Sigaba 70
Sembulo lesaniketwa ngaJoseph Smith umPhrofethi, e-Hiram, e-Ohio, mhlaka 12 Lweti, ngemnyaka we-1831. Umlandvo wemPhrofethi utsi imihlangano lemine lekhetsekile yabanjwa kusukela mhlaka 1 kuya kumhlaka 12 Lweti, lawo malanga ahlanganisiwe. Kuyekugcina yalemibutsano, kubaluleka lokukhulu kwetembulo lebetitawukhishwa kamuva njengeBook of Commandments (INcwadzi yemiYaleto) letabese tibitwa ngeMfundziso neTivumelwano kwabukwa. Lesi sembulo saniketwa emvakwekutsi lomhlangano uncume kutsi leti tembulo “tibaluleke kakhulu eBandleni njengemcebo weMhlaba wonkhe.” Umlandvo waJoseph Smith utsi leti tembulo “tisisekelo seliBandla kuleti tikhatsi tekugcina, futsi tiyinzuzo emhlabeni wonkhe, lokukhombisa kutsi tikhiya tetimfihlakalo tembuso weMsindzisi wetfu setiphindze taphatsiswa kumuntfu.”
1–5, Baphatsi bayakhetfwa kutsi bakhiphe letembulo kubantfu; 6–13, Labo labasebenta etintfweni takamoya bafanele kutfola liholo labo; 14–18, LabaNgcwele kufanele balingane etintfweni tasemhlabeni.
1 Bukani, futsi nilalele, O nine bantfu labahlala eSiyoni, nani nonkhe nine bantfu belibandla lami labakhashane, nive livi leNkhosi lengilinika inceku yami Joseph Smith, lomNcane, nasencekwini yami Martin Harris, nasencekwini yami Oliver Cowdery, nasencekwini yami John Whitmer, nasencekwini yami Sidney Rigdon kanjalo nasencekwini yami William W. Phelps, ngendlela yemyaleto kubo.
2 Ngoba ngibaniketa umyaleto; ngaloko-ke lalelani futsi nive, ngoba naku lokushiwo yiNkhosi kubo—
3 Mine, iNkhosi, ngibakhetsile, futsi ngababeka kutsi babe baphatsi betembulo nemiyaleto lengibanikete yona, lengitawuphindze ngibanikete yona emvakwaloku;
4 Futsi umbiko ngaloku kuphatsa kwabo ngiyawukufuna kubo ngelilanga lekwehlulela.
5 Ngaloko-ke, ngibakhetsele wona, futsi lona ngumsebenti wabo ebandleni laNkulunkulu, kulawula yona netindzaba letiphatselene nayo, yebo nenzuzo yayo.
6 Ngaloko-ke, ngibanika umyaleto, wekutsi bangatinikeli leti tintfo ebandleni, noma emhlabeni;
7 Noko, nangabe batfola ngetulu kwaloko lokudzingekile ngekwetidzingo nangalabakufunako, kuyawubekwa endlini yabo yengcebo;
8 Futsi inzuzo iyawungcweliselwa bantfu labahlala eSiyoni, netitukulwane tabo, nangabe baba tindlalifa ngekwemitsetfo yembuso.
9 Bukani, nguloko iNkhosi leyikufunako kuwonkhe muntfu ekuphatseni kwakhe, ngisho njengobe mine, iNkhosi, ngikhetse noma emvakwaloku ngiyawukhetsa noma ngumuphi umuntfu.
10 Futsi bukani, kute umuntfu lokhululiwe kulomtsetfo longuwelibandla laNkulunkulu lophilako;
11 Yebo noma umbhishobhi, noma sitfunywa lesigcina indlu yengcebo yeNkhosi, noma loyo lokhetfwe kutsi aphatse tintfo tasemhlabeni.
12 Loyo lobekwe kutsi alawule tintfo takamoya, nguye loyo lofanele kutsi atfole liholo lakhe, njengalabo labakhetfwe kutsi baphatsi kutsi baphatse tintfo tasemhlabeni;
13 Yebo, lelinyenti kakhulu, lokuyinala leyandziselwa kubo ngetibonakaliso taMoya.
14 Noko, etintfweni tenu tasemhlabeni kufanele nilingane, futsi loku ningakwenti kalukhuni, kungenjalo inala yetibonakaliso taMoya iyawugodlwa.
15 Manje, lomyaleto ngiwunika tinceku tami kute tizuze tisaphila, kute kube nesibonakaliso setibusiso tami etikwetinhloko tabo, futsi kute batfole umvuzo wekukhutsala kwabo baphindze baphephe;
16 Kute batfole kudla netembatfo; batfole lifa; batfole tindlu nemihlaba, kunoma ngutiphi timo mine, iNkhosi, lengiyawubabeka kuto, futsi noma ngukuphi lapho mine, iNkhosi, ngiyawubatfuma khona,
17 Ngoba betsembekile etintfweni letinyenti, futsi bente kahle njengoba bangatange bone.
18 Bukani, mine, iNkhosi, nginemusa futsi ngitawubabusisa, batawungena enjabulweni yaleti tintfo. Kunjalo nje. Amen.