Sigaba 128
Incwadzi lephuma kuJoseph Smith umPhrofethi leya eBandleni laJesu Khristu lalabaNgcwele beTinsuku Tekugcina, lecuketse letinye ticondziso ngekubhajatiselwa labafile, yamhlaka 6 iNyoni 1842, eNauvoo, e-Illinois.
1–5, Lababhalisako betindzawo letehlukahlukene nalababhalisako belibandla labakhulu kufanele bacinisekise liciniso lekubhajatiselwa labafile; 6–9, Imibhalo yabo iyacinisekisa futsi ibhaliwe nasezulwini; 10–14, Lichibi lekubhabhatisa lisifananiso selithuna; 15–17, Elija wabuyisela emandla laphatselene nekubhajatiselwa labafile; 18–21, Tonkhe tikhiya, emandla, nemagunya etinhlelo tekwengamela letendlulile sekubuyiselwe; 22–25, Tindzaba letimnandzi naletimangalisako timenyetelelwa labaphilako nalabafile.
1 Njengoba ngishito kini encwadzini yami ngaphambi kwekube ngishiye indzawo yami, kutsi ngitawunibhalela tikhatsi ngetikhatsi nginatise ngalokuphatselene netihloko letiningi, manje sengichubeka nesihloko sekubhajatiselwa labafile, njengoba lesihloko kungatsi sisengcondvweni yami, futsi sitsintsa imizwa yami kakhulu, kusukela ngesikhatsi ngitingelwa titsa tami.
2 Nginibhalele emavi lambalwa esembulo ngalokuphatselene nalobhalisako. Ngibe nemibono lembalwa leyengetiwe mayelana naloludzaba, lengilucinisekisako manje. Kutsi, kwashiwo encwadzini yami yaphambilini kutsi kufanele kubekhona lobhalisako, lokufanele abe ngufakazi, aphindze ativele ngetindlebe takhe, kute abhale umbhalo loliciniso phambi kweNkhosi.
3 Manje, ngalokuphatselene naloludzaba, kungaba matima kakhulu kutsi umbhali munye ahlale akhona ngato tonkhe tikhatsi, nekutsi awente wonkhe lomsebenti. Kugwema lobu bumatima, kungabakhona lobhalisako lokhetsiwe ewadini ngalinye lelidolobha, loceceshekile kutsatsa emaminitsi lacondze ngco; akacacise futsi ashaye khona ekubhaleni konkhe lokuchubekako, acinisekise embhalweni wakhe kutsi utibonele ngemehlo akhe, waphindze weva ngetindlebe takhe, anike lusuku, emagama, njalonjalo, nemlandvo wako konkhe lokwentekako; asho nemabito ebantfu labatsatfu labakhona, uma kukhona labakhona, labangacinisekisa noma kungasiphi sikhatsi uma kutsiwa abacinisekise ngaloko, kute ngemilomo yalababili noma labatsatfu bofakazi onkhe emavi acinisekiswe.
4 Ngetulu kwaloko, akube khona lobhalisako lomkhulu, lokungendluliselwa kuye lena leminye imibhalo, lephekeletelwa titifiketi letisayinwe ngibo, leticinisekisako kutsi lombhalo labawubhalile uliciniso. Emvakwaloko lolobhalisako lomkhulu welibandla angawufaka lombhalo encwadzini yelibandla lonkhe, kanye netitifiketi nabo bonkhe bofakazi labebakhona, nembiko wakhe wekutsi uyakholwa ngeliciniso kutsi lombiko nemibhalo kuliciniso, ngekwati similo lesiphelele kanye nekukhetfwa libandla kwalawo madvodza. Emvakwekube sekwentiwe loku encwadzini yelibandla lonkhe, umbhalo uyawuba njengalongcwele, futsi uyawukwenta simiso sifane nanjengoba atibonele ngemehlo akhe waphindze wativela ngetindlebe takhe, wenta nembhalo lofanako encwadzini yelibandla lonkhe,
5 Ningacabanga kutsi loluhlelo lwetintfo lucacisa kakhulu; kodvwa anginitjele kutsi kukufeza kuphela intsandvo yaNkulunkulu, ngekulandzela simiso nekulungiselela loko iNkhosi leyakumisa yaphindze yakulungisa umhlaba ungakasekelwa, kute kusindziswe labafile labatawukufa ngaphandle kwekwati livangeli.
6 Kwengeta, ngifuna kutsi nikhumbule kutsi Johane uMembuli bekacabanga ngaso lesihloko ngalokuphatselene nalabafile, ngesikhatsi atsi, njengoba utawukutfola kubhaliwe encwadzini yeSembulo 20:12—Ngabona labafile, labakhulu nalabancane, beme embikwaNkulunkulu; netincwadzi tavulwa, nalenye incwadzi yavulwa, lokuyincwadzi yekuphila; labafile behlulelwa ngaloko lokubhaliwe etincwadzini, ngekwemisebenti yabo.
7 Nitawutfola kuloku lokucashuniwe kutsi tincwadzi tavulwa; nalenye incwadzi yavulwa, lokwakuyincwadzi yekuphila; kodvwa labafile behlulelwa ngetintfo lebetibhalwe etincwadzini, ngekwemisebenti yabo; ngako-ke, letincwadzi lokukhulunywa ngato kumele kube nguletincwadzi leticuketse imibhalo yemisebenti yabo, futsi ticondze imibhalo legcinwe emhlabeni. Incwadzi lokwakuyincwadzi yekuphila ngumbhalo logcinwe ezulwini; umgomo lovumelana kahle nemfundziso leniyaletwe ngayo esembulweni lesicuketfwe encwadzini lenganibhalela yona ngaphambi kwekushiya indzawo yami—kute kuko konkhe lenikubhalako kubhalwe nasezulwini.
8 Manje, ingcikitsi yalesi simiso ikuwo emandla ebuphristi, ngesembulo saJesu Khristu, lapho kunikwe khona kutsi lenitakubopha emhlabeni kuyawuboshwa nasezulwini, futsi noma lenikukhulula emhlabeni kuyawukhululwa nasezulwini. Noma, ngalamanye emagama, uma sibuka kuhunyushwa ngalenye indlela, noma yini leniyibhala emhlabeni kuyawubhalwa nasezulwini, futsi noma yini leningayibhali emhlabeni akuyukubhalwa nasezulwini; ngoba labafile benu bayawukwehlulelwa ngalokusetincwadzini, ngekwemisebenti yabo, kutsi ngabe bona lucobo lwabo batentile yini timiso propria persona (ngekwabo), noma ngekusitwa ngulababamele, ngekwesimiso Nkulunkulu lasilungiselele kusindziswa kwabo umhlaba ungakasekelwa, ngekwemibhalo labayigcinile ngalokuphatselene balabafile babo.
9 Kulabanye kungabukeka kuyimfundziso lenesibindzi kakhulu lelesikhuluma ngayo—emandla labhala noma labopha emhlabeni aphindze abophe ezulwini. Noko, kuto tonkhe tikhatsi temhlaba, njalo uma iNkhosi inike luhlelo lwekwengamela lwebuphristi kunoma nguyiphi indvodza ngesembulo lucobo, noma kunoma nguliphi licembu lemadvodza, lamandla aniketwe njalo. Ngalesi sizatfu, noma yini lawo madvodza layenta ngeligunya, egameni leNkhosi, futsi ayenta ngeliciniso nangekwetsembeka, futsi agcina umbhalo lofanele nalowetsembekile waloko, wawuba ngumtsetfo emhlabeni nasezulwini, futsi wawungeke ucitfwe lutfo, ngekwetimemetelo taJehova lomkhulu. Letsembekile lelivi. Ngubani longaliva na?
10 Ngetulu kwaloko, njengesibonelo, buka Matewu 16:18, 19: Nami-ke ngitsi kuwe, UnguPhetro, etikwalelidvwala ngiyakulakha libandla lami; futsi nemasango esihogo angeke alehlule. Ngiyawukunika tikhiya tembuso wasezulwini: lotakubopha lapha emhlabeni kuyawube kuboshiwe nasezulwini; nako konkhe lotakukhulula lapha emhlabeni kuyawube kukhululiwe nasezulwini.
11 Manje imfihlo lebalulekile nalenkhulu yalo lonkhe loludzaba, futsi ne-summum bonum (buhle lobundlula konkhe) yaso sonkhe lesihloko lesisembikwetfu, isekutfoleni emandla ebuPhristi lobuNgcwele. Kuloyo lokuniketwe kuye letikhiya kute bumatima ekutfoleni lwati lwemaciniso ngalokuphatselene nensindziso yebantfwana bebantfu, yalabafile nalabaphilako.
12 Kuloku kunebukhosi nekuhlonishwa, nekungabhubhi nekuphila lokuphakadze—Simiso sekubhajatiswa ngemanti, kucwiliswa kuwo kute kuvumelane nemfanekiso walabafile, kute umgomo munye uvumelane nalomunye; kucwiliswa emantini uphindze uphume emantini kufana nekuvuka kwalabafile baphuma emathuneni abo; ngako-ke, lesi simiso samiselwa kutsi sibe nebudlelwane nesimiso sekubhabhajatiselwa labafile, ngoba simngumfaneliso walabafile.
13 Ngako-ke, lichibi lekubhabhatisela lakhiwa njengemfanekiso welithuna, futsi kwayaletwa kutsi libe sendzaweni lengaphansi lapho labaphilako bavamise kuhlanganela khona, kuhlukanisa labaphilako nalabafile, futsi kute tonkhe tintfo tibe nemfanekiso wato, tiphindze tivumelane—loko lokusemhlabeni kuvumelane naloko lokusezulwini, njengoba Pawula amemetela ku, 1 KubaseKhorinte 15:46, 47, kanye na 48:
14 Kepha kwekucala akusiko kwemoya, kodvwa kwenyama; emvakwaloko kuba kwemoya. Umuntfu wekucala wavela emhlabeni, alutfuli, umuntfu wesibili yiNkhosi levela ezulwini. Njengoba abenjalo umuntfu welutfuli, banjalo nalabo labalutfuli; nanjengoba anjalo umuntfu wasezulwini, banjalo nalabo labasezulwini. Futsi njengoba injalo imibhalo emhlabeni ngalokuphatselene nalabafile benu, lebhalwe ngekweliciniso, injalo futsi nemibhalo lesezulwini. Ngako-ke, loku, ngemandla ekuhlanganisa nekubopha, futsi, ngalamanye emavi, tikhiya tembuso, lokusikhiya selwati.
15 Manje, bomnaketfu nabodzadzewetfu labatsandzeka kakhulu, anginicinisekise kutsi lena yimigomo lephatselene nalabafile nalabaphilako lengeke itsatfwe malula, ngalokuphatselene nensindziso yetfu. Ngoba insindziso yabo iyadzingeka futsi ibalulekile ekusindzisweni kwetfu, njengoba Pawula asho ngalokuphatselene nabokhokho—kutsi bona ngaphandle kwetfu ngeke bapheleliswe—natsi ngaphandle kwalabafile betfu angeke sipheleliswe.
16 Manje, ngalokuphatselene nekubhajatiselwa labafile, ngitawucaphuna emavi aPawula ku, 1Â KubaseKhorinte 15:29: Kepha bayawukwenta njani lababhajatiselwa kulabafile, nangabe kuliciniso kutsi abavuki na? Pho babhajatiselelwani kulabafile?
17 Ngetulu kwaloko, ngalokuphatselene naloku lokucashuniwe ngitawuninika lokwacashunwa kulomunye webaphrofethi, lobekacabanga ngekubuyiselwa kwebuphristi, emaciniso lebekatawukwembulwa emalangeni ekugcina, futsi ngendlela lekhetsekile ngaletihloko letimangalisa kakhulu letimayelana nelivangeli lelingunaphakadze, lokunguloku, kubhajatiselwa labafile; ngoba Malakhi utsi, sehluko sekugcina, livesi lesihlanu nelesitfupha: Bukani, ngiyawunitfumelela umphrofethi Elija, lingakefiki lelo langa lelikhulu nalelesabekako leNkhosi: Uyawuguculela tinhlitiyo taboyise kubantfwababo, netinhlitiyo tebantfwana kuboyise; ngaphandle kwaloko ngiyawuta ngitewushaya lelive ngesicalekiso.
18 Bengitawunika kuhunyushwa lokucacile kulelivesi, kodvwa licace ngalokwanele kuvumelana nenhloso yami njengoba injalo. Kwanele kwati, kuloku, kutsi umhlaba utawushaywa ngesicalekiso ngaphandle uma kukhona budlelwane lobuhlanganisako beluhlobo lolutsite emkhatsini wabobabe nebantfwana, ngalokuphatselene nesihloko lesitsite noma lesinye—futsi bukani ngusiphi leso sihloko na? Kubhajatiselwa labafile. Ngoba tsine ngaphandle kwabo angeke sipheleliswe; noma bona ngaphandle kwetfu angeke bapheleliswe. Noma bona noma tsine angeke sipheleliswe ngaphandle kwalabo labafela evangelini; ngoba kuyadzingeka ekucaleni kweluhlelo lwekwengamela lekuphelela kwetikhatsi, luhlelo lwekwengamela lolo manje loselucala, kute kuhlangana konkhe lokufeziwe nalokuphelele, kanye nekuhlanganiswa ndzawonye kwetinhlelo tekwengamela, kanjalo netikhiya, emandla, nemaciniso kufanele kwenteke, futsi kwembulwe kusukela etikhatsini ta-Adamu kute kube sesikhatsini samanje. Futsi hhayi loku kuphela, kodvwa leto tintfo letingakate tembulwe kusukela ekusekelweni kwemhlaba, kodvwa letigcinwe tifihliwe kulabahlakaniphile nalabanekucondza, tiyawukwembulelwa bantfwana labamunyako kulolu, luhlelo lwekwengamela lekuphelela kwetikhatsi.
19 Manje, yini lesiyivako evangelini lesilitfolile na? Livi lenjabulo! Livi lemusa lovela ezulwini; nelivi leliciniso lelisuka emhlabeni; tindzaba letimnandzi talabafile; livi lenjabulo lalabaphilako nalabafile; tindzaba letimnandzi tenjabulo lenkhulu. Maye tinhle etintsabeni tinyawo talabo labashumayela tindzaba letimnandzi, nalabatsi kuyo iSiyoni: Buka, Nkulunkulu wakho uyabusa! Njengematolo aseKhameli, kanjalo nelwati lwaNkulunkulu luyawukwehlela kubo!
20 Ngetulu kwaloko, sivani na? Tindzaba letimnandzi letisuka eKhumora! Moroni, ingilosi lesuka ezulwini, imemetela kugcwaliseka kwebaphrofethi—incwadzi letawukwembulwa. Livi leNkhosi ehlane laseFayette, esifundzeni saseSeneca, limemetela ngabofakazi labatsatfu labatawufakaza ngencwadzi! Livi laMikhayeli elusebeni lwaseSusquehanna, abona develi ngesikhatsi avela njengengilosi yekukhanya! Livi la Phetro, Jakobe, naJohane ehlane emkhatsini weHarmony, sifundza saseSusquehanna, neColesville, esifundzeni saseBroome, emfuleni iSusquehanna, labatsi banetikhiya tembuso, neluhlelo lwekwengamela lekuphelela kwetikhatsi!
21 Ngetulu kwaloko, livi laNkulunkulu endlini yaBabe Whitmer losekamdzala, eFayette, esifundzeni saseSeneca, ngetikhatsi letingafani, nasetindzaweni letehlukene kuko konkhe kuhamba netinhlupheko taleliBandla laJesu Khristu lalabaNgcwele beTinsuku Tekugcina! Nelivi laMikhayeli, ingilosi lenkhulu; livi laGabriyeli, nelaRafayeli, neletingilosi letehlukahlukene, kusuka kuMikhayeli noma Adamu kwehla njalo kute kube sikhatsi samanje, bonkhe bamemetela ngetinhlelo tabo tekwengamela, emalungelo abo, tikhiya tabo, ludvumo lwabo, bukhulu nebukhosi babo, nemandla ebuphristi babo; banika umugca etikwemugca, umyalo etikwemyalo, lokuncane lapha, nalokuncane lapha; basinika indvudvuto ngekumemetela loko lokutako, bacinisekisa litsemba letfu.
22 Bomnaketfu, singachubeki yini kulomgomo lomkhulu kangaka na? Chubekani ningahlehli. Manini sibindzi, bomnaketfu; nichubeke, chubekelani ekuncobeni! Tinhlitiyo tenu atitfokote, tiphindze tijabule kakhulu. Umhlaba awuhlokome ngengoma. Labafile abasho emaculo ekudvumisa kwaphakadze eNkhosini Imanyuweli, lowabekwa umhlaba usengakadalwa, loko lokutawusinika emandla ekutsi sibahlenge baphume ejele labo; ngoba tiboshwa tiyawukhululwa.
23 Tintsaba atimemete ngenca yenjabulo, futsi nani nonkhe tigodzi khalani kakhulu; nani nonkhe tilwandle nemihlaba leyomile shanoni timangaliso teNkhosi yenu yaPhakadze! Nani mifula, nemifudlana, nemitfombo gobhotani ngenjabulo. Emahlatsi nato tonkhe tihlahla tesiganga atibonge iNkhosi; nine madvwala lacinile khalani ngenca yenjabulo! Lilanga, inyanga, netinkhanyeti tasekuseni akuhlabele ndzawonye, futsi onkhe emadvodzana aNkulunkulu akamemete ngenca yenjabulo! Tidalwa taphakadze atibite libito lakhe phakadze naphakadze! Ngetulu kwaloko ngitsi, maye liyamangalisa livi lesiliva livela ezulwini, lelimemetela etindlebeni tetfu, bukhosi, nensindziso, nenhlonipho, nekungabhubhi, nekuphila lokuphakadze; imibuso, babusi, nemandla!
24 Bukani, lilanga lelikhulu leNkhosi selisedvute; futsi ngubani longamelana nelilanga lekufika kwayo, futsi ngubani longema ekubonakaleni kwayo na? Ngoba ifanana nemlilo wemcengi, nensipho yemgezi; futsi iyawuhlala njengemcengi nemgezi wesiliva, iphindze ihlambulule emadvodzana aLevi, iwahlute njengeligolide nesiliva, kute anikele eNkhosini umnikelo ngekulunga. Ngako-ke, asinikeleni eNkhosini umnikelo ngekulunga, njengelibandla nebantfu, nanjengalabaNgcwele beTinsuku Tekugcina; asiletse ethempelini lakhe lelingcwele, uma seliphelile, incwadzi lecuketse imibhalo yalabafile betfu, leyawufaneleka kutsi yemukeleke.
25 Bomnaketfu, nginetintfo letiningi lengitawutisho ngalokuphatselene nalesihloko; kodvwa manje ngitawuyivala lencwadzi kwamanje, ngibuye ngisichube lesihloko ngalesinye sikhatsi. Ngingiyo, njengasemihleni, inceku yenu letfobekile nemhlobo longaphambuki.
Joseph Smith.