1 Kuckt, lauschtert op d’Stëmm vun deem, deen all Muecht huet, dee vun Onendlechkeet zu Onendlechkeet, jo, Alpha an Omega ass, den Ufank an d’Enn.

2 Kuckt, wierklech, sou seet den Här zu iech, o dir Eelster vu menger Kierch, déi dir hei versammelt sidd: är Sënde sinn iech elo verzien, well ech, den Här, verzeie Sënden a si baarmhäerzeg zu deenen, déi hir Sënde mat bescheidenem Häerz bekennen.

3 Awer wierklech, ech soen iech: et ass net néideg, datt dëst ganzt Departement vu mengen Eelsten sech schnell um Waasser fortbeweegt, wärend d’Bewunner zu béid Säiten an Onglawen ënner ginn.

4 Mee hunn ech et zougelooss, fir datt dir Temoignage kënnt ginn; kuckt, et gi vill Geforen um Waasser, a besonnesch vun elo un.

5 Well ech, den Här, hunn a menger Roserei vill Zerstéierung um Waasser beschloss, jo, a besonnesch op dësem Waasser.

6 Mee ass alles Fleesch a menger Hand, a wien ënnert iech trei ass, dee wäert net duerch d’Waasser ëmkommen.

7 Dofir ass et ze beroden, datt mäi Kniecht Sidney Gilbert a mäi Kniecht William W. Phelps sech schnell un hiren Optrag, an un hir Missioun maachen.

8 Mee wollt ech net zouloossen, datt dir ausernee gitt, bevir dir fir all är Sënde bestrooft sidd, op datt dir eent wiert, op datt dir net an der Béist ëmkommt.

9 Awer elo, wierklech, ech soen: Mir erschéngt et ubruecht, datt dir ausernee gitt. Dofir solle meng Kniechte Sidney Gilbert a William W. Phelps hir fréiert Departement sammelen, a si sollen sech schnell op de Wee maachen, fir hir Missioun ze erfëllen; an duerch de Glawe wäerten si iwwerwannen.

10 A wann si trei sinn, wäerten si beschützt ginn, an ech, den Här, wäert mat hinne sinn.

11 An déi iwwreg solle mathuelen, wat si u Kleedung brauchen.

12 Loosst mäi Kniecht Sidney Gilbert dat mathuelen, wat net gebraucht gëtt—wéi dir iech dorobber eenegt.

13 An elo, kuckt, zu ärem Notzen hunn ech iech heiriwwer ee Gebot ginn, an ech, den Här, wëll mat iech doriwwer schwätze wéi mat de Männer an aler Zäit.

14 Kuckt, um Ufank hunn ech, den Här, d’Waasser geséint; awer an de leschten Deeg hunn ech d’Waasser duerch de Mond vu mengem Kniecht Johannes verflucht.

15 Dofir wäerten d’Deeg kommen, wou um Waasser kee Fleesch sécher wäert sinn.

16 An an zukünftegen Deeg wäert ee soen, datt keen amstand wäert sinn, iwwert d’Waasser an d’Land Zion ze kommen, wéi nëmmen deen, deen am Häerz reng ass.

17 An sou wéi ech, den Här, am Ufank d’Land verflucht hunn, sou hunn ech et an de leschten Deeg, zu senger Zäit, zum Gebrauch vu mengen Hellege geséint, datt si um Rendement vum Land géifen deelhuelen.

18 An elo ginn ech iech d’Gebot—a wat ech zu engem soen, dat soen ech zu allen—datt dir är Bridder a Bezuch op d’Waasser warnt, fir datt si net um Waasserwee ureesen an hire Glawen si verléisst an si a Schlénge geroden.

19 Ech, den Här, hunn et dekretéiert, an den Zerstéierer fiert um Waasser laanscht, an ech zéien den Dekreet net zeréck.

20 Ech, den Här, war gëschter rosen iwwert iech, mee haut ass meng Roserei ofgewannt.

21 Dofir sollen déijéineg, vun deenen ech gesot hunn, si sollen sech schnell op de Wee maachen—nach eng Kéier soen ech: Si sollen sech schnell op de Wee maachen.

22 A wann si no enger gewëssener Zäit hir Missioun erfëllen, sou mécht et mir näischt aus, ob si iwwer d’Waasser oder iwwer d’Land reesen; dat soll sinn, wéi et hinne vun elo un no hirem eegenen Urteel gewise wäert ginn.

23 An elo, wat meng Kniechte Sidney Rigdon, Joseph Smith Jr. an Oliver Cowdery betrëfft: Si sollen, wann si hir Heemrees untrieden, sech net erëm op d’Waasser beginn, et sief dann de Kanal; oder, mat anere Wierder, si sollen net um Waasser reesen, ausser iwwert de Kanal.

24 Kuckt, ech, den Här, hunn ee Wee fir d’Reese vu mengen Helleger bestëmmt, a kuckt, dëst ass de Wee: Nodeems si de Kanal verloossen, sollen si iwwer d’Land reesen, souwäit et hinne kommandéiert ass, ze reesen an an d’Land Zion ze kommen;

25 a si sollen et de Kanner vun Israel gläich maachen an ënnerwee hir Zelter opbauen.

26 A kuckt, dëst Gebot sollt dir all äre Bridder ginn.

27 Mee wiem d’Muecht ginn ass, d’Waasser ze kommandéieren, deem ass et duerch de Geescht ginn, all seng Weeër ze wëssen;

28 dofir soll hie maachen, wat de Geescht vum liewege Gott him kommandéiert, sief et um Land oder um Waasser, wéi et mir iwwerlooss bleift, vun elo un ze maachen.

29 An iech ass d’Richtung fir d’Helleger ginn, nämlech de Wee, deen d’Helleger zum Lager vum Här aschloe sollen

30 A weider, wierklech, ech soen iech: Meng Kniechte Sidney Rigdon, Joseph Smith Jr. an Oliver Cowdery sollen an de Kongregatioune vun de Béisen hire Mond net opmaachen, bis si zu Cincinnati ukommen;

31 an do sollen si d’Stëmm géint dëst Vollek zu Gott hiewen, jo, zu him, deem seng Roserei géint hir Béist entflaamt ass—dëst Vollek, dat bal räif ass fir d’Vernichtung.

32 A vun do sollen si sech zu de Kongregatioune vun hire Bridder begoen, well schonn elo ass hir Aarbecht ënnert deene méi néideg wéi an de Kongregatioune vun de Béisen.

33 An elo, wat déi iwwreg betrëfft: Loosst si reesen an an de Kongregatioune vun de Béisen d’Wuert verkënnegen, souwäit et gi ginn ass;

34 a wann si dat maachen, wäerten si hir Kleeder propper maachen an ouni Flecke viru mir sinn.

35 An si sollen zesumme reesen oder zwee an zwee, wéi et hinne gutt schéngt; nëmme mäi Kniecht Reynolds Cahoon a mäi Kniecht Samuel H. Smith, un deenen ech Wuelgefalen hunn, sollen net getrennt ginn, bis si heem zeréckkomm sinn, an dëst aus enger weisen Absicht, déi ech hunn.

36 An elo, wierklech, ech soen iech—a wat ech engem soen, dat soen ech zu allen—sidd gudder Laun, kleng Kanner, well ech si matzen ënnert iech, an ech hunn iech net verlooss.

37 A wou dir iech viru mir humiliéiert hutt, sinn d’Seenunge Gottes är.

38 Maacht iech prett, a passt op, a sidd seriö; kuckt aus nom Komme vum Jong vum Mënsch; well hie kënnt zu enger Stonn, wou dir et net denkt.

39 Biet ëmmer, dat dir net a Versuchung gerot, datt dir den Dag vu sengem Kommen aushale kënnt, sief et am Liewen oder am Dout. Jo. Amen.