Naʻe ʻomi ʻe hono fokotuʻu ʻo e Siasí ʻi he ʻaho 6 ʻo ʻEpeleli 1830, ʻa e founga ki hono fakahoko e ngaahi ouau ʻo e lakanga fakataulaʻeikí ki he fānau ʻa e Tamai Hēvaní ʻi he funga ʻo e māmaní ʻi he ngaahi ʻaho kimui ní. Kimuʻa ʻi hono fokotuʻu ʻo e Siasí, naʻe kamata ke fakahā ʻe he ʻEikí ʻa e ngaahi fatongia ʻo e ngaahi tuʻunga ʻi he lakanga fakataulaʻeikí ki he Palōfita ko Siosefa Sāmitá ʻi he konga kimuʻa ʻo e faʻahitaʻu māfana ʻo e 1829. ʻOku fakamatalaʻi ʻe he Tokāteline mo e Ngaahi Fuakava 20 ʻa e ngaahi fatongia lahi ko ʻení mo fakahinohinoʻi e kau maʻu lakanga fakataulaʻeikí ʻi hono fakahoko e ngaahi ouaú pea mo hono tokangaʻi mo tokoniʻi e kāingalotu ʻo e Siasí.
ʻOku fakamatalaʻi e ngaahi fatongia ʻo e ngaahi tuʻunga ʻo e lakanga fakataulaʻeikí
Te ke tali fēfē kapau ʻe fehuʻi atu ʻe ha taha ,“Ko hai e faifekau homou siasí?” ʻI hoʻo ako ʻa e Tokāteline mo e Ngaahi Fuakava 20:38–67, fakakaukau ki ha founga te ke tali ʻaki ʻa e fehuʻi ko ʻení.
Hiki ha tatau ʻo e ngaahi hingoa mo e ngaahi fakamoʻoni fakafolofola ko ʻení ki hoʻo tohinoa ako folofolá. Hili iá, pea lau ʻa e ngaahi potufolofola ko ʻení, pea hiki e ngaahi fatongia ʻo e ngaahi tuʻunga ʻo e lakanga fakataulaʻeikí ʻi lalo he ʻuluʻi tohi totonú ʻi hoʻo tohinoá. ʻE lava ke tokoni atu ke ke ʻilo ko e foʻi lea ko e “kaumātuʻa” ʻi he ngaahi veesi ko ʻení ʻoku ʻuhinga ia ki he kau maʻu Lakanga Taulaʻeiki Faka-Melekisēteki kotoa pē.
Hili hoʻo hiki e ngaahi fatongiá ʻi lalo ʻi he ʻuluʻitohi totonú, laineʻi ʻa e ngaahi faikehekehe ʻokú ke fakatokangaʻi ʻi he fatongia ʻo ha kaumātuʻa, taulaʻeiki, akonaki, mo ha tīkoní. Siakaleʻi ʻa e ngaahi meʻa ʻoku nau faitatau aí.
Ko ʻeni kuó ke ako ha meʻa siʻi kau ki he ngaahi fatongia ʻo e lakanga fakataulaʻeikí, tā ha ngaahi laine ʻi he saati ko ʻeni ʻi laló, mei he tuʻunga ʻo e lakanga fakataulaʻeikí ki he ngaahi fatongia ʻo e kau maʻu lakanga fakataulaʻeiki ko ia ʻoku nau maʻu e mafai ke fakahokó:
Kaumātuʻa
Mafai ke foaki ʻa e meʻafoaki ʻo e Laumālie Māʻoniʻoní
Taulaʻeiki
Mafai ke fakahoko (tāpuakiʻi) ʻa e sākalamēnití
Akonaki
Mafai ke fakanofo ha tīkoni
Tīkoni
Mafai ke akoʻi
ʻOku maʻu ʻa e ngaahi tali ki he ngaahi ʻekitivitī fakatauhoa ko ʻení ʻi he ngataʻanga ʻo e lēsoni ko ʻení. Fakatokangaʻi ange ʻoku kau ʻi he ngaahi tuʻunga māʻolunga ange ʻo e lakanga fakataulaʻeikí ʻa e ngaahi fatongia mo e mafai ʻo e ngaahi tuʻunga maʻulalo angé.
Hiki ʻi hoʻo tohinoa ako folofolá ha tefitoʻi moʻoni ʻokú ne fakamatalaʻi fakanounou ʻa e fatongia ʻo e kau maʻu lakanga fakataulaʻeikí kotoa.
Fakafehoanaki hoʻo tefitoʻi moʻoní mo e tefitoʻi moʻoni ko ʻení: ʻOku maʻu ʻe he kau maʻu lakanga fakataulaʻeiki kotoa pē ʻa e fatongia ke fakahoko e ngaahi ouaú pea ke leʻohi mo tokoniʻi e kāingalotu ʻo e Siasí. Mahalo te ke fie maʻu ke hiki e moʻoni ko ʻení ʻi he tafaʻaki hoʻo folofolá ofi ki he Tokāteline mo e Ngaahi Fuakava 20:38–59.
ʻĪmisi
ko hono teuteu ʻo e sākalamēnití
Ke tokoni ke mahino lahi ange kiate koe fekauʻaki mo e fatongia ʻo e kau maʻu lakanga fakataulaʻeiki kotoa pē ke tokangaʻi mo tauhi e kāingalotu ʻo e Siasí, lau ʻa e Tokāteline mo e Ngaahi Fuakava 20:53–54, 59, pea feinga ke ʻiloʻi e ngaahi founga naʻe fakahinohino ʻe he ʻEikí ki he kau maʻu lakanga fakataulaʻeikí ke nau leʻohi mo fakamālohia ʻaki e kāingalotu ʻo e Siasí. Mahalo te ke fie maʻu ke fakaʻilongaʻi e meʻa ʻokú ke maʻú. Ko e hā ha ngaahi founga ʻe lava ai ʻe ha taha maʻu Lakanga Taulaʻeiki Faka-Ēlone ke “leʻohi ʻa e siasí … pea ke ne ʻiate kinautolu mo fakamālohia ʻa kinautolu”?
ʻOku ope atu ʻa e ngaahi fatongia ʻo e kau maʻu Lakanga Taulaʻeiki Faka-ʻĒloné ʻi hono fakahoko pē ʻo e ngaahi ouaú. Fakalaulauloto ki he ngaahi fokotuʻutuʻu ko ʻení, pea fakakaukau ki he ngaahi founga ʻoku fakahoko ai ʻe he kau maʻu lakanga fakataulaʻeikí honau fatongia ke fakaafeʻi ʻa e niʻihi kehé ke haʻu kia Kalaisí mo e ngaahi founga ʻoku ʻikai ke nau fai ai iá:
Hili e tokoni ʻa ha taha maʻu Lakanga Taulaʻeiki Faka-ʻĒlone ki hono fakahoko ʻo e sākalamēnití ʻi he houalotu sākalamēnití, ʻokú ne ʻalu ki he Lautohi Faka-Sāpaté pea anga taʻe fakaʻapaʻapa ki he faiakó mo e kau mēmipa kehe ʻo e kalasí.
ʻOku foki mai ha taha maʻu lakanga fakataulaʻeiki kei talavou mei he faiako fakaʻapí pea kamata ke ne vahevahe e fakamatala pelepelengesi pe fakatāutaha fekauʻaki mo kinautolu naʻá ne faiako fakaʻapi ki aí.
ʻOku fakataha ha kulupu ʻo e kau maʻu lakanga fakataulaʻeikí ke fai ha ngāue tokoni pea kamata ke fakamataliliʻi mo fakakataʻaki ha kaungā mēmipa ʻo e kōlomú.
Tali e fehuʻi ko ení i hoʻo tohinoa ako folofolá: Ko e hā ʻoku mahuʻinga ai ke ʻilo ʻe he kau maʻu lakanga fakataulaʻeikí ʻoku ʻikai ngata pē honau fatongiá ʻi hono fakahoko ʻo e ngaahi ouaú?
ʻĪmisi
Richard G. Scott
Mahalo te ke fie maʻu ke hiki ʻa e fakamatala ko ʻeni naʻe fai ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he tafaʻaki hoʻo folofolá pe ʻi hoʻo tohinoa ako folofolá: “Ko e taumuʻa ʻo e mafai ʻo e lakanga fakataulaʻeikí ke foaki, tokoni, hiki hake mo ueʻi fakalaumālie” (“Fakaʻapaʻapaʻi mo Fakaʻaongaʻi Lelei ʻa e Lakanga Fakataulaʻeikí,” Ensign pe Liahona, Nōvema 2008, 46).
Fakakaukau ki ha taimi kuó ke mamata ai ki he kau talavoú ʻi hoʻomou uōtí pe koló ʻoku nau fakaʻapaʻapaʻi ʻa honau lakanga fakataulaʻeikí ʻaki ʻenau leʻohi, ngāue tokoni, hiki hake, ueʻi fakalaumālie, pe fakamālohia e niʻihi kehé. Kapau ko ha tokotaha maʻu lakanga fakataulaʻeiki koe, fakakaukau ke hiki ha taumuʻa ʻe tokoni ke ke fakahoko faivelenga e ngaahi ouaú pea leʻohi mo fakamālohia ʻa e Siasí.
ʻOku ʻoatu ʻa e ngaahi fakahinohino ki he fakanofo ʻo e lakanga fakataulaʻeikí
Kuó ke aʻusia pe mamata nai ʻi ha fakanofo ki he lakanga fakataulaʻeikí? Fakakaukau ki he ngaahi ongo naʻá ke maʻu ʻi hono fakanofo koé pe ko hoʻo mamata ki hono fakanofo ʻo ha taha kehe.
ʻĪmisi
Lakanga Taulaʻeiki Faka-ʻĒloné
Lau ʻa e Tokāteline mo e Ngaahi Fuakava 20:60, pea feinga ke ʻiloʻi ʻa e mālohi ʻoku totonu ke fakaʻaongaʻi ʻe he tokotaha ʻokú ne fakahoko ʻa e fakanofó makehe mei he lakanga fakataulaʻeikí. Fakatatau ki he veesi ko ʻení, ko e hā e mālohi ʻoku totonu ke tataki ʻaki ha taha maʻu lakanga fakataulaʻeikí ʻi heʻene ngāue ʻaki ʻa e lakanga fakataulaʻeikí?
ʻOku fakapapauʻi fēfē ʻe ha taha maʻu lakanga fakataulaʻeiki ʻokú ne fakahoko hono ngaahi fatongiá ʻaki e mālohi ko ʻení? Naʻe fakamatala ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ki he feituʻu ʻoku maʻu mei ai ʻa e mālohi ʻo e tokotaha maʻu lakanga fakataulaʻeikí:
ʻĪmisi
Palesiteni Boyd K. Packer
“ʻOku maʻu ho mafaí ʻi hono fakanofo koé; ʻoku maʻu ho mālohí ʻi he talangofuá mo e moʻui tāú.
“ʻOku maʻu e mālohi ʻo e lakanga fakataulaʻeikí mei hono fai ho fatongiá ʻi he ngaahi meʻa angamahení: maʻu fakatahá, tali ʻo e ngaahi ngāue kuo vahé, lau e folofolá, mo hono tauhi e Lea ʻo e Potó.
“Naʻe pehē ʻe Palesiteni Utalafi: ʻNaʻá ku fononga ʻi ha maile ʻe lauiafe ʻo malanga ʻaki e Ongoongoleleí ʻi heʻeku hoko ko ha Taulaʻeikí, pea , hangē ko ia ne u lea ʻaki kimuʻa ki he ngaahi haʻofangá, naʻe poupouʻi au ʻe he ʻEikí peá Ne fakahaaʻi Hono mālohí ʻi hono maluʻi ʻeku moʻuí lolotonga ʻeku maʻu ʻa e tuʻunga ko iá ʻo hangē ko ia kuó Ne fai lolotonga ʻeku maʻu ʻa e tuʻunga ko ha ʻAposetoló. ʻOku poupouʻi ʻe he ʻEikí ha tangata pē ʻokú ne maʻu ha tufakanga ʻo e Lakanga Fakataulaʻeikí, ʻo tatau ai pē pe ko ha Taulaʻeiki, Kaumātuʻa, Fitungofulu, pe ko ha ʻAposetolo, ʻo kapau ʻokú ne fakahoko totonu hono uiuiʻí mo fai hono fatongiá’” (“The Unseen Power,” New Era, May 2007, 7; vakai foki, “The Aaronic Priesthood,” Ensign, Nov. 1981, 32–33).
Kapau ko ha talavou koe, fakakaukau ʻi he faʻa lotu ki he meʻa ʻe fie maʻu ʻe he ʻEikí ke ke fai ke fakaafeʻi mai e mālohi ʻo e Laumālie Māʻoniʻoní ke hoko ko ho takaua ʻi hoʻo fakahoko ho ngaahi fatongia ʻo e lakanga fakataulaʻeki lolotongá pea ʻi he kahaʻú. Kapau ko ha finemui koe, fakakaukau ki he founga te ke ala tokoniʻi ai e kau talavoú ʻi heʻenau feinga ke maʻu ʻa e Laumālié ʻi heʻenau moʻuí pea ʻi heʻenau ngāue ʻi he lakanga fakataulaʻeikí.
Lau ʻa e Tokāteline mo e Ngaahi Fuakava 20:65. Mei he meʻa ʻokú ke ako ʻi he veesi ko ʻení, ko e hā ʻoku tau hiki ai hotau nimá ʻi he Siasí ke fakahaaʻi ʻetau poupoú? Naʻe ʻomi mei he ʻEikí ʻa e fekau ki he Siasí ke fai hono hikinimaʻi ʻi he kakaí.
ʻOku ʻuhinga ki he hā ke hiki ho nimá ʻo fakahaaʻi ha poupou ki ha taha kehé? Naʻe fakamatalaʻi ʻe ʻEletā Lōleni C. Taní, ʻa ia naʻá ne hoko ko ha mēmipa ʻo e Kau Fitungofulú, ʻa e ngaahi fatongia ʻoku ō fakataha mo e founga ke poupou aí:
ʻĪmisi
ʻEletā Loren C. Dunn
“ʻI he taimi ʻoku tau poupouʻi ai ʻa e kau ʻōfisá, ʻoku tau maʻu e faingamālie ke hikinimaʻi ʻa kinautolu kuo ʻosi ui ʻe he ʻEikí ʻi he fakahā. …
“ʻOku toki ʻomi leva ʻe he ʻEikí kiate kitautolu ʻa e faingamālie ke hikinimaʻi ʻa e ngāue ʻo ha uiuiʻi fakalangi pea ʻoku tau fakahaaʻi foki ai ʻo kapau ʻoku ʻi ai ha faʻahinga ʻuhinga ʻoku ʻikai ke tau ongoʻi pehē.
“Ko e hikinimaʻí ko hono haʻi ia e ngāue ko iá kiate kitautolu pea fakatukupaaʻi kitautolu ke poupouʻi ʻa e kakai ko ia kuo tau hikinimaʻí. ʻI he taimi ʻoku fou ai ha taha ʻi he ngāue toputapu ʻo hono hiki hake hono nimá ki he sikueá, ʻoku totonu ke ne manatuʻi, ʻi he loto fakamātoato, ʻa e meʻa kuó ne faí pea kamata ke ngāue ʻo fenāpasi mo ʻene hikinima ʻi he kakaí mo e ʻikai fakahāhā holó fakatouʻosi” (“We Are Called of God,” Ensign, July 1972, 43).
Kuó ke ʻi ha houalotu sākalamēniti ʻi hano hikinimaʻi ʻe he kāingalotú ha talavou ke fakanofo ki ha tuʻunga ʻi he Lakanga Taulaʻeiki Faka-ʻĒloné? Naʻe hiki nai ʻe he haʻofangá honau nimá? ʻE tokoniʻi fēfē ke fakahoko ʻe ha talavou hono ngaahi fatongiá ʻi heʻene sio ki hono hikinimaʻi hono fakanofo iá ʻe he niʻihi kehé?
ʻĪmisi
ko hono hikinimaʻi ʻi he houalotu sākalamēnití
Hiki ha ngaahi sētesi siʻi pē ʻi hoʻo tohinoa ako folofolá ʻo fakamatalaʻi ʻa e ʻuhinga ʻokú ke fakamālō ai koeʻuhí ko e mafai ʻo e lakanga fakataulaʻeikí. Vahevahe e meʻa kuó ke hikí mo ha taha ʻo hoʻo mātuʻá pe kau taki ʻo e Siasí, tokoua pe tuongaʻane, pe ha kaungāmeʻa. Kole ki he tokotaha ko iá ke vahevahe atu ʻa e ngaahi meʻa ʻok ne ongoʻi kau ki he ʻuhinga ʻo e lakanga fakataulaʻeikí.
Hiki ʻa e fakamatala ko ʻení ʻi lalo ʻi he ngaahi ngāue ke fai ʻi he ʻahó ní ʻi hoʻo tohinoa ako folofolá: