Sektioun 55
Offenbarung, ginn duerch de Prophet Joseph Smith un de William W. Phelps zu Kirtland, Ohio, de 14. Juni 1831. De William W. Phelps, en Drécker, a seng Famill ware grad zu Kirtland ukomm, an de Prophet huet den Här ëm Informatiounen iwwert hie gefrot.
1–3, De William W. Phelps gëtt beruff a gewielt fir gedeeft ze ginn, zum Eelste geweit ze ginn an d’Evangelium ze priedegen; 4, Hie soll och Bicher fir Kanner a Kiercheschoule schreiwen; 5–6,Hie soll op Missouri reesen, wat d’Gebitt vu senger Aarbecht wäert sinn.
1 Kuck, sou seet den Här zu dir, mäi Kniecht William, jo, den Här vun der ganzer Äerd: Du bass beruff a gewielt; a wann s du mat Waasser gedeeft wäerts sinn—an dës méchs, d’A nëmmen op meng Herrlechkeet geriicht, wäerten dir d’Sënde verzie ginn, an du wäerts den Hellege Geescht duerch Hännopleeën empfänken;
2 da solls du vu mengem Kniecht Joseph Smith Jr. zu engem Eelsten an der Kierch ordinéiert ginn, fir datt s du Ëmkéiert a Verzeie vu Sënde mëttels der Daf am Numm vum Jesus Christus, dem Jong vum liewege Gott, priedege kanns.
3 A wann s du engem d’Hänn oplees a wann hie viru mir bedauert, sou wäerts du d’Muecht hunn, him den Hellege Geescht ze spenden.
4 A weider, du solls ordinéiert ginn, mengem Kniecht Oliver Cowdery beim Impriméieren a bei der Auswiel a beim Schreiwe vu Bicher fir d’Schoulen an der Kierch behëlleflech ze sinn, fir datt och déi kleng Kanner Uweisung viru mir kréien, wéi et mir agreabel ass.
5 A weider, wierklech, ech soen dir: Wéinst dëser Saach solls du dech mat menge Kniechte Joseph Smith Jr. an Oliver Cowdery op de Wee maachen, fir datt s du dech am Land vun denger Ierfschaft nidderloosse kanns, fir dës Aarbecht maachen ze kënnen.
6 A weider: Mäi Kniecht Joseph Coe soll sech mat hinnen op de Wee maachen. Dat iwwregt wäert spéider nach gewise ginn, jo, wéi ech et wëll. Amen.