Sigaba 82
Sembulo lesaniketwa Joseph Smith, e-Independence, eSifundzeni saseJackson, eMissouri, mhlaka 26 Mabasa, 1832. Bekusikhatsi semkhandlu webaphristi labakhulu kanye nebabonisi beliBandla. Kulomkhandlu, Joseph Smith umPhrofethi wasekelwa njengeMengameli webuPhristi lobuKhulu, sikhundla labekabekwe kuso ngaphambilini emhlanganweni webaphristi labakhulu, babonisi, kanye namalunga, e-Amherst, e-Ohio, mhlaka 25 Bhimbidvwane 1832 (buka sihloko sesigaba 75). Lesi sembulo siphindza imiyaleto leniketwe esembulweni sangaphambilini (sigaba 78) sekusungula inkampane—leyatiwa ngekutsi yiNkampane yeLubumbano (ngaphansi kwekuyaletwa nguJoseph Smith, leligama lelitsi “luhlelo” latsatsa indzawo yalelitsi “inkampane”)—yekuphatsa imetamo yeliBandla yekutsengisa imphahla nekushicilela.
1–4, Lapho kuniketwe lokukhulu, kudzingeka lokukhulu; 5–7, Bumnyama buyabusa emhlabeni; 8–13, INkhosi iyatibophelela uma senta loko leyikushoko; 14–18, ISiyoni kufanele ikhule ngebuhle nangebungcwele; 19–24, Wonkhe umuntfu kufanele afune kusita makhelwane wakhe.
1 Ngicinisile, ngicinisile, ngitsi kini, tinceku tami, nangabe nitsetselelana emacala enu, kanjalo nami, ngiyanitsetselela.
2 Noko, kukhona emkhatsini wenu labone kakhulu; yebo, ngisho nani nonkhe nonile; kodvwa ngicinisile ngitsi kini, caphelani kusukela manje, gwemani kona, funa kwehlulelwa lokumatima kwehliselwe etinhloko tenu.
3 Ngoba kuloyo loniketwe lokukhulu kudzingeka lokukhulu; futsi loyo lowona anelwati lolukhudlwana bayawukwemukeliswa kwehlulelwa lokumatima.
4 Nibita libito lami kute nitfole tembulo, futsi ngiyaninika; nangabe ningayigcini imiyaleto yami, lengininika yona, niba ngulabaphambukako; futsi kulunga nekwehlulelwa tijeziso letihlangene nemtsetfo wami.
5 Ngako-ke, lengikusho kumunye ngikusho kubo bonkhe: Caphelani, ngoba lomubi wandzisa kubusa kwakhe, futsi nebumnyama buyabusa.
6 Nentfukutselo yaNkulunkulu yokhelekela bantfu basemhlabeni; futsi kute lowenta lokuhle, ngoba bonkhe baphumile endleleni.
7 Manje, ngicinisile ngitsi kini, mine, iNkhosi, angeke nginibekele sono ngaloku lenikwentako; hambani ningabe nisona; kodvwa kuloyo muntfu lowonako tono takucala titawubuya, kusho iNkhosi Nkulunkulu wenu.
8 Ngetulu kwaloko, ngitsi kini, ngininika umyaleto lomusha, kute niyicondze intsandvo yami ngalokuphatselene nani;
9 Noma, ngalamanye emagama, ngininika imiyaleto yekutsi ningatiphatsa kanjani phambi kwami, kute loku kube nemphumela wekuba nisindziswe.
10 Mine, iNkhosi, ngiyatibophelela uma nenta loko lengikushoko; kodvwa uma ningakwenti lengikushoko, aninaso setsembiso.
11 Ngako-ke, ngicinisile ngitsi kini, kufanele kutsi tinceku tami Edward Partridge naNewel K. Whitney, na-A. Sidney Gilbert na Sidney Rigdon, nenceku yami Joseph Smith, naJohn Whitmer naOliver Cowdery, kanye na W. W. Phelps naMartin Harris titibophelele ndzawonye ngebudlelwane nangesivumelwano lesingeke sephulwe ngesiphambeko, uma kungenjalo kwehlulelwa kuyawulandzela masinyane, ekuphatseni kwenu lokwehlukahlukene—
12 Kuphatsa tindzaba talabamphofu, nato tonkhe tintfo letiphatselene nebubhishobhi eveni laseSiyoni naseveni laseKirtland;
13 Ngoba ngilingcwelisile live laseKirtland ngesikhatsi sami lesifanele kute kuzuze labangcwele baloyo Losetikwako Konkhe, futsi njengesikhonkhwane kute kuzuze iSiyoni.
14 Ngoba iSiyoni kufanele ikhule ngebuhle, nangebungcwele; imincele yayo kufanele yandziswe; tikhonkhwane tayo kufanele ticiniswe; yebo, ngicinisile ngitsi kini, iSiyoni kufanele iphakame igcoke tingubo tayo letinhle.
15 Ngako-ke, ngininika lomyaleto, wekutsi nitibophe ngalesi sivumelwano, futsi kuyawukwentiwa ngekwemitsetfo yeNkhosi.
16 Bukani, naku kuhlakanipha lokukimi kute nizuze.
17 Kufanele nilingane, noma ngalamanye emagama, kufanele nibe nelilungelo lelilinganako lekutfola imphahla, kute nikwati kuphatsa tindzaba tekuphatsa kwenu, wonkhe umuntfu ngekwaloko lakufunako nangekwetidzingo takhe, nangabe loko lakufunako kulungile—
18 Futsi konkhe loku kute kuzuze libandla laNkulunkulu lophilako, kute wonkhe umuntfu atfutfukise likhono lakhe, kute wonkhe umuntfu azuze lamanye emakhono, yebo, ngisho ngalokuphindvwe kaningi, kute abekwe endlini yengcebo yeNkhosi, abe yimphahla yawo wonkhe umuntfu ebandleni lonkhe—
19 Wonkhe umuntfu kufanele afune kusita makhelwane wakhe, futsi ente tonkhe tintfo ngeliso lelicondze inkhatimulo yaNkulunkulu.
20 Lolu luhlelo ngilubeke kutsi lube luhlelo lwaphakadze kini, nalabatawunilandzela, nangabe ningoni.
21 Futsi loyo muntfu lowonako kulesi sivumelwano, nalowenta inhlitiyo yakhe ibe lukhuni kuso, kuyawubhekwana naye ngekwemitsetfo yelibandla lami, futsi uyawunikelwa ekuhlushweni nguSathane kute kube lilanga lekuhlengwa.
22 Manje, ngicinisile ngitsi kini, loku kuhlakanipha, tenteleni bangani ngemcebo wekungalungi, futsi angeke banibhubhise.
23 Yekelani kwehlulela kimi, ngoba ngekwami futsi ngitawubuyisela. Kuthula akube kini; tibusiso tami atichubeke tibe kini.
24 Ngoba ngisho namanje umbuso usengewenu, futsi uyawuba ngewenu ingunaphakadze, uma ningawi ekucineni kwenu. Kunjalo nje. Amen.