Sigaba 36
Sembulo lesaniketwa ngaJoseph Smith umPhrofethi ku-Edward Partridge, edvute naseFayette, eNew York, mhlaka 9 ngeNgongoni, ngemnyaka we-1830 (buka sihloko sesigaba 35). Umlandvo waJoseph Smith utsi Edward Partridge “bekasifanekiso sekutinikela kukhonta Nkulunkulu, futsi angulomunye wemadvodza latsandzeka kakhulu eNkhosini.”
1–3, INkhosi ibeka sandla Sayo ku-Edward Partridge ngesandla saSidney Rigdon; 4–8, Yonkhe indvodza leyemukela livangeli nebuphristi kufanele ibitelwe kuhamba iyawushumayela.
1 Naku lokushiwo yiNkhosi Nkulunkulu, lomKhulu waka-Israyeli: Buka ngitsi kuwe, nceku yami Edward, ubusisiwe, netono takho titsetselelwe, futsi ubitelwe kushumayela livangeli lami njengekukhala kwelicilongo;
2 Futsi ngitawubeka sandla sami etikwakho ngesandla senceku yami Sidney Rigdon, uyawutfola Moya wami, Moya loNgcwele, ngisho uMdvudvuti, lotawukufundzisa tintfo letinekuthula tembuso;
3 Uyawumemetela ngelivi leliphakeme, utsi: Hosana, libusisiwe libito laNkulunkulu losetikwako konkhe.
4 Manje ngikunika lolu lubito nemyaleto ngalokuphatselene nabo bonkhe bantfu—
5 Kutsi bonkhe labayawukuta phambi kwetinceku tami boSidney Rigdon naJoseph Smith, lomNcane, bemukela lolubito nemyaleto, bayawubekwa baphindze batfunyelwe kuyawushumayela livangeli laphakadze emkhatsini wetive—
6 Bashumayele kuphendvuka, batsi: Tisindziseni kulesi situkulwane lesiphambene, niphume emlilweni, nitenyanye tingubo letingcoliswe ngenyama.
7 Lona myaleto uyawuniketwa babonisi belibandla lami, kute kutsi wonkhe umuntfu lotawemukela ngenhlitiyo yinye abekwe aphindze atfunyelwe, njengobe sengikhulumile.
8 NginguJesu Khristu, iNdvodzana yaNkulunkulu; ngaloko-ke, bophani tinkhalo tenu ngitawukuta masinyane ethempelini lami. Kunjalo nje. Amen.