Sigaba 11
Sembulo lesaniketwa ngaJoseph Smith umPhrofethi kumnakabo Hyrum Smith, eHarmony, ePennsylvania, ngeNkhwekhweti ngemnyaka we-1829. Lesembulo satfolakala nge-Urimu neThumimu kuphendvulwa umthandazo nembuto waJoseph. Umlandvo waJoseph Smith ukhombisa kutsi lesembulo satfolakala ngemuva kwekubuyiselwa kwebuPhristi baka-Aroni.
1–6, Tisebenti esivinini titawutfola insindziso; 7–14, Funa kuhlakanipha, shumayela kuphendvuka, tsembela kuMoya; 15–22, Gcina imiyaleto, futsi uwafundze emavi eNkhosi; 23–27, Ungawuphiki umoya wesembulo newekuphrofetha; 28–30, Labo labemukela Khristu baba ngemadvodzana aNkulunkulu.
1Â Umsebenti lomkhulu nalomangalisako sewutawucala emkhatsini webantfwana bebantfu.
2Â Buka, nginguNkulunkulu; naka livi lami, leliphilile nalelinemandla, lelikhalipha kwengca inkemba lesika ngetinhlangotsi totimbili, lisika lidzimate lehlukanise emalunga nemnkantja; ngako-ke naka livi lami.
3Â Buka, insimi seyimhlophe seyilungele kuvunwa; ngako-ke, noma ngubani lonesifiso sekuvuna akajikijele lisikela lakhe ngemandla, avune kusesemini, kute abekele umoya wakhe insindziso yaphakadze embusweni waNkulunkulu.
4Â Yebo, noma ngubani lotawujikijela lisikela lakhe avune, nguye loyo lobitwe nguNkulunkulu.
5Â Ngako-ke, uma utawucela kimi utawutfola; uma utawunconcotsa utawuvulelwa.
6Â Manje, njengobe ucelile, buka, ngitsi kuwe, gcina imiyaleto yami, uphindze ufune kuveta futsi ucinisekise umgomo weSiyoni.
7Â Ungafuni umcebo kodvwa funa inhlakanipho; futsi, buka, timfihlakalo taNkulunkulu tiyawukwembulelwa wena, futsi emvakwaloko uyawunotsa. Buka, loyo lonekuphila lokuphakadze unotsile.
8Â Ngicinisile, ngicinisile, ngitsi kuwe, njengobe ufisa lokuvela kimi kuyawuba njalo kuwe; futsi, uma ufisa, uyawuba yindlela yekwenta lokuhle kulesi situkulwane.
9Â Ungashumayeli lutfo kulesi situkulwane ngaphandle kwekuphendvuka. Gcina imiyaleto yami, ulekelele ekuveteni umsebenti wami, ngekwemiyaleto yami, uyawubusiswa.
10Â Buka, unesipho, noma uyawuba nesipho uma usicela kimi ngelukholo, ngeliciniso, ukholwa emandleni aJesu Khristu, noma emandleni ami lakhuluma nawe;
11Â Ngoba, buka, ngimi lona lokhulumako; buka, ngikukhanya lokukhanya ebumnyameni, futsi nangemandla ami ngikunika lamavi.
12 Manje, ngicinisile, ngicinisile ngitsi kuwe, beka litsemba lakho kuloyo Moya loholela ekwenteni lokuhle—yebo, ekwenteni kulunga, ekutiphatseni ngekutitfoba, nekwehlulela ngekulunga; futsi nguMoya wami lona.
13Â Ngicinisile, ngicinisile, ngitsi kuwe, ngitawukwembula kuwe incenye yaMoya wami, loyo lokhanyisela ingcondvo yakho, loyawugcwalisa umoya wakho ngenjabulo.
14Â Emvakwaloko uyawukwati, noma ngenca yaloku uyawukwati, tonkhe tintfo tanoma ngayini loyifisako kimi, letiphatselene netintfo tekulunga, ngelukholo ukholwa kimi kutsi uyawutitfola.
15Â Buka, ngiyakuyaleta kutsi akukafaneli ucabange kutsi ubitelwe kushumayela ute ubitwe.
16Â Lindza sikhashana, ute ube nelivi lami, lidvwala lami, libandla lami, nelivangeli lami, kute wati ngekweliciniso ngemfundziso yami.
17Â Emvakwaloko, buka, ngekwetifiso takho, yebo, ngisho nangelukholo lwakho kuyawukwenteka kuwe.
18Â Gcina imiyaleto yami; thula; ncusa kuMoya wami;
19 Yebo, bambelela kimi ngenhlitiyo yakho yonkhe, kute usite ekukhanyiseleni bantfu leto tintfo lesekukhulunywe ngato—yebo, kuhunyushwa kwemsebenti wami; beketela ute ukufeze loko.
20Â Buka, ngumsebenti wakho lona, kugcina imiyaleto yami, yebo, ngawo onkhe emandla, ingcondvo kanye nangemfutfo wakho.
21Â Ungafuni kumemetela livi lami, kodvwa funa kucala kulitfola livi lami, futsi emvakwaloko lulwimi lwakho luyawuchacheka; emvakwaloko, uma ufisa, uyawukuba naMoya wami nelivi lami, yebo, emandla aNkulunkulu ekukholwiseni bantfu.
22Â Kodvwa manje thula; fundza livi lami leselimenyetelwe emkhatsini webantfwana bebantfu, ufundze nelivi lami leliyawukwembulwa emkhatsini webantfwana bebantfu, noma lelo lelihunyushwako manje, yebo, ute ukutfole konkhe lengiyawukupha labantfwana bebantfu kulesi situkulwane, futsi emvakwaloko tonkhe tintfo tiyawukwengetwa kuloko.
23Â Buka unguHyrum, ndvodzana yami; funa umbuso waNkulunkulu, futsi tonkhe tintfo tiyawukwengetwa ngekuvumelana nekulunga.
24Â Yakhela etikwelidvwala lami, lokulivangeli lami;
25Â Ungawuphiki umoya wesembulo, naloyo moya wekuphrofetha, ngoba maye kuloyo loyawuphika leti tintfo;
26Â Ngako-ke, londvolota enhlitiyweni yakho livi lami kute kube sikhatsi lengiyawubona ngaso kutsi kufanele uhambe.
27Â Buka, ngikhuluma kubo bonkhe labanetifiso letinhle, nalabajikijele lisikela labo kute bavune.
28Â Buka, nginguJesu Khristu, iNdvodzana yaNkulunkulu. Ngikuphila nekukhanya kwemhlaba.
29Â Nginguye loweta kubami futsi bami bangangemukeli;
30Â Kodvwa ngicinisile, ngicinisile, ngitsi kuwe, bonkhe labangemukelako, ngitawubanika emandla ekuba ngemadvodzana aNkulunkulu, ngisho nakulabo labakholelwa egameni lami. Amen.