Sigaba 96
Sembulo lesaniketwa Joseph Smith umPhrofethi, lesikhombisa luhlelo lwelidolobha noma sikhonkhwane seSiyoni eKirtland, e-Ohio, mhlaka 4 iNhlaba, 1833, lesaniketwa njengesibonelo kulabaNgcwele eKirtland. Bekungumhlangano webaphristi labakhulu, futsi ludzaba lolukhulu lolwalubuketwa bekukwendluliswa kwemihlaba letsite, lebeyatiwa ngekutsi lipulazi laFrench, lebekungeleliBandla lelalisedvute naseKirtland. Ngenca yekutsi umhlangano awukwatanga kuvumelana kutsi ngubani lobekatawuphatsa lelipulazi, bonkhe bavumelana ngekubuta eNkhosini mayelana naloludzaba.
1, Sikhonkhwane saseKirtland seSiyoni kufanele sentiwe sicine; 2–5, Umbhishobhi kufanele ahlukanisele labaNgcwele emafa; 6–9, John Johnson kafanele abe lilunga leluhlelo lwekuba munye.
1 Bukani, ngitsi kini, naku kuhlakanipha, leniyawukwati ngako kutsi nente kanjani mayelana naloludzaba, ngoba ngabona kufanele kutsi lesi sikhonkhwane lengisimisile kute kucine iSiyoni sentiwe sicine.
2 Ngako-ke, inceku yami Newel K. Whitney ayiphatse leyondzawo leshiwo emkhatsini wenu, kuyo lengihlele kwakha indlu yami lengcwele.
3 Ngetulu kwaloko, ayehlukaniswe tincenye, ngekuhlakanipha, kute kuzuze labo labafuna emafa, njengoba kuyawuncunywa emkhadlwini emkhatsini wenu,
4 Ngako-ke, caphelani kutsi niyabhekana naloludzaba, naleyo ncenye ledzingekile kute kuzuze luhlelo lwami, ngenhloso yekuletsa livi lami kubantfwana bebantfu.
5 Ngoba bukani, ngicinisile ngitsi kini, loku ngikubona kubaluleke kakhulu, kutsi livi lami lihambe liye kubantfwana bebantfu, ngenhloso yekutsambisa tinhlitiyo tebantfwana bebantfu kute nizuze. Kunjalo nje. Amen.
6 Ngetulu kwaloko, ngicinisile ngitsi kini, kukuhlakanipha futsi kubalulekile kimi, kutsi inceku yami John Johnson umnikelo wayo lengiwemukele, nemthandazo wayo lengiwuvile, lenginiketa kuyo setsembiso sekuphila lokuphakadze nangabe igcina imiyaleto yami kusukela manje—
7 Ngoba ingeyentalelwane yaJosefa futsi itawutfola tibusiso tesetsembiso lesentiwa kuboyise—
8 Ngicinisile ngitsi kini, ngibona kufanele kutsi ibe lilunga lalolu luhlelo, kute isite ekuletseni livi lami kubantfwana bebantfu.
9 Ngako-ke kufanele niyibeke kulesi sibusiso, futsi kufanele ifune ngekukhutsala kususa tikweleti letisetikwalendlu leshiwo emkhatsini wenu, kute ihlale kuyo. Kunjalo nje. Amen.