1 Bukani, futsi nilalele livi laloyo lonemandla onkhe, losuka phakadze naphakadze, ngisho Alfa na-Omega, sicalo nesiphetfo.

2 Bukani, ngicinisile naku lokushiwo yiNkhosi kini, O babonisi belibandla lami, lenibutsene kulendzawo, lenitsetselelwe tono tenu manje, ngoba mine, iNkhosi, ngiyatitsetselela tono, futsi nginemusa kulabo labavuma tono tabo ngenhlitiyo letfobekile;

3 Kodvwa ngicinisile ngitsi kini, akukadzingeki kutsi lonkhe lelicembu lebabonisi bami lihambe ngekushesha etikwalamanti, ngesikhatsi bantfu labahlala ngalapha nangalapha babhubha ngekungakholwa.

4 Noko, ngakuvumela kute nifakaze; bukani, tinyenti tingoti etikwalamanti, ikakhulukati emvakwaloku;

5 Ngoba mine, iNkhosi, ngimemetele entfukutselweni yami imbubhiso lenyenti etikwalamanti; yebo, ikakhulukati etikwalawa manti

6 Noko, yonkhe inyama isesandleni sami, futsi loyo lowetsembekile emkhatsini wenu angeke abhubhe ngalamanti.

7 Ngaloko-ke, kufanele kutsi inceku yami Sidney Gilbert nenceku yami William W. Phelps basheshe kwenta umsebenti wabo wekufundzisa livangeli labatfunywe wona.

8 Noko, bengingeke ngivume kutsi nehlukane nite nijeziswe ngato tonkhe tono tenu, kute nibe munye, kute ningabhubhi ebubini;

9 Kodvwa manje, ngicinisile ngitsi, kudzingekile kutsi nehlukane. Ngaloko-ke tinceku tami Sidney Gilbert naWilliam W. Phelps atihambe nelicembu lato lakucala, batsatse luhambo lwabo ngekushesha kute bente umsebenti wabo wekufundzisa livangeli, futsi ngekukholwa batawuncoba;

10 Nangabe betsembekile batawugcinwa, futsi mine, iNkhosi, ngitawuba nabo.

11 Labasele abatsatse loko labakudzingako kwekwembatsa.

12 Inceku yami Sidney Gilbert ayitsatse loko leyingakudzingi ihambe nako, ngekuvumelana kwenu.

13 Manje, bukani, kute nizuze nganinika umyaleto mayelana naletintfo: Futsi mine, iNkhosi, ngitawubonisana nani njengakubantfu etikhatsini tasemandvulo.

14 Bukani, mine, iNkhosi, ekucaleni ngawabusisa lamanti; kodvwa ngemalanga ekugcina, ngemlomo wenceku yami Johane, ngawacalekisa lamanti

15 Ngaloko-ke, tikhatsi titawufika lapho kuyawubate inyama leyiyawusindza etikwalamanti.

16 Futsi kuyawutsiwa etikhatsini letitako kute loyawukwati kuya etulu eveni laseZion etikwalamanti, kodvwa loyo lolungile enhlitiyweni.

17 Futsi, njengobe mine, iNkhosi, ekucaleni ngalicalekisa lelive, kanjalo-ke emalangeni ekugcina ngilibusisile, ngesikhatsi salo, kute lisetjentiswe ngulabangcwele bami, kute badle inala yalo.

18 Manje ngininiketa umyaleto wekutsi lengikusho kumunye ngikusho kubo bonkhe, kute nicwayise bomnakenu mayelana nalamanti, kute bangahambi etikwawo, funa lukholo lwabo lwehluleke babambeke kulolugibe;

19 Mine, iNkhosi, ngimemetele, futsi umbhubhisi uhamba etikwawo, futsi angisihocisi lesimemetelo.

20 Mine, iNkhosi, benginitfukutselele itolo, kodvwa lamuhla intfukutselo yami iphelile.

21 Ngaloko-ke, labo lengikhulume ngabo, lokufanele batsatse luhambo lwabo ngekushesha—ngiyaphindza ngitsi kini, abatsatse luhambo lwabo ngekushesha.

22 Futsi akusho lutfo kimi, emvakwesikhashana, uma batawenta umsebenti wabo wekufundzisa livangeli, noma bahamba emantini noma emhlabatsini; loko akube njengobe kwembuliwe kubo njengekubona kwabo emvakwalesi sikhatsi.

23 Manje, ngalokuphatselene netinceku tami, Sidney Rigdon, Joseph Smith, lomNcane, na-Oliver Cowdery, atingaphindzi tite kulamanti, ngaphandle kwekutsi kube semseleni, ngesikhatsi tisahamba tiya emakhaya ato; noma ngalamanye emagama angeke bete bahamba kulamanti, ngaphandle kwekutsi kube ngemsele.

24 Bukani, mine, iNkhosi, ngiyikhetsile indlela yekuhamba yalabangcwele bami, futsi bukani, ngiyo lena indlela—kutsi emvakwekushiya umsele kufanele bahambe emhlabatsini, njengobe bayaletiwe kutsi bahambe baye etulu eveni laseZion;

25 Futsi kufanele bente njengebantfwana baka-Israyeli, bamise emathende abo ngendlela.

26 Futsi, bukani, lomyaleto niyawuniketa kubo bonkhe bomnakenu.

27 Noko, loyo loniketwe emandla ekuyaleta emanti, kuye kuniketwe ngaMoya kutsi ati tonkhe tindlela takhe;

28 Ngaloko-ke, akente njengobe Moya waNkulunkulu lophilako amyaletile, noma emhlabatsini noma emantini, njengobe kukimi kwenta emvakwaloku.

29 Futsi kini kuniketwe indlela yalabangcwele, noma indlela yalabangcwele belibandla leNkhosi, kutsi bahambe.

30 Ngetulu kwaloko, ngicinisile ngitsi kini, tinceku tami, Sidney Rigdon, Joseph Smith lomNcane, na-Oliver Cowdery, atiyukuyivula imilomo yato emabandleni alababi tite tifike eCincinnati;

31 Futsi kuleyo ndzawo tiyawuphakamisa emavi ato kuNkulunkulu ngekumelana nalabo bantfu, yebo, kuloyo intfukutselo yakhe levutsako ngekumelana nebubi babo, bantfu cishe lesebalungele kubhujiswa.

32 Kusuka lapho abahambele emabandla abomnakabo, ngoba imisebenti yabo namanje idzingeka kakhulu emkhatsini wabo kunasemkhatsini wemabandla alababi.

33 Manje, ngalokuphatselene nalabasele, abahambe bamemetele livi emkhatsini wemabandla alababi, njengobe bayaletiwe;

34 Nangabe bakwenta loku bayawuba ngulabangenacala, futsi abayuba nacashata phambi kwami.

35 Futsi abahambe kanyekanye, noma ngababili, njengobe kubonakala kukuhle kubo, kuphela nje inceku yami Reynolds Cahoon, nenceku yami Samuel H. Smith, lengitfokota kakhulu ngabo, abangehlukaniswa bate babuyele emakhaya abo, loku kungenjongo lehlakaniphile kimi.

36 Manje, ngicinisile ngitsi kini, lengikusho kumunye ngikusho kubo bonkhe, manini sibindzi, bantfwana labancane; ngoba ngisemkhatsini wenu, futsi angikanilahli;

37 Futsi nangabe nititfobile phambi kwami, tibusiso tembuso ngetenu.

38 Bophani tinkhalo tenu nilindze niphindze nibe nesizotsa, nibuke phambili ekubuyeni kweNdvodzana yeMuntfu, ngoba iyawufika ngesikhatsi leningakasilindzeli.

39 Thandazani njalo kute ningangeni ekulingweni, kute nilimele lilanga lekubuya kwakhe, noma ekuphileni noma ekufeni. Kunjalo nje. Amen.