Sektioun 27
Offenbarung, ginn un de Prophet Joseph Smith zu Harmonie a Pennsylvanien, am August 1830. Bei der Virbereedung vun engem Gottesdéngscht, bei deem de Sakrament vu Brout a Wäin, gereecht sollt ginn, mécht sech de Joseph Smith op de Wee, fir zu dësem Ulooss Wäin ze beschafen. Ënnerwee ass him een Engel vum Himmel erschéngt, an de Joseph Smith huet dës Offenbarung empfaangen, wouvunner déi éischt véier Versen deemools, déi iwwreg awer am September drop niddergeschriwwe goufen. Waasser gëtt elo amplaz vu Wäin an de sakramentalen Déngschter vun der Kierch benotzt.
1–4, D’Embleemer, déi beim Sakrament deelhuele sollen, gi festgeluecht; 5–14, De Christus a Seng Dénger aus allen Zäite sollen um Sakrament deelhuelen; 15–18, Do déi ganz Rüstung vu Gott un.
1 Lauschter der Stëmm vum Jesus Christus no, dengem Här, dengem Gott an Erléiser, deem säi Wuert lieweg a kräfteg ass.
2 Well kuckt, ech soen iech: Et kënnt net dorobber un, wat dir iesst a wat dir drénkt, wann dir vum Sakrament huelt, souwäit dir et maacht, d’A nëmmen op meng Herrlechkeet geriicht, an—virum Papp—u mäi Leif denkt, dee fir iech niddergeluecht gouf, souwéi u mäi Blutt, dat fir d’Verzeie vun äre Sënde vergoss gouf.
3 Dofir ginn ech iech d’Gebot, vun äre Feinde weder Wäin nach staarkt Gedrénks ze kafen;
4 dofir sollt dir vu kengem Wäin drénken, ausser e wier vun iech nei preparéiert, jo, an dësem mengem Papp sengem Räich, dat op Äerden opgeriicht soll ginn.
5 Kuckt, dëst ass no menger Weisheet; dofir wonnert iech net, well d’Stonn kënnt, wou ech vun der Fruucht vum Wäistack mat iech op der Äerd drénke wäert, och mam Moroni, deen ech iech geschéckt hunn, fir iech d’Buch vum Mormon mat der Fëllt vu mengem éiwegen Evangelium ze offenbaren, an deem ech d’Schlëssele vum Bericht vum Efraim sengem Holz iwwerdroen hunn;
6 an och mam Elias, deem ech d’Schlëssele vun der Restauratioun vun all deem iwwerdroen hunn, wouvunner duerch de Mond vun allen hellege Prophete vum Ufank vun der Welt un a Bezuch op déi lescht Deeg gesprach ginn ass;
7 an och mam Johannes, dem Jong vum Zacharias, deen Zacharias, deen hien (den Elias) besicht huet an deem hien d’Versprieche ginn huet, hie wäert ee Jong kréien, deem säin Numm Johannes soll sinn an dee vum Elias sengem Geescht erfëllt wäert sinn;
8 dëse Johannes hunn ech zu iech, meng Kniechte Joseph Smith Jr. an Oliver Cowdery, geschéckt, datt hien iech zum éischte Priistertum ordinéiert, dat dir empfaangen hutt, fir datt dir beruff an ordinéiert wiert wéi den Aaron;
9 an och mam Elijah, deem ech d’Schlëssele vun der Muecht iwwerdroen hunn, d’Häerz vun de Pappen de Kanner an d’Häerz vun de Kanner de Pappen zouzewennen, fir datt net déi ganz Äerd mat engem Fluch geschloe géif;
10 an och mam Joseph a mam Jakob a mam Isaak a mam Abraham, äre Pappen, duerch déi d’Versprieche weider bestoen;
11 an och mam Michael oder Adam, dem Papp vun allen, dem Prënz vun allen, den Uralen;
12 An och mam Péitruss a mam Jakobus a mam Johannes, déi ech zu iech geschéckt hunn, duerch déi ech iech zu Apostelen an als souer bestätegt hunn, fir datt dir besonnesch Zeie vu mengem Numm wiert an d’Schlëssele vun ärem geeschtlechen Déngscht an all deem haalt, wat ech och hinne reveléiert hunn,
13 an deenen ech d’Schlëssele vu mengem Räich an enger Dispensatioun vum Evangelium fir déi lescht Zäit iwwerdroen hunn a fir d’Fëllt vun den Zäiten, wou ech alles an eent zesummefaasse wëll, souwuel wat am Himmel wéi och wat op Äerden ass;
14 an och mat all deenen, déi mir mäi Papp vun der Welt ginn huet.
15 Dofir hieft d’Häerz héich a freet iech, a maacht iech prett, an dot meng Wafferëschtung un, fir datt dir dem béisen Dag widderstoe kënnt an, nodeems dir alles gemaach hutt, amstand sidd ze stoen.
16 Dofir stitt, un der Hëft mat Wourecht, gemaach mam Broschtpanzer vun der Gerechtegkeet, d’Féiss beschungt mat der Virbereedung vum Friddensevangelium, dat iech ze iwwerdroen ech meng Engele geschéckt hunn.
17 Ergräift de Schëld vum Glawen, mat deem dir all feireg Feiler vun de Béisen ausläsche kënnt,
18 an huelt den Helm vun der Erléisung an d’Schwäert vu mengem Geescht, deen ech iwwert iech ausgéisse wäert, a mäi Wuert, dat ech iech offenbaren; sidd iech eeneg an allem, wat och ëmmer dir vu mir biet, a sidd trei, bis ech kommen; da wäert dir opgefaange ginn, sou datt do, wou ech sinn, och dir wäert sinn. Amen.