Sigaba 104
Sembulo lesaniketwa Joseph Smith umPhrofethi, eKirtland noma dvutane nakhona, e-Ohio, mhlaka 23 kuMabasa, ngemnyaka we-1834, ngalokuphatselene neNkampane yeLubumbano (buka tihloko tetigaba 78 kanye na 82). Kungenteka kutsi leso sikhatsi kwakunguleso semhlangano wemkhandlu wemalunga eNkampane yeLubumbano, lapho kwakukhulunywa khona ngetidzingo tesikhashana teliBandla letiphutfumako. Emhlanganweni lowawungaphambilini lowawumhlaka 10 Mabasa walenkampane wawuncume kutsi lenkampane ihlakatwe. Lesi sembulo siyala kutsi esikhundleni saloko lenkampane ayihlelwe kabusha; imphahla yayo bekufanele ihlukaniswe emkhatsini walamalunga alenkampane njengebaphatsi babo. Ngekuyaleta kwaJoseph Smith, lamagama latsi “iNkampane yeLubumbano” kamuva latsatselwa indzawo ngulawa latsi “Luhlelo lweLubumbano” kulesi sembulo.
1–10, LabaNgcwele labephula umtsetfo eluhlelweni lwelubumbano batawucalekiswa; 11–16, INkhosi yondla labangcwele Bayo ngendlela Yayo; 17–18, Umtsetfo welivangeli ngiwo lophetse kunakekelwa kwalabamphofu; 19–46, Kuphatsa netibusiso tebazalwane labehlukahlukene kuyashiwo; 47–53, Luhlelo lwelubumbano eKirtland, neluhlelo loluseSiyoni kufanele kusebente ngekwehlukana; 54–66, Indzawo lengcwele yekugcina ingcebo yeNkhosi imiselwe kutsi kukhicitwe imibhalo lengcwele; 67–77, Indzawo yekugcina ingcebo yeluntfu yeluhlelo lwelubumbano kufanele isebente ngekuvumelana; 78–86, Labo labaseluhlelweni lwelubumbano kufanele babhadale tonkhe tikweleti tabo, futsi iNkhosi itawubakhulula ebugcilini bemali.
1 Ngicinisile ngitsi kini, bahlobo bami, ngininika seluleko, nemyaleto, ngalokuphatselene nayo yonkhe imphahla leyingeyeluhlelo lengiyalete kutsi luhlelwe luphindze lumiswe, kutsi kube luhlelo lwelubumbano, neluhlelo lwaphakadze kute kuzuze libandla lami, futsi kute bantfu basindziswe ngite ngibuye—
2 Ngesetsembiso lesingagucuki nalesingashintji, sekutsi nangabe labo lengabayaleta betsembekile kufanele babusiswe ngetibusiso letinyenti;
3 Kodvwa nangabe bangaketsembeki bebasondzele kuko kucalekiswa.
4 Ngako-ke, nangabe letinye tinceku tami tingawugcinanga umyaleto, kodvwa tephule sivumelwano ngekuhawukela, ngemavi ebucili, ngiticalekisile ngesicalekiso lesibuhluhgu nalesibi kakhulu.
5 Ngoba mine, iNkhosi, ngincumile enhlitiyweni yami, kutsi nangabe kukhona noma ngubani waloluhlelo loyawutfolakala ephula umtsetfo, noma, ngalamanye emagama, loyawuphula sivumelwano leniboshwe ngaso, uyawucalekiswa emphilweni yakhe, futsi uyawunyatselwa nguloyo lengimkhetsile;
6 Ngoba mine, iNkhosi, angiphukutwa kuleti tintfo—
7 Futsi konkhe loku kute labamsulwa emkhatsini wenu bangalahlwa ngelicala nalabangakalungi; futsi kute labanelicala emkhatsini wenu bangaphunyuli; ngoba mine, iNkhosi, nginetsembisile umchele wenkhatimulo esandleni sami sangesekudla.
8 Ngako-ke, nangabe nitfolwe nitephulamtsetfo, angeke niphunyule elulakeni lwami etimphilweni tenu.
9 Nangabe nisusiwe ngenca yekwephula umtsetfo, angeke nikwati kuphunyula ekuhlaselweni nguSathane kute kube lilanga lekuhlengwa.
10 Manje ngininika emandla kusukela kulesi sikhatsi, kutsi uma kukhona emkhatsini wenu, longuwaloluhlelo, lotfolakala asephulamtsetfo futsi angaphendvuki ebubini, kutsi niyawumnikela ekuhlaselweni nguSathane; futsi angeke abe nemandla ekuletsa bubi etikwenu.
11 Kukuhlakanipha kimi; ngako-ke, ngininika umyaleto, wekutsi niyawutihlela niphindze nikhetsele wonkhe umuntfu kuphatsa kwakhe;
12 Kute wonkhe muntfu atiphendvulele kimi ngekuphatsa lokukhetselwe yena.
13 Ngoba kufanele kutsi mine, iNkhosi, ngente wonkhe umuntfu atiphendvulele, njengemphatsi etikwetibusiso tasemhlabeni, lengitentile nalengitilungiselele tidalwa tami.
14 Mine, iNkhosi, ngelula emazulu, ngaphindze ngakha umhlaba, umsebenti wetandla tami lucobo; nato tonkhe tintfo letikuwo tami.
15 Futsi kuyinhloso yami kupha labangcwele bami, ngoba tonkhe tintfo tami.
16 Kodvwa kufanele kwentiwe ngendlela yami, futsi bukani nayi indlela mine, iNkhosi, lengiyimemetele kupha labangcwele bami, kutsi labamphofu baphakanyiswe, ngekutsi labacebile batfotjiswe.
17 Ngoba umhlaba ugcwele, futsi kunalokwanele nalokusele; yebo, ngalungisa tonkhe tintfo, futsi nganiketa bantfwana bebantfu kutsi batikhetsele.
18 Ngako-ke, uma kukhona umuntfu lotsatsa kulokunyenti lengikwentile, anganiki incenye yakhe, ngekwemtsetfo welivangeli lami, kulabamphofu nalabeswele, uyawuphakamisa emehlo akhe esihogweni, nalababi, asekuhluphekeni.
19 Manje, ngicinisile ngitsi kini, ngalokuphatselene nemphahla yaloluhlelo—
20 Inceku yami Sidney Rigdon ayiniketwe indzawo lapho ihlala khona nyalo, nencenye yendzawo yekushuka tikhumba kutsi kube ngumsebenti wayo, kute isitakale ngesikhatsi isebenta esivinini sami, njengobe ngitsandza, uma ngiyiyaleta.
21 Futsi konkhe akwentiwe ngeseluleko seluhlelo, nekuvumelana noma livi leluhlelo, loluseveni laseKirtland.
22 Futsi loku kuphatsa nesibusiso, mine, iNkhosi, ngikunika inceku yami Sidney Rigdon kutsi kube sibusiso kuyo, nentalelwane yayo emvakwayo;
23 Futsi ngitawukwandzisa tibusiso kuyo, nangabe atawutitfoba phambi kwami.
24 Ngetulu kwaloko, inceku yami Martin Harris ayiniketwe, kutsi ayiphatse, incenye yendzawo yemhlaba inceku yami John Johnson leyayitfola ngekushintjisa ngelifa layo lekucala, ibe yayo nentalelwane yayo emvakwayo;
25 Futsi nangabe yetsembekile, ngitawutandzisa tibusiso kuyo nasentalelwaneni yayo emvakwayo.
26 Futsi inceku yami Martin Harris ayinikele ngetimali tayo kute kumenyetelwe emavi ami, njengobe inceku yami Joseph Smith, lomNcane, iyawukusho.
27 Ngetulu kwaloko, inceku yami Frederick G. Williams ayibe ngeyakhe lendzawo lehlala kuyo nyalo.
28 Nenceku yami Oliver Cowdery ayibe nalencenye yendzawo leyehlukene nendlu kodvwa lesedvute nayo, lekufanele ibe lihhovisi lekukhicita, lokuyincenye yendzawo yekucala, nencenye yendzawo lapho uyise ahlala khona.
29 Netinceku tami Frederick G. Williams na-Oliver Cowdery atibe nelihhovisi lekukhicita nelato tonkhe tintfo letiphatselene nako.
30 Futsi loku kuyawuba kuphatsa kwato lokuyawuniketwa tona.
31 Futsi nangabe tetsembekile, bukani ngitawutibusisa, ngiphindze ngandzise tibusiso kuto.
32 Futsi loku kusicalo sekuphatsa lengikumisele tona, tona kanye nentalelwane yato emvakwato.
33 Futsi, nangabe tetsembekile, ngitawukwandzisa tibusiso kuto nentalelwane yato emvakwato, ngisho bunyenti betibusiso.
34 Ngetulu kwaloko, inceku yami John Johnson ayibe nendlu lehlala kuyo, nelifa, konkhe ngaphandle kwelibala lelibekelwe kwakha tindlu tami, lelicondzene nalelolifa, naleto tincenye tetindzawo letimiselwe inceku yami Oliver Cowdery.
35 Futsi nangabe yetsembekile, ngitawukwandzisa tibusiso kuyo.
36 Futsi kuyinhloso yami kutsi kufanele itsengise letincenye tetindzawo letehlukaniselwe kwakha lidolobha lalabangcwele bami, nangabe kuyawukwatiswa kuyo ngelivi laMoya, nangekweseluleko seluhlelo, nangelivi leluhlelo.
37 Futsi loku kusicalo sekuphatsa lengikumisele yona, kute kube sibusiso kuyo kanye nakuntalelwane yayo emvakwayo.
38 Futsi nangabe yetsembekile, ngitawukwandzisa tibusiso kuyo.
39 Ngetulu kwaloko, inceku yami Newel K. Whitney ayiniketwe tindlu nencenye yendzawo lapho ihlala khona nyalo, nencenye yendzawo nesakhiwo kuyo lekume sakhiwo sekutsengiselana, nencenye yendzawo lesekoneni leliseningizimu nesakhiwo sekutsengiselana, nencenye yendzawo lakukhona kuyo umlotsa.
40 Futsi konkhe loku ngikunike inceku yami Newel K. Whitney kutsi ikuphatse, kube sibusiso kuyo nentalelwane yayo emvakwayo, kute kuzuze sakhiwo sekutsengiselana seluhlelo lwami lengisilungiselele sikhonkhwane sami eveni laseKirtland.
41 Yebo, ngicinisile, loku kuphatsa lengikunike inceku yami N. K. Whitney, ngisho lesi sakhiwo sonkhe sekutsengiselana, yona nesitfunywa sayo, kanye nentalelwane yayo emvakwayo.
42 Futsi nangabe yetsembekile ekugcineni imiyaleto yami, lengiyinike yona, ngitawukwandzisa tibusiso kuyo nasentalelwaneni yayo emvakwayo, ngisho bunyenti betibusiso.
43 Ngetulu kwaloko, inceku yami Joseph Smith, lomNcane, ayiniketwe incenye yemhlaba leyehlukaniselwe kwakha indlu yami, lenetingodvo letingemashumi lamane budze nelishumi nakubili bubanti, nelifa lapho kuhlala khona uyise;
44 Futsi loku kusicalo sekuphatsa lengikumisele yona, kute kube sibusiso kuyo, nakuyise.
45 Ngoba bukani, ngimgcinele lifa uyise, kute ondliwe; ngako-ke uyawutsatfwa njengewendlu yenceku yami Joseph Smith lomNcane.
46 Futsi ngitawukwandzisa tibusiso endlini yenceku yami Joseph Smith, lomNcane, nangabe yetsembekile, ngisho bunyenti betibusiso.
47 Manje, ngininika umyaleto ngalokuphatselene neSiyoni, wekutsi aniseyuphindze nihlanganiswe ngeluhlelo lwelubumbano kubomnakenu baseSiyoni, kuphela ngalendlela—
48 Emvakwekuhlelwa kwenu, niyawubitwa ngeLuhlelo lweLubumbano lweSikhonkhwane saseSiyoni, Lidolobha laseKirtland. Futsi bomnakenu, emvakwekuhlelwa kwabo, bayawubitwa ngeLuhlelo lweLubumbano lweLidolobha laseSiyoni.
49 Bayawuhlelwa ngemabito abo, nangelibito labo; futsi bayawukwenta umsebenti wabo egameni labo, nasemagameni abo;
50 Futsi nani niyawukwenta umsebenti egameni lenu, nasemagameni enu.
51 Futsi loku ngikuyalete kutsi kwentelwe insindziso yenu, kanjalo nangensindziso yabo, ngenca yekucoshwa kwabo naloko lokutako.
52 Tivumelwano tephulwa ngekwephula umtsetfo, nangekuhawukela nemavi ebucili—
53 Ngako-ke, senihlakatiwe njengeluhlelo lwelubumbano nabomnakenu, lokusho kutsi anikaboshwa kuphela kute kube ngulesikhatsi kubo, ngaphandle kwalendlela, njengobe ngishito, ngetikweleti njengobe kwavunyelwana ngaloluhlelo emkhandlwini, njengekuvuma kwetimo tenu nangekuyala kwelivi lemkhandlu.
54 Ngetulu kwaloko, ngininika umyaleto mayelana nekuphatsa lengininike kona.
55 Bukani, yonkhe lemphahla ngeyami, kungenjalo kukholwa kwenu kulite, futsi nitfolwe nibatentisi, netivumelwano lenitentile tephuliwe;
56 Futsi uma imphahla ingeyami, nine nibaphatsi; uma kungenjalo anisibo baphatsi.
57 Kodvwa, ngicinisile ngitsi kini, nginikhetsile kutsi nibe baphatsi endlini yami, ngisho baphatsi ngempela.
58 Futsi ngenca yalesi sizatfu nginiyalete kutsi nitihlele, kute nikhicite emavi ami, kuphelela konkhe kwemibhalo yami lengcwele, tembulo lengininike tona, nalengiyawuninika tona, emvakwaloku, tikhatsi ngetikhatsi—
59 Ngenhloso yekwakha libandla nembuso wami emhlabeni, nekulungiselela bantfu bami sikhatsi lapho ngiyawuhlala nabo, lesesisedvute.
60 Futsi niyawutilungiselela indzawo yekugcina ingcebo, futsi niyawuyingcwelisela libito lami.
61 Futsi niyawukhetsa munye emkhatsini wenu kutsi agcine indzawo yekugcina ingcebo, aphindze abekwe kulesi sibusiso.
62 Kuyawuba khona luphawu loluyawubekwa kulendzawo yekugcina ingcebo, netintfo tonkhe letingcwele tiyawuletfwa kulendzawo yekugcina ingcebo; futsi kute umuntfu emkhatsini wenu loyawuyibita ngekutsi ngeyakhe, noma nguyiphi incenye yayo, ngoba iyawuba ngeyenu nonkhe.
63 Futsi ngininika kusukela ngalesi sikhatsi, futsi manje cinisekisani, kutsi niyacala nisebentisa kuphatsa lengininike kona, ngaphandle kwetintfo letingcwele, ngenhloso yekukhicita leti tintfo letingcwele njengobe ngishito.
64 Inzuzo yetintfo letingcwele iyawugcinwa endzaweni yekugcina ingcebo, kuphindze kubekwe luphawu etikwayo; futsi angeke isetjentiswe noma isuswe endzaweni yekugcina ingcebo ngunoma ngubani, noma luphawu lutfukululwe loluyawubekwa etikwayo, kuphela ngelivi leluhlelo, noma ngemyaleto.
65 Niyawuyigcina kanjalo inzuzo yetintfo letingcwele endzaweni yekugcina ingcebo, ngekwetinjongo letingcwele naletilungile.
66 Futsi loku kuyawubitwa ngekutsi yindzawo lengcwele yekugcina ingcebo yeNkhosi; futsi luphawu luyawubekwa etikwayo kute ibe ngcwele futsi ingcweliselwe iNkhosi.
67 Ngetulu kwaloko, kuyawuba nalenye indzawo yekugcina ingcebo leyawulungiswa, futsi umgcinis’khwama uyawukhetfwa kugcina lendzawo yekugcina ingcebo, neluphawu luyawubekwa etikwayo;
68 Futsi tonkhe timali lenititfolako ekuphatseni kwenu, ngekutfutfukisa imphahla lengininike yona, ngalokuphatselene netindlu, nemihlaba, noma tinkhomo, noma tonkhe tintfo ngaphandle uma kuyimibhalo lengcwele nalelungile, lengitigcinele yona kute ngifeze tinhloso letingcwele naletilungile, tiyawubekwa endzaweni yekugcina ingcebo ngekushesha nisandza kutitfola leto timali, ngemakhulu, noma ngemashumi lasihlanu, noma ngemashumi lamabili, noma ngemashumi, noma ngesihlanu.
69 Noma ngalamanye emagama, uma kukhona umuntfu emkhatsini wenu lotfola ema-dola lasihlanu akawabeke endzaweni yekugcina ingcebo; noma uma atfola lalishumi, noma langemashumi lamabili, noma langemashumi lasihlanu, noma likhulu, naye akente kanjalo.
70 Futsi akubete umuntfu emkhatsini wenu lotsi ngeyakhe; ngoba angeke ibitwe ngekutsi ngeyakhe, noma nguyiphi incenye yayo.
71 Futsi kute incenye yayo leyawusetjentiswa, noma itsatfwe endzaweni yekugcina ingcebo, kuphela ngelivi nekuvumelana kweluhlelo.
72 Futsi loku kuyawuba livi nekuvumelana kweluhlelo—kutsi noma ngubani emkhatsini wenu lotsi kumgcinis’khwama: Ngidzinga loku kungelekelela ekuphatseni kwami—
73 Uma kungemadola lasihlanu, noma kungemadola lalishumi, noma langemashumi lamabili noma langemashumi lasihlanu, noma likhulu, umgcinis’khwama uyawumniketa linani lalidzingako kumelekelela ekuphatseni kwakhe—
74 Ate atfolwe asephulamtsetfo, futsi kuvetwe phambi kwemkhandlu weluhlelo ngalokusobala kutsi ungumphatsi longaketsembeki nalongakahlakaniphi.
75 Kodvwa uma asahlanganyela ngalokugcwele, futsi etsembekile aphindze ahlakaniphile ekuphatseni kwakhe, loku kuyawuba luphawu lwakhe kumgcinis’khwama kutsi umgcinis’khwama angayigodli.
76 Kodvwa uma ephula umtsetfo, umgcinis’khwama uyawuba ngaphansi kwekulawulwa ngumkhandlu nelivi leluhlelo.
77 Futsi uma kutfolakala umgcinis’khwama angumphatsi longaketsembeki nalongakahlakaniphi, uyawuba ngaphansi kwekulawulwa ngumkhandlu nelivi leluhlelo, futsi uyawususwa esikhundleni sakhe, bese kubekwa lomunye esikhundleni sakhe.
78 Ngetulu kwaloko, ngicinisile ngitsi kini, ngalokuphatselene netikweleti tenu—bukani kuyinhloso yami kutsi nitibhadale tonkhe tikweleti tenu.
79 Futsi kuyinhloso yami kutsi nititfobe phambi kwami, nitfole lesi sibusiso ngekukhutsala nangekutfobeka nangemthandazo wekukholwa.
80 Futsi nangabe nikhutsele niphindze nitfobekile, nisebentisa umthandazo ngekukholwa, bukani, ngitawutsambisa tinhlitiyo talabo lenibakweletako, ngite ngiletse lisu kini lekutsi nikhululwe.
81 Ngako-ke bhalelani ngekushesha eNew York nibhale ngekwaloko lokutawuniketwa nguMoya wami; futsi ngitawutitsambisa tinhlitiyo talabo lenibakweletako, kutsi kususwe etingcondvweni tabo kutsi banihluphe.
82 Futsi nangabe nitfobekile futsi netsembekile niphindze nibita libito lami, bukani, ngitawuninika kuncoba.
83 Ngininika setsembiso, sekutsi niyawukhululwa kuloku kanye nje ebugcilini benu.
84 Nangabe nitfola litfuba lekuboleka imali ngemakhulu, noma tinkhulungwane, nite neboleke ngalokwanele kunikhulula ebugcilini, kulilungelo lenu.
85 Futsi bambisani ngemphahla lengiyibeke etandleni tenu, kanye nje kuloku, ngekuniketa emabito enu ngekuvumelana noma ngalenye indlela, ngekutsandza kwenu.
86 Ngininika lelilungelo, kanye nje kuloku; futsi bukani, uma nichubeka nekwenta leti tintfo lengitibeke phambi kwenu, ngekwemiyaleto yami, tonkhe leti tintfo ngetami, futsi nine nibaphatsi bami, nemnikati wendlu angeke avume indlu yakhe igcekezwe. Kunjalo nje. Amen.