Laipelí
Lēsoni 101: Loma 8–11

Lēsoni 101

Loma 8–11

Talateú

Naʻe akonaki ʻa Paula fekauʻaki mo e ngaahi tāpuaki ʻo e toe fanauʻi foʻou fakalaumālié mo e talangofua ki he finangalo ʻo e Tamai Hēvaní. Naʻá ne akonaki foki fekauʻaki mo hono fakaʻikaiʻi ʻe ʻIsileli e fuakava ʻa e ʻOtuá pea fekauʻaki mo hono fakamafola ʻo e ongoongoleleí ʻi he lotolotonga ʻo e kau Senitailé.

Ngaahi Fokotuʻu ki hono Akoʻí

Loma 8

Ko hono fakamatalaʻi ʻe Paula e ngaahi tāpuaki ʻo e toe fanauʻi foʻou fakalaumālié.

Kamata e lēsoní ʻaki hono fai ange e ngaahi fehuʻi ko ʻení:

  • Ko e hā ʻa e tofiʻa?

  • Kapau te ke lava ʻo maʻu ha koloa ʻa ha taha, ko e koloa ʻa hai te ke filí pea ko e hā hono ʻuhingá?

  • Ko hai ʻoku angamaheni ʻaki ʻene faʻa maʻu ha koloa ʻa ha taha kehe?

Kole ki he kau akó ke nau fakakaukau ki he ngaahi tāpuaki ʻe lava ke maʻu ʻe ha taha ko ha ʻea-hoko ki he koloa kotoa ʻoku maʻu ʻe he Tamai Hēvaní. Fakaafeʻi e kau akó ke nau kumi ʻi heʻenau ako ʻa e Loma 8:1–18 e meʻa kuo pau ke tau fai ke maʻu e kotoa ʻoku maʻu ʻe he Tamai Hēvaní.

Fakaafeʻi ha niʻihi ʻo e kau ako ke nau taufetongi ʻi hono lau ʻa e Loma 8:1, 5–7, 13. Kole ki he kau akó ke nau muimui ki ai, ʻo kumi e meʻa naʻe akoʻi ʻe Paula fekauʻaki mo kinautolu “ʻoku ʻo e kakanó,” pe fakavaivai ki he fakahehema ke faiangahalá, pea mo kinautolu “ʻoku ʻo e Laumālié” (veesi 5).

  • ʻOku ʻuhinga ki he hā ʻa e hoko ʻo “loto fakakakano”? (veesi 6) (Ke tokanga taha ki hono fakafiemālieʻi e ngaahi fie holi fakakakanó mo e ngaahi manako ʻo e sino fakamatelié.)

  • ʻOku ʻuhinga ki he hā ʻa e hoko ʻo “loto fakalaumālie”? (veesi 6)

Fakamatalaʻi ange ʻoku ʻuhinga ʻa e “tamateʻi ʻa e ngaahi anga ʻo e kakanó” (veesi 13) ke faka-pekia pe ikunaʻi ʻa e ngaahi vaivaí, ʻahiʻahí, mo e ngaahi angahala fekauʻaki mo hotau sino fakamatelié (vakai, ; Mōsaia 3:19).

  • Ko e hā e tefitoʻi moʻoni ʻe lava ke tau ako mei he veesi 13 fekauʻaki mo e meʻa ʻe lava ke ne tokoniʻi kitautolu ke tau ikunaʻi ʻa e fakahehema ʻa e tangata fakakakanó ke faiangahalá? (Tokoni ki he kau akó ke nau ʻilo ʻa e tefitoʻi moʻoni ko ʻení: Kapau te tau muimui ki he ueʻi ʻa e Laumālie Māʻoniʻoní, te tau lava ʻo ikunaʻi ʻa e fakahehema ʻa e tangata fakakakanó ke faiangahalá. Tohi ʻa e tefitoʻi moʻoni ko ʻení ʻi he palakipoé.)

Fakaafeʻi ha tokotaha ako ke lau leʻolahi ʻa e Loma 8:14–16. Kole ki he kalasí ke muimui ki ai, ʻo kumi e meʻa naʻe ui ʻaki ʻe Paula ʻa kinautolu ne muimui ki he Laumālié.

  • ʻOku fakamatalaʻi fēfē ʻe Paula ʻakinautolu ʻoku muimui ki he Laumālié? (Fakamatalaʻi ange ʻoku ʻuhinga ʻa e foʻi lea ngaahi foha ʻi he tūkunga ko ʻení ki he ngaahi foha mo e ngaahi ʻofefine fakatouʻosi [vakai T&F 25:1].)

Fakamahinoʻi ange ʻa e kupuʻi lea “Laumālie ʻo e ohi” veesi 15. Fakamatalaʻi ange, naʻe fakatupu ʻe he Tamai Hēvaní “hotau laumālié” (veesi 16), ʻo ʻuhinga ki hotau sino fakalaumālié, ʻo faʻu ʻa e tokotaha kotoa pē ko e fānau fakalaumālie ʻa e Tamai Hēvaní. Neongo ia, ʻoku ʻi hono fakahoko e ngaahi fuakava mo e ʻOtuá ʻo fakafou ʻi he ngaahi ouaú pea tauhi leva ʻa e ngaahi fuakava ko ia ʻoku toe fanauʻi foʻou fakalaumālie ai ʻa e kakaí, pe ohí, ko Hono ngaahi foha mo e ʻofefine ʻi he fuakava ʻo e ongoongoleleí. ʻOku fakahaaʻi ʻe he takaua ʻo e Laumālie Māʻoniʻoní ʻoku ʻikai ngata pē ʻi he hoko ʻa e kakai peheé, ko e fānau fakalaumālie ʻa e ʻOtuá ʻi he mafai ʻo e fakatupú, ka ʻoku nau hoko foki ko ʻEne fānau ʻi he fuakavá.

Fakaafeʻi ha tokotaha ako ke lau leʻolahi ʻa e Loma 8:17–18. Kole ki he kalasí ke nau muimui ki ai, ʻo kumi e meʻa ʻe lava ke aʻusia ʻe he fānau fuakava ʻa e ʻOtuá.

  • Ko e hā ʻe lava ke aʻusia ʻe he fānau fuakava ʻa e ʻOtuá? (Hiki e tefitoʻi moʻoni ko ʻení ʻi he palakipoé, ʻo tuku ha foʻi laine ʻi he tuʻuʻanga ʻo e foʻi lea faivelengá: Kapau ko e fānau tui faivelenga kitautolu ʻa e ʻOtuá, ʻe lava ke tau hoko ko e kau ʻea-hoko fakataha mo Sīsū Kalaisi ki he kotoa ʻo e meʻa ʻoku maʻu ʻe he Tamai Hēvaní.)

  • Ko e hā ʻa e ʻea-hoko? (Ko hā ha taha ʻokú ne maʻu ha tofiʻa tatau mo e kau ʻea-hoko kehé.)

  • Fakatatau ki he veesi 17, ko e hā kuo pau ke fai ʻe he fānau fuakava ʻa e ʻOtuá ke nau hoko ko e kau ʻea hoko fakataha mo Kalaisi?

Fakamatalaʻi ange ʻoku ʻikai ʻuhinga ʻa e “mamahi mo iá [Sīsū Kalaisí]” (veesi 17) ʻoku tau fua ʻa ia naʻe fai ʻe he Fakamoʻuí ko ha konga ʻo ʻEne feilaulau fakaleleí. Kae hangē ko e Fakamoʻuí, kuo pau ke tau fakafisi mei he anga taʻemāʻoniʻoni kotoa pē, tauhi e ngaahi fekaú, pea kātakiʻi faivelenga ʻa e fakafepakí (vakai, Mātiu 16:24; Liliu ʻa Siosefa Sāmita, Mātiu 16:26 [ʻi he Ko e Fakahinohino ki he Ngaahi Folofolá]). Tānaki atu ʻa e foʻi lea faivelengá ke fakakakato ʻa e tefitoʻi moʻoni ʻi he palakipoé. Tā ha saati kōlomu ʻe tolu ʻi he palakipoé. Fakahingoa ʻa e kōlomu ʻuluakí ko e Ngaahi fie maʻú, pea kōlomu hono uá ko e Ngaahi fakafepakí, pea kōlomu hono tolú ko e Tofiʻá. Hiki e tali ʻa e kau akó ki he ngaahi fehuʻi ko ʻení ʻi honau kōlomu totonu.

  • Ko e hā ha ngaahi meʻa kuo pau ke tau fai ke ui ai kitautolu ko e fānau fuakava tui faivelenga ʻa e ʻOtuá?

  • Ko e hā ha ngaahi sīpinga ʻo e fakafepakí ʻe lava ke tau aʻusia ʻi heʻetau feinga ke moʻui ko ha fānau fuakava tui faivelenga ʻa e ʻOtuá?

  • Ko e hā ha ngaahi tāpuaki ʻe lava ke tau maʻu mei he Tamai Hēvaní kapau te tau feinga ke moʻui ko ʻEne fānau fuakava tui faivelenga? (Ko e taha ʻo e ngaahi talí ko e lava ke tau hoko ʻo hangē ko e Tamai Hēvaní .)

Kole ki he kau akó ke nau fakalaulauloto ki he lisi ʻi he palakipoé.

  • Hili hono lau e ngaahi akonaki ʻa Paula ʻi he veesi 18, ʻokú ke pehē ʻe anga fēfē hano fakafehoanaki ʻa e ngaahi meʻa ʻoku fie maʻu ke hoko ko e kaungā ʻea-hoko fakataha mo Kalaisí ki he ngaahi tāpuakí? Ko e hā hono ʻuhingá?

Fakamatalaʻi ange ʻoku tau lau ʻi he Loma 8:19–30, naʻe akoʻi ʻe Paula ʻoku tokoniʻi kitautolu ʻe he Laumālié ʻi hotau ngaahi vaivaí pea tokoniʻi kitautolu ke tau ʻiloʻi e meʻa ke lotuá. ʻOku tau lau foki naʻe ui ʻa Sīsū Kalaisi ʻi he maama fakalaumālié ke hoko ko e Fakamoʻui ki he fānau ʻa e ʻOtuá (vakai, Liliu ʻa Siosefa Sāmita, Loma 8:29–30 [ʻi he Ko e Fakahinohino ki he Ngaahi Folofolá]).

Fakatokangaʻi ange: ʻOku ʻuhinga ʻa e foʻi lea ko e tuʻutuʻuni ʻi he Loma 8:29–30, ki he tomuʻa fakanofo pe uiuiʻi. ʻE ako ʻe he kau akó ha niʻihi ʻo e ngaahi akonaki ʻa Paula kau ki he tomuʻa fakanofó ʻi he lēsoni ʻi he ʻEfesō 1.

Fakaafeʻi ha niʻihi ʻo e kau akó ke nau taufetongi ʻi hono lau leʻolahi ʻa e Loma 8:28, 31–39. Kole ki he kalasí ke nau muimui ki ai, ʻo kumi e ngaahi moʻoni naʻe akoʻi ʻe Paula fekauʻaki mo e ʻofa ʻa e ʻOtuá ʻi heʻene fekauʻaki mo e fakafepakí, ngaahi faingataʻá, mo e ngaahi ʻahiʻahi ʻo e moʻui fakamatelié. Fakamahinoʻi ange ʻoku fetongi ʻaki ʻe he Liliu ʻa Siosefa Sāmita ki he Loma 8:31 e kupuʻi lea “angatuʻú” ʻaki e “mālohi ange”

  • Ko e hā ha ngaahi moʻoni ʻe lava ke tau ako mei he ngaahi veesi ko ʻení? ʻE ala ʻilo ʻe he kau akó ha ngaahi tefitoʻi moʻoni kehekehe, kau ai ʻa e ngaahi meʻá ni: Kapau ʻoku tau ʻofa ʻi he ʻOtuá ʻe fengāueʻaki fakataha ʻa e ngaahi meʻa kotoa pē koeʻuhí ko ʻetau leleí. ʻE lava ke tau ikunaʻi ʻa e ngaahi ʻahiʻahi mo e ngaahi faingataʻa kotoa pē ʻo e moʻui fakamatelié ʻo fakafou ʻia Sīsū Kalaisi. He ʻikai ha meʻa te ne lava ʻo fakamavahevaheʻi kitautolu mei he ʻofa ʻa e ʻOtuá, ʻa ia ʻoku fakahā mai ʻi he Fakalelei ʻa Sīsū Kalaisí.)

  • ʻE lava ke tokoniʻi fēfē kitautolu ʻe Sīsū Kalaisi mo ʻEne ngaahi akonakí ke tau ikunaʻi ʻa e ngaahi faingataʻa mo e ngaahi ʻahiʻahi ʻo e moʻui fakamatelié?

  • Fakatatau ki he ngaahi faingataʻa mo e ngaahi ʻahiʻahi ʻo e moʻui fakamatelié kuó ke aʻusiá, ko fē ʻi he ngaahi veesi ko ʻení ʻoku makehe kiate koé? Ko e hā hono ʻuhingá?

  • Kuó ke aʻusia fēfē e ʻofa ʻa e ʻOtuá ʻi he lotolotonga hoʻo ngaahi faingataʻaʻiá mo e ʻahiʻahí?

Fakaafeʻi ʻa e kau akó ke nau hiki ʻi heʻenau pepa akó pe tohinoa ako folofolá ʻa e meʻa naʻe ueʻi kinautolu ke nau fai, koeʻuhí ke nau lava ʻo ikunaʻi ʻa e ngaahi faingataʻá mo e ngaahi ʻahiʻahí ʻo fakafou ʻia Sīsū Kalaisi. Poupouʻi kinautolu ke nau moʻui ʻaki ʻa e meʻa ne nau tohí.

Loma 9–11

ʻOku akoʻi ʻe Paula fekauʻaki mo hono fakafisingaʻi ʻe ʻIsileli e fuakava ʻa e ʻOtuá mo hono ʻomi ʻo e ongoongoleleí ki he kau Senitailé

Kole ki he kau akó ke nau fakakaukauloto ki he founga te nau tali ʻaki e ngaahi meʻa ko ʻení:

  1. ʻOkú ke fononga fakataha mo hoʻo pīsopé ke ʻaʻahi ki ha talavou ʻoku mālohi hono fāmilí ʻi he Siasí, ka ʻoku māmālohi ia. ʻI he feinga hoʻo pīsopé ʻi he angaʻofa ke tokoni ke mahino ki he talavoú e ngaahi nunuʻa e ʻikai moʻui ʻaki e ongoongoleleí, ʻoku pehē ʻe he talavoú ni, “ʻOua te ke tokanga ki ai. Kuo ʻosi papitaiso au, pea ʻoku mālohi ʻeku ongomātuʻá. He ʻikai taʻofi ʻe he ʻOtuá ha ngaahi tāpuaki meiate au.”

  2. Naʻá ke toki fakakaungāmeʻa ki ha finemui ʻo ha tui fakalotu kehe. ʻOkú ne fehuʻi fekauʻaki mo e ngaahi tuʻunga moʻui ʻokú ke moʻui ʻakí. Hili hoʻo fakamatalaʻi ha niʻihi ʻo e ngaahi tuʻunga moʻui ʻa e ʻEikí, naʻá ne pehē, “ʻOku ʻikai mahino kiate au e ʻuhinga ʻokú ke fai kotoa ai ʻa e ngaahi meʻa ko ʻená. Ko e meʻa pē ke ke faí ko e tui kia Sīsū Kalaisi.”

Fakaafeʻi e kau akó ke nau kumi ki ha ngaahi moʻoni ʻi heʻenau ako ʻa e Loma 9–11 ʻe lava ke ne tokoniʻi kinautolu ke mahino ʻa e meʻa ʻoku fie maʻu kae maʻu ʻa e ngaahi tāpuaki ʻo e ongoongoleleí.

Fakaafeʻi ha tokotaha ako ke lau ʻa e fakamatala ko ʻení fekauʻaki mo e ngaahi akonaki ʻa Paula ʻi he Loma 9–11:

Hangē ko hono lekooti ʻi he Loma 9–11, naʻe fakaʻaongaʻi ʻe Paula ʻa e ongo foʻi lea ʻIsileli mo e kakai ʻIsilelí kae ʻikai ko e kau Siú ʻi hono aleaʻi e ngaahi fili naʻe fakahoko ʻe he kau Siú. ʻOku faʻa ui ʻi he taimi ʻe niʻihi e fānau fuakava ʻa e ʻOtuá ko e fale ʻo ʻIsilelí. ʻI he kuonga ʻo e Fuakava Motuʻá, naʻe fili ʻe he ʻOtuá ʻa e hako ʻo Sēkopé, pe ʻIsilelí, ke hoko ko ha konga ʻo ʻEne fuakava mo ʻĒpalahamé (vakai, Loma 9:4–5), ʻa ia naʻe kau ai ha ngaahi tāpuaki lahi hangē ko e ongoongoleleí, mafai ʻo e lakanga fakataulaʻeikí, moʻui taʻengatá, taʻengata hono hakó, ko ha fonua ʻo e tofiʻá, pea mo e fatongia hono tāpuakiʻi e māmaní ʻaki ʻa e ongoongoleleí.

Fakaafeʻi ha tokotaha ako ke ne lau leʻolahi ʻa e Loma 9:6, 8. Kole ki he kalasí ke nau muimui ki ai, ʻo kumi e meʻa naʻe akoʻi ʻe Paula fekauʻaki mo e kau mēmipa ʻo e fale ʻo ʻIsilelí.

  • ʻOkú ke pehē ko e hā e ʻuhinga ʻa Paula ki he “ʻikai ko e ʻIsileli kotoa pē, ʻa ia ʻoku meia ʻIsilelí”? (veesi 6) (Naʻe tokolahi ha kakai Siu naʻe lohiakiʻi kinautolu kuo pau ke maʻu ʻe honau hakó e ngaahi tāpuaki ʻo e fuakavá ʻo fakafou ʻia ʻĒpalahame.)

Fakamatalaʻi ange ʻoku tau lau ʻi he Loma 9:25–30, naʻe akoʻi ʻe Paula ʻe lava ke maʻu ʻe he kau Senitaile naʻe kau mai ki he Siasí e ngaahi tāpuaki kotoa pē ʻo e fuakavá pea hoko ʻo māʻoniʻoni ʻi heʻenau tui kia Sīsū Kalaisí.

Fakaafeʻi ha kau ako ʻe niʻihi ke nau taufetongi hono lau leʻolahi ʻa e Loma 9:31–33; 10:1–4. Kole ki he kalasí ke muimui ki ai, ʻo kumi e founga naʻe fekumi ai ha niʻihi ʻo e kau ʻIsileli ʻi he kuonga ʻo Paulá ke māʻoniʻoni ʻi he ʻao ʻo e ʻOtuá. Fakamatalaʻi ange ʻoku ʻuhinga ʻa e “fono māʻoniʻoní” (Loma 9:31) ki he fono ʻa Mōsesé; ko Sīsū Kalaisi ʻa e “maka tūkiaʻangá” (Loma 9:32, 33); pea ʻoku ʻuhinga ʻa e “fakatonuhia mei he ʻOtuá” (Loma 10:3) kia Sīsū Kalaisi mo ʻEne ongoongoleleí.

  • Fakatatau ki he Loma 9:31–33, naʻe fekumi fēfē e niʻihi ʻo e kau ʻIsilelí ke māʻoniʻoni ʻi he ʻao ʻo e ʻOtuá? (ʻAki ʻenau fakahoko pau e ngaahi ngāue ʻo e fono ʻa Mōsesé.)

  • Fakatatau ki he Loma 10:3–4, ko e hā kuo fakaʻikaiʻi ʻe he kau ʻIsilelí ni? (Ko Sīsū Kalaisi mo e māʻoniʻoni ʻoku fakafou mai ʻiate Iá.)

Fakamatalaʻi ange hangē ko hono lekooti ʻi he Loma 10:8–13, naʻe fakamatalaʻi ʻe Paula e founga ʻe lava ke maʻu ai “ʻa e fakatonuhia ʻoku ʻi he tuí” (Loma 9:30.) Fakaafeʻi ha kau ako ʻe niʻihi ke nau taufetongi hono lau leʻolahi e Loma 10:8–13. Kole ki he kalasí ke muimui ki ai, ʻo kumi e founga ke maʻu ai ʻa e tuʻunga māʻoniʻoni ko ʻení.

  • Ko e hā kuo pau ke fai ʻe ha taha ke maʻu ʻa e māʻoniʻoni ʻoku haʻu mei he tuí?

Fakamatalaʻi ange ʻoku fakahaaʻi ʻe he foʻi lea faka-Kalisi ʻoku liliu ko e fakahā ʻi he veesi 9 ha talitali lelei, pe fuakava, pea mo e foʻi lea faka-Kalisi naʻe liliu ko e tuí ha tukupā falalaʻanga. ʻOku tataki ʻe he falala ko ia ki he Fakamoʻuí ʻa e kakaí ke nau fakahaaʻi ʻenau tali Iá ʻi he ngaahi founga kuó Ne filí. (ʻOku kau ʻi he ngaahi founga ko ʻení ʻa e talangofua ki he ngaahi fekau ʻa e ʻOtuá, fakatomalá, mo maʻu e ngaahi ouau fakamoʻui hangē ko e papitaisó mo e meʻafoaki ʻo e Laumālie Māʻoniʻoní.

  • Fakatatau ki he ngaahi akonaki ʻa Paulá, ko e hā kuo pau ke tau fai kapau ʻoku tau holi ke maʻu ʻa e ngaahi tāpuaki ʻo e fuakava ʻa e ʻOtuá, kau ai ʻa e fakamoʻuí? (Tokoni ki he kau akó ke nau ʻilo ʻa e tefitoʻi moʻoni ko ʻení: Kapau te tau tali mo talangofua kia Sīsū Kalaisi mo ʻEne ongoongoleleí, ʻe lava ke tau maʻu ʻa e ngaahi tāpuaki ʻo e ngaahi fuakava ʻa e ʻOtuá pea mo fakamoʻui kitautolu. Tohi ʻa e tefitoʻi moʻoni ko ʻení ʻi he palakipoé.)

Fakamahinoʻi ange kuo fakaʻaongaʻi ʻe ha kakai ʻe niʻihi ʻa e Loma 10:9, 13 ke pehē ko e meʻa pē ke tau fai ke fakahaofi ai kitautolú ko e lea ʻo fakahā ʻetau tui kia Sīsū Kalaisí. Fakamanatu ange ki he kau akó ʻa e ngaahi tūkunga naʻe fakamatalaʻi kimuʻa ʻi he lēsoní.

  • ʻE lava fēfē ʻe he ngaahi moʻoni ʻi he lēsoni ko ʻení ʻo tokoniʻi koe ke ke tali ʻa e ngaahi meʻá ni?

Fakamatalaʻi fakanounou ʻa e toenga ʻo e Loma 10–11 ʻaki hano fakamatalaʻi ange naʻe akoʻi ʻe Paula ʻoku mahuʻinga e fanongo ki he folofola ʻa e ʻOtuá ki hono fakatupulaki ʻo e tui kia Sīsū Kalaisí. Naʻá ne fakaʻaongaʻi ha fakatātā ʻo hono hoko ʻo ha ngaahi vaʻa mei ha fuʻu ʻōlive vao ki ha fuʻu ʻōlive kolo ke fakafofongaʻi hono ohi ʻo e kau Senitailé ki he fale ʻo ʻIsilelí (vakai foki Sēkope 5:3–14). Naʻá ne akoʻi ʻe toe ʻoatu pē ʻa e ongoongoleleí ki he kakai Siú.

Fakaʻosi ʻaki haʻo fakamoʻoni ki he ngaahi moʻoni naʻe aleaʻi ʻi he lēsoni ko ʻení.

Ngaahi Fakamatala Fakamahino mo e Puipuituʻá

Loma 8:14–17. Ko e fānau kitautolu ʻa e ʻOtuá

Naʻe fakamoʻoni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ki hotau tukufakaholo fakalangi ko e fānau ʻa e ʻOtuá:

“ʻOku ʻafioʻi ʻe hoʻo Tamai ʻi Hēvaní ho hingoá pea ʻafioʻi ho tūkungá. ʻOkú Ne fanongo ki hoʻo ngaahi lotú. ʻOkú Ne ʻafioʻi hoʻo ngaahi ʻamanakí mo e fakaʻānauá, kau ai ʻa hoʻo ngaahi manavasiʻí mo e ngaahi meʻa ʻoku fakatupu loto mamahi kiate koé. Pea ʻokú Ne ʻafioʻi ʻa e meʻa te ke malava ʻo aʻusiá, tuʻunga ʻi hoʻo tui kiate Iá. Koeʻuhí ko e tukufakaholo fakalangí ni, ʻokú ke maʻu ai, fakataha mo ho ngaahi tokoua mo e tuongaʻane fakalaumālié, ha tuʻunga tatau pē ʻi Hono ʻaó pea ʻoku fakamālohia ʻa kimoutolu ʻi hoʻomou talangofuá ke mou hoko ko ha ʻea hoko ʻi Hono puleʻanga taʻengatá, ʻa ia ko ha “[ʻea-hoko] ʻo e ʻOtuá, ko e [kaungā-ʻea-hoko] ʻo Kalaisi” [Loma 8:17]. Feinga ke ʻiloʻi hono mahuʻinga ʻo e ngaahi tokāteline ko ʻení. (“To Young Women,” Ensign pe Liahona, Nov. 2005, 28).

“ʻOku pehē ʻe he folofolá ko e ‘fānau [kitautolu] ʻa e ʻOtuá’ ʻi ha founga ʻoku lahi hake he tahá (Loma 8:16). ʻUluakí, ʻoku hoko ʻa e tangata moʻui kotoa pē ko ha fānau fakalaumālie ʻofeina ʻa e Tamai Hēvaní (vakai, Malakai 2:10; Ngāue 17:29; Hepelū 12:9; ‘Ko e Fāmilí: Ko ha Fanongonongo ki Māmani,’ Ensign pe Liahona, Nōvema 2010, 129). (Uá, ʻoku ‘fanauʻi foʻou’ kitautolu ko e fānau ʻa e ʻOtuá ʻi ha vā fetuʻutaki kuo fuakavaʻi ʻi he taimi ʻoku tau fakahaaʻi ai ʻa e tui kia Sīsū Kalaisí, fakatomala, papitaiso, pea maʻu ʻa e Laumālie Māʻoniʻoní [mo e ngaahi ouau kehé]) (vakai, Sione 1:12; Kalētia 3:26–29; Mōsaia 5:7; T&F 11:30; [T&F 84: 33–38;] Mōsese 6: 65–68)” (New Testament Student Manual [Church Educational System manual, 2014], [00] 348).

ʻIkai ngata pē he lava ke fakapapauʻi ʻe he Laumālié ko e fānau fuakava kitautolu ʻa e ʻOtuá, ka ʻokú ne lava foki ʻo fakapapauʻi ki hotau ngaahi laumālié ko e fānau ʻofeina kitautolu ʻa e ʻOtuá pea naʻa tau nofo mo Ia kimuʻa pea fāʻeleʻi mai kitautolú.

Loma 8:15. “Ko e Laumālie ʻo e ohi”

“Ko e ohí naʻe angamaheni ʻaki pē ia ʻi he kau Lomá pea kuo hoko ia ko ha foʻi fakakaukau angamaheni ki he kau laukonga ʻa Paulá. Naʻe foaki ʻe he tokotaha ʻokú ne ohi fakalao mai ha taha ʻa e totonu mo e faingamālie kotoa pē ki he tokotaha ko iá ʻa ia ʻe ala maʻu ʻe ha fānau ʻoku fāʻeleʻi ki he mātua fakanatulá. Ko ia, ʻi heʻetau maʻu e ‘Laumālie ʻo e ohí’ (Loma 8:15) ʻi he hū ki he fuakava ʻo e ongoongoleleí, ʻoku tau hoko ai ko e fānau ʻa e ʻOtuá mo ha ‘kaungā ʻea hoko fakataha mo Kalaisi’ (Loma 8:17)” (New Testament Student Manual [Church Educational System manual, 2014], [00] 348).

ʻI he Tohi ʻa Molomoná, naʻe akoʻi foki ʻe he Tuʻi ko Penisimaní e founga ke tau hoko ai ko e “fānau ʻa Kalaisí” (vakai, Mōsaia 5:5–10). Naʻe akoʻi ʻe Palesiteni Siosefa Filitingi Sāmita ko Sīsū Kalaisí “ʻoku toe hoko ko ʻetau Tamai” koeʻuhí he ʻokú Ne “foaki ʻa e moʻuí, ʻa e moʻui taʻengatá, ʻi he fakalelei naʻá ne fai maʻatautolú.” Naʻe fakamatala ʻa Palesiteni Sāmita ʻo pehē, “ʻOku tau hoko ko e fānau, ko e ngaahi foha mo e ʻofefine ʻo Sīsū Kalaisi, ʻi heʻetau ngaahi fuakava ke talangofua kiate Iá” (Doctrines of Salvation, fakatahatahaʻi ʻe Bruce R. McConkie, 3 vols. [1954–56], 1:29).

Loma 8:31–32. “Ka kuo kau ʻa e ʻOtuá [mo kitautolu], pea ko hai ʻe angatuʻu kiate kitautolu?”

“Naʻe akoʻi ʻe Paula ʻoku fakahaaʻi ʻe he Fakalelei ʻa Kalaisí ko e ‘ʻOtuá maʻatautolu’ pea ʻokú Ne mateakiʻi kitautolu mo ʻetau taʻengatá. Koeʻuhí naʻe foaki mai ʻe he ʻOtuá hono ʻAlo pē Taha naʻe Fakatupú maʻatautolu, ʻe lava pē ke tau fakapapauʻi ʻe hokohoko atu ke ngāue ʻa e ʻOtuá ki hotau fakamoʻuí pea teuteuʻi kitautolu ke hoko ko e kau ʻea-hoko ʻo e meʻa kotoa ʻokú Ne finangalo ke foaki maʻatautolú. Naʻe akoʻi ʻe ʻEletā Sefilī R. Hōlani e kau mēmipa ʻo e Siasí ʻa e meʻa tatau pē:

“‘Fakakaukau ki hono taʻe fakangatangata ʻo e totongi kuó Ne fai ʻi he Tutukí mo e Fakaleleí, ʻoku ou palōmesi atu ai, he ʻikai te Ne tuku taʻe tokoniʻi kitautolu he taimí ni. … ʻE kāinga, tatau ai pē pe ko e hā ho faingataʻaʻiá, kātaki ʻoua naʻá ke foʻi’ (‘Broken Things to Mend,’ Ensign pe Liahona, May 2006, 71)” (New Testament Student Manual [Church Educational System manual, 2014], [00] 350).

Loma 8:29–30; 9:11; 11:2, 5, 7, 28. Tuʻutuʻuniʻi, tomuʻa fakanofó, mo fili

“ʻI he Loma 8:29–30, ʻoku ʻuhinga ʻa e foʻi lea faka-Kalisi naʻe liliu ko e tuʻutuʻuni ki he ‘vaheʻi, pe tomuʻa fakapapauʻi’ pea ʻoku ʻuhinga ia ki he tomuʻa fakanofo ʻoku maʻu ʻe he kakai ʻe niʻihi, ʻo makatuʻunga ʻi he tokaimaʻananga ʻa e ʻOtuá, ke muimui ʻia Sīsū Kalaisi pea hangē ko Iá (vakai foki, ʻEfesō 1:3–4; 1 Pita 1:2). ‘ʻOku ‘ikai fakapapauʻi ‘e he tomuʻa fakanofó ‘e maʻu ‘e ha kakai ha ngaahi [uiuiʻi] pe ngaahi fatongia pau. ‘Oku hoko mai ‘a e ngaahi faingamālie ko iá ‘i he moʻui ko ‘ení ko e ola ia ‘oku makatuʻunga ‘i hono ngāue māʻoniʻoni ‘aki ‘o e tauʻatāina ke filí, ‘o hangē pē ko e makatuʻunga ‘a e tomuʻa fakanofó ‘i he māʻoniʻoni ‘i he maama fakalaumālié’ (‘Tomuʻa Fakanofo,’ Tuʻu Maʻu ʻi he Tuí: Ko Ha Huluhulu Ki He Ongoongoleleí [2004], 193; vakai foki ʻAlamā 13:3–4)” (New Testament Student Manual [Church Educational System manual, 2014], 350).

ʻOku fakamatalaʻi ʻe he Bible Dictionary ko e filí (election) ko ha “foʻi lea fakateolosia ia ʻokú ne fakahaaʻi e fili ʻe he ʻOtuá e fale ʻo ʻIsilelí ke nau hoko ko e kakai ʻo e fuakavá fakataha mo ha ngaahi monū mo e faingamālie, ke hoko ko ha maʻuʻanga tāpuaki ki he māmaní kotoa. …

“ʻOku fili ʻa e kakai filí ‘ʻoku heʻeki ke fakatupu ʻa māmaní’, ka ʻoku ʻikai ha taha ʻe fili ki he moʻui taʻengatá māʻataʻatá pē. Kuo pau ke tokanga ʻa e tokotaha kotoa pē ʻiate ia pē ki he ongoongoleleí mo maʻu hono ngaahi ouaú mo e ngaahi fuakavá mei he toʻukupu ʻo e kau tamaioʻeikí ʻa e ʻEikí kae toki maʻu ʻa e fakamoʻuí. Kapau ʻoku fili ha taha kae ʻikai ke ngāue, ʻe lava pē ke pehē ʻoku taʻeʻaonga hono fili iá, ʻo hangē ko hono fakamatalaʻi ʻe Paula ʻi he 2 Kolinitō 6:1.

“… Ko e ‘fili ʻi he ʻofa’ ʻoku lau ki ai ʻa e … Loma 11:1 – 5 ʻoku fakamatala ia ki ha tūkunga ʻa ha taha ʻi he moʻui fakamatelié; ʻa ia ʻe fāʻeleʻi ʻi ha taimi, feituʻu, pe ʻi ha tūkunga ʻe hoko ai ʻa e tahá ʻo fehokotakinga lelei mo e ongoongoleleí. Naʻe hoko ʻa e fili ko ʻení ʻi he maama fakalaumālié. ʻE maʻu ʻe kinautolu ʻoku faivelenga pea faʻa ngāue he ongoongoleleí ʻi he moʻui fakamatelié ha fili lelei ange ʻi he moʻuí ni pea hoko ko e kakai fili ʻa e ʻOtuá. ʻO nau maʻu e talaʻofa ʻo e kakato e nāunāu ʻa e ʻOtuá ʻi he taʻengatá (T&F 84: 33–41) “(Bible Dictionary, “Fili”; vakai foki, ʻAlamā 13:3–4).

Naʻe fakamatalaʻi ʻe he Palōfita ko Siosefa Sāmitá, “naʻe ʻikai ko e Kau ʻAposetoló ne nau akoʻi hono fili maʻataʻatā ʻo e fakafoʻituituí ki he moʻui taʻengatá [tuʻutuʻuni]. Naʻe fili mo tuʻutuʻuni ʻe he ʻOtuá, ʻoku totonu ke fakamoʻui ʻa kinautolu ʻe moʻuí ʻia Sīsū Kalaisi, pea ʻi he talangofua ki he Ongoongoleleí” (ʻi he History of the Church, 4:360). ʻA ia, ʻe maʻu ʻe he kakai kotoa pē ʻe moʻui ha fakamoʻui tuʻunga ʻi he Fakalelei ʻa Sīsū Kalaisí pea ʻikai ha toe founga kehe.

Loma 11:25. “Fakakātoa mai ʻo e kakai Senitailé”

Naʻe fakamatalaʻi ʻe ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá hono ʻuhinga ʻo e “fakakātoa mai ʻo e kakai Senitailé”:

“Naʻe ʻi ai ha vahaʻataimi naʻe kotofa maʻá e kau Siú ke nau fanongo ki he folofolá, pea mo ha vahaʻataimi ke muʻomuʻa ai ʻa e kau Senitailé. Ko e kuonga ʻo e kau Senitailé ʻa e vahaʻataimi ʻa ia naʻe ʻoatu ai ʻa e ongoongoleleí kiate kinautolu ʻi ha ngaahi ʻuhinga filifilimānako, pea ʻe hokohoko atu pē ʻeni kae ʻoua kuo nau maʻu ha faingamālie kakato ke tali ʻa e moʻoní, pe ko hono fakalea ʻe tahá kae ʻoua kuo hokosia e kakato ʻa e kau Senitailé. Pea ʻe toe ʻalu ʻa e pōpoakí ki he kau Siú, ʻo ʻuhinga ki he kau Siú ko ha puleʻanga pea mo e kakaí”(Doctrinal New Testament Commentary,3 vols. [1965 – 73], 2:290).

Naʻe akoʻi ʻe Nīfai ki hono ngaahi tokouá ʻi ha ngaahi senituli kimuʻa pea hiki ʻe Paula ʻa e tohi ko ʻení, ʻe toki ʻoatu ʻa e ongoongoleleí ki hono hakó mo e hako ʻo hono ngaahi tokouá ʻi he hokosia e kakato ʻa e kau Senitailé ʻi he ngaahi ʻaho kimui ní. ʻE fakangofua ʻe he meʻá ni kinautolu “ke nau maʻu ʻa e ʻilo ki honau Huhuʻí mo e ngaahi tefitoʻi meʻa ʻo ʻEne ngaahi tokāteliné, koeʻuhí ke nau ʻiloʻi pe ʻe fēfē ʻenau haʻu kiate Ia ʻo moʻuí” (1 Nīfai 15:14). Ko hono tānaki fakataha ko ʻeni ʻo e hako ʻo Līhaí ko ha konga ia hono fakahoko ʻo e ngaahi vaʻa totonú ki he fuʻu ʻōlivé ʻi he ngaahi ʻaho kimui ní hangē ko hono kikiteʻi ʻe Paula mo Seinosí (vakai, Loma 11:23–25; Sēkope 5:52, 60, 63, 67–68).

ʻI he taimi naʻe hā ai ʻa e ʻāngelo ko Molonaí ki he Palōfita ko Siosefa Sāmitá ʻi he taʻu 1823, Naʻe pehē ʻe Molonai “ʻe vave ʻa e hoko mai ʻa hono kakato ʻo e kau senitailé” (Siosefa Sāmita—Hisitōlia 1:41).