Talateu ki he Polokalama Ako Semineli ‘i ‘Apí
ʻOku fokotuʻutuʻu ʻa e polokalama ako semineli ʻi ʻapí ke tokoni ki hono fakamālohia hoʻo ʻilo fekauʻaki mo e ongoongolelei ʻo Sīsū Kalaisí pea mo fakaʻaongaʻi hono ngaahi akonakí ʻi hoʻo moʻui fakaʻahó ʻi hono ako ʻo e folofolá. Ki hoʻo ako ʻi he taʻu fakaako ko ʻení, te ke tomuʻa fakakakato ʻa e ngaahi laukonga meí he folofola ki he kalasi ko ʻení — ko e Tokāteline mo e Ngaahi Fuakavá — pea hili iá pea te ke fakakakato leva ʻa e ngaahi lēsoni fakafoʻituituí. Te ke talanoa mo e faiako seminelí tuʻo taha ʻi he uike ke ʻave hoʻo ngāué mo kau ʻi ha lēsoni faka-uiké.
Ko e seminelí ko ha polokalama ako fakalotu fakaʻaho ia. ʻOku totonu ke hoko hono ako ʻa hoʻo folofolá ʻi he faʻa lotú ko ha ngāue fakaʻaho. ʻE fie maʻu ke ke ngāue ki hoʻo ngaahi ngāue ʻi he seminelí ʻi he ʻaho taki taha, neongo ʻoku ʻikai te ke kalasi semineli ʻi he ʻaho kotoa pē. ʻOku ʻi ai ha ʻiuniti ʻe 32 ke fakakakato lolotonga ʻa e kalasí. ʻOku ʻasi ʻi he saati laukongá ʻa e meʻa ke ke ako ʻi he ʻiuniti taki taha. ʻE tokoni atu hoʻo faiakó ke ke ʻilo ʻa e taimi ʻe ʻosi ki ai ʻa e ʻiuniti takitaha. ʻOku totonu ke miniti ʻe 30 nai ʻa e lēsoni taki taha ʻi he fakahinohino ako ko ʻení, makehe mei hoʻo ako folofola fakaʻahó.
ʻOku totonu ke ʻi ai hoʻo tohinoa ako folofola ʻe ua (pe pepa ako ʻe ua), makehe mei hoʻo tohinoa fakatāutahá, ʻa ia te ke fai ai ʻa e ngaahi ngāue ko ia mei he ngaahi ʻekitivitī ʻo e tohi fakahinohino akó. ʻI he uike kotoa pē te ke fakataha ai mo hoʻo faiakó, ʻoku totonu ke ke ʻoange hoʻo tohinoa ako folofolá kuo ʻosi fakakakato ai hoʻo ngaahi ngāue mei he ngaahi ʻekitivitī ʻo e tohi fakahinohino akó ʻa ia naʻá ke fai ʻi he uike ko iá. ʻE lau mo fakamaaka ʻe hoʻo faiakó hoʻo ngaahi ngāué pea fakafoki atu hoʻo tohinoa ako folofolá ʻi he uike hono hokó. ʻE lava foki ke ke fakahoko hoʻo ngaahi talí ʻi ha ʻū lauʻi pepa ʻoku malava pē ke toʻo mavahe meí he takafí (binder) pea tānaki e ngaahi peesi naʻá ke ngāue ki ai ʻi he uike ko iá. Pea ʻi he taimi ʻe fakafoki atu ai ʻe hoʻo faiakó ʻa e ngaahi pēsí, te ke lava ke fakafoki kinautolu ki hoʻo pepa akó.
Fakaʻaongaʻi ‘o e Tohi Lēsoni Ko ‘Ení ‘i ha Polokalama Ako Fakaʻaho ‘a e Seminelí
ʻE malava pe ke fakaʻaongaʻi fakaʻaho ʻe he kau faiakó mo e fānau akó ʻa e tohi lēsoni ko ʻení ʻi he polokalama seminelí ke fakalahi e lēsoní pe ko e ngaahi ngāue toe fakaleleʻí. Neongo iá, ʻoku ʻikai fakataumuʻa ʻeni ke ʻoange ki he tokotaha ako semineli fakaʻaho kotoa pē. Kapau ʻe fie maʻu ʻe ha tokotaha ako ke fakaleleiʻi haʻane ngaue ke maʻu ha māká, ʻe malava ke ʻoange ʻe he faiakó ʻa e lēsoni ʻoku fakahoko mei ʻapí ke ne fakakakato ʻa ia ʻe fekauʻaki pē mo e lēsoni naʻe ʻikai ke ne faí.
Ko Hono Fakaʻaongaʻi ʻo e Tohi Fakahinohino ʻa e Tokotaha Ako mei ʻApí.
Talateu ki he Tohi Folofola ki he Lēsoní
‘Oku ‘oatu ‘e he talateú ha fakamatala ki he puipuituʻá mo hano fakamatalaʻi fakanounou ‘o e vahe mei he tohi folofolá ki he lēsoni takitaha.
Fakakulupu ‘o e Ngaahi Vēsí mo Hono Fakamatalaʻi Fakanounoú
‘Oku fakamahinoʻi ‘e hono fakakulupu ‘o e ngaahi vēsí ‘a hono vahevahe totonu ‘o e ngaahi meʻa ‘oku hokó, hangē ko e taimi ‘oku hoko ai ha liliu ‘i ha ngāue pe kaveinga. ‘Oku hoko mai ‘i he fakamatala taki taha hano kiʻi fakamatalaʻi fakanounou ‘o e ngaahi meʻa ‘oku hoko pe ngaahi akonaki ‘i he ngaahi veesi ko iá.
Ngaahi Tokāteliné mo e Ngaahi Tefitoʻi Moʻoní
Koeʻuhí ‘oku fakanatula pē ‘a hono ʻohake e ngaahi tokāteliné mo e ngaahi tefitoʻi moʻoní mei he tohi folofolá, ‘oku fakaʻilongaʻi mataʻāʻā kinautolu ‘i he lēsoní koeʻuhí ke tokoniʻi koe ke ke ʻiloʻi kinautolu.
Ngaahi Tokoni ki he Akó
‘Oku ‘omi ‘e he ngaahi tokoni ki he akó ha ngaahi fakakaukau makehe pea fakamatala ki he ngaahi founga ngāue ‘e lava ‘o tokoni ke fakalahi ki hoʻo akó mo hoʻo mahino ki he folofolá.
Fakataukei Folofola
Ko e ngaahi veesi fakataukei folofola ko ia ‘e 25 ‘oku ʻi he Tokāteline mo e Ngaahi Fuakavá, ‘oku fakamatalaʻi māvahevahe pē ia ‘i he lēsoni ‘oku ʻasi aí, ke tokoniʻi koe ke lahi ange hoʻo taukei mo iá.
Hiki ‘o e Ngaahi Talí ʻi he Tohi Lēsoní
‘E kole atu he taimi ‘e niʻihi ke ke hiki ha ngaahi tali ki he tohi lēsoní ‘i he ngaahi laine ʻoku ʻataá pe ʻi ha saati.
Ngaahi Ngāue ke Fai ‘i he Tohinoa Ako Folofolá
ʻOku fie maʻu ke tohi ʻa e ngaahi tohinoa ako folofolá pea tānaki ki hoʻo faiakó ʻi he uike kotoa pē ke ne toe fai atu ha fakamatala tokoni. ʻI hoʻo fakakaukau lelei ki hoʻo ngaahi talí ʻe tokoni ia ke ʻuhingamālie hoʻo ngaahi aʻusiá ʻi hoʻo ako mo fakaʻaongaʻi ʻa e ngaahi moʻoni meí he folofolá.