Sezzjoni 62
Rivelazzjoni mogħtija permezz ta’ Joseph Smith il‑Profeta, max‑xatt tax‑Xmara Missouri, f’Chariton, Missouri, nhar it‑13 ta’ Awwissu, 1831. F’dan il‑jum, il‑Profeta u dawk li kienu miegħu, li kienu fi triqithom minn Independence għal Kirtland, iltaqgħu ma’ diversi presbiteri li kienu fi triqithom lejn l‑art ta’ Sijon, u wara li sellmu lil xulxin b’ferħ, irċevew din ir‑rivelazzjoni.
1–3, It‑testimonjanzi huma ddokumentati fis‑smewwiet; 4–9, Il‑presbiteri għandhom jitilqu għal għonq it‑triq u jmorru jxandru skont il‑ġudizzju tagħhom u kif jiġu mmexxija mill‑Ispirtu.
1 Araw, u agħtu widen, O presbiteri tal‑knisja tiegħi, jgħid il‑Mulej Alla tagħkom, l‑istess Ġesù Kristu, l‑avukat tagħkom, li jaf id‑dgħufija tal‑bniedem u jaf kif jgħin lil dawk li huma fit‑tiġrib.
2 U tassew li għajnejja jinsabu fuq dawk li sa issa għadhom ma telgħux lejn l‑art ta’ Sijon; għalhekk il‑missjoni tagħkom għadha mhux kompluta.
3 Madankollu, henjin intom, għax it‑testimonjanza li intom tajtu hija ddokumentata fis‑smewwiet biex jifluha l‑anġli; u huma jifirħu minħabba fikom, u dnubietkom ikunu maħfura.
4 U issa komplu fi triqtkom. Morru nġabru flimkien fl‑art ta’ Sijon; u agħmlu laqgħa biex flimkien tifirħu, u offru s‑sagrament lil Alla l‑Għoli.
5 U mbagħad tistgħu terġgħu lura biex taqsmu x‑xhieda tagħkom, iva, jew ilkoll flimkien jew tnejn tnejn, kif tħossu li hu l‑aħjar, għalija xorta; araw biss li tibqgħu fidili, u xxandru l‑bxara t‑tajba lil dawk li jgħammru fuq l‑art, jew fost il‑kongregazzjonijiet tal‑ħżiena.
6 Araw, jien, il‑Mulej, ġbartkom flimkien biex tkun tista’ tiġi fis‑seħħ il‑wegħda, li l‑fidili fostkom għandhom jiġu mħarsa u għandhom jithennew flimkien fl‑art ta’ Missouri. Jien, il‑Mulej, nagħmel wegħda mal‑fidili u jiena ma ngħidx kelma b’oħra.
7 Jien, il‑Mulej, lest, jekk xi ħadd fostkom jixtieq jirkeb iż‑żwiemel, jew il‑bgħula, jew il‑karrijiet, li lilu nagħti din il‑barka, jekk huwa jinsab lest li jirċeviha minn id il‑Mulej b’qalb mimlija gratitudni f’kull ħaġa.
8 Jien se nħalli dawn il‑ħwejjeġ f’idejkom biex intom tagħmlu skont il‑ġudizzju tagħkom u kif tiġu mmexxija mill‑Ispirtu.
9 Araw, is‑saltna f’idejkom. U araw, jiena ninsab dejjem ma’ min hu fidil lejja. Hekk għandu jkun. Ammen.