Vahe 119
Ko e fakahā naʻe fai mai ʻia Siosefa Sāmita ko e Palōfitá, ʻi Hihifo Mamaʻo, ʻi Mīsuli, ʻi he ʻaho 8 Siulai, 1838, ko e tali ki heʻene tautapa: “ʻE ʻEiki! Fakahā muʻa ki hoʻo kau tamaioʻeikí ʻa e lahi ʻokú ke finangalo ki ai mei he koloa ʻa ho kakaí ke hoko ko e vahehongofulú.” Naʻe teʻeki fakahā mai ki he Siasí ki muʻa ʻi he fakahā ko ʻení ʻa e fono ʻo e vahehongofulú ʻo hangē ko ʻene mahino ʻi he ʻaho ní. Ko e foʻi lea ko ia ko e vahehongofulu naʻe ngāue ʻaki ʻi he lotú pea ʻi he ngaahi fakahā ki muʻá (64:23; 85:3; 97:11) naʻe ʻikai ke ʻuhinga ia ki he vahehongofulu pē ʻe taha, ka ko e ngaahi foaki tauʻatāina kotoa pē, pe ko e ngaahi foaki ʻofa, ki he paʻanga ʻa e Siasí. Naʻe maʻu ʻa e fakahā ko ʻení hili e fepaki ʻa e Kāingalotú mo ha ngaahi faingataʻa fakapaʻanga ʻi Mīsuli mo ʻOhaiō ko e tupu mei hono langa ʻo e Temipale Ketilaní; ngaahi fakatanga ʻi he Vahefonua Siakisoní, Mīsuli; mo ha tō lalo fakapaʻanga fakafonua. Naʻe kei hokohoko atu foki ʻa e Kāingalotú ke langa hake ʻa e tūkuikolo ʻi Mīsulí.
1–5, ʻOku totonu ke totongi ʻe he kau Māʻoniʻoní ʻa ʻenau koloa hulú pea nau toki foaki leva ʻa e vahehongofulu ʻe taha ʻo e tupu ʻo ʻenau koloá ʻi he taʻú ko e vahehongofulu; 6–7, ʻE hanga ʻe heʻenau fai peheé ʻo fakamāʻoniʻoniʻi ʻa e fonua ko Saioné.
1 Ko e moʻoni, ʻoku folofola peheni ʻe he ʻEikí, ʻoku ou fie maʻu ʻa ʻenau koloa hulu kotoa pē ke ʻoatu ia ki he nima ʻo e pīsope ʻo hoku siasí ʻi Saioné,
2 Ki hono langa hake ʻo hoku falé, pea ki hono ʻai ʻo e tuʻunga ʻo Saioné pea ki he lakanga fakataulaʻeikí, pea ki he ngaahi moʻua ʻo e Kau Palesitenisī ʻo hoku Siasí.
3 Pea ʻe hoko ʻeni ko e kamataʻanga ʻo hono fakavahehongofuluʻi ʻo hoku kakaí.
4 Pea ka hili iá, ko kinautolu kuo fakavahehongofuluʻi peheʻí te nau totongi ʻa e vahehongofulu ʻe taha ʻo e tupu kotoa pē ʻi he taʻu taki taha; pea ʻe hoko ʻeni ko ha fono tuʻu maʻu kiate kinautolu ʻo taʻengata, ki hoku lakanga fakataulaʻeiki toputapú, ʻoku folofola ʻe he ʻEikí.
5 Ko e moʻoni ʻoku ou pehē kiate kimoutolu, ʻe hoko ʻo pehē ko kinautolu kotoa pē ʻe tānaki ki he fonua ko Saioné ʻe fakavahehongofuluʻi ʻa kinautolu ʻi he hulu ʻo ʻenau ngaahi koloá pea te nau tauhi ʻa e fono ko ʻení, pe ʻe ʻikai lau ʻa kinautolu ʻoku nau feʻunga ke nofo ʻi homou lotolotongá.
6 Pea ʻoku ou pehē kiate kimoutolu, kapau ʻe ʻikai ke tauhi ʻe hoku kakaí ʻa e fono ko ʻení, ke tauhi ia ke māʻoniʻoni, pea fakamāʻoniʻoniʻi ʻi he fonó ni ʻa e fonua ko Saioné kiate au, koeʻuhi ke tauhi ʻi ai ʻa ʻeku ngaahi tuʻutuʻuní mo ʻeku ngaahi fakamāú, koeʻuhí ke fungani māʻoniʻoni ia, vakai, ko e moʻoni ʻoku ou pehē kiate kimoutolu, ʻe ʻikai hoko ia ko ha fonua ʻo Saione kiate kimoutolu.
7 Pea ʻe hoko ʻeni ko e sīpinga ki he ngaahi siteiki kotoa pē ʻo Saioné. ʻE pehē. ʻĒmeni.