Sigaba 85
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 27 Lweti, 1832. Lesi sigaba siyincenye lekhishwe encwadzini yemPhrofethi leya kuWilliam W. Phelps, lobekahlala e-Independence, eMissouri. Siphendvula imibuto ngalabaNgcwele labebatfutsele eSiyoni kodvwa labebangakawulandzeli umyaleto wekunikela ngemphahla yabo lokwenta kutsi bangawatfoli emafa abo ngekweluhlelo lolwalumisiwe eBandleni.
1–5, Emafa eSiyoni atfolakala ngekunikela; 6–12, Lonemandla nalocinile utawuniketa labaNgcwele lifa labo eSiyoni.
1 Kungumsebenti wamabhalane weNkhosi, leyimkhetsile, kugcina umlandvo, nemibhalo lephelele yelibandla yato tonkhe tintfo letenteka eSiyoni, neyabo bonkhe labo labanikela ngemphahla, nalabatfola emafa ngalokusemtsetfweni kumbhishobhi;
2 Nendlela yabo yemphilo, lukholo lwabo, nemisebenti yabo; neyemahlubuka lahlubukako emvakwekutfola emafa abo.
3 Kuphambene nentsandvo nemyaleto waNkulunkulu kutsi labo labangawatfoli emafa abo ngekunikela, ngekuvumelana nemtsetfo wakhe, lawuniketile, kute akhokhise kwelishumi bantfu bakhe, kute abalungiselele bamelane nelilanga lesijeziso nelekusha, kutsi emagama abo abhalwe newebantfu baNkulunkulu.
4 Futsi nemlandvo wesitukulwane sabo awungagcinwa, noma ubekwe lapho ungatfolakala khona emibhalweni noma emlandvweni welibandla.
5 Emabito abo awangatfolakali, noma emabito aboyise, noma emabito ebantfwana labhaliwe encwadzini yemtsetfo waNkulunkulu, kusho iNkhosi yemaBandla.
6 Yebo, naku lokushiwo livi lelincane lelithulile, lelihlebela liphindze lihlabe tonkhe tintfo, futsi etikhatsini letiningi lenta ematsambo ami achachatele ngesikhatsi litibonakalisa, litsi:
7 Futsi kuyawukwenteka kutsi mine, iNkhosi Nkulunkulu, ngitawutfumela locinile nalonemandla, lophetse intfonga yemandla esandleni sakhe, lowembetse kukhanya kube yingubo, umlomo wakhe loyawukusho emavi, emavi aphakadze; kantsi tibilini takhe tiyawuba ngumtfombo weliciniso, kulungisa indlu yaNkulunkulu, nekuhlela ngenkatho emafa alabangcwele emabito abo latfolakalako, nemabito aboyise, newebantfwaba babo, labhalwe encwadzini yemtsetfo waNkulunkulu;
8 Kantsi leyondvodza, leyabitwa nguNkulunkulu futsi yakhetfwa, leyelula sandla kubamba umphongolo waNkulunkulu, iyawukuwa ngemcibisholo wekufa, njengesihlahla lesishaywe ngumcibisholo wembani lokhanya kakhulu.
9 Futsi bonkhe labo labayawutfolwa bangakabhalwa encwadzini yesikhumbuto abayukulitfola lifa ngalelo langa, kodvwa bayawuhlukaniswa nalabanye, futsi sabelo sabo bayawukhetselwa sona emkhatsini walabangakholwa, lapho kukhona kukhala nekugedletela kwematinyo.
10 Leti tintfo angitikhulumi ngekwami; ngako-ke, njengoba iNkhosi ikhulumile, iyawutigcwalisa futsi.
11 Futsi labo labangebebuPhristi lobuKhulu, emabito abo langatfolakali abhaliwe encwadzini yemtsetfo, noma labo labatfolakala bahlubukile, noma basusiwe ebandleni, nalabo bebuphristi lobuncane, noma emalunga, ngalelo langa angeke balitfole lifa emkhatsini walabangcwele baLosetikwako Konkhe;
12 Ngaloko-ke, kuyawukwentiwa kubo njengakubantfwana bemphristi, njengoba kubhaliwe esehlukweni sesibili livesi lemashumi lasitfupha nakunye nelemashumi lasitfupha nakubili lencwadzi ya-Ezra.