Sigaba 87
Sembulo nesiphrofetho ngemphi, lesaniketwa ngaJoseph Smith umPhrofethi, eKirtland noma edvute nakhona, e-Ohio, mhlaka 25 iNgongoni, 1832. Ngalesi sikhatsi bekukhona kuphikisana eveni laseMelika mayelana nebugcili nangekucitfwa kwekukhokhwa nekugcogcwa kwetimali kwaseSouth Carolina. Umlandvo waJoseph Smith utsi “kuvela kwetinhlupheko emkhatsini wetive” besekucala “kubonakala kakhulu” kumPhrofethi “ kunangaphambilini seloku liBandla lacala luhambo lwalo liphuma ehlane.”
1–4, Imphi iyaphrofethwa emkhatsini weTifundza taseNyakatfo neTifundza taseNingizimu; 5–8, Tehlakalo letimatima titawuwela kubantfu basemhlabeni.
1 Ngicinisile, naku lokushiwo yiNkhosi mayelana netimphi letitawukwenteka madvutane, letitawusuka ekuvukeleni kweSouth Carolina, lokutawephetsa ngekufa nangelusizi lwebantfu labaningi;
2 Futsi sikhatsi sitawukuta lapho imphi itawutfululwa etiveni tonkhe, kusuka kulendzawo.
3 Ngoba bukani, tifundza taseNingizimu tiyawutihlukanisa ngekumelana neTifundza taseNyakatfo, futsi tifundza taseNingizimu titawubita letinye tive, ngisho nesive saseGreat Britain, njengoba sibitwa kanjalo, futsi nabo batawubita letinye tive, kute bativikele kuletinye tive; emvakwaloko imphi iyawutfululwa etiveni tonkhe.
4 Futsi kuyawukwenteka, emvakwemalanga lamaningi, tigcili tiyawuvukela baphatsi bato, labayawuhlelwa futsi baceceshelwe imphi.
5 Futsi kuyawukwenteka kutsi insali lesele yendzawo itawutihlela, ibe nentfukutselo lenkhulu, ihluphe beTive ngetinhlupheko letimatima.
6 Ngaleyo ndlela, ngenkemba nangekucitseka kwengati bantfu basemhlabeni bayawulila; futsi ngendlala, nangetifo letibhubhisako, nangekutamatama kwemhlaba, nangekudvuma kwelizulu, nangembani lonelulaka nekukhanya lokukhulu, bantfu basemhlabeni bayawukwentiwa baluve lulaka, nentfukutselo, nesandla lesijezisako saNkulunkulu Somandla, ite imbubhiso lebekiwe seyicedze tonkhe tive ngalokuphelele;
7 Kute kukhala kwalabangcwele, nekwengati yalabangcwele, kuyawukuma kuta etindlebeni teNkhosi Sebawothi, lisuka emhlabeni, kute batiphindziselele etitseni tabo.
8 Ngaloko-ke, manini etindzaweni letingcwele, ninganyakatiswa, kute kufike lilanga leNkhosi; ngoba bukani, liyeta masinyane, kusho iNkhosi. Amen.