekuhambisana nemizwa yebantfu;
25 Futsi bukani, ngitawuninika umusa emehlweni abo, kute niphumule ngekuthula nangekuphepha, ngesikhatsi nitsi kubantfu: Yehlulelani ngebucotfo nangekulunga ngekwemtsetfo, futsi nisilungise ekoniweni kwetfu.
26 Manje, bukani, ngitsi kini, bahlobo bami, ngalendlela ningawutfola umusa emehlweni ebantfu, lite libutfo laka-Israyeli libe likhulu kakhulu.
27 Futsi ngitawutsambisa tinhlitiyo tebantfu, njengoba ngenta enhlitiyweni yaFaro, tikhatsi ngetikhatsi, ite inceku yami Joseph Smith, lomNcane, nebabonisi bami, lengibakhetsile, babe nesikhatsi sekugcogca libutfo lendlu yami,
28 Nekutfumela emadvodza lahlakaniphile, kugcwalisa loko lengikuyaletile mayelana nekutsengwa kwayo yonkhe imihlaba esifundzeni saseJackson lengatsengwa, nasetifundzeni letisedvute.
29 Ngoba kuyinhloso yami kutsi lemihlaba itsengwe; futsi emvakwekutsengwa labangcwele bami bayitsatse ibe ngeyabo ngekwemitsetfo yekunikela lengiyinikile.
30 Futsi emvakwekutsengwa kwalemihlaba, angiyukuwabeka cala emabutfo aka-Israyeli ngekutsatsa imihlaba yabo, lebebayitsengile kwasekucaleni ngetimali tabo, nekubhidlita imibhoshongo yetitsa tami lengaba setikwabo, nekusakata bogadzi babo, nekungiphindziselela etitseni tami esitukulwaneni sesitsatfu nesesine salabo labangitondzako.
31 Kodvwa kwekucala libutfo lami alibe likhulu kakhulu, futsi alingcweliswe phambi kwami, kute libe lihle njengelilanga, futsi likhanye njengenyanga, kute tibonakaliso tabo tesabeke kuto tonkhe tive.
32 Kute imibuso yalomhlaba iphoceleleke kuvuma kutsi umbuso weSiyoni ngempela ngumbuso waNkulunulu wetfu naKhristu wakhe; ngako-ke, asibe ngaphansi kwemitsetfo yakhe.
33 Ngicinisile ngitsi kini, ngibona kufanele kutsi babonisi bekucala belibandla lami batfole tipho tabo tamoya letivela etulu endlini yami, lengiyaletile kutsi yakhiwe egameni lami eveni laseKirtland.
34 Futsi leyo miyaleto lengiyinikile ngalokuphatselene neSiyoni nemtsetfo wayo ayentiwe iphindze igcwaliseke, emvakwekubuyiswa kwayo.
35 Kube nelilanga lekubitwa, kodvwa sikhatsi sesifikile selilanga lekukhetsa; futsi labo labafanelekile abakhetfwe.
36 Futsi kuyawuvetwa kuyo inceku yami, ngelivi laMoya, labo labakhetsiwe; futsi bayawungcweliswa;
37 Futsi nangabe balandzela imiyaleto labayitfolile, batawukuba nemandla emvakwemalanga lamaningi kufeza tonkhe tintfo letiphatselene neSiyoni.
38 Ngetulu kwaloko ngitsi kini, celani kuthula, hhayi kubantfu labanishayile kuphela, kodvwa nakubo bonkhe bantfu;
39 Niphakamise nesibonakaliso sekuthula, nente nesimemetelo sekuthula siye emikhawulweni yemhlaba;
40 Futsi nente netiphakamiso tekuthula kulabo labanishayile, ngekwelivi laMoya lelikini, futsi tonkhe tintfo tiyawunisebentela tibe nguletinhle.
41 Ngako-ke, tsembekani; futsi bukani, nibone, nginani kute kube sekugcineni. Kunjalo nje. Amen.