Ko e
Tokāteline mo e Ngaahi Fuakava

1 Tokanga mai, ʻa kimoutolu ʻa e kakai ʻo hoku siasí, ʻoku folofola ʻe he leʻo ʻo ia ʻoku ʻafio ʻi ʻolungá, pea ʻoku ʻafio mai ʻa hono fofongá ki he kakai kotoa pē; ʻio, ko e moʻoni ʻoku ou pehē: Tokanga mai ʻa kimoutolu ʻa e kakai mei he mamaʻó; pea mo kimoutolu ʻoku ʻi he ngaahi motu ʻo e tahí, mou fanongo fakataha.

2 He ko e moʻoni, ʻoku fakaongo atu ʻa e leʻo ʻo e ʻEikí ki he kakai kotoa pē, pea ʻoku ʻikai ha taha ʻe hao; pea ʻoku ʻikai ha mata ʻe taʻe-mamata, pe ha telinga ʻe taʻe-fanongo, pe loto ʻe taʻe-mahuhuhuhu.

3 Pea ʻe huhuhuhuʻi ʻa e kau angatuʻú ʻaki ʻa e mamahi lahi; he ʻe lea ʻaki ʻenau ngaahi hiá ʻi he tumutumu ʻo e ngaahi falé, pea ʻe fakahā ʻa ʻenau ngaahi ngāue fufuú.

4 Pea ʻe fai ʻa e lea ʻo e fakatokangá ki he kakai kotoa pē, ʻi he ngutu ʻo ʻeku kau ākonga, ʻa ia kuó u fili ʻi he ngaahi ʻaho fakaʻosi ko ʻení.

5 Pea te nau ʻalu atu pea ʻe ʻikai ha taha te ne taʻofi ʻa kinautolu, he ko au ko e ʻEikí naʻá ku fekauʻi ʻa kinautolu.

6 Vakai, ko hoku mafaí ʻeni, mo e mafai ʻo ʻeku kau tamaioʻeikí, pea mo ʻeku talamuʻaki ki he tohi ʻo ʻeku ngaahi fekaú, ʻa ia kuó u ʻoange kiate kinautolu ke pulusi ʻo ʻoatu kiate kimoutolu, ʻe kakai ʻo e māmaní.

7 Ko ia, ke manavahē pea tetetete, ʻa kimoutolu ʻa e kakaí, he ko au ko e ʻEikí ko e meʻa kuó u tuʻutuʻuni kiate kinautolú ʻe fakahoko ia.

8 Pea ko e moʻoni ʻoku ou pehē kiate kimoutolu, ko kinautolu ʻoku ʻalu atu, ʻo ʻave ʻa e ngaahi ongoongó ni ki he kakai ʻo e māmaní, ʻoku foaki kiate kinautolu ʻa e mālohi ke fakamaʻu ʻi he māmaní pea ʻi he langí fakatouʻosi, ʻa e kau taʻetuí mo e kau angatuʻú;

9 ʻIo, ko e moʻoni, ke fakamaʻu ʻa kinautolu ki he ʻaho ʻa ia ʻe lilingi hifo ai ʻa e houhau ʻo e ʻOtuá ki he kau fai angahalá ʻo taʻe-fakangatangata—

10 ʻO aʻu ki he ʻaho ʻa ia ʻe hāʻele mai ai ʻa e ʻEikí ke totongi ki he tangata taki taha ʻo fakatatau ki heʻene ngāué, pea fakamaau ki he tangata taki taha ʻo fakatatau ki he fakamaau kuó ne fakamāuʻi ʻaki ʻa hono kāingá.

11 Ko ia ko e leʻo ʻo e ʻEikí ʻoku fai ia ki he ngaahi ngataʻanga ʻo e māmaní, koeʻuhí ko kinautolu ʻe fanongó ke nau lava ʻo fanongo:

12 Mou teuteu, mou teuteu ki he meʻa ʻe hoko maí, he ʻoku ofi mai ʻa e ʻEikí;

13 Pea kuo tupu hake ʻa e houhau ʻo e ʻEikí, pea kuo unu ʻa ʻene heletaá ʻi he langi, pea ʻe tō hifo ia ki he kakai ʻo e māmaní.

14 Pea ʻe fakahā ʻa e toʻukupu ʻo e ʻEikí; pea ʻe hoko mai ʻa e ʻaho ko kinautolu ʻe ʻikai fanongo ki he leʻo ʻo e ʻEikí, pe ko e leʻo ʻo ʻene kau tamaioʻeikí, pe ʻikai tokanga ki he ngaahi lea ʻa e kau palōfitá mo e kau ʻaposetoló, ʻe motuhi atu ʻa kinautolu mei he kakaí;

15 He kuo nau liʻaki ʻa ʻeku ngaahi ouaú mo maumauʻi ʻeku fuakava taʻengatá;

16 ʻOku ʻikai te nau kumi ki he ʻEikí ke fokotuʻu ʻene māʻoniʻoní, ka ʻoku ʻaʻeva ʻa e tangata taki taha ʻi hono hala pē ʻoʻona, pea fakatatau ki he tatau ʻo hono ʻotua ʻoʻoná, ʻa ia ko hono tataú ʻoku hangē ko e māmaní, ʻa ia ʻoku ʻi he tatau ʻo ha tamapua, ʻa ia ʻoku fakaʻau ʻo motuʻa pea ʻe ʻauha ia ʻi Pāpilone, ʻio ʻa Pāpilone ko e lahí, ʻa ia ʻe tō.

17 Ko ia, ko au ko e ʻEikí, ʻi heʻeku ʻiloʻi ʻa e fakatuʻutāmaki ʻa ia ʻe hoko mai ki he kakai ʻo e māmaní, naʻá ku ui ai ki heʻeku tamaioʻeiki ko Siosefa Sāmita, ko e Siʻí, peá u lea kiate ia mei langi, mo fai kiate ia ʻa e ngaahi fekau;

18 Pea fai foki mo e ngaahi fekau ki ha niʻihi kehe, koeʻuhí ke nau fakahā atu ʻa e ngaahi meʻá ni ki he māmaní; peá u fai ʻeni kotoa, koeʻuhí ke lava ʻo fakahoko, ʻa ia kuo tohi ʻe he kau palōfitá—

19 ʻE ō mai ʻa e ngaahi meʻa vaivai ʻo e māmaní ʻo holoki hifo ʻa e kau māfimafí mo e kau mālohí, koeʻuhí ke ʻoua naʻa akonakiʻi ʻe he tangatá ʻa hono kāingá, pe falala ki he nima ʻo e kakanó—

20 Kae kehe ke lava ʻa e tangata taki taha ʻo lea ʻi he huafa ʻo e ʻOtua ko e ʻEikí, ʻio ko e Fakamoʻui ʻo e māmaní;

21 Koeʻuhí foki ke lava ʻa e tuí ʻo tupulaki ʻi he māmaní;

22 Koeʻuhí ke lava ʻeku fuakava taʻengatá ʻo fokotuʻu;

23 Koeʻuhí ke lava ʻo malanga ʻaki hono kakato ʻo ʻeku ongoongoleleí ʻe he kau vaivaí mo e kau māʻulaló ki he ngaahi ngataʻanga ʻo e māmaní, pea ʻi he ʻao ʻo e ngaahi tuʻí mo e kau pulé.

24 Vakai, ko e ʻOtuá au pea kuó u lea ʻaki ia; ko e ngaahi fekau ko ʻení ʻoku meiate au ia, pea naʻe ʻoange ia ki heʻeku kau tamaioʻeikí ʻi heʻenau vaivaí, ʻo fakatatau mo ʻenau leá, koeʻuhí ke mahino ia kiate kinautolu.

25 Pea fakatatau ki heʻenau fehalākí, ʻe lava ʻo fakahā ia kiate kinautolu;

26 Pea fakatatau ki heʻenau kumi ki he potó ʻe lava ʻo akonakiʻi ʻa kinautolu;

27 Pea fakatatau ki heʻenau fai angahalá ʻe lava ʻo valokiʻi ʻa kinautolu, koeʻuhí ke nau lava ʻo fakatomala;

28 Pea fakatatau ki heʻenau loto-fakatōkilaló ʻe lava ʻo ngaohi ʻa kinautolu ke mālohi, pea tāpuekina mei ʻolunga, pea maʻu ʻa e potó mei he taimi ki he taimi.

29 Pea hili ʻene maʻu ʻa e lekooti ʻo e kau Nīfaí, ʻio, ʻa ʻeku tamaioʻeiki ko Siosefa Sāmita, ko e Siʻí, ke ne maʻu ʻa e mālohi ke liliu ʻi he ʻaloʻofa ʻa e ʻOtuá, ʻi he mālohi ʻo e ʻOtuá, ʻa e Tohi ʻa Molomoná.

30 Kae ʻumaʻā mo kinautolu foki naʻe tuku ki ai ʻa e ngaahi fekau ko ʻení, ke nau maʻu ʻa e mālohi ke fokotuʻu ʻa e tuʻunga ʻo e siasi ko ʻení, pea ʻomi ia mei he kakapú, pea mei he fakapoʻulí, ko e siasi moʻoni mo moʻui pē taha ʻi he funga ʻo e māmaní kotoa, ʻa ia ko au, ko e ʻEikí, ʻoku ou leleiʻia aí, ʻa ia ko e lea ki he siasí fakakātoa kae ʻikai ki he tangata fakafoʻituituí—

31 He ko au ko e ʻEikí ʻoku ʻikai te u lava ke mamata ki he angahalá ʻo momoʻi fakaʻatuʻi ia;

32 Ka neongo iá, ʻilonga ia ʻoku fakatomala pea fai ki he ngaahi fekau ʻa e ʻEikí ʻe fakamolemoleʻi ia;

33 Pea ko ia ia ʻoku ʻikai fakatomalá, ʻe toʻo meiate ia ʻa e maama ko ia ʻa ia kuó ne maʻú; koeʻuhí ʻe ʻikai fāinga maʻu ai pē ʻa hoku Laumālié ke ueʻi hake ʻa e tangatá, ʻoku folofola ʻe he ʻEiki ʻo e Ngaahi Kau Taú.

34 Pea ko e taha, ko e moʻoni ʻoku ou pehē kiate kimoutolu, ʻe kakai ʻo e māmaní: Ko au ko e ʻEikí, ʻoku ou loto-fiemālie ke fakahā ʻa e ngaahi meʻá ni ki he kakano kotoa pē;

35 He ʻoku ʻikai te u filifilimānako ki he kakaí, pea ʻoku ou loto ke ʻiloʻi ʻe he kakai kotoa pē ʻoku vave mai ʻa e ʻahó; ʻoku teʻeki ai hoko ʻa e houá, ka ʻoku ofi mai ia, ʻa ia ʻe toʻo atu ai ʻa e melinó mei he māmaní, pea ʻe maʻu ʻe he tēvoló ʻa e mālohi ki hono puleʻanga ʻoʻoná.

36 Pea ʻe maʻu foki ʻe he ʻEikí ʻa e mālohi ki hono kakai māʻoniʻoní, pea te ne pule ʻi honau lotolotongá, pea te ne ʻalu hifo ʻi he tautea ki ʻAitumia, pe ko māmani.

37 Fakatotolo ʻi he ngaahi fekau ko ʻení, he ʻoku moʻoni mo totonu ia, pea ko e ngaahi kikite mo e ngaahi talaʻofa ʻoku ʻi aí ʻe fakamoʻoniʻi hono kotoa.

38 ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia, pea ʻoku ʻikai te u tuli tonuhia; pea neongo ʻe mole atu ʻa e ngaahi langí mo e māmaní, ka ʻe ʻikai mole atu ʻa ʻeku leá, ka ʻe fakamoʻoniʻi hono kotoa, neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.

39 He vakai, pea tā, ko e ʻEikí ko e ʻOtuá ia, pea ʻoku fakamoʻoniʻi ʻe he Laumālié, pea ʻoku moʻoni ʻa e fakamoʻoní, pea ʻoku tuʻu ʻa e moʻoní ʻo taʻengata pea taʻengata. ʻĒmeni.