Sigaba 63
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 30 ngeNgci, ngemnyaka we-1831. UmPhrofethi, naSidney Rigdon, na-Oliver Cowdery besebafikile eKirtland mhlaka 27 ngeNgci baphuma ekuvakasheni kwabo eMissouri. Umlandvo waJoseph Smith usichaza kanje lesi sembulo: “Kulamalanga ekucatfuta kweliBandla, bekukhona kukhatsateka lokukhulu kutfola livi leNkhosi kunoma ngusiphi sihloko lesasiphatselene nensindziso yetfu nganoma nguyiphi indlela; futsi njengobe live laseZion manje beselibukwe njengenhloso yasemhlabeni lebaluleke kakhulu, ngabuta eNkhosini kute ngitfole lwati lolwengetiwe ngekugcogcwa kwalabaNgcwele, nekutsengwa kwemhlaba, nalokunye.”
1–6, Lilanga lelulaka litawukuta kulababi; 7–12, Tibonakaliso tita ngekukholwa; 13–19, Labaphinga ngenhlitiyo batawukuphika kukholwa bese balahlwa echibini lemlilo;20, Labetsembekile batawutfola lifa emhlabeni loguculiwe; 21, Indzaba lephelele ngalokwenteka eNtsabeni yeKugucuka lesinye simo kusengakembulwa; 22–23, Labalalelako batfola timfihlakalo tembuso; 24–31, Emafa aseZion kufanele atsengwe; 32–35, INkhosi imemetela timphi, nalababi babulala lababi; 36–48, LabaNgcwele kumele babutsane ndzawonye eZion bakhiphe timali tekuyakha; 49–54, Tibusiso ticinisekiswa labatsembekile eKubuyeni kwesiBili, eKuvukeni, nangesikhatsi seMileniyamu; 55–58, Leli lilanga lekwecwayisa; 59–66, Libito leNkhosi liphatfwa ngelite ngulabo labalisebentisa ngaphandle kweligunya.
1 Lalelani, O nine bantfu, vulani tinhlitiyo tenu nibeke indlebe nine lenikhashane; nilalele, nine lenitibita ngebantfu beNkhosi, nive livi leNkhosi nentsadvo yayo ngalokuphatselene nani.
2 Yebo, ngicinisile, ngitsi, vanini livi laloyo intfukutselo yakhe iyavutsa ngekumelana nalababi nalabangihlubukako;
3 Loyo lotsandza kutsatsa ngisho labo latawubatsatsa, nalogcina ekuphileni labo latawubagcina;
4 Loyo lowakha ngentsadvo nangekujabula kwakhe; nalobhubhisako uma atsandza, nalongaphonsa umphefumulo wemuntfu esihogweni.
5 Bukani, mine, iNkhosi, ngikhuluma livi lami, futsi litawulalelwa.
6 Ngaloko-ke, ngicinisile ngitsi, lababi abacaphele, nalabangihlubukako abesabe futsi batfutfumale; nalabangakholwa abathule, ngoba lilanga lelulaka litawukuta kubo njengesivunguvungu, futsi yonkhe inyama iyawukwati kutsi nginguNkulunkulu.
7 Futsi loyo lofuna tibonakaliso uyawutibona tibonakaliso, kodvwa hhayi kutsi asindziswe.
8 Ngicinisile, ngitsi kini, kukhona labo emkhatsini wenu labafuna kubona tibonakaliso, futsi bebakhona labanjalo ngisho kwasekucaleni;
9 Kodvwa, bukani, kukholwa akuti ngetibonakaliso, kodvwa tibonakaliso tilandzela labo labakholwako.
10 Yebo, tibonakaliso tita ngekukholwa, hhayi ngentsandvo yebantfu, noma ngekutsandza kwabo, kodvwa ngentsandvo yaNkulunkulu.
11 Yebo, tibonakaliso tita ngekukholwa, kute kube nemisebenti yemandla, ngoba ngaphandle kwekukholwa umuntfu angeke akhone kujabulisa Nkulunkulu; futsi loyo Nkulunkulu lamtfukutselele akajabuli ngaye; ngaloko-ke, kulabanjalo akakhombisi tibonakaliso, kuphela nje ngelulaka ekulahlweni ngelicala kwabo.
12 Ngaloko-ke, mine, iNkhosi, angitfokoti ngalabo emkhatsini wenu labafuna tibonakaliso netimangaliso kute babe nekukholwa, futsi bangafuneli kutsi kuzuze bantfu ngenca yeludvumo lwami.
13 Noko, nginika imiyaleto, futsi labanyenti bayifulatsele imiyaleto yami bangayigcini.
14 Bekukhona emkhatsini wenu tiphingi, netiphingikati; letinye tato letinifulatsele, futsi letinye tisesele nani letitawukwembulwa emvakwaloku.
15 Labanjalo abacaphele baphendvuke ngekushesha, funa kwehlulelwa kwehlele etikwabo njengasochaka, nebulima babo buvetwe, nemisebenti yabo ibalandzele emehlweni ebantfu.
16 Futsi ngicinisile ngitsi kini, njengobe ngishito phambilini, loyo lobuka wesifazane bese uyamkhanuka, noma uma kukhona labayawuphinga etinhlitiyweni tabo, angeke babe naMoya, kodvwa bayawuluphika lukholo baphindze besabe.
17 Ngaloko-ke, mine, iNkhosi, ngishito kutsi emagwala, nalabangakholwa, bonkhe bakhohlisi, nabo bonkhe labo labatsandza kucala emanga, netingwandla, netangoma, bayawuba nesabelo echibini lelivutsa umlilo nesibabule, lokukufa kwesibili.
18 Ngicinisile ngitsi, abayukuba nesabelo ekuvukeni kwekucala.
19 Manje bukani, mine, iNkhosi, ngitsi kini anikemukelwa, ngoba leti tintfo tisemkhatsini wenu.
20 Noko, loyo lobeketela ngekukholwa aphindze ente intsandvo yami, nguye loyo loyawuncoba, futsi uyawutfola lifa emhlabeni ngesikhatsi lilanga lekugucuka lesinye simo selifika;
21 Ngesikhatsi umhlaba sewuguculwa, njengesifanekiso lesakhonjiswa kubaphostoli bami entsabeni; kuphelela kwaleyo ndzaba lenisengakakutfoli.
22 Manje, ngicinisile ngitsi kini, njengobe ngasho kutsi ngitawunatisa intsandvo yami, bukani ngitawunatisa, hhayi ngendlela yemyaleto, ngoba banyenti labangayigcini imiyaleto yami.
23 Kodvwa kuloyo logcina imiyaleto yami ngitawumnika timfihlakalo tembuso wami, futsi kuye tiyawuba ngumtfombo wemanti laphilako, laphuphumela ekuphileni lokuphakadze.
24 Manje, bukani, lena yintsandvo yeNkhosi Nkulunkulu wenu ngalokuphatselene nalabangcwele bakhe, kutsi kufanele babutsane ndzawonye eveni laseZion, hhayi ngekushesha, funa kubekhona kudideka, lokuletsa sifo lesingumashayabhuce.
25 Bukani, live laseZion—mine, iNkhosi, ngilibamba ngetami tandla;
26 Kodvwa, mine, iNkhosi, nginika Khesari lokukwaKhesari.
27 Ngaloko-ke, mine iNkhosi ngibheke kutsi nitsenge imihlaba, kute nibe nemandla emhlabeni, kute nibe nelilungelo emhlabeni, kute bangaphehlelwa entfukutselweni.
28 Ngoba Sathane ukufaka etinhlitiyweni tabo kutsi banitfukutselele, nekutsi bacitse ingati.
29 Ngaloko-ke, live laseZion angeke litfolakale kuphela nje ngekutsengwa noma ngengati, kungenjalo kute lifa lenu.
30 Futsi uma kungekutsengwa, bukani nibusisiwe;
31 Uma kungengati, njengobe ningakavunyelwa kucitsa ingati, buka, titsa tenu tisetikwenu, futsi niyawuhlushwa kusukela edolobheni kuya kulelinye lidolobha, kusukela esinagogeni kuya kulenye isinagoge, futsi bambalwa labayawukuma kutfola lifa.
32 Mine, iNkhosi, ngibatfukutselele lababi; ngibamba Moya wami kubantfu basemhlabeni.
33 Ngifungile elulakeni lwami, futsi ngimemetele timphi emhlabeni, nalababi bayawubulala lababi, nekwesaba kuyawufika etikwabo bonkhe bantfu.
34 Futsi labangcwele bayawuphunyula kalukhuni; noko, mine, iNkhosi, nginabo, futsi ngiyawukwehla ezulwini ngiphuma ebukhoneni baBabe ngishise lababi ngemlilo longacimeki.
35 Futsi bukani, loku angeke kwenteke manje, kodvwa masinyane.
36 Ngaloko-ke, ngenca yekutsi mine, iNkhosi, ngimemetele tonkhe leti tintfo emhlabeni, ngibheke kutsi labangcwele bami babutsane eveni laseZion;
37 Nekutsi wonkhe umuntfu kufanele atsatse kulunga etandleni takhe nekwetsembeka elukhalweni lwakhe, aphakamise livi lesecwayiso kubantfu basemhlabeni; amemetele ngelivi nangekubaleka kutsi incitsakalo itawufika kulababi.
38 Ngaloko-ke, bafundzi bami labaseKirtland abahlele tindzaba tabo tasemhlabeni, labahlala kulelipulazi.
39 Inceku yami Titus Billings, lekungiyo lelibukile, ayiwudayise lomhlaba, kute itilungiselele entfwasahlobo letako kutsatsa luhambo lwayo loluya eveni laseZion, nalabo labahlala kulo, ngaphandle kwalabo lengitawutigcinela bona, labangeke bahambe ngite ngibayalete.
40 Futsi tonkhe timali letisele, akukabaluleki kimi kutsi tincane noma tinyenti, atitfunyelwe eveni laseZion, kulabo lengibakhetsile kutsi batemukele.
41 Bukani, mine, iNkhosi, ngitawuniketa inceku yami Joseph Smith, lomNcane, emandla ekutsi ikwati kucondza ngaMoya kutsi ngubani lotawukuya eveni laseZion, nalabo lababafundzi bami labatawusala.
42 Inceku yami Newel K. Whitney ayigcine sitolo sayo, noma ngalamanye emagama, sitolo leso, kwesikhashana.
43 Noko, akaphisane ngayo yonkhe imali langakhona kuphisana ngayo, kute itfunyelwe eveni laseZion.
44 Bukani, leti tintfo tisetandleni takhe lucobo, akatente ngekuhlakanipha.
45 Ngicinisile ngitsi, akabekwe abe sitfunywa kubafundzi labatawusala, futsi akabekwe kulamandla;
46 Manje vakashela ngekushesha emagala emabandla, uchaze kabanti leti tintfo kubo, nenceku yami Oliver Cowdery. Buka, lena yintsandvo yami, kutfola timali njengobe ngiyaletile.
47 Loyo lowetsembekile nalobeketelako uyawuncoba umhlaba.
48 Loyo lotfumela ingcebo eveni laseZion uyawutfola lifa kulomhlaba, nemisebenti yakhe iyawumlandzela, kanjalo nemvuzo emhlabeni lotako.
49 Yebo, futsi babusisiwe labafile bafela eNkhosini, kusukela kulesikhatsi, lapho iNkhosi iyawubuya, futsi tintfo letindzala tiyawukwendlula, konkhe kwentiwe kube kusha, bayawuvuka kulabafile bangabe basafa emvakwaloko, baphindze batfole lifa phambi kweNkhosi, edolobheni lelingcwele.
50 Loyo lophilako uma iNkhosi ibuya, abe agcine kukholwa, ubusisiwe; noko, kumisiwe kuye kutsi afe esikhatsini lesibekelwe umuntfu.
51 Ngaloko-ke, bantfwana bayawukhula bate babe badzala; bantfu labadzala bayawukufa; kodvwa angeke balale elutfulini, kodvwa bayawuguculwa ngekuphatima kweliso.
52 Ngaloko-ke, ngalesi sizatfu baphostoli bashumayela emhlabeni kuvuka kwalabafile.
53 Leti tintfo lekufanele nitifune; futsi, kukhuluma ngendlela yeNkhosi, setisedvute, esikhatsini lesitako, ngisho elangeni lekubuya kweNdvodzana yeMuntfu.
54 Futsi kute kube nguleso sikhatsi kuyawuba khona tintfombi letitiwula emkhatsini waletihlakaniphile; ngaleso sikhatsi kuyawuba khona kwehlukaniswa lokuphelele kwalabalungile nalababi; futsi ngalelo langa ngiyawutfumela tingilosi tami kutsi tehlukanise lababi tibaphonse emlilweni longacimeki.
55 Manje bukani, ngicinisile ngitsi kini, mine, iNkhosi, angitfokoti ngenceku yami Sidney Rigdon; utiphakamisile enhlitiyweni yakhe, wangasemukeli seluleko, kodvwa umdzabukisile Moya.
56 Ngaloko-ke umbhalo wakhe awemukeleki eNkhosini, utawukwenta lomunye; futsi uma iNkhosi ingawemukeli, bukani, angeke asema esikhundleni lengimbeke kuso.
57 Ngetulu kwaloko, ngicinisile ngitsi kini, labo labafisako etinhlitiyweni tabo, ngebumnene, kwecwayisa toni kutsi tiphendvuke, ababekwe kulamandla.
58 Ngoba leli lilanga lesecwayiso, futsi akusilo lilanga lemavi lamanyenti. Ngoba mine, iNkhosi, angitukuhlekwa ngemalanga ekugcina.
59 Bukani, ngivela etulu, futsi emandla ami angephansi. Ngingetulu kwako konkhe, nasekhatsi kwako konkhe, nakuko konkhe, futsi ngihlolisisa tonkhe tintfo, nelilanga liyeta lapho tonkhe tintfo tiyawuba ngaphansi kwami.
60 Buka, ngingu-Alfa na-Omega, ngisho Jesu Khristu.
61 Ngaloko-ke, bonkhe bantfu abacaphele kutsi baliphatsa kanjani libito lami etindzebeni tabo—
62 Ngoba bukani, ngicinisile ngitsi kini, banyenti labangaphansi kwaloko kulahlwa ngelicala, labasebentisa libito leNkhosi, balisebentisa ngelite, bete ligunya.
63 Ngaloko-ke, libandla aliphendvuke etonweni talo, mine, iNkhosi, ngitawubavuma; kungenjalo batawususwa.
64 Khumbulani kutsi loko lokuvela ngetulu kungcwele, futsi kumele kukhulunywe ngekucaphela, nangekuholwa nguMoya; kuloku kute kulahlwa ngelicala, futsi nitfola Moya ngekuthandaza; ngaloko-ke, ngaphandle kwaloku kusele kulahlwa ngelicala.
65 Tinceku tami, Joseph Smith, lomNcane, naSidney Rigdon, atifune likhaya, njengobe bafundzisiwe ngemthandazo nguMoya.
66 Leti tintfo kusamele tincotjwe ngekubeketela, kute labanjalo batfole lengalinganiswa nalengunaphakadze inkhatimulo, kungenjalo, kukhona kulahlwa ngelicala lokukhulu. Amen.