Sigaba 68
Sembulo lesaniketwa ngaJoseph Smith umPhrofethi, eHiram, e-Ohio, mhlaka 1 Lweti, ngemnyaka we-1831, kuphendvulwa umthandazo wekutsi kwatiwe ingcondvo yeNkhosi ngalokuphatselene na-Orson Hyde, Luke S. Johnson, Lyman E. Johnson, naWilliam E. McLellin. Nanoma incenye yalesi sembulo beyibhekiswe kulamadvodza omane, lokunyenti lokucuketfwe kuphatselene neliBandla lonkhe. Lesi sembulo sanwetjwa ngaphansi kwemyalo waJoseph Smith ngesikhatsi sishicilelwa eluhlelweni lwa 1835 lweMfundziso neTivumelwano.
1–5, Emavi ebabonisi uma achutjwa nguMoya loNgcwele ayimibhalo lengcwele; 6–12, Babonisi kufanele bashumayele baphindze babhabhatise, futsi tibonakaliso titawulandzela labakholwa ngekweliciniso; 13–24, Litubulo emkhatsini wemadvodzana a-Aroni lingasebenta njengeMbhishobhi loweNgamele (lokusho kutsi, liphatse tikhiya tebumengameli njengembhishobhi) ngaphansi kwekuyaletwa buMengameli bekuCala; 25–28, Batali bayaletwa kutsi bafundzise livangeli kubantfwana babo; 29–35, LabaNgcwele kufanele bagcine liSabatha, basebente ngekukhutsala baphindze bathandaze.
1Â Inceku yami, Orson Hyde, yabitwa ngekugcotjwa kwayo kutsi imemetele livangeli laphakadze, ngaMoya waNkulunkulu lophilako, kusuka kubantfu kuya kulabanye, nekusuka eveni kuya kulelinye, emabandleni alababi, emasinagogeni abo, ikhulumisana nabo iphindze ibachazela yonkhe imibhalo lengcwele.
2 Futsi, bukani, nibone, loku kusibonelo kubo bonkhe labo lababekwa kulobu buphristi, umsebenti wabo wekufundzisa livangeli lomiselwe bona kutsi bahambe—
3Â Loku kusibonelo kubo, kutsi bayawukhuluma ngekuholwa nguMoya loNgcwele.
4Â Futsi noma ngabe yini labayawuyikhuluma ngekuchutjwa nguMoya loNgcwele kuyawuba ngumbhalo longcwele, kuyawuba yintsandvo yeNkhosi, kuyawuba yingcondvo yeNkhosi, kuyawuba ngumlayeto weNkhosi, kuyawuba liphimbo leNkhosi nemandla aNkulunkulu ekusindziseni.
5Â Bukani, lesi setsembiso seNkhosi kini, O nine tinceku tami.
6Â Ngaloko-ke, manini sibindzi, ningesabi, ngoba mine iNkhosi nginani, futsi ngitawukuma nani; niyawufakaza ngami, ngisho Jesu Khristu, kutsi ngiyiNdvodzana yaNkulunkulu lophilako, kutsi bengikhona, ngikhona, futsi ngitawubuya.
7 Lona ngumyaleto weNkhosi kuwe, nceku yami Orson Hyde, nakunceku yami Luke Johnson, nakunceku yami Lyman Johnson, nakunceku yami William E. McLellin, nakubo bonkhe babonisi labetsembekile belibandla lami—
8Â Hambani niye emhlabeni wonkhe, nishumayele livangeli kuto tonkhe tidalwa, nikwente ngeligunya lengininike lona, nibhabhatise egameni laBabe, neleNdvodzana, nelaMoya loNgcwele.
9Â Futsi loyo lokholwako bese uyabhajatiswa uyawusindziswa, kodvwa loyo longakholwa uyawulahlwa.
10Â Futsi loyo lokholwako uyawubusiswa ngetibonakaliso letiyawumlandzela, njengobe kubhaliwe.
11Â Futsi niyawuphiwa kutsi nati tibonakaliso tetikhatsi, netibonakaliso tekubuya kweNdvodzana yeMuntfu;
12Â Futsi bonkhe labo Babe layawufakaza ngabo, niyawuniketwa emandla ekubabophela ekuphileni lokuphakadze. Amen.
13 Manje, mayelana netintfo letengetwe etivumelwaneni nasemiyaletweni, nguleti—
14Â Kukhona emvakwaloku, ngesikhatsi lesifanele seNkhosi, labanye babhishobhi lokufanele behlukaniswe ebandleni, kute basite njengewakucala.
15Â Ngaloko-ke bayawuba baphristi labakhulu labafanele, futsi bayawukhetfwa buMengameli bekuCala bebuPhristi baka-Melkhisedeki, ngaphandle uma babesitukulwane sangempela sa-Aroni.
16Â Uma babesitukulwane sangempela sa-Aroni banelilungelo lelisemtsetfweni lekuba sesikhundleni sebubhishobhi, uma bangematubulo emkhatsini wemadvodzana a-Aroni.
17Â Ngoba litubulo linelilungelo lebumengameli kulobu buphristi, kanye netikhiya noma ligunya labo.
18Â Kute umuntfu lonelilungelo lelisemtsetfweni kulesi sikhundla, kuphatsa tikhiya talobu buphristi, ngaphandle uma anguwesitukulwane sangempela futsi alitubulo la-Aroni.
19Â Kodvwa, njengobe umphristi lomkhulu webuPhristi baka-Melkhisedeki aneligunya lekusebenta kuto tonkhe tikhundla letincane angasebenta esikhundleni sembhishobhi uma kute lotfolakalako longewesitukulwane sangempela sa-Aroni, uma nje abitiwe wase uyehlukaniswa waphindze wabekwa kulamandla, ngaphansi kwetandla tebuMengameli bekuCala bebuPhristi baka-Melkhisedeki.
20Â Futsi longewesitukulwane sangempela sa-Aroni, naye, kufanele akhonjwe ngulobu buMengameli, atfolakale angulofanele, agcotjwe, bese ubekwa ngaphansi kwetandla tebuMengameli, kungenjalo akavunyelwa ngekwemtsetfo kusebenta ebuphristini bakhe.
21Â Kodvwa, ngenca yesimemetelo mayelana nelilungelo labo lebuphristi lelehla kusukela kubabe kuya kundvodzana, bangakufuna kugcotjwa kwabo uma noma ngusiphi sikhatsi bangayifakazela intalelwane yabo, noma bayitfole ngesembulo lesisuka eNkhosini ngaphansi kwetandla tebuMengameli losebushiwo ngenhla.
22Â Ngetulu kwaloko, kute umbhishobi noma umphristi lomkhulu loyawuhlukaniswa kulona msebenti loyawehlulelwa noma loyawulahlwa noma nguliphi licala, ngaphandle uma kungaphambi kwebuMengameli bekuCala belibandla;
23Â Futsi nangabe atfolwa anelicala phambi kwalobu buMengameli, ngebufakazi lobungeke buphikiseke, uyawulahlwa ngelicala;
24Â Uma aphendvuka uyawutsetselelwa, ngekwetivumelwano nemiyaleto yelibandla.
25Â Ngetulu kwaloko, nangabe batali banebantfwana eSiyoni, noma kunobe ngutiphi tikhonkhwane tayo letihleliwe, labangabafundzisi kutsi bayicondze imfundziso yekuphendvuka, kukholwa kuKhristu iNdvodzana yaNkulunkulu lophilako, nekubhajatiswa kanye nesipho saMoya loNgcwele ngekubekwa tandla, uma sebaneminyaka lesiphohlongo budzala, sono siyawuba setikwetinhloko tebatali.
26Â Ngoba loku kuyawuba ngumtsetfo kubantfu labahlala eSiyoni, noma kunoma ngutiphi tikhonkhwane tayo letihleliwe.
27Â Nebantfwana babo bayawubhajatiswa kute kutsetselelwe tono tabo uma sebaneminyaka lesiphohlongo budzala, futsi kufanele bemukele kubekwa tandla.
28Â Futsi bayawufundzisa bantfwana babo kuthandaza, nekuhamba ngebucotfo phambi kweNkhosi.
29Â Futsi nebantfu labahlala eSiyoni bayawukhumbula lilanga leliSabatha baligcine lingcwele.
30Â Nebantfu labahlala eSiyoni bayawuyikhumbula imisebenti yabo, nangabe bakhetfwe kutsi basebente, kuko konkhe kwetsembeka; ngoba livila liyawukhunjulwa phambi kweNkhosi.
31Â Manje, mine, iNkhosi, angitfokoti kahle ngebantfu labahlala eSiyoni, ngoba kunemavila emkhatsini wabo; nebantfwana babo bakhulela ebubini; futsi abayifuni ngebucotfo ingcebo yaphakadze, kodvwa emehlo abo agcwele umhobholo.
32Â Leti tintfo akukafaneli tibe njalo, futsi kufanele ticedvwe emkhatsini wabo; ngaloko-ke, inceku yami Oliver Cowdery ayihambise lomyaleto eveni laseZion.
33 Futsi ngibanika umyaleto—kutsi loyo longawenti umthandazo wakhe phambi kweNkhosi ngesikhatsi sawo, akakhunjulwe phambi kwemehluleli webantfu bami.
34Â Lena miyaleto iliciniso futsi yetsembekile; ngaloko-ke, ningayephuli, futsi ningesusi lutfo kuyo.
35Â Bukani, ngingu-Alfa na-Omega, futsi ngiyabuya masinyane. Amen.