1 Lalelani livi laJesu Khristu, uMhlengi wenu, Lomkhulu ngiNguye, lo umkhono wakhe wemusa utihlawulele tono tenu;

2 Lotawubutsela bantfu bakhe njengesikhukhukati sifukamela emantjwele aso ngaphansi kwetimphiko taso, ngisho bonkhe labo labatawulalela livi lami futsi batitfobe phambi kwami, bangibite ngemthandazo lonemandla.

3 Bukani, ngicinisile, ngicinisile, ngitsi kini, ngalesi sikhatsi tono tenu ticolelwe, ngako-ke nitfola leti tintfo; kodvwa khumbulani kutsi ningaphindzi none, funa nehlelwe tingoti.

4 Ngicinisile, ngitsi kini nikhetsiwe emhlabeni kute nimemetele livangeli lami ngemsindvo wenjabulo, njengekukhala kwelicilongo.

5 Tfokotani niphindze nijabule, ngoba ngisemkhatsini wenu, ngingummeli wenu kuBabe; futsi kuyintsandvo yakhe lenhle kuninika umbuso.

6 Futsi, njengobe kubhaliwe—Noma ngayini leniyawuyicela ngekukholwa, nimunye emthandazweni njengekwemyaleto wami, niyawuyitfola.

7 Futsi nibitelwe kufeza kugcogca labakhetsiwe bami; ngoba labakhetsiwe bami bayaliva livi lami futsi abatenti lukhuni tinhlityo tabo;

8 Ngaloko-ke simemetelo siphumile kuBabe kutsi bayawugcogcelwa endzaweni yinye eveni, kute balungise tinhlitiyo tabo futsi batilungiselele kuto tonkhe tintfo ngelilanga lapho lusizi nembubhiso sekutfunyelwa kulababi.

9 Ngoba lihora selisondzele nelilanga selisedvute lapho umhlaba sewuvutsiwe; bonkhe labatigcabhako nabo bonkhe labenta lokubi bayawuba njengetinhlanga; futsi ngitawubashisa baphele nya, kusho iNkhosi yemaBandla, kute bubi bungabi khona emhlabeni;

10 Ngoba lihora selisondzele, futsi naloko lokwakhulunywa baphostoli bami kumele kugcwaliseke; ngoba njengobe bakhuluma kuyawukwenteka kanjalo;

11 Ngoba ngitawutembula ngivela ezulwini ngemandla nangenkhatimulo lenkhulu, nalo lonkhe libutfo lakhona, ngihlale ngekulunga nebantfu emhlabeni iminyaka letinkhulungwane, futsi lababi angeke bahlale.

12 Ngetulu kwaloko, ngicinisile, ngicinisile, ngitsi kini, kuphume ngesimemetelo lesicinile, ngentsandvo yaBabe, kutsi baphostoli bami, labaliShumi nakuBili labebanami emsebentini wami eJerusalema, bayawukuma ngasesandleni sami sangesekudla ngelilanga lekubuya kwami ngensika yemlilo, bembatsiswe tingubo tekulunga, banemichele etinhloko tabo, basenkhatimulweni njengami, kute behlulele yonkhe indlu yaka-Israyeli, ngisho bonkhe labangitsandzile bagcina imiyaleto yami, kute lomunye.

13 Ngoba licilongo liyawukhala sikhatsi lesidze futsi likhale kakhulu, njengaseNtsabeni iSinayi, wonkhe umhlaba uyawutamatama, futsi bayawuphuma—yebo, nalabafile labafela kimi, kutawutfola umchele wekulunga, nekugcokiswa, njengami, kute babe nami, kute sibe munye.

14 Kodvwa, bukani, ngitsi kini ngaphambi kwaleli lilanga lelikhulu lilanga liyawufiphala, nenyeti ibe bovu njengengati, netinkhanyeti tiyawukuwa tisuka ezulwini, futsi kuyawuba netibonakaliso letinkhulu etulu ezulwini nasemhlabeni ngaphansi;

15 Futsi kuyawuba khona kukhala nekulila emkhatsini wesicumbi sebantfu;

16 Kuyawuba khona sangcotfo lesikhulu lesiyawutfunyelwa kutawubulala tonkhe titjalo temhlaba.

17 Futsi kuyawukwenteka, ngenca yebubi bemhlaba, kutsi ngitawuphindzisela kulababi, ngoba abafuni kuphendvuka, ngoba sitja sentfukutselo sigcwele; ngoba bukani, ingati yami angeke ibahlante uma bangangilaleli.

18 Ngaloko-ke, mine iNkhosi Nkulunkulu ngitawutfumela timphungane emhlabeni, letiyawubamba bonkhe bantfu labahlala kuwo, futsi tiyawukudla inyama yabo, tidale kutsi timphetfu tibahluphe;

19 Lulwimi lwabo luyawuboshwa kute bangakhoni kukhuluma emavi ngekumelana nami; nenyama yabo iyawuhlephuka ematsanjeni abo, nemehlo abo esuke etisekelweni tawo;

20 Futsi kuyawukwenteka kutsi tilwane tasendle netinyoni telizulu tiyawubadla tibacedze.

21 Nelibandla lelikhulu nalelinengekile, leliyingwadla yemhlaba wonkhe, liyawuphonswa phansi ngemlilo locutfulako, njengobe kwashiwo ngemlomo waHezekeli umphrofethi, lowakhuluma ngaleti tintfo, letingakenteki kodvwa lokufanele nakanjani tenteke, njengobe ngiphila, ngoba tinengiso angeke tibuse.

22 Ngetulu kwaloko, ngicinisile, ngicinisile ngitsi kini uma iminyaka letinkhulungwane seyiphelile, nebantfu sebacala kuphika Nkulunkulu wabo, ngaleso sikhatsi ngiyawuhlenga umhlaba kwesikhashana;

23 Kuphela kwetikhatsi kayawufika, lizulu nemhlaba kuyawubhujiswa futsi kwendlule, kuyawuba nelizulu lelisha nemhlaba lomusha

24 Ngoba tonkhe tintfo letindzala tiyawukwendlula, tonkhe tintfo tiyawuba tinsha, ngisho lizulu nemhlaba nako konkhe lokugcwele kuwo, bantfu netilwane, tinyoni telizulu, netinhlati taselwandle;

25 Futsi kute nalunye lunwele, noma lokuncane, lokuyawulahleka, ngoba kungumsebenti wetandla tami.

26 Kodvwa, bukani, ngicinisile ngitsi kini, ngaphambi kwekube umhlaba wendlule, Mikhayeli, ingilosi yami lenkhulu, uyawushaya licilongo lakhe, bese bonkhe labafile bayavuka, ngoba emathuna abo ayawuvulwa, bese bayaphuma—yebo, bonkhe.

27 Labalungile bayawugcogcelwa ngasesandleni sami sangesekudla ekuphileni lokuphakadze; bese lababi ngasesandleni sami sangesencele ngitawuba nemahloni ekutsi ngebami phambi kwaBabe.

28 Ngaloko-ke ngiyawutsi kubo—Khweshani kimi, nine lenicalekisiwe, niye emlilweni waphakadze lolungiselwe develi netingilosi takhe.

29 Manje, bukani, ngitsi kini, angikate noma ngasiphi sikhatsi ngamemetela ngemlomo wami kutsi bayawubuya, ngoba lapho ngikhona angeke bete, ngoba bete emandla.

30 Kodvwa khumbulani kutsi tonkhe tehlulelo tami atikembulwa kubantfu; futsi njengobe emavi asaphumile emlonyeni wami kanjalo-ke ayawugcwaliseka, kutsi bekucala bayawuba bekugcina, nekutsi bekugcina babe bekucala kuto tonkhe tintfo lengitidalile ngelivi lemandla ami, lokungemandla aMoya wami.

31 Ngoba ngemandla aMoya wami ngatidala; yebo, tonkhe tintfo ngekwakamoya nangekwemvelo—

32 Kucala ngadala tintfo takamoya, kwesibili ngadala tintfo temvelo, lokukucala kwemsebenti wami; ngetulu kwaloko, kucala ngadala tintfo temvelo, kwesibili ngadala tintfo takamoya, lokungukwekugcina kwemsebenti wami—

33 Ngikhuluma kini loku kute nicondze ngekwemvelo; kodvwa kimi umsebenti wami ute siphetfo, noma sicalo; kodvwa niphiwe kona kute nicondze, ngoba nicelile kimi futsi nivumelene.

34 Ngaloko-ke, ngicinisile ngitsi kini tonkhe tintfo kimi tamoya, futsi kute sikhatsi lapho ngake nganinika umtsetfo wasemhlabeni, noma nginike umtsetfo wasemhlabeni kumuntfu, nebantfwana bebantfu; noma Adamu, babe wenu lengamdala.

35 Bukani, ngamniketa kutsi akwati kutikhetsela; ngaphindze ngamnika umyaleto, kodvwa angimnikanga umyaleto wasemhlabeni, ngoba yami imiyaleto yamoya; ayisiyo yemvelo noma yemhlaba, yenyama noma yekutfokotisa imizwa.

36 Futsi kwenteka kutsi Adamu, alingwe ngudeveli—ngoba, bukani, develi wabakhona kucala kuna-Adamu, ngoba wangivukela, watsi, Nginike ludvumo lwakho, lokungemandla ami; ngetulu kwaloko incenye yesitsatfu yelibutfo lasezulwini walenta langilahla ngenca yelilungelo labo lekutikhetsela;

37 Futsi baphonswa phansi, wabakhona kanjalo-ke develi netingilosi takhe;

38 Futsi, bukani, kukhona indzawo lelungiselelwe bona kusuka ekucaleni, leyo ndzawo sihogo.

39 Futsi develi kufanele abalinge bantfwana bebantfu, nakungenjalo angeke bakwati kutikhetsela ngekwabo; ngoba uma bebangakate beve buhlungu bebangeke babati bumnandzi—

40 Ngaloko-ke, kwenteka kutsi develi wamlinga Adamu, wasidla sitselo lebekangakavunyelwa kutsi asidle wephula umyaleto, ngaloko waba ngaphansi kwentsandvo yadeveli, ngoba wavumela silingo.

41 Ngaloko-ke, mine, iNkhosi Nkulunkulu, ngenta kutsi acoshwe ngaphandle eNsimini yase-Edeni, ebukhoneni bami, ngenca yesiphambeko sakhe, ngaloko-ke waba ngulofile ngekwakamoya, lokukufa kwekucala, loko kufa lokufanako lokukufa kwekugcina, lokukwakamoya, lokuyawumenyetelwa kulababi lapho ngiyawutsi: Khweshani, nine lenicalekisiwe.

42 Kodvwa, bukani, ngitsi kini mine, iNkhosi Nkulunkulu, ngamvumela Adamu nentalelwane yakhe, kutsi bangafi ngekufa kwenyama, ngite mine, iNkhosi Nkulunkulu, ngitfumele tingilosi titawumemetela kubo ngekuphendvuka nangekuhlengwa, ngekukholwa egameni leNdvodzana yami leTelwe Yodvwa.

43 Futsi ngenta kanjalo-ke mine, iNkhosi Nkulunkulu, ngamisela umuntfu sikhatsi sekuvivinywa—kute kutsi ngekufa kwakhe kwemvelo angavuselwa esimeni sekungabhubhi nasekuphileni lokuphakadze, ngisho bonkhe labo labatawukholwa;

44 Futsi bonkhe labo labangakholwa bavuselwa ekulahlweni lokuphakadze; ngoba angeke bahlengwe esimeni sekuwa ngekwamoya, ngoba abaphendvuki;

45 Ngoba batsandza bumnyama kunekukhanya, netento tabo timbi, futsi bazuza inkhonkhelo yaloyo labakhetsa kumtfobela.

46 Kodvwa bukani, ngitsi kini, bantfwana labancane bahlengiwe kusukela ekusekelweni kwemhlaba ngaloTelwe Yedvwa wami;

47 Ngaloko-ke, angeke bone, ngoba Sathane akaniketwa emandla ekulinga bantfwana labancane, bate bakwati kutiphendvulela phambi kwami;

48 Ngoba kwembuliwe kubo njengobe ngikhetsile, ngekwentsandvo yami, kutsi tintfo letinkhulu tingadzingeka kubokhokho babo.

49 Ngetulu kwaloko, ngitsi kini, noma ngubani lonelwati, angikamyaleti yini kutsi aphendvuke na?

50 Futsi loyo lote kucondza, kukimi kutsi ngente njengobe kubhaliwe. Manje angisamemeteli lokunye kini kulesi sikhatsi. Amen.