Sigaba 100
Sembulo lesaniketwa Joseph Smith umPhrofethi naSidney Rigdon, ePerrysburg, eNew York, mhlaka 12 iMphala, 1833. Labazalwane lababili, ngenca yekutsi bebangekho nemindeni yabo emalanga lambalwa, baba nekukhatsateka ngayo.
1–4, Joseph naSidney kufanele bashumayele livangeli kute kusindziswe bantfu; 5–8, Batawuniketwa ngaleso sikhatsi lekufanele bakusho; 9–12, Sidney kufanele abe ngumlomo naJoseph kufanele abe ngumembuli futsi abe nemandla ebufakazini; 13–17, INkhosi itawuvusa bantfu labamsulwa, nalabalalelako batawusindziswa.
1 Ngicinisile, naku lokushiwo yiNkhosi kini, bahlobo bami Sidney naJoseph, imindeni yenu iyaphila; isetandleni tami, futsi ngitawukwenta kuyo njengekutsandza kwami; ngoba kimi kunemandla onkhe.
2 Ngako-ke, ngilandzeleni, nilalele imiyalo lengiyawuninika yona.
3 Bukani, nibone, nginebantfu lananingi kulendzawo, etifundzeni tonkhe; futsi litfuba lekusebenta liyawuvuleka etifundzeni letisondzelene nalendzawo lesemphumalanga.
4 Ngako-ke, mine, iNkhosi, nginivumele kutsi nite kulendzawo; ngoba ngekwenta njalo ngakubona kufanele kute kusindziswe bantfu.
5 Ngako-ke, ngicinisile ngitsi kini, phakamisani emaphimbo enu kulaba bantfu; khulumani imicabango lengiyawuyifaka etinhlitiyweni tenu, futsi angeke nithuliswe phambi kwebantfu;
6 Ngoba niyawuniketwa ngaleso sikhatsi, yebo, ngalowo mzuzu, leniyawukusho.
7 Kodvwa ngininiketa umyaleto, wekutsi niyawusho noma ngayini leniyawuyisho egameni lami, ngesizotsa senhlitiyo, ngemoya webumnene, etintfweni tonkhe.
8 Futsi ngininiketa lesi setsembiso, sekutsi nangabe nikwenta loku Moya loNgcwele uyawutfunyelwa kini kufakaza nganoma ngitiphi tintfo leniyawutisho.
9 Futsi ngibona kufanele kutsi wena, nceku yami Sidney, ube ngumlomo kulaba bantfu; yebo, ngicinisile, ngitawukubeka kulolubito, ube ngumlomo wenceku yami Joseph.
10 Ngitawumnika nemandla kubo bufakazi.
11 Futsi ngitawukunika emandla ekutsi ube nemandla ekuchazeni kabanti imibhalo yonkhe lengcwele, kute ube ngumlomo wakhe, yena uyawuba ngumembuli kuwe, kute wati buciniso bato tonkhe tintfo letiphatselene nembuso wami emhlabeni.
12 Ngako-ke, chubekani neluhambo lwenu futsi netinhlitiyo tenu atijabule; ngoba bukani, nibone, nginani kute kube sekugcineni.
13 Manje sengininiketa livi mayelana neSiyoni. ISiyoni iyawuhlengwa, nanoma ajeziswa kwesikhashana.
14 Bomnakenu, tinceku tami Orson Hyde naJohn Gould, basetandleni tami; futsi nangabe bagcina imiyaleto yami bayawusindziswa.
15 Ngako-ke, tinhlitiyo tenu atidvudvuteke; ngoba tonkhe tintfo tiyawusebentelana tibe nguletinhle kulabo labahamba ngebucotfo, kute kungcweliswe libandla.
16 Ngoba ngitawutivusela bantfu labamsulwa, labatawungikhonta ngekulunga;
17 Futsi bonkhe lababita libito leNkhosi, bagcine nemiyaleto yayo, bayawusindziswa. Kunjalo nje. Amen.