Ngaahi Folofola
Tokāteline mo e Ngaahi Fuakava 94
kimuʻa hoko

Vahe 94

Ko e fakahā naʻe fai mai ʻia Siosefa Sāmita ko e Palōfitá, ʻi Ketilani. ʻi ʻOhaiō, ʻi he ʻaho 6 Mē 1833 (History of the Church, 1:346–347). ʻOku fili ʻa Hailame Sāmita, Leinolitisi Kahuni, mo Sēleti Kaata ke nau hoko ko ha kōmiti langa ʻa e Siasí.

1–9, ʻOku fai mai ʻe he ʻEikí ha fekau ʻo fekauʻaki mo hono langa ha fale ki he ngāue ʻa e Kau Palesitení; 10–12, ʻE langa ha fale paaki tohi; 13–17, ʻOku vahe ha ngaahi tofiʻa ʻe niʻihi.

1 Pea ko e tahá, ko e moʻoni ʻoku ou pehē kiate kimoutolu, ʻe hoku ngaahi akaumeʻa, ʻoku ou fai ha fekau kiate kimoutolu, ke mou kamata ha ngāue ʻa ia ko hono palani mo teuteuʻi ha kamataʻanga mo e tuʻunga ki he kolo ʻo e bsiteiki ʻo Saioné, ʻi heni ʻi he fonua ko Ketilaní, ʻo kamata ʻi hoku falé.

2 Pea vakai, kuo pau ke fai ia ʻo fakatatau ki he asīpinga kuó u ʻoatu kiate kimoutolú.

3 Pea tuku ke fakatapui ʻa e ʻuluaki konga kelekele ʻi he feituʻu tongá kiate au ki hono langa ʻo ha fale ki he kau palesitení, ke fai ʻa e ngāue ʻa e kau palesitení, ʻi hono maʻu ʻo e ngaahi fakahā; pea ki he ngāue fakafaifekau ʻa e kau apalesitení, ʻi he ngaahi meʻa kotoa pē ʻoku kau ki he siasí pea mo e puleʻangá.

4 Ko e moʻoni ʻoku ou pehē kiate kimoutolu, ʻe langa ia ʻo fute ʻe nimangofulu mā nima hono maokupú pea fute ʻe onongofulu mā nima hono lōloá, ʻi he lotoʻā ʻi lotó.

5 Pea ʻe ʻi ai ha lotoʻā ʻi lalo hifo pea mo ha lotoʻā ʻi ʻolunga hake, ʻo fakatatau ki he sīpinga ʻa ia ʻe ʻoatu kiate kimoutolu ʻamuí.

6 Pea ʻe fakatapui ia ki he ʻEikí mei hono tuʻunga ʻo iá, ʻo fakatatau ki he lakanga ʻo e lakanga fakataulaʻeikí, ʻo fakatatau ki he sīpinga ʻa ia ʻe ʻoatu kiate kimoutolu ʻamuí.

7 Pea ʻe fakatapui hono kotoa ki he ʻEikí ki he ngāue ʻa e kau palesitení.

8 Pea ʻe ʻikai te mou tuku ha meʻa ataʻemaʻa ke hū ki ai; pea ʻe ʻi ai ʻa hoku bnāunaú, pea ʻe ʻi ai ʻa hoku lotolotongá.

9 Ka ʻo kapau ʻe hū ki ai ha meʻa ataʻemaʻa, ʻe ʻikai ke ʻi ai ʻa hoku nāunaú; pea ʻe ʻikai hū ki ai ʻa hoku lotolotongá.

10 Pea ko e tahá, ko e moʻoni ʻoku ou pehē kiate kimoutolu, ʻe fakatapui maʻaku ʻa e konga kelekele hono ua ʻi he feituʻu tongá ke langa ai ha fale kiate au, ki he ngāue ʻo e apaaki ʻo hono bliliu ʻo ʻeku ngaahi folofolá, pea mo e ngaahi meʻa kotoa pē te u fekau kiate kimoutolú.

11 Pea ʻe fute ʻe nimangofulu mā nima hono maokupú pea fute ʻe onongofulu mā nima hono lōloá, ʻi he lotoʻā ʻi lotó; pea ʻe ʻi ai ha lotoʻā ʻi lalo hifo pea mo ha lotoʻā ʻi ʻolunga hake.

12 Pea ʻe fakatapui ʻa hono kotoa ʻo e falé ni ki he ʻEikí mei hono tuʻunga ʻo iá, ki he ngāue ʻo e paaki tohi, ʻi he ngaahi meʻa kotoa pē te u fekau kiate kimoutolú, ke toputapu, mo taʻeʻuliʻi, ʻo fakatatau ki he sīpinga ʻi he ngaahi meʻa kotoa pē ʻo hangē ko e meʻa ʻe ʻoatu kiate kimoutolú.

13 Pea ʻe maʻu ʻa e konga kelekele hono tolú ʻe heʻeku tamaioʻeiki ko Hailame Sāmitá ko hono tofiʻa.

14 Pea ʻe maʻu ʻa e konga kelekele hono uá mo hono tolú ʻi he feituʻu tokelaú ʻe heʻeku ongo tamaioʻeiki ko Leinolitisi Kahuní mo Sēleti Kātá ko hona tofiʻa—

15 Koeʻuhí ke na lava ʻo fai ʻa e ngāue ʻa ia kuó u tuʻutuʻuni kiate kinauá, ke hoko ko ha kōmiti ke langa hake hoku ngaahi falé, ʻo fakatatau ki he fekau, ʻa ia ko au, ko e ʻEiki ko e ʻOtuá, kuó u fai kiate kimoutolú.

16 ʻE ʻikai ke langa ʻa e ongo fale ko ʻení ʻe uá kae ʻoua ke u fai atu ha fekau kiate kimoutolu ʻo kau ki ai.

17 Pea ko ʻeni ʻoku ʻikai te u toe ʻoatu kiate kimoutolu mo ha meʻa ʻi he taimí ni. ʻĒmeni.