Sigaba 118
Sembulo lesaniketwa ngaJoseph Smith umPhrofethi, eFar West, eMissouri, mhlaka 8, kuKholwane ngemnyaka we-1838, kuphendvula kuncusa lokwakutsi, “Sikhombise intsandvo yakho, O Nkhosi, ngalokuphatselene nalabaliShumi nakuBili.”
1–3, INkhosi itawuyondla imindeni yalabaliShumi nakuBili; 4–6, Tikhala kulabaliShumi nakuBili tiyagcwaliswa.
1 Ngicinisile, naku lokushiwo yiNkhosi: Akubanjwe umhlangano ngekushesha; labaliShumi nakuBili abahlelwe; futsi akukhetfwe emadvodza latawutsatsa sikhundla salabo labawile.
2 Inceku yami Thomas ayihlale kwesikhashana eveni laseZion, kute yatise ngelivi lami.
3 Labasele abachubeke bashumayele kusuka ngaleso sikhatsi, futsi uma batawukwenta loku ngako konkhe kutitfoba kwenhlitiyo, ngebumnene nangekutfobeka, ngekumela bulukhuni, mine, iNkhosi, ngibanika setsembiso sekutsi ngitawuyondla imindeni yabo; futsi umnyango welitfuba lekusebenta bayawuvulelwa wona, kusuka ngalesi sikhatsi kuya phambili.
4 Futsi ngentfwasahlobo lelandzelako abasuke bahambe bawele emanti lamakhulu, lapho bafike bashumayele livangeli lami, kuphelela kwalo, baphindze bafakaze ngelibito lami.
5 Abashiye labangcwele bami edolobheni laseFar West, mhla tingemashumi lamabili nesitfupha kuMabasa lolandzelako, endzaweni yekwakha indlu yami, kusho iNkhosi.
6 Inceku yami John Taylor, nenceku yami John E. Page, nenceku yami Wilford Woodruff, nenceku yami Willard Richards, abakhetfwe kugcwalisa tikhala talabo labawile, batiswe ngalokusemtsetfweni ngekukhetfwa kwabo.